Ngasuka Ekubeni Umkhuzi Wempi Ngaba “Isosha LikaKristu”

Njengoba Ilandiswa NguMark Lewis

“Sawubona Nkosi yami.” “Sawubona Mhlonishwa.” “Sawubona Ndunankulu.” Lezi yizindlela zokubingelela engangivame ukuzisebenzisa lapho ngisengumshayeli wezindiza noMkhuzi Wempi webutho elivikela izikhulu zombuso le-Royal Australian Air Force. Ngangishayela izindiza ezithwala izikhulu zoMbuso nezikahulumeni kulo lonke elase-Australia nasemhlabeni wonke. Kodwa manje, sengenza okuthile okuzuzisa kakhulu. Ake ngichaze.

NGAZALELWA ePerth, eNtshonalanga Australia ngo-1951, futhi ngakhuliswa emkhayeni wamasosha. Lapho sengineminyaka engu-15 ubudala, ngaba yilungu leqembu labandiza ngamapharashuti anezinjini. Ngakho ngaqala lapho ukuba nothando lokuhamba ngezindiza.

Ngokushesha ngemva kwalokho, abazali bami baqala ukuhlala ngokwehlukana, futhi umkhaya wakithi wawohloka. Umkhuzi wempi weButho Lasemoyeni nomkhaya wakhe bangamukela lapho ngisaqedela izifundo zesikole esiphakeme. Ithonya lakhe langishukumisela ukuba ngifundele ubusosha eRoyal Australian Air Force Academy.

Ngathola Iziqu Zokundiza

Ngemva kweminyaka engaba yisithupha, ngathola iziqu zesayensi nezokuba isosha leButho Lasemoyeni kanye namaphepha okushayela izindiza. Umsebenzi wami wokuqala wawuhilela ukushayela izindiza zokuthutha impahla yempi kulo lonke elase-Australia, eNingizimu Pacific naseNingizimu-mpumalanga Asia. Sasivame ukundiza siphume phakathi kwezintaba sishone phansi ezigodini siyothi cababa emizileni yezindiza enotshani. Kwakuwumsebenzi oyingozi. Ziningi izindiza zebutho lethu ezaphahlazeka nabantu abalungile abafa ngaleyo minyaka. Kodwa, imigomo yethu yabasiza labo ababehlala ezindaweni eziqhelile. Sasithutha impahla yokwakha amabhuloho, ogandaganda bokwakha imigwaqo, ukudla kosizo oluphuthumayo namaqembu ezokwelapha. Sasithutha nabantu abanesidingo sezempilo esiphuthumayo.

Ngo-1978, ngafaneleka njengomqeqeshi wabashayeli bezindiza futhi ngaphindela e-Air Force Academy ngayofundisa khona. Lapha ngavuselela ubungane noDiane, umfelokazi osemusha owayenentombazanyana eneminyaka emithathu. Sasifunde ndawonye nomyeni kaDiane e-Academy kodwa kamuva washona engozini yendiza. Lapho ngicela uDiane ukuba sishade, wacela isikhathi sokucabangisisa ngale ndaba. Wayengaqiniseki ukuthi wayesafuna yini ukuba nomyeni ongumshayeli wezindiza.

Phakathi naleso sikhathi, ngamukela isikhundla esasizothatha izinyanga ezingu-12 sokuba uMeluleki Wezempi woMphathi-jikelele Wase-Australia. Ukuhlala eNdlini YoMbuso, eCanberra, kwangisiza ukuba ngiqonde ezombangazwe futhi kwakuhilela ukusondelana eduze nezikhulu zomphakathi, ezempi nezenkolo. Lapho isikhathi sami kulesi sikhundla siphela ngabuyela emsebenzini wami wokuqeqesha abashayeli bezindiza. Ngashada noDiane ngokushesha ngemva kwalokho ngo-1980.

Ngo-1982, ngamukela isabelo sokuyosebenza neButho Lasemoyeni Lase-United States njengesikhulu sokuphepha kwezindiza nomphenyi wezingozi zazo. Lo msebenzi wawungihambisa lonke elase-United States nasezindaweni eziqhelile njengaseNyakatho Ireland. Wawuhilela ukuphenya ngezingozi zezindiza nokuhlola imiklamo yazo nezinqubo zokundiza ngenjongo yokuthuthukisa ukuphepha.

