Amakristu Abhekana NeNkantolo Ephakeme YaseJerusalema Futhi

NGUMLOBELI WE-PHAPHAMA! KWA-ISRAEL

UJESU wama phambi kweSanhedrin, inkantolo eyayiphakeme kunazo zonke eJerusalema, equliswa icala eliphathelene nokuphila kwakhe. Naphezu kwalokhu kucindezela, wawumelela ngesibindi uMbuso kaNkulunkulu. (Mathewu 26:57-68) Ngemva kwamasonto ambalwa okuqulwa kwecala likaJesu, abalandeli bakhe abaseduze bama phambi kwayo kanye lenkantolo ephakeme. Lapho banikeza ubufakazi obunamandla ngoMbuso kaNkulunkulu nangeNkosi yawo emisiwe.—IzEnzo 4:5-21.

Lapho abaphostoli bephinde belethwa ngenkani phambi kweSanhedrin ezinsukwini ezithile kamuva, kwenzeka okuthile okwakungalindelekile. Naphezu kokucindezela okunamandla kontanga, uGamaliyeli, omunye wamalungu alenkantolo ahlonipheke kakhulu, wabakhulumela ngesibindi abafundi bakaJesu. Ngenxa yalokhu kungenela okumangalisayo, abaphostoli bakhululwa.—IzEnzo 5:27-42.

Lokhu kuvela enkantolo kaningi kwakuwukugcwaliseka kwamazwi kaJesu akuMathewu 10:16-18: “Bhekani, ngiyanithuma ninjengezimvu phakathi kwezimpisi . . . Bayakunikhaphela [ezinkantolo zendawo, NW] . . . Niyakuyiswa nangaphambi kwababusi namakhosi ngenxa yami, kube ngubufakazi kubo nakwabezizwe.” Nakuba babevame ukungaqondwa kahle, abalandeli bakaJesu baziwa kahle kamhlophe kulo lonke elakwa-Israyeli. Izinkulungwane zamaJuda ekhulu lokuqala zasamukela isigijimi sikaJesu. (IzEnzo 4:4; 6:7) Konke lokhu kwakuwumphumela wokushumayela ngentshiseko kwabafundi bakaJesu abangamaJuda, kuhlanganise nokuvela kwabo ngesibindi kaningi enkantolo.

Kwa-Israel namuhla, uma kuqhathaniswa bambalwa abantu abazi oFakazi BakaJehova, njengamanje abayinani elingaphansi kuka-500 kulelizwe elinabantu abangaba izigidi ezinhlanu. Kodwa ngo-1993, icala likaFakazi othile osemusha alizange lilethe kuphela ukunakekela okuphawulekayo emsebenzini wabo kodwa futhi laqokomisa ukuhlobana okuyingqayizivele okungokomlando phakathi kobandlululo nokushushiswa okuye kwenziwa kumaJuda nakoFakazi BakaJehova.

Yaqala Kanjani Lempikiswano?

U-Ariel Feldman, umJuda waseRussia oneminyaka engu-17 ubudala owafudukela kwa-Israel, ohlala eHaifa, wayengumfundi okhaliphile futhi ethandwa kakhulu othisha nangabafundi afunda nabo.

Ngenxa yokufakaza ngokwethukela emgwaqweni ngesikhathi seMpi YasePersian Gulf, u-Ariel nomkhaya wakubo baqala ukufunda iBhayibheli noFakazi BakaJehova. U-Ariel wazihlolisisa futhi waziqhathanisa ngokungashwampuluzi izimfundiso zenkolo yamaJuda nezincazelo zeBhayibheli ayezinikezwa oFakazi BakaJehova. Ngokuzimisela u-Ariel wathuthuka ngokushesha ekufundeni kwakhe iBhayibheli futhi waba ilungu lokuqala emkhayeni wakubo elabhapathizwa njengomunye woFakazi BakaJehova.

