Asanahe Be Agedihe
Ya mo gu bake papara Atambuahe nga Davide aadurugo pai adurugo ho ko ake gupai ni nga ko atambua rimo Mbori “nye anye kindi,” a wa duhe ni kekehe rogo Atambuahe 61:8?
Oó. Gupai Davide akehe adu ni kina ruruhe.
Oni berẽnga kurii gupai ko akehe rogo gu veresi re na rogo agu averesi du wakina ha: “Mi abi bia tambuahe ti rimoro nye anye kindi, wa mi naadigisa gimi akidohe na uru.” “Ako gbia gi Mbori, mi natambua ro na kpotore yo dunduko, mi ataasa rimoro nye anye kindi.” “Mi asambua ro na auru, ki tambua rimoro nye anye kindi.”—Tam. 61:8; 86:12; 145:1, 2.
Ho Davide ape agu afugo re ni, ko aaberãnga gupai nga ko akpingo te te. Ko aima ino gupai nga Yekova aima pe gupai nga sangbana gu ingapai nga ga aboro nga kpio, na ko aima ida kuti gupai nga ko angia boro ingapai. (Bam. P. 3:3, 17-19; Tam. 51:4, 5) Ko aima ino gupai nga zavura gu ruru akumba nangia Abarayama, Yisaka, na Yakobo, aima kpiko. Na Davide aima ino gupai nga ko nika kpi akpi a. (Tam. 37:25; 39:4) Ono agu afugoko du rogo Atambuahe 61:8 nayugo gako nyemupai na diaberã nga ko aaida kaa tambua Mbori nyeanye kindi a wa ko adu ni unga ko.—2 Sam. 7:12.
Ti kura aregbo, Davide anakepai tipa agu apai ko anaagbia tiko na ni rogo raka yo, wa gu ani abihe rogo gu kekepai du barii Atambuahe nga 18, 51, na 52. Rogo Atambuahe 23, Davide asakipai tipa Yekova ni bangerefuo akandoro nafu rugapai, wasa, na bandahe. Davide angia wene bangerefuo akandoro. Na ko aaida ka iriso Mbori ‘wa ko adu ni unga ko.’—Tam. 23:6.
Oni ini gupai a nga, ga Mbori toro naadu kugii Davide ko ke gupai re. Agu apai ko akehe adu na sangbaanebi nga gu si adu nga si nika digiso tihe kusa. Ni kpiapai, rogo Atambuahe 110, Davide afura tipa gu regbo gako Gbia nika ‘súngo ku kumbabe Mbori yo’ ngbangbaturũ yo na ki gbia bakere pagbia. Ka manga gine? Kadu na ome kurii avura Mbori na ka ‘sára sapangbanga dagba arikaaboro’ auru kpotosende. Davide angia tita Masiya, gu ko si adu na ko nika zogarago ngbangbaturũ yo ni “boromotumo nye anye kindi.” (Tam. 110:1-6) Yesu aya gu sangbaanebi du rogo Atambuahe 110 adu tipa ko na si nika digisotihe kumbatayo.—Mt. 22:41-45.
Ii, ga Mbori toro adu kugii Davide ko kepai tipa gako regbo na gu regbo nika ye kumbatayo ho i nika zingisa ko ni be kpio ko ki ndu kumbatayo kaa iriso Yekova nyeanye kindi. Gipai re naundo rani ani gitirani na gupai nga ani ima rengba ka giarogo Atambuahe 37:10, 11, 29 nga si aafura tipa gupai naadu rogo gu Yisaraere naadu mbata na gupai nika manga rogo zegino dũ barambeda kumbatayo ho Mbori nika digiso gako akidohe ni.—Mo bi genewaraga 8 nga ga gu kekeapai nga, “Ani Adú na Mo Paradiso Yo” rogo gi magazini re.
Atambuahe 61:8 gbiati gu kura averesi du wakinaha nayugo gupai nga Davide aaida kaa tambua Yekova ti gu regbo aYisaraere naadu mbata daho ko akpi ni. Na agu averesi re nayugo gupai Davide nika mangaha kumbatayo ho Yekova nika zingisako ni be kpio.