Intsha Iyabuza . . .

Iyini Ingozi Yokudlala Ngemilingo?

INGABE intsha inesithakazelo ngempela emilingweni? Iqembu labacwaningi lafuna ukuthola impendulo ngokuxoxa nabafundi ezikoleni eziphakathi neziphakeme ezingu-115. Le nhlolo-vo yakhipha lezi zibalo ezivula amehlo: Abangaphezu kwesigamu kulabo okwaxoxwa nabo (amaphesenti angu-54) bathi bayayithanda imilingo nezinto ezinamandla angaphezu kwavamile, kuyilapho abayingxenye yesine (amaphesenti angu-26) bathi “bayayithanda kakhulu.”

Abacwaningi base-University of Alaska e-Anchorage bayabhala: “Amaphephandaba nomagazini bezindaba ezimayelana nalokho okuthiwa ukwanda kwehlelo likaSathane . . . baye basakazeka eminyakeni yamuva.” Abacwaningi bathi abukho ubufakazi obuphathekayo bokusekela ukuthi ubuSathane busakazekile phakathi kwentsha. Noma kunjalo, akungabazeki ukuthi intsha eningi inesithakazelo ezicini zobuSathane nemilingo, ngisho noma leso sithakazelo singatheni.

Ngakho enye intsha ingase ibuze ‘Iyini ingozi yokudlala ngemilingo?’ Ukuze siphendule, ake sihlole ezinye zezindlela intsha ezithola isihileleke ngazo emilingweni.

Ukuyenga Kwemilingo

Isihloko esikuyi-U.S.News & World Report siphawula ukuthi “izingane nentsha namuhla bakwazi ukuthola futhi bachayeke ezithombeni nasekwazisweni okuningi ngokushaqisayo—ngokuvamile okwethusayo—okwakungeke kucatshangwe nokucatshangwa eminyakeni engu-20 edlule.” Ilukuluku lenza intsha eningi ifunde izincwadi nomagazini, ibuke ama-video noma ihlole izingosi ze-Internet ezikhangisa ngemilingo.

Ngokwe-BBC News Online, uhlelo lwe-TV oluthandwayo olubonisa ubuthakathi nemikhovu “kuthiwa lukhuthaza izingane ukuba zibe nesithakazelo ebuthakathini.” Omunye umculo onesigqi esinamandla nawo unezici ezinobudlova noma ezinobudemoni. Umlobeli wephephandaba uTom Harpur wabhala ephephandabeni laseToronto i-Sunday Star: “Kufanele ngikhiphe isixwayiso esiqine ngempela ngalokho okwenzekayo [emculweni]. . . . Angikaze ngiyibone into eyonakele kanje. Lezi zingoma zigcwele ubuhlanya, imimoya emibi, amademoni, ukuchithwa kwegazi, iziqalekiso, zonke izinhlobo zobudlova, kuhlanganise nokudlwengula, ukuzicwiya izitho zomzimba, ukubulala nokuzibulala. Ukufa nembubhiso, iziprofetho zokubi, ukuphikwa kwakho konke okuhle nokwamukela konke okwesabekayo nokubi—yizona zinto okukhulunywa ngazo.”

Ingabe ukulalela umculo onjalo kunengxenye ngempela ekuziphatheni okonakalisayo? Ngokusobala kwaba njalo okungenani esenzakalweni esisodwa—sosemusha oneminyaka engu-14 ubudala e-United States owagwaza unina wambulala wabe esezibulala naye. Izindonga zekamelo lakhe zazigcwele izithombe zabaculi be-rock enesigqi esinamandla. Kamuva, uyise wanxusa: “Tshelani abazali ukuba baqaphe ukuthi izingane zabo zilalela muphi umculo.” Wathi esontweni elingaphambi kokuba indodana yakhe ibulale unina, yayilokhu icula ingoma ye-rock “ekhuluma ngegazi nokubulala unyoko.”