Konke lokhu akuzange kumnikeze bunzima ezifundweni zakhe zesikole. Nokho, onyakeni owandulela ayezophothula ngawo, isikole ayefunda kuso sanquma ukunezela ezifundweni zesikole isimiso sokulungiselela abafundi inkonzo yempi. Kwakufundisa amasosha, futhi lesisimiso sasihlanganisa nezindlela zokulwa. Njengoba ayenomuzwa wokuthi ukubamba iqhaza kulesisifundo kwakuyolimaza unembeza wakhe oqeqeshwe ngeBhayibheli nokuma kwakhe kokungathathi hlangothi njengomunye woFakazi BakaJehova, u-Ariel wenza imizamo enengqondo yokuchaza ukuma kwakhe kuthishanhloko. (Isaya 2:2-4) Wachaza ngenhlonipho ukuthi wayezimisele ukuhlanganyela kunoma yimuphi omunye umsebenzi wesikole phakathi nalenkathi kodwa wayengenakwenza ngokumelene nezinkolelo zakhe.

Nakuba ngaphambili uthishanhloko wakhe ayebonise ukumqonda okuthile, wanquma ukuthi wayengenakusamukela lesisicelo. Wamnqumela ugwayi katiki: Uzohlanganyela ngentshiseko kulokhu kuqeqeshelwa impi noma uzoxoshwa esikoleni. U-Ariel wayengenakwenza ngokumelene nonembeza wakhe. Ngo-January 31, 1993, ezinyangeni ezimbalwa nje ngaphambi kwezivivinyo zokugcina, waxoshwa ngokusemthethweni esikoleni wanganikezwa enye indlela ayengayisebenzisa.

Ukuvikelwa Umthombo Ongalindelekile

U-Ariel waphendukela kuyi-Association for Civil Rights yakwa-Israel. Babezimisele ukusingatha icala lakhe, bemnikeza usizo lomthetho mahhala. IZwe lanamuhla lamaJuda akwa-Israel libuswa ngentando yeningi. Nakuba singenawo umthetho-sisekelo oqinisekisa amalungelo omuntu ngamunye, isimemezelo sakwa-Israel sokuzimela sikhuthaza inkululeko yenkolo nenkululeko kanembeza. Akukaze kube nesenzakalo esingokomthetho kwa-Israel esihilela ukuxoshwa esikoleni ngenxa yezinkolelo ezingokwenkolo.

Amaphephandaba aqala ukuba nesithakazelo kulendaba. Njengoba ayelandela iseluleko somthetho, u-Ariel akazange afakane imilomo nezintatheli, ekhetha ukuba icala lakhe lahlulelwe inkantolo kunokuba lahlulelwe “inkantolo” yemibono yeningi. Nokho, uthishanhloko walesisikole wazithethelela ngokushesha lapho kuxoxwa naye. Ephephandabeni i-Hadashot ka-February 9, 1993, akazange azwakalise uvo lwakhe kuphela lokuthi ukuma kwalomfundi okungokwenkolo kwakuwukwedelela uMbuso Wakwa-Israel nabo bonke abawuthandayo kodwa futhi wasebenzisa lelithuba ukuba akhulume ngokumelene noFakazi BakaJehova njengenhlangano, ethi: “Umsebenzi wabo ufihlekile, ungcolile, uwumshoshaphansi. Baphuma inqina bagole futhi bazingele ababuthakathaka.”

Abantu abaningi bakwa-Israel babebona ukuthi imibono yalothishanhloko yayibonisa ubandlululo. UTom Segev, intatheli eyisazimlando yakwa-Israel oye wacwaninga kakhulu ngokuQothulwa Kwesizwe, waphazanyiswa kakhulu yilengxoxo. Yamkhumbuza ngesimo sengqondo esaboniswa abanye eJalimane lobuNazi, okwathi ngokushukunyiswa ukumangalelwa okungamanga kwamaJuda, baveza ubandlululo lwabo ngokwenza ubugebengu obubi nobukhulu kunabo bonke emlandweni wesintu. Umbono kaSegev wawuwukuthi ingozi enkulu kakhulu eMbusweni Wakwa-Israel, ayikho esinyathelweni esiqondiswa unembeza esithathwe yilomfundi osemusha, kodwa kunalokho isesibonelweni sokungabekezeli esiboniswe uthishanhloko walesisikole. Washukumiseleka ukuba abhale isihloko esivikela amalungelo oFakazi BakaJehova. (Bheka ibhokisi, ekhasini 15.)

