Okuthile Okusha Ekwakheni Komhlaba Wonke
ABANINGI bayamangala ukubona izakhiwo ezinjengemibhoshongo yaseGibithe noDonga Olukhulu lwaseShayina. Izakhiwo eziphakeme kakhulu zesimanje ezingamamitha angu-400 ukuphakama nazo zenza ukhexe. Nokho, izici zesinye isimiso sokwakha nazo zimangaza ngendlela efanayo.
Izisebenzi zokuzithandela zakha izakhiwo eziningi ezinkulu emhlabeni wonke. Eziningi zalezi zisebenzi zokuzithandela zivela emazweni lapho lezakhiwo zakhiwa khona. Kodwa njengoba kuvame ukudingeka usizo olwengeziwe, izisebenzi ezivela kwamanye amazwe ziye zachitha izigidi zamaRandi emali yazo ukuze zikhokhele izindleko zazo zokuya ezindaweni okwakhiwa kuzo ezikude kakhulu. Eziningi zalezi zisebenzi zokuzithandela zinikela ngesikhathi sazo seholide ukuze zisebenze; ezinye zithatha isikhathi sokuphumula emsebenzeni wazo wasikhathi sonke ngaleyondlela zidele iholo elibhekile.
Lomzamo ophawulekayo wokusiza uyisimiso sokusiza ngokuzithandela ekwakheni komhlaba wonke esiqondiswa endlunkulu yoFakazi BakaJehova eBrooklyn, eNew York. Kusukela ekusungulweni kwalesimiso ngoNovember 1985, abantu abangaphezu kuka-3 000 baye bazikhokhela imali yokugibela beya ezindaweni okusetshenzwa kuzo ezingaphezu kwezingu-30 eNyakatho naseNingizimu Melika, eAustralia, eAfrika, eYurophu, naseziqhingini ezihlukahlukene.
Okwamanje, izisebenzi zokuzithandela ezithi azibe u-600 zisebenza cishe emazweni angu-25. Ezingaphezu kuka-400 zazo zisezabelweni ezizothatha isikhathi eside esingangonyaka noma ngaphezulu, futhi zibizwa ngokuthi “amaInternational Servant [iziNceku Zomhlaba Wonke].” Zonke ezinye zisezabelweni zesikhathi esifushane esisukela emasontweni amabili kuya ezinyangeni ezintathu.
Kungani zonke lezisebenzi zinikela ngokuzithandela ngamakhono azo namandla ngaphandle kweholo? Yini eziyibheka njengebaluleke kakhulu kangangokuthi zize zizidele ngalendlela?
Ukugcwalisa Isiprofetho SeBhayibheli
Imbangela yokusabela okuhle esimisweni sokwakha komhlaba wonke itholakala empendulweni yombuzo olandelayo. Eminyakeni engaphezu kwengu-1 900 edlule, abaphostoli bakaJesu Kristu bambuza: “[I]sibonakaliso sokuza kwakho nesokuphela kwezwe siyakuba-yini na?” Ngemva kokuchaza izinto ezinjengokwanda kwezimpi, indlala, ubici lwezifo, nokuzamazama komhlaba, uJesu wathi: “Lelivangeli lombuso liyakushunyayelwa ezweni lonke, kube-ngubufakazi ezizweni zonke, andukuba kufike ukuphela.”—Mathewu 24:3, 14.
Lezisebenzi zokuzithandela ziyaqiniseka ukuthi manje yisikhathi okugcwaliseka ngaso lesosiprofetho sikaJesu. Ngakho ziyajabula ukwenza noma yini ezingayenza ukuze zithuthukise ukumenyezelwa koMbuso ngaphambi kokuba kufike isiphelo salesimiso. Lesimiso sokwakha somhlaba wonke senzelwa ukuhlanganisa imizamo yabantu abanjalo ukuze bakhe izakhiwo ezinyathelisayo futhi zisakaze isigijimi soMbuso.