Ukuphindela E-Australia

Ngemva kokubuyela e-Australia, sanda emkhayeni wethu saba bane lapho kuzalwa indodakazi yethu uKerry. Ngenxa yokuba matasa emsebenzini, uDiane wayengumama aphinde abe ngubaba emantombazaneni ethu, ngakho ukuphila komkhaya wethu kwawohloka. Ngemva kweminyaka emithathu, ngathola isikhundla sokuqala sokuba umkhuzi weButho Lasemoyeni elivikela izikhulu zikahulumeni, njengoba sengichazile ekuqaleni. Lapho kugqashuka iMpi yasePersian Gulf ngo-1991, ibutho lami lasekela lowo mkhankaso we-UN kanye neminye ePakistan, e-Afghanistan, e-Afrika nakwa-Israyeli.

Ngo-1992, ngaba uMsizi Omkhulu woMphathi WeButho Lezokuvikela. Ukuba umsizi wesikhulu esiphakeme sezempi e-Australia kwangisiza ukuba ngiqonde ubuhlobo obukhona phakathi kwezempi, ezombangazwe ne-UN. Ngaphetha ngokuthi i-UN yayinamaphutha amaningi. Kodwa, yayibonakala iwukuphela kwethemba esinalo lokwenza izwe libe ngcono. Izinto ezazenzeka ekhaya ngaleso sikhathi zangenza ngaqala ukuhlola kabusha indlela engibheka ngayo izinto.

Imibuzo KaDiane Iyaphendulwa

Ngemva kokufa komyeni wakhe wokuqala, uDiane, owayengumRoma Katolika, wayefune izimpendulo zemibuzo yakhe, kodwa wangazithola. Kodwa isimo saba sibi nakakhulu lapho indodakazi yethu endala, uRenee, iqala ukuba nesithakazelo ekusebenzelaneni nemimoya. Lapho esemzini womngane wakhe, uDiane wabona i-Phaphama! eyayimemezela isihloko esikhuluma ngokukhulekelwa kukaSathane.a Wayengakaze ayibone i-Phaphama! Lapho esendleleni eya ekhaya, wayezibuza, ‘Ngingawuthola kanjani lo magazini?’

Ngemva kwezinsuku ezintathu savakashelwa oFakazi BakaJehova, futhi uDiane wawuthola umagazini ayewufuna. Kamuva wamukela isifundo seBhayibheli wabe eseqala ukuya emihlanganweni yobuKristu. Ngangingenankinga nokufundelwa kwakhe futhi ngangize ngiye naye kweminye imihlangano, kodwa ngangingasiboni isidingo sokuzihilela. Ngangingazibheki njengomuntu othanda inkolo. Ngangikholelwa kuNkulunkulu kodwa ngangibone ubuzenzisi obukhulu obabungenza ngingayithathi ngokungathí sina inkolo. Ngokwesibonelo, kwakunzima ukuqonda ukuthi kungani abefundisi basempini babekhuluma ngothando nokuthula kodwa bebe besekela impi.

Ngokuhlakanipha, uDiane wayeshiya omagazini INqabayokulinda ne-Phaphama! ukuze ngibafunde. Ngangibafunda abanye bese ngibabuyisela ngokucophelela lapho ngibathathe khona. Ngangingafuni ukuba acabange ukuthi nginesithakazelo. Njengoba ulwazi lwami lweBhayibheli lukhula, ngaxakwa imibhalo emibili. Owokuqala isAmbulo 19:17, 18, esikhuluma ngezinyoni ezidla inyama “yezinduna zamabutho.” Omunye kwakuyisAmbulo 17:3, esikhuluma “ngesilo sasendle esinombala obomvu.” OFakazi babebheka lesi silo njengesifanekisela i-UN, umbono owawungqubuzana nowami mayelana naleyo nhlangano yomhlaba wonke.b Kodwa ngazama ukuyiziba imibuzo enganginayo.

Ngo-1993, uDiane wangicela ukuba ngibe khona lapho ebhapathizwa. Ngangingasilindele leso sicelo. Ngambuza, “Uma kufanele ukhethe, ubungakhetha mina noma uJehova?” Waphendula: “UJehova. Kodwa asikho isidingo sokukhetha. Nginifuna nobabili ekuphileni kwami.” Ngaqaphela ngaleso sikhathi ukuthi kwakudingeka ngifunde okwengeziwe ngalo muntu owayesekuphileni kukaDiane. Umdala ongumKristu endaweni wacela ukufunda nami iBhayibheli, futhi ngavuma.

