Ya mo Oni Rengbe ka Raka Wene Raka?

NAIRIWO wai du agi afugo re nirengo! Raka rogo gi zegino re hi kina be “mbusa na irairapai.” Isoke mo aima bakabangiro nga, ‘Ya mo boro rengbe ka raka wene raka awere?’

Nikpiapai, ani bingo gupai du tipa Maria. Ri angia gu boro naadu dedede zaaza, ono awere wa garãri nada 84, ri arengbanga ka guari kporo nisari te. Ri naberã aberã wenengai ono kpotori arengbanga ka manga gupai ri akpinyemu ka mangaha te. Ya mo ri rengbe ka berãha nga ri naraka wene raka?

Na ginipai du tipa ro? Si nawira wa mo aima sana tiro singia mo naraka wene raka. Si nawira wa mo naamanga bangisa sunge dedede, na si rengbe kadu nga si nafu bakere mbugo foro, na si ima kio. Dungu aboro abingo gu sunge mo amangaha na nyanyakipaha te. Ka si vura du nga mo naraka wene raka awere, mo ima rengba kaa bakabangiro tipa ga raka kumbatayo. Ti kura aregbo, mo rengbe kaa bi tiro nga mo nisaro watadu mo na bakere gberarago. Gamo ramukporo na akpakarapai rogoho gbiati wawaru. Singia gu boro mo akpinyemu ní gbe ní ima kpi. Kumba du rimoko nga André aduna wene pagume na bako, kaza aziko ko ki kpi agba kpio. Si adu fu André nikpakarapai, he ho naasako ko du na ngbarago te, na ko aabi tiko nga ko adunga na ngbarago berewe te.

Ka si vurangia gini ngbatunga kpakarapai na arungo ani agbia tirani nani vurũ, pai kinaho si aida ani inipai tipaha nga: Ya mo ani rengbe ka raka wene raka? Ani rengbe ka gbia karagapai kuti gi sanahe re niwisigo ani pai tipa gu kumba naraki auru kpotosende agarã wa 2,000 kusayo nga Yesu Kristo. Zanga bipa agu akpakarapai ko agbiatiko nani, ko aima raka wene raka. Kinawo rengbehe kadu a tipa rani ka ani pekefuo gako kpiapai.