Ukwanda Komsebenzi WoMbuso
Ngonyaka odlule omagazini beNqabayokulinda nePhaphama! abangu-678 509 507, abaqokomisa uMbuso kaNkulunkulu njengokuwukuphela kwethemba lesintu, banyatheliswa ezakhiweni eziqondiswa oFakazi BakaJehova. Lelo inani elingaphezu kakhulu komagazini abayizigidi ezimbili—njengalona owufundayo—abaphuma emishinini yokunyathelisa nsuku zonke zokusebenza! Ngaphezu kwalokho, unyaka ngamunye kunyatheliswa futhi kusakazwe amashumi ezigidi zamaBhayibheli, izincwadi, izincwajana, nezincwajana ezingangomagazini.
Izindawo zokunyathelisa ezinkulu kunazo zonke zisendlunkulu yomhlaba wonke yoFakazi BakaJehova eBrooklyn, eNew York, nasenyakatho eduze neWallkill, khona eNew York. Nokho, phakathi kwawo-1950 nawo-1960 izindawo zokunyathelisa eziningi zazakhiwe nangaphandle kweUnited States. Khona-ke, ngo-1970 INqabayokulinda nePhaphama! kwakukhiqizwa ezakhiweni eziqondiswa oFakazi BakaJehova eJalimane, eNingizimu Afrika, eCanada, eNgilandi, eSwitzerland, eDenmark, eSweden, eFinland, naseFrance.
Khona-ke, ngo-1972 nango-1973, labomagazini baqala futhi ukukhiqizwa ezindaweni zokunyathelisa zoFakazi BakaJehova kwamanye amazwe angaphezu kwayisithupha: IJapane, iBrazil, iAustralia, iGhana, iNigeria, nePhilippines. Eminyakeni eyalandela, njengoba umsebenzi woMbuso wawanda, kwaqala ukwakhiwa amahhovisi amasha amagatsha anezindawo zokunyathelisa ezinkulu ngisho nangokwengeziwe. Ukuze uthole umqondo wokwanda okusheshayo, cabangela ukuthi izakhiwo zamagatsha ezinezindawo ezintsha zokunyathelisa INqabayokulinda nePhaphama! zanikezelwa ngezinsuku ezilandelayo:
EGreece, January 16, 1979; eSweden, December 23, 1980; eBrazil, March 21, 1981; eCanada, October 10, 1981; eItaly, April 24, 1982; eRepublic of Korea, May 8, 1982; eJapane, May 15, 1982; eAustralia, March 19, 1983; eDenmark, May 21, 1983; eSpain, October 9, 1983; eNetherlands, October 29, 1983; eJalimane, April 21, 1984; eNdiya, January 20, 1985; naseNingizimu Afrika, March 21, 1987.
Ngaphezu kwalokho, kwanikezelwa amahhovisi amasha amagatsha noma izakhiwo ezinkulu ezenezelwe kwezindala eCôte d’Ivoire, February 27, 1982; eTahiti, April 15, 1983; eNgilandi, October 2, 1983; eFinland, ngoMay 5, 1984; eNorway, May 19, 1984; eMartinique, August 22, 1984; ePeru, January 27, 1985; eMexico, April 13, 1985; eVenezuela, April 21, 1985; naseFrance, May 4, 1985.
Nakuba omunye womsebenzi wokwakha emagatsheni ambalwa wawenziwa izisebenzi ezingochwepheshe ezikhokhelwayo ezingebona oFakazi, oFakazi BakaJehova ngokuvamile bazenzela bona okuningi. Ngezinkulungwane banikela ngezinkonzo zabo ngokuzithandela, ngisho nakuba abaningi babo babengenawo amakhono emisebenzini yokwakha.
Njengoba ukushumayela ngoMbuso koFakazi BakaJehova kwakuqhubeka kwanda, kwadingeka izakhiwo ezandisiwe. Lezi zakhiwo zazingakhiwa kanjani ngokushesha okukhudlwana?
