Ukubuka Okwezwe

◼ “Iqembu lezazi zezinkanyezi ezisebenzisa izibonakude i-Subaru ne-Keck eMauna Kea [eHawaii] liye lathola izixhobo ezinkulu zemithala ezihlanganisa ibanga elingathatha iminyaka eyizigidi ezingu-200 uma uhamba ngejubane lokukhanya.” Lezi zixhobo ziyizinto ezinkulu ezaziwayo ezake zatholwa.—INGOSI YESIBONAKUDE I-SUBARU, EJAPANE.

◼ I-Office for National Statistics e-United Kingdom ibika ukuthi “inani lemishado [eNgilandi naseWales] ngo-2006 laliphansi kunawo wonke eminyakeni engu-110. Liyanda inani lemibhangqwana ekhetha ukukipita.”—I-GUARDIAN WEEKLY, EBRITHANI.

◼ Ngokwe-Pew Forum on Religion and Public Life, “abantu abadala abangamaphesenti angu-44 baye bashintsha inkolo, bazihlanganisa nenkolo ethile nakuba ngaphambili babengenayo inkolo, noma bayeka ngokuphelele ukulandela amasiko enkolo ethile.”—E-U.S.A.

Amakolishi Nobulili “Obungenazibopho”

“Ngaphandle kwamakolishi athile angaphansi kwamasonto . . . , kunomehluko omncane phakathi kwamakolishi namayunivesithi omphakathi, azimele nawamaKatolika uma kuziwa ‘emkhubeni wobulili obungenazibopho’ ovamile ezikoleni—owenza abafundi bafune ukuhlanganyela ubulili nabantu abahlukahlukene.” Kusho isazi semfundiso yamaKatolika nesekela likaprofesa waseyunivesithi uDonna Freitas ngemva kokwenza ucwaningo ngokuziphatha okungokobulili nenkolo emakolishi aseMelika. Ngokwe-National Catholic Reporter, uFreitas wathi ukuntuleka kwethonya lenkolo ekuziphatheni okungokobulili akwembuli nje “ithonya elinamandla lomkhuba wobulili obungenazibopho” kuphela kodwa “nokwehluleka kwamasiko angokwenkolo ukunqanda lokhu kuziphatha.”

Abazali Bayakhokhelwa Ukuze Bazale Amantombazane

Umbiko we-BBC News uthi uhulumeni waseNdiya unika abazali abampofu imali engaba ngu-R23 000 ukuze bazale amantombazane. Imikhaya iyothola umvuzo wemali ngokuzalwa kwentombazane naphakathi kwezigaba ezihlukahlukene zokukhula kwayo ize ibe neminyaka engu-18. Nakuba ukubulawa kwamantombazane nokukhishwa kwezisu uma owesifazane ekhulelwe intombazane kwavalwa ngokomthetho ngo-1994, kusaqhubeka. Empeleni, kulinganiselwa ukuthi kule minyaka engu-20 edlule, kuye kwabulawa imibungu engamantombazane engaba yizigidi eziyishumi ngokushishwa kwezisu, okuye kwakuphazamisa kakhulu ukulingana kwamanani abesilisa nabesifazane kwezinye izindawo. Ngokwenani labantu elatholakala ngo-2001, ezweni kabanzi kwakunamantombazane angu-927 kubafana abayinkulungwane abaneminyaka engaphansi kweyisithupha futhi lelo gebe lalanda. Esifundazweni esithile ngokwesilinganiso kwakuzalwa amantombazane angu-793 kubafana abayinkulungwane.

Ukusabela Kwezinyoni Emsindweni

Ezinye izinyoni zenza umzamo omkhulu wokuba zizwakale nakuba kunomsindo edolobheni. Umagazini i-New Scientist uthi nakuba umsindo wasemadolobheni ungase ubacasule abantu, ungase usho “ukufa nokuphila” ezinyonini, njengoba amaduna ecula ukuze “akhange izinsikazi futhi aphawule imingcele yendawo yawo.” Ngenxa yokuthi umsindo wasemadolobheni mkhulu, ezinye izinyoni zenza umculo wazo uzwakale kakhudlwana ngokucula ebusuku noma ngokuculela phezulu. Ngaphezu kwalokho, lo magazini uthi akuzona izinyoni zasemadolobheni kuphela ezizivumelanisa nezimo ngale ndlela. Lezo ezihlala eduze “nezimpophoma nemifula nazo ziculela phezulu.”