Ngenxa yesihloko sikaSegev, nabanye baveza uvo lwabo. Esinye isakhamuzi saseJerusalema, esasiyisiboshwa ekamu phakathi neMpi Yezwe II ngenxa yokuba umJuda, sabhalela umhleli incwadi ethile sikhumbula ukuziphatha okuhle koFakazi BakaJehova esasinabo ekamu ngenxa yokwenqaba kwabo ukuya empini yaseJalimane.

Njengoba loFakazi osemusha ayengaxoxi nezintatheli, zaphendukela kwamanye amalungu ebandla. Nakuba engazange akhulume ngokuqondile ngesimo sika-Ariel ngaphambi kokuba sisingathwe inkantolo, akujabulela ukunikeza ukwaziswa ngezinkolelo zoFakazi BakaJehova nangomsebenzi wabo kwa-Israel. Lokhu kwaholela ezihlokweni eziningi zamaphephandaba akwa-Israel ezakhuluma kahle ngabo kanye nasengxoxweni eyenziwa umsakazo kuxoxwa nomunye wabadala bebandla lendawo. Abaningi bezwa okokuqala ngqá ngoFakazi BakaJehova ngenxa yokuba undab’ uzekwayo bengacelanga.

Mhla Kusenkantolo YaseJerusalema

Igatsha laseHaifa le-Association for Civil Rights yakwa-Israel lazama ngokuphindaphindiwe ukubonisana nothishanhloko, iBhodi Lemfundo, noMnyango Wemfundo waseJerusalema. Nokho, kwaba nhlanga zimuka nomoya. Ngo-March 11, 1993, kwafakwa isicelo sika-Ariel Feldman eNkantolo Ephakeme eJerusalema, inkantolo enkulu kunazo zonke kwa-Israel wanamuhla.

Usuku olwalumiselwe ukuba abingelela ngalo imantshi kwakungu-March 15, 1993. Abameli be-Association for Civil Rights yakwa-Israel bethula icala lika-Ariel ngokumelene neBhodi Lemfundo, uthishanhloko walesisikole, nomasipala wedolobha laseHaifa. Amajaji amathathu eNkantolo Ephakeme yakwa-Israel adingida lelicala ekuqulweni kwalo kokuqala.

Ummeli kaHulumeni wethula loludaba ngokuthi luyolulaza igunya lalesisikole uma kuvunyelwa lomfundi ukuba “azinqumele” ukuthi yiziphi izifundo azozifunda nangeke azifunde. Bacela lenkantolo ukuba isekele isinqumo sabo sokuthi lomfundi akufanele nakancane aphinde alubhade emagcekeni alesisikole.

Abameli abalwela amalungelo ezakhamuzi bethula loludaba ngokuthi ngesikhathi lesisikole sisingatha loludaba sephule amalungelo ayisisekelo enkululeko yokukhulekela nawenkululeko kanembeza. Lamajaji abuza imibuzo ngokuqondene nezimfundiso zoFakazi BakaJehova ukuze aqonde isizathu sokuma kwalomfundi osemusha. Nabo banikezwa izincwadi eziningi eziyizicelo ezinokwaziswa okuphathelene namacala afanayo emhlabeni wonke lapho izinkantolo eziphakeme zanquma ngokuvumelana noFakazi BakaJehova.

Esiphethweni sawo lamajaji athi izinhlangothi zombili zazilwela isimiso esithile. Nokho, lapho ehlaziya ukuthi yiluphi uhlangothi oluyolimala kakhulu uma loludaba luyekwa lunjengoba lunjalo, ngokuqinisekile kwakuzoba yilomfundi. Amajaji abonisa ukungayikholelwa indlela yokuziphatha kukalothishanhloko nokweBhodi Lemfundo, abanikeza izinsuku eziyishumi zokuba babhale bachaze izenzo zabo. Lenkantolo yakhipha umyalo wokuthi u-Ariel Feldman kumelwe aphinde amukelwe emagcekeni esikole ukuze aqedele unyaka wokufunda nokuthi angathiywa ekubhaleni izivivinyo zakhe zokugcina.