Isimiso Esisha Sigcwalisa Isidingo
Ukuze kuhlelwe futhi kusizwe ekwandeni okukhulu kwalomsebenzi wokwakha womhlaba wonke, kwasungulwa futhi kwamiswa isimiso esisha esikhethekile sezisebenzi zokuzithandela. Omunye wababonisi balesimiso wachaza: “Phakathi nesikhathi sokwakha, kudingeka amakhono okwakha athile amaningi ngezikhathi ezithile. Awumdingi umuntu wokufulela lapho kusathelwa ukhonkolo wesisekelo. Ngakho ihhovisi lezisebenzi zomhlaba wonke lamiswa eBrooklyn, eNew York, ukuze liqondise izinto.”
Khona-ke, njengoba izicelo ezifuna ochwepheshe bokwakha zifika, ihhovisi laseBrooklyn likhonza “njengomxhumanisi.” Lixhumanisa izidingo zezakhiwo emhlabeni wonke nezisebenzi ezifanelekile ukuze kufezwe lezozidingo zokwakha. Ngokwesibonelo, njengoba izakhiwo zokuhlala ezazenezelwa egatsheni laseMexico zazifinyelela ekupheleni ngo-1988, kwacelwa eBrooklyn abandlali bakakhaphethi abanekhono. Phakathi nemizuzu embalwa, ihhovisi lathola abane abangomakad’ ebona abakujabulela ukuzenza batholakalele lokho ngokuzithandela. Ngesikhathi kunikezelwa isenezelo segatsha ngoJanuary 1989, okhaphethi base bendlelwe futhi bebukeka kahle.
Ukufanelekela Ukukhonza
Ukuze sihlanganyele esimisweni sokwakha somhlaba wonke sezisebenzi zokuzithandela, isisebenzi kudingeka siqale sifaneleke. Ngasinye isisebenzi sokuzithandela kumelwe sibe uFakazi kaJehova ozinikezele, nobhapathiziwe. EUnited States, abafuna ukuba izisebenzi zokuzithandela kumelwe baqale bakhonze kwesinye sezakhiwo zoFakazi BakaJehova eNew York. Lokhu kunikeza ithuba lokuba kuhlolwe imikhuba yakhe yokusebenza namakhono. Emva kwalokho ube esecelwa ukuba afake isicelo sokungena kulesimiso sokwakha. Amakhosikazi alabo abafuna ukuba yizisebenzi zokuzithandela, nakuba ngokuvamile engamenyelwa ukuzokho-nza namadoda awo eNew York, nawo angasifanelekela lesimiso futhi agcwalise ifomu lesicelo.
OFakazi BakaJehova kwamanye amazwe bangafaka isicelo sokuhlanganyela esimisweni ngokucela ifomu lesicelo egatsheni lakubo. Lelifomu lithunyelwa ehhovisi elisendlunkulu eseBrooklyn okuyilona eliqondisa izinceku zomhlaba wonke nezinye izisebenzi zokuzithandela zokwakha emhlabeni wonke. Owenza isicelo ube esetshelwa ukuthi ayodingeka nini amakhono akhe omsebenzi.
Ingxenye Yamakhosikazi
Nakuba amakhosikazi ezisebenzi zokwakha engavamile ukuba namakhono emisebenzini yokwakha, amaningi aye aqeqeshelwa ukubopha izinsimbi zokuqinisa ukhonkolo azihlanganise ngocingo, ukubeka ngokunameka amatile, kanye nokwenza bushelelezi udonga nokulupenda. Amanye anakekela imisebenzi edingekayo yasendlini. Onke ngokwenza kanjalo anikela ngendlela enhle emsebenzini ezindaweni zokwakha emhlabeni wonke.
Enye inkosikazi eyahlanganyela nendoda yayo ekusebenzeni esakhiweni segatsha elisha ePuerto Rico muva nje iye yabhalela ihhovisi eBrooklyn: “Safika ngoJanuary 1, 1991, ukuze sifeze isabelo sethu senyanga. Ngangisebenza neqembu elalibopha izinsimbi lizenza omata. Lona kwakuwumsebenzi wamandla onzima kakhulu kwengake ngayenza. Ngokuyisisekelo, wawuhilela ukugoba nokuhlanganisa izinsimbi, usebenzisa udlawu nesondo locingo—usuku lonke!