Ngaba nesithakazelo esikhulu eziprofethweni zeBhayibheli, ikakhulukazi lezo ezikhuluma ngempi nomlando wezombangazwe. Ngokwesibonelo, lapho ngisaqeqeshwa eButhweni Lasemoyeni, ngangifunde ngokunqoba kwamaGreki asendulo kwezempi. Manje ngase ngifunda ukuthi ingxenye enkulu yalowo mlando yayibhalwe emakhulwini eminyaka ngaphambili encwadini kaDaniyeli isahluko 8. Leso siprofetho kanye nezinye, kancane kancane zangenza ngabona ukuthi iBhayibheli liphefumulelwe uNkulunkulu.

Ngaqala ukuyibheka ngelinye iso i-UN. Ngangazi ukuthi impi ayinakuzixazulula izinkinga zesintu, ukuthi ukuthula kweqiniso kwakungenakuba khona uma kunosongo lwempi, nokuthi i-UN ayinakuzixazulula izingxabano zezombangazwe, zenkolo nezobuhlanga ezibangela impi. Ngaqala ukubona ukuthi uNkulunkulu kuphela owayengaxazulula izinkinga zesintu. Empeleni, kwabonakala sengathi wayekwenza lokho kakade ebuzalwaneni bomhlaba wonke boFakazi BakaJehova. (IHubo 133:1; Isaya 2:2-4) Ngazibuza, ‘Kodwa ngingawushiya kanjani umsebenzi wami wezempi ukuze ngikhonze uNkulunkulu?’

Ukumelela Iqiniso LeBhayibheli

Kwafika olwamanqamu ngo-1994 lapho ngiya emhlanganweni wesigodi woFakazi BakaJehova eSydney. Isimiso sasihlanganisa nedrama yeBhayibheli yasendulo eyayiqokomisa ukukhetha okwadingeka isizwe sakwa-Israyeli wasendulo sikwenze phakathi kokukhonza uJehova noma uBhali, unkulunkulu wamaKhanani. Umprofethi kaJehova u-Eliya wabekela ama-Israyeli inselele: “Kuyoze kube nini nixhugela phakathi kwemibono emibili? Uma uJehova enguNkulunkulu weqiniso, landelani yena; kodwa uma kunguBhali, landelani yena.” (1 AmaKhosi 18:21) Lawo mazwi angihlaba enhliziyweni. Njengama-Israyeli, ngangimanqikanqika. Kwakufanele ngikhethe: Ingabe ngangizokhonza uJehova noma ngiqhubeke nomsebenzi wami wezempi?

Lapho sisendleleni eya ekhaya ebusuku, ngatshela uDiane ukuthi ngizolishiya iButho Lasemoyeni ngibe omunye woFakazi BakaJehova. Wamangala ngalesi sinqumo sami esingalindelekile kodwa wasisekela ngokugcwele. Ngemva kwezinsukwana isinqumo sami sasingakashintshi, ngakho ngafaka incwadi yokusula emsebenzini.

Ngaleso sikhathi, nganginguMkhuzi WeButho Labaqalayo e-Australian Defence Force Academy enhloko-dolobha, eCanberra. Ngangengamele ezempi nokuqeqeshwa kwabantu abangaba ngu-1 300 ebuthweni leMigundatshani, laseManzini nelaseMoyeni. Ngosuku lokugcina lwalowo nyaka wezifundo, ngatshela amasosha nezikhulu ezingu-400 ukuthi ngiyashiya empini ukuze ngingene endlini ngendlu ngifundise abantu iBhayibheli njengesikhonzi sokuzithandela esingumKristu. Leso simemezelo savusa izingxoxo ezithakazelisayo.

Ukuba Yisikhonzi Sesikhathi Esigcwele

Ngaqala ukwenza umsebenzi wokushumayela ngosuku olulandela ukusula kwami emsebenzini. Ngemva kwezinyanga ezintathu, ngo-April 1995, ngabhapathizwa. Khona-ke, ngokushesha ngabhalisa njengephayona elivamile, okwakusho ukuchitha isikhathi sami sonke enkonzweni yasobala.