Bese kuba khona imidlalo ekwenza umlingiswa othile, eminye yayo evumela abadlali ukuba babe abathakathi nabanye abalingiswa abasebenzisa imilingo. Eminingi yale midlalo ibonisa ubudlova obunobudemoni.a

Noma kunjalo inhlangano yezocwaningo i-Mediascope iyabika: “Ukuhlola kubonisa ukuthi ukuthanda umculo onesigqi esinamandla kungase kube uphawu olubalulekile olubonisa ukuba unkom’ idla yodwa, ukusebenzisa kabi izidakamizwa, ukuphazamiseka engqondweni, ingozi yokuzibulala . . . noma imikhuba yokuzifaka engozini kosemusha, kodwa umculo awuyona imbangela yalokhu kuziphatha. Kucatshangwa ukuthi intsha esinalezo zinkinga kakade ingase ikhangwe umculo onesigqi esinamandla, ngoba isigqi sawo sichaza imizwa yayo ekhathazekile.”

Abacwaningi bangase bangavumelani bonke ngezingozi zokulalela umculo wobuSathane. Kodwa ingabe ukubukela ama-video, ukulalela umculo noma ukudlala imidlalo eqokomisa ubudlova noma ukuzilimaza ngeke kube yingozi? Nokho, ukudlala ngemilingo kuyingozi enkulu ngisho nakakhulu kumaKristu.

Umbono KaNkulunkulu Ngemilingo

Kweyoku-1 Korinte 10:20, umphostoli uPawulu waxwayisa amaKristu: “Angifuni ukuba nibe abahlanganyeli namademoni.” Kodwa angobani wona amademoni, futhi kungani kuyingozi kangaka ukuzihlanganisa nawo? Kalula nje, amademoni yilabo ababeyizingelosi abakhetha ukulandela uSathane uDeveli. Elithi uSathane lisho “uMphikisi” kanti elithi uDeveli lisho “uMnyundeli.” NgokweBhayibheli, lo owayekade eyindodana kaNkulunkulu eyingelosi wazenza ngokwakhe umphikisi nomnyundeli ngokukhetha ukuhlubuka kuNkulunkulu. Ngokuhamba kwesikhathi, wayenga ezinye izingelosi ukuba zihlanganyele naye enkambweni yakhe yokuhlubuka. Ngakho laba bahlobo bakhe baba ngamademoni.—Genesise 3:1-15; 6:1-4; Jude 6.

UJesu wabiza uSathane ngokuthi “umbusi walelizwe.” (Johane 12:31) USathane namademoni akhe ‘banentukuthelo enkulu’ ngenxa yokubhujiswa kwabo okusondelayo. (IsAmbulo 12:9-12) Akumangalisi ukuthi labo abaye bahileleka emademonini baye bathola ukuthi anonya kakhulu. Omunye wesifazane eSuriname owakhulela emkhayeni owawusebenzelana nemimoya wazibonela yena mathupha ukuthi amademoni “akujabulela kakhulu ukuhlukumeza izisulu zawo ezingafuni.”b Ngakho kuyingozi kakhulu ukuzihlanganisa nalezi zidalwa zomoya ezinonya nganoma iyiphi indlela!

Ngenxa yalokho, uNkulunkulu wayala abantu bakhe basendulo, ama-Israyeli, ukuba bagweme yonke imikhuba yemilingo. “Yilowo nalowo ozenza lezi zinto uyisinengiso kuJehova,” kuxwayisa uDuteronomi 18:10-12. AmaKristu nawo axwayiswa ngendlela efanayo ukuthi uNkulunkulu uyobabhubhisa ‘labo abasebenzisa imimoya.’ (IsAmbulo 21:8) UNkulunkulu uyakulahla ngisho nokudlala ngemilingo. “Niyeke ukuthinta into engahlanzekile.”—2 Korinte 6:17.

