“Yilwa Ukulwa Okuhle Kokholo”
1 Umphostoli uPawulu weluleka uThimothewu ukuba ‘alwe ukulwa okuhle kokholo.’ (1 Thim. 6:12) UPawulu ngokwakhe waphila ngokwalawo mazwi. Lapho esekhulile ngeminyaka, wakhuluma ngokuqiniseka ukuthi wayekulwile ukulwa okuhle. (2 Thim. 4:6-8) Ngazo zonke izindlela, waphishekela inkonzo ngesibindi nangokukhuthazela. Ngokulingisa isibonelo sakhe, singaba nesiqinisekiso esifanayo sokuthi senza konke okusemandleni ekulweleni kwethu ukholo lobuKristu.
2 Yenza Umzamo Odingekayo: UPawulu wasebenza kanzima enkonzweni. (1 Kor. 15:10) Nathi senza okufanayo lapho sifuna bonke abafanelekayo ensimini yethu. (Math. 10:11) Ukuze sifinyelele abanye babo, kungase kusho ukuvuka ekuseni sifakaze kulabo esihlangana nabo emgwaqweni. Noma kungasho ukusebenza ntambama noma kusihlwa ukuze sithole abantu lapho sebebuyele emakhaya.
3 Kudinga ukuzithiba nokuhlela okuhle ukuze sifike ngesikhathi lapho sizohlangana neqembu lethu lesifundo sencwadi ukuze siye enkonzweni yasensimini. Ngokwesibonelo, amanye amalungu omkhaya waseBethel ahamba imizuzu engaba ngu-45 ngezimpelasonto ukuya nje kuphela enkonzweni ukuze ahlanganyele namabandla abelwe kuwo. Futhi, kufanele sibazise abanye abamemezeli nemikhaya esinayo ebandleni abahamba ibanga elide kodwa bafike ngesikhathi. Izibonelo ezinjalo zokukhuthala nokuhleleka komuntu siqu kufanele zilingiswe.
4 Kufanele sishukumiseleke ukuba silandelele bonke esibatholayo abanesithakazelo. Ngisho nalapho sihambisa izincwadi emgwaqweni noma ngokwethukela, kufanele senze umzamo wokuthola ikheli noma inombolo yocingo yalowo muntu. Singabe sesimhambela ukuze sithuthukise isithakazelo futhi sizame ukuqala isifundo seBhayibheli.
5 Phuma Njalo Enkonzweni: UPawulu wayephuma njalo futhi engashwampuluzi ekushumayeleni. (Roma 15:19) Kuthiwani ngawe? Ingabe uhlanganyela njalo enkonzweni? Ingabe usuke wahlanganyela enkonzweni yasensimini kule nyanga? Abaqhubi beZifundo Zencwadi Zebandla banesithakazelo sokubona wonke umuntu oseqenjini labo ehlanganyela enkonzweni ngo-August. Bayokusiza ukuba wenze kanjalo.
6 Ngokulingisa isibonelo sikaPawulu sokusekela ngokugcwele izindaba ezinhle, siyoqhubeka ‘silwa ukulwa okuhle kokholo.’