Ukusuka kwami ekubeni umkhuzi wempi ngiba “isosha likaKristu” kwasho ukwenza ushintsho oluningana. (2 Thimothewu 2:3) Esinye sezabelo zami zokuqala kwakuwuphatha imibhobho emihlanganweni yobuKristu. Esikhundleni sokunikeza iziyalezo, kwadingeka ukuba ngifunde ukucela ukuba kwenziwe okuthile. Ukucabangela abanye nothando kwaba yizinto ezibaluleke kakhulu kunokwenza izinto ngendlela engenaphutha, nakuba ngisenenkinga yokulinganisela kulezi zimfanelo. Futhi ngenxa yomholo omncane, kwadingeka ukuba umkhaya wami wenze ukuphila kube lula.

Ngangiwujabulela kakhulu umsebenzi wokushumayela, futhi kusenjalo namanje. Ngesinye isikhathi lapho sishumayela nendodakazi yethu eyayineminyaka engu-9 ngaleso sikhathi, uKerry, ngayicela ukuba iphawule indlela abaninikhaya abasabela ngayo. Ngokushesha saqaphela ukuthi abantu abaningi babengenasithakazelo kodwa abanye babehlonipha futhi benesithakazelo. Lokhu kwasikhuthaza sobabili. Enye indodakazi yethu yatadisha iBhayibheli okwesikhashana kodwa yakhetha ukuba ingamkhonzi uJehova njengamanje.

Mina noDiane sakhuthaza uKerry ukuba alwele ukungenela inkonzo yesikhathi esigcwele. Muva nje, ngiye ngajabulela ukuya eSikoleni Senkonzo Samaphayona kanye naye. Yena ubeqala, kanti mina besengiya okwesibili. Yeka indlela okujabulisa ngayo ukumbona yena nenye intsha bethuthuka ngokomoya futhi bephishekela inkonzo yobuKristu!—IHubo 110:3.

Inala Yezibusiso

Uma ngibheka emuva, ngibona izici ezifanayo kanye nezihlukile phakathi kokukhonza empini nokuba isosha likaKristu. Zombili lezi zindima zidinga ubuqotho, ukulalela, ukuthembeka, ukuzikhuza nokuzidela. Kodwa nakuba abaningi empini bengase bazimisele ukufela izwe lakubo nabangane, amaKristu eqiniso kudingeka athande ngisho nezitha zawo. (Mathewu 5:43-48) Futhi nakuba amaqhawe empi engase aklonyeliswe ngesenzo esisodwa sobuqhawe, amaKristu eqiniso azuza umusa kaNkulunkulu ngokukhuthazela ngokwethembeka enkonzweni—okungase kusho ukubonisa isibindi nakuba uphikiswa, uhlekwa usulu nalapho ubhekene nezinye izilingo unyaka nonyaka. (Hebheru 10:36-39) AmaKristu esikanye nawo angabantu abahle kakhulu engibaziyo.

Ngokuphambene nendlela engangibingelela ngayo eshiwo ekuqaleni kwale ndaba, kulezi zinsuku ngibingelela ngokuthi “Sawubona, Dadewethu,” noma ngithi “Sawubona, Mfowethu.” Yeka indlela okujabulisa ngayo ukukhonza enkonzweni yobuKristu nabantu abamthanda ngempela uNkulunkulu! Kodwa ilungelo elikhulu kunawo wonke elokukhonza oPhezukonke, uJehova, uqobo lwakhe! Ayikho indlela engiyicabangayo ezuzisa ngaphezu kwalena yokusebenzisa ukuphila kwami.

[Imibhalo yaphansi]

[Amazwi acashunwe esihlokweni ekhasini 14]

Nakuba abaningi empini bengase bazimisele ukufela izwe lakubo nabangane, amaKristu eqiniso kudingeka athande ngisho nezitha zawo

[Isithombe ekhasini 12, 13]

Ngishayela indiza yezikhulu yeButho Lasemoyeni, ngidlula ePhalamende, eCanberra

[Isithombe ekhasini 15]

Idrama yeBhayibheli, emhlanganweni wesigodi ka-1994 eSydney, e-Australia

[Isithombe ekhasini 15]

NginoKerry eSikoleni Senkonzo Samaphayona

[Isithombe ekhasini 15]

NginoDiane noKerry namuhla