“Ezinsukwini ezimbalwa zokuqala isigqoko sami esilukhuni sasilokhu siwa, futhi ngangilokhu ngithandela amagilavu ami amakhulu kumata. Kodwa ekugcineni ngasebenza ngendlela ehleleke kakhulu. Amaplasta amaBand-Aid amahlanu noma ayisithupha ayenakekela amabhamuza ezandleni zami. Ngafunda ukubala izilinganiso emapulanini, ukudweba phansi imigqa eqondile ngoshoki; nokwendlala insimbi yokwenza umata ngamunye. Kwakuwumsebenzi owanelisa ngempela. Okuningi kakhulu kwalokho engikwenzayo nsuku zonke kudinga ukwenziwa njalo—ukucoca, ukupheka, ukuwasha izingubo, njalo njalo. Kodwa labomata bensimbi bazongena ezindongeni eziyohlala zimile uma nje igatsha lisamile. Lowomcabango uyavuza!”
Ukwazisa Ngelungelo Lokusebenza
Umbonisi walomsebenzi wokwakha womhlaba wonke wathi: “Kuyinto enhle kakhulu ongase uyicabange. Abantu basebenzisa izikhathi zabo zamaholide ukuze baye ezindaweni zokwakha ezikude, bezikhokhela bona izindleko zokuhamba. Lapho kungase kudingeke basebenze kanzima ngokwengeziwe namahora amaningi kunabawasebenze unyaka wonke. Futhi lapho befika ekhaya bayasibhalela besibonga ngelungelo!”
Ngokwesibonelo, incwadi efike muva ithi: “Sinibhalela lencwadi ukuze sinibonge ngelungelo elihle kakhulu esalijabulela lapho sisebenza izinyanga ezintathu egatsheni lasePhilippines. Ekupheleni kosuku ngalunye lomsebenzi sasisuke sikhathele siyingcuba, njengoba sasikulindele, kodwa sakheke kakhulu ngokomoya ngabangane bethu abahle. Sakujabulela ukwazi eziningi zezinye izisebenzi zokuzithandela ezazilapho, futhi oFakazi bendawo esasisebenza nabo basihlaba umxwele kakhulu. Ngempela baye baba ngabathandekayo kithi, sebandise umkhaya wethu.”
Umbhangqwana owaya e-Ecuador wabhala: “Safunda ukuphila ngaphandle kweziyoliyoli ezingenamsoco, ukugeza ngamanzi amancane, nokushefa nokugeza ngamanzi abandayo. Sasingaqapheli ukuthi ukucabanga kwethu kwase kuthonywe kangaka ezokukhangisa. Sanikela ngokungcono esasinakho esakhiweni, kodwa saphuma sinokuningi kakhulu kunesakunikela. Abazalwane bethu base-Ecuador bampofu ngokwezinto ezibonakalayo, ngokwezindinganiso zaseU.S., kodwa ingokomoya labo nokwazisa abanakho ngomsebenzi wokushumayela kuvelele. Amazwi ngeke ayichaze ngempela indlela esizizwa ngayo ngokuba nalelilungelo.”
Ukwakha Ngetilt-up
Isici esiyingqayizivele somsebenzi wokwakha womhlaba wonke siwukusetshenziswa kwendlela yetilt-up. Lendlela ihilela ukwakhelwa phansi kwezindonga ezinkulu zikakhonkolo, eziqiniswe ngezinsimbi ngaphakathi. Lezindonga zingafinyelela esitezi sesithathu ngokuphakama futhi zibe nesisindo samathani angu-20. Lezindonga zakhelwa phansi endaweni yesakhiwo eyenziwe ngokhonkolo noma endaweni eseduze yokuthela ukhonkolo.
Izindonga eziyisithupha noma eziyisishiyagalombili zingabekwa esinye phezu kwesinye. Lapho lezindonga seziqine ngokwanele—ngokuvamile ngemva kwezinsuku eziyisikhombisa—icrane isetshenziselwa ukuzifaka endaweni yazo. Lezindonga manje sezisetshenziselwa kokubili izindonga zangaphakathi nezangaphandle, kanye nezakhiwo ezinezitezi eziningi. Ngokwesibonelo, amakhulu alezindonga, asetshenziselwa ukwakha igatsha elinezitezi ezingu-11 ePhilippines. Lezindonga ezibushelelezi ezenzelwa phansi zidinga ukupendwa kuphela.