Ezinsukwini ezithile ngaphambi kokuqulwa kwecala kokugcina, okwakuhlelelwe ukuba ngo-May 11, 1993, iBhodi Lemfundo lahoxa ekumangaleleni kwalo u-Ariel Feldman. Ngenxa yalokho, ukuqulwa kwalelicala kokugcina kwesulwa, izindaba eziyisisekelo ngalelicala azizange zinqunywe inkantolo, futhi akuzange kumiswe mthetho oyonquma esikhathini esizayo ngesenzakalo esifana nalesi. Nakuba lokhu kushiya loludaba luseyinkulumo-mpikiswano engokomthetho esengadingidwa ngokuqhubekayo, oFakazi BakaJehova basijabulela isimo sengqondo sokucabangela esaboniswa amajaji eNkantolo Ephakeme yakwa-Israel.

Izifundo Ezifundiwe

Kusukela osukwini lukaJesu kuze kube manje, oFakazi BakaJehova baye babhekana nokuphikiswa nobandlululo okuye kwabayisa ezinkantolo eziphakeme zasemazweni amaningi. Lamacala aphenduka ‘ubufakazi kwabezizwe.’ (Mathewu 10:18) Ngisho nasemazweni athile lapho oFakazi bakhe bembalwa khona, uJehova uyaqikelela ukuba igama lakhe laziwe kabanzi. Futhi njengoba kwakunjalo ekhulwini lokuqala ngokungenela okumangalisayo kwelungu elihloniphekile leSanhedrin uGamaliyeli, nanamuhla uNkulunkulu angabangela ukuba imithombo engalindelekile isekele abantu bakhe.

[Ibhokisi ekhasini 15]

“Lokho Uthishanhloko Othile Akwaziyo NgoFakazi BakaJehova”

(Izingcaphuno ezithathwe esihlokweni sikaTom Segev kuyi-Haʼaretz, ka-February 12, 1993)

“Kulelizwe elinakho konke, kukhona noFakazi BakaJehova bakwa-Israel. Ababaningi, futhi ababaningi asebezwile ngabo, naphezu kweqiniso lokuthi kwa-Israel, njengakwamanye amazwe, bazama ukuthola abalandeli bezimiso zabo, kokubili ngezincwadi nangomlomo. Ngandlela-thile bathola lowomfundi wasesikoleni saseHugim. Njengoba azamukela izimiso zalenhlangano, wenqaba ukuhlanganyela ezifundweni zokuvivinya umzimba zokuqeqeshelwa impi kulesisikole. Uthishanhloko akazange avume ukumkhulula kulezizifundo. Uma ngamqonda kahle, umbheka njengosongo lwekusasa lobuZayoni. Kulelisonto uye wangichazela: ‘Siyisikole seZayoni; sifundisa izingane ukwethembeka kuHulumeni nakulelizwe.’ . . .

“URina Shmueli, weNhlangano Yamalungelo Ezakhamuzi yaseHaifa, wazama ukubonisa lothishanhloko ukuba aqaphele ilungelo lomfundi lokulalela unembeza wakhe futhi amkhulule ekuqeqeshelweni impi; lokhu bekungaba isifundo esihle sokubekezela nokubusa ngentando yeningi. Kodwa wala waphetha. Ucabanga ukuthi sibhekene nehlelo elithile eliyingozi elizuza amalungu alo ngokuwayenga. . . .

“Lokhu kwangikhumbuza okuthile okungekuhle neze. Ngakho ngamshayela ucingo lothishanhloko ngase ngimbuza ukuthi yini ngempela ayeyazi ngoFakazi BakaJehova. Wathi akukuningi ayekwazi kodwa wayezwile ukuthi bakhuthele nakwamanye amazwe, nokuthi yena ngokwakhe wake wahlangana nabo eCanada naseJalimane. Ngambuza ukuthi uyakwazi yini okwenziwa kubo eJalimane. Lothishanhloko waphendula: ‘Angikwazi, futhi angifuni nokukwazi.’

“Mhlawumbe iHugim High School inawo umtapo wezincwadi, futhi mhlawumbe kulowomtapo wezincwadi kungenzeka kukhona i-Encyclopedia of the Holocaust, ehlelwe ngu-Israel Gutman. Uma bengenayo lekhophi, kufanele bayithenge. Ngaphansi kwesihloko esithi ‘Earnest Bible Students,’ lothishanhloko uyothola ukuthi amaNazi ayisa oFakazi BakaJehova emakamu okuhlushwa.”