Ukugqashula Emikhubeni Yemilingo

Ingabe uye wenza iphutha lokudlala ngemilingo? Khona-ke cabangela lokho okwenzeka ekhulwini lokuqala edolobheni lase-Efesu. Abaningi lapho ‘babenza ubuciko bemilingo.’ Kodwa abanye bashukunyiswa imisebenzi yamandla umphostoli uPawulu ayeyenza ngosizo lomoya ongcwele. Waba yini umphumela? “Abaningana impela kulabo ababenza ubuciko bemilingo baletha izincwadi zabo ndawonye futhi bazishisa phambi kwawo wonke umuntu. Futhi babala ndawonye amanani azo bazithola zibiza izinhlamvu zesiliva eziyizinkulungwane ezingamashumi ayisihlanu. Ngakho ngendlela enamandla izwi likaJehova laqhubeka likhula futhi linqoba.”—IzEnzo 19:11-20.

Kusitshelani lokhu? Ukuthi uma umuntu efuna ukuphunyuka emademonini, kumelwe alahle zonke izinto eziphathelene nokukhulekelwa kukaSathane! Lokhu kuhlanganisa zonke izincwadi, omagazini, izithombe, izincwadi zamahlaya, ama-video, iziphandla (“izinto zokugqaba”), nokwaziswa kwamademoni okuvela kuyi-Internet. (Duteronomi 7:25, 26) Lahla noma iziphi izinto ezingase zisetshenziselwe ukubhula, njengamabhola ekristalu noma amabhodi e-Ouija. Lahla nomculo noma ama-video anezihloko zobuSathane.

Kudinga isibindi nokuzimisela ukuthatha izinyathelo eziqiné kanjalo. Kodwa izinzuzo zingaba nkulu kakhulu. Owesifazane ongumKristu okuthiwa uJeanc wathenga umdlalo we-computer owawubonakala ungenangozi ekuqaleni. Njengoba ayedlulela ezigabeni eziphezulu zalo mdlalo, wathola izici zalo mdlalo ezazinobudemoni. Ngokushesha wayesenamaphupho asabisayo anobudlova! UJean uthi: “Ngavuka phakathi nobusuku ngawalahla wonke ama-CD alowo mdlalo.” Waba yini umphumela? “Angiphindanga ngakhathazwa yilutho kusukela lapho.”

Uma ubonisa ukuthi uzimisele ngempela ukugqashula, uyophumelela. Khumbula ukuzimisela uJesu akubonisa lapho uDeveli ezama ukuyenga uJesu ukuba amkhulekele. “UJesu wathi kuye: ‘Hamba, Sathane! Ngoba kulotshiwe ukuthi, “NguJehova uNkulunkulu wakho okumelwe umkhulekele, futhi nguye yedwa okumelwe unikele kuye inkonzo engcwele.”’ Khona-ke uDeveli wamshiya.”—Mathewu 4:8-11.

Ungalwi Nawo Uwedwa

Umphostoli uPawulu usikhumbuza ukuthi wonke amaKristu ‘abambene nendikimba yomoya ababi esezindaweni zasezulwini.’ (Efesu 6:12) Kodwa ungazami ukulwa noSathane namademoni akhe uwedwa. Thola usizo kubazali bakho abesaba uNkulunkulu kanye nabadala ebandleni lobuKristu lakini. Kungase kukubangele amahloni ukuvuma ukuthi uhilelekile, kodwa kungaphumela ekutholeni ukusekelwa okudinga kakhulu.—Jakobe 5:14, 15.

Khumbula futhi ukuthi iBhayibheli lithi: “Melanani noDeveli futhi uyonibalekela. Sondelani kuNkulunkulu, naye uyosondela kini.” (Jakobe 4:7, 8) Yebo, uJehova uNkulunkulu uyokusekela! Uyokusiza ukuba ugqashule ogibeni lwemilingo.

[Imibhalo yaphansi]

[Isithombe ekhasini 20]

Lahla zonke izinto eziphathelene nokukhulekelwa kukaSathane

[Isithombe ekhasini 20]

Qaphela izingosi ze-Internet ezigqugquzela ukusebenzelana nemimoya