‘Oni Sanahe Tipa he, I ki Fuhe Furoni’

“Gbia, mo raba rani ani kpari.” (Ruka 11:1) Gu kura ga Yesu bawiriki sa naape gipai re fuko. Yesu akaragapai fuko nimangako sunge na akpiapai ue nga gu nayugo wai ka kpara fu Mbori ko ki gi gaani kpee. Kangia mo naabaka bangiro singia Mbori nagia gamo akpee, mo nikadu na ngbarago ka ino ga Yesu karagapai.—Oni gedi Ruka 11:5-13.

Gu bambata kpiapai nafura tipa gu boro nakparakpee. (Ruka 11:5-8) Rogo gu pangbanga re, gino aye fuo kumba yuru ka riahe adunga beko tipa ko fuhe fuko ya. Gi kumba re abihe nga si naida ko mangipai niʹipiʹipihe. Wa si avura du nga yuru du naadu, ko andu fuo bakureako tipa ka ho bete kpakuto beko. Ti tonatonaha, bakureako aaidanga ka guari te mbiko ko gbiati gako aborokporo i aara ara. Ono gi kumba re akpatagara kuti hohe kindi daho ko aguari ni ki fu bete kpakuto fuko.a

Ginipai gi kpiapai re ayugoho furani tipa kparakpee? Yesu nape gupai furani nga si naida ani kpatagara kuti kparakpee, sanahe, gbata he, na kini ngoka ngbadimo angoka kindi. (Ruka 11:9, 10) Tipagine? Ya mo Yesu aaida ka pe gupai nga ho ani akpara ni gure nga ani nangoka gu ngbadimo nga ga dindikodindiko Mbori? Oó. Gupai Yesu aaida ka pehe nga Mbori wa bakurea gu kumba re te, Mbori na nyemu kafu he fu agu aboro nakpara fuko rogo idapase yo. Ani nayugo ngbatunga gu idapase re ho ani akpatagara ni kuti sanako. Ho ani adogoda gaani sanahe ni, gure nayugo gupai nga ani naida guhe re aida nzunzu na ani naa kido nga ko nika fuhe afu furani ka si du nga si nga gupai ko akpinyemuhe.—Marako 11:24; 1 Yoane 5:14.

Gu ue kpiapai nafura tipa “gu ko ninagia kpetambuahe” nga Yekova. (Atambuahe 65:2) Yesu asanahe ki yaa: “Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni? Ka ni sana he tipa parakondo ni ki fu ngerembia fu ni?” Karagapai gbayaga nga, gu baagude du na nyemuse ní arengbanga ka fu gbegberẽhe fu awirini te. Fuani, ko amangisunge na gu kpiapai re ki yaa: Kangia agu abaagude nga kpakpa aboro na “gama wene ahe” agama fu awiriyo, sidu, gu ‘Barani du ngbangbaturũ yo ko susi nagama Ziazia Toro’ nga wene gamahe fu agu awiriko du auru kpotosende nasanako tipaha!b—Ruka 11:11-13; Matayo 7:11.

Gi kpiapai re nayugo ginipai furani tipa Yekova nga “gu ko ninagia kpetambuahe”? Yesu aaida ani bi Yekova wagu baagude du na nyemuse du barambeda tipa ka manga gupai awirini aidaha. Sidu, si aidanga airisi Yekova nigunde ti sanako na agu apai du ngbaduyo yó i aida ko mangihe fuyo te. Na pa ino yó gupai nga ko nga naida wenepai tipa yó, si nasayo i di gu karagapai kugume ko afuhe sa gayo asanahe ka si vura du vurũ nga si amanganga wagu i aidaha te.c