IBhokisi Lemibuzo
◼ Ngamunye wethu angasiza kanjani ekulondolozeni isimo esihle sokufunda emihlanganweni yebandla? (Dut. 31:12)
Ngenxa yenhlonipho ejulile ngoJehova nangelungiselelo lakhe lemihlangano yebandla, sonke sikhuthazwa ukuba sifike kusenesikhathi futhi sikulungele ukufundiswa nguye. Kuyasiza kakhulu ukuhlala ezihlalweni eziphambili ehholo, izihlalo ezisemuva sizishiyele labo abanezingane ezincane nalabo okungenzeka bafike sekwephuzile. Ngaphambi kokuba umhlangano uqale, omakhalekhukhwini nezinye izinto zobuchwepheshe kufanele bacushwe ngendlela yokuthi bangaziphazamisi izilaleli. Iziphazamiso ziyoba ncane kakhulu lapho bonke abakhona belondoloza isimo senhlonipho phakathi nemihlangano