Lendlela yokwakha ayongi nje kuphela isikhathi kodwa futhi izisebenzisa ngokuphumelelayo izisebenzi ezimbalwa ezingenawo amakhono kakhulu. Incwadi yezokwakha okuthiwa iConcrete, ngokuphathelene nokwakhiwa kwefekthri entsha yoFakazi BakaJehova eNgilandi yathi: “Ukwakha ngetilt-up kwakuzifanelekela kahle izidingo zabo ngenxa yokuba lula kwalendlela yokwakha . . . Ukongeka kwesikhathi nezindleko ngaso sonke isikhathi kuye kwaba izinzuzo eziyinhloko.”
Lomagazini wanezela ngokuphathelene nokwakha ngetilt-up: “Ukukwazi kwayo ukwakha izindonga (ezisindayo nezinye) ngesikhashana, kuhlangene nokusetshenziswa kwezisebenzi zendawo ezingadingi isilinganiso esingavamile sokuqondiswa, kwenza lendlela isheshe futhi yonge imali.” Khona-ke, yeka ukuthi kufaneleka kanjani, ukuthi isimiso esisha sokwakha kumelwe sisebenzise lendlela elula, nephumelelayo yokwakha!
Amahhovisi Ezobunjiniyela
Ukuqondiswa kwalesimiso sokwakha somhlaba wonke kunikezwa kusuka ehhovisi elikhulu lezobunjiniyela endlunkulu yoFakazi BakaJehova eBrooklyn, eNew York. Lapho, onjiniyela, abaklami, nabadwebi bezakhiwo abangaphezu kwekhulu—abangamalungu ezisebenzi zasendlunkulu—badweba amapulani ezakhiwo. Ukuze kusizwe ngomsebenzi owandisiwe, muva nje kuye kwamiswa amahhovisi onjiniyela ezifunda eJapane, eAustralia, naseYurophu.
Ngo-1987, iCAD (Computer Aided Design) yakhiwa ukuze yenze imifanekiso. Isiteshi seCAD sinezingxenye eziningana zemishini. Uma zisetshenziswa ndawonye, lezi zenza kube nokwenzeka ukudweba kuyicomputer kunokudweba ngesandla phezu kwetafula lokudweba amapulani. Kumanje, kusetshenziswa iziteshi zeCAD ezingaphezu kuka-65 eBrooklyn nasemagatsheni.
Njengoba imidwebo ingase ifakwe enkumbulweni yecomputer, imiklamo eyayisetshenziswa kwezinye izakhiwo ingatholakala kuyicomputer futhi ishintshelwe emidwebeni yangalesosikhathi. Lokhu kusiza emkhiqizweni nasekufanisweni kwemiklamo nezakhiwo.
Izakhiwo Zamuva
Njengoba iHhovisi LaseBrooklyn LoNjiniyela lalikhula ngobukhulu, nomcabango wokuhlela izisebenzi zokuzithandela wakhula. Kungase kushiwo ukuthi isimiso saqala ngo-1985 lapho izisebenzi ezivela kwamanye amazwe zisabela ukuze zisize ekwakhiweni kwegatsha elisha ePanama. Sakhula lapho iPeru idinga usizo lokwenezela isakhiwo esikhulu egatsheni layo. Futhi lesisimiso ngempela saqala ukusebenza ekwakhiweni kwegatsha laseCosta Rica nelaseNigeria. Ngokushesha kwathunyelwa izisebenzi eziyinhloko ukuba ziyosiza ekwakheni emhlabeni wonke.
Izinceku zomhlaba wonke nezinye izisebenzi zokuzithandela manje seziye zasiza ekwakhiweni kwamagatsha amasha amaningi kanye nokwenezela kwamadala, kuhlanganise namaningi alawo aqedwa ekuqaleni kuka-1986. Eminyakeni emihlanu edlule noma ngaphezulu, kuye kwaqedwa izakhiwo futhi zanikezelwa ePanama, eCosta Rica, eChile, eMexico, eNew Zealand, eHaiti, eLiberia, eAustria, e-Ecuador, ePapua New Guinea, eGuyana, eGhana, eHawaii, ePortugal, eHong Kong, eCyprus, ePeru, e-El Salvador, eMauritius, eJapane, eHonduras, eGuatemala, eNigeria, eArgentina, eAustralia, eNew Caledonia, eFiji, ePhilippines, naseGreece.
Eziningi zazo zaziyizakhiwo ezinkulu. ENigeria, empeleni okuyidolobha elincane, kwakhiwa endaweni engamahektare angu-57. Kwakhiwa ifekthri enokuphakama okungamamitha angu-140 nobubanzi obungamamitha angu-70, kanye nezakhiwo sokuhlalisa abantu abangaphezu kuka-400, isakhiwo samahhovisi, igaraji, nezinye izakhiwo. Impahla yokwakha eyathunyelwa ivela eUnited States iyodwa yayanele ukugcwalisa izinto zokuthumela ezinkulu ezingu-347, okungathi uma zibekwe zalandelana zithathe indawo engamakhilomitha angu-3,5!
Ngezinye izikhathi, kunokuphikisa kwabefundisi ekwakhiweni kwezakhiwo. EGreece abefundisi bahlela amabhasi angu-40 ayegcwele abaphikisi ngo-March 1989, kodwa amaphoyisa asekela ilungelo elingokomthetho loFakazi lokwakha, futhi ukuphikisa kwabhuntsha ngemva kokusuka ngomfutho. Igatsha elisha, elinefekthri enkulu, entsha nezakhiwo zokuhlala ezingu-22 zokuhlalisa abantu abangaphezu kuka-170, laqedwa futhi lanikezelwa kulentwasahlobo.
EFrance, uMbhishobhi wase-Evreux, uJacques Gaillot, waphikisa ukwakhiwa kwegatsha elikhulu elisha oFakazi BakaJehova ababehlela ukulakha eLouviers. Wathi ukushumayela kwasobala koFakazi “akusihloniphi isithunzi sabantu.” Nokho, abanye abavumelani nombhishobhi. Bakholelwa ukuthi oFakazi BakaJehova kufanele babe nelungelo lokwandisa izakhiwo zabo kulendawo, njengoba benza ezindaweni eziningi kuwo wonke umhlaba.
Njengamanje, izisebenzi zokuzithandela zokwakha emhlabeni wonke zisebenza ezakhiweni zamagatsha eColombia, ePuerto Rico, eZambia, eBrazil, Engilandi, eCanada, eDominican Republic, e-Ecuador, ePoland, eGuadeloupe, eThailand, eLeeward Islands, eBahamas, eWestern Samoa, eTahiti, eSolomon Islands, eVenezuela, eRepublic of Korea, eNingizimu Afrika, naseJalimane. Ezinye izakhiwo zisadwetshwa, kuhlanganise namagatsha amasha noma izenezelo emagatsheni akhona eFrance, eSpain, eMexico, eSri Lanka, eTaiwan, naseSuriname.
Ukulindela Isidingo
Lapho iNdikimba Ebusayo yoFakazi BakaJehova igunyaza ukunwetshwa kwegatsha laseJalimane ngengxenye yalokho elaliyikho ngo-1988, abanye bacabanga ukuthi isakhiwo sasisikhulu kakhulu. Kodwa ngo-1989 nango-1990 umsebenzi wokushumayela woFakazi BakaJehova wagunyazwa ngokomthetho noma wavunyelwa ukuba uqhubeke ngaphandle kwemingcele ePoland, eHungary, eMpumalanga Jalimane, naseRomania. Futhi ngo-March 27, kulonyaka, oFakazi BakaJehova baqashelwa ngokomthetho iSoviet Union njengenhlangano engokwenkolo.
Abantu abangaphezu kuka-250 000 eMpumalanga Yurophu baba khona emihlanganweni yoFakazi BakaJehova ehlobo elidlule futhi babelangazelela ukuthola izincwadi zeBhayibheli. I-1991 Britannica Book of the Year yathi, “Phakathi nezinyanga ezimbili nje kuphela, ihhovisi legatsha laseNtshonalanga Jalimane leWatchtower Society lathumela amathani angu-275 ezincwadi ezisekelwe eBhayibhelini, kuhlanganise namaBhayibheli angu-115 000, eMpumalanga Jalimane kuphela.” Khona-ke kusobala manje ukuthi igatsha laseJalimane likudinga konke ukwandiswa okugunyaziwe, futhi likudinga ngokushesha!
Ukulungiselela Izidingo Zesikhathi Esizayo
Njengoba ungase ucabange, ukushumayela ‘lelivangeli loMbuso ezweni lonke ngaphambi kokuba kufike isiphelo’ ekugcwalisekeni kwesiprofetho sikaJesu kudinga umzamo omkhulu. (Mathewu 24:14) Futhi amaKristu eqiniso emhlabeni wonke enza lowomzamo. Enza konke angakwenza ngendlela ehleleke kahle ukuze enze isigijimi soMbuso sitholakale kuzo zonke izizwe.
Ukuze bafeze lokhu, oFakazi BakaJehova bandisa izakhiwo zabo zokusakaza izincwadi zeBhayibheli endlunkulu yabo eBrooklyn, eNew York. Ukwakhiwa kwesakhiwo esinezitezi ezingu-30, esiku-90 Sands Street, sokuhlalisa amanye amalungu ezisebenzi zasendlunkulu ayinkulungwane manje kuyaqhubeka futhi sihlelelwe ukuba siphele ngo-1993.
Nokho, isakhiwo esikhulu kunazo zonke, yileso esakhiwayo endaweni eqhele ngamakhilomitha angu-110 eDolobheni laseNew York eseduze nasePatterson, eNew York. INew York Times ka-April 7, 1991, yabika: “Lapho [oFakazi BakaJehova] sebeqedile, esikhathini esithile ngo-1996, bayobe sebakhe izindlu eziyisithupha zokuhlala ezinezitezi ezisukela kwezimbili kuya kwezinhlanu ukuphakama ezinamakamelo angu-624, igaraji lezimoto ezingu-450, ihhotela elinamakamelo angu-144, ikhishi elikhulu nendlu yokudlela eyokhonza abantu abangu-1 600 ngesikhathi, isakhiwo samahhovisi, isakhiwo samakilasi nezinye izakhiwo eziningi izisebenzi eziphathelene nenkonzo eziyosebenzela kuzo.” Amakhulu ezisebenzi zokuzithandela anikela ngamandla azo mahhala ukuze akhe lesisikhungo esikhulu semfundo yoMbuso.
Ngempela, isimiso esimangalisayo sokwakha siyaqhubeka kuzo zonke izingxenye zomhlaba—zonke zenziwa futhi ziqedwe izisebenzi zokuzithandela. Ngempela kungokuthile okusha ekwakheni komhlaba wonke!
[Isithombe ekhasini 21]
Ukubopha izinsimbi zokuqinisa kuyingxenye yomsebenzi wesakhiwo
[Izithombe ekhasini 23]
Ekwakheni nge“tilt-up,” izindonga zikakhonkolo zingakhiwa olunye phezu kolunye. Lapho izindonga seziqine ngokwanele, ziyaphakanyiswa zifakwe endaweni yazo
[Izithombe ekhasini 24]
Isakhiwo segatsha elisha ePoland siyabuyekezwa eBrooklyn. Imidwebo yezakhiwo idwetshwa kuyi“computer”
[Izithombe ekhasini 25]
Izakhiwo zamagatsha njengoba zihlelelwe ukwakhiwa ePuerto Rico, eZambia, naseLeeward Islands
[Isithombe ekhasini 26]
Izisebenzi zokuzithandela esakhiweni ezweni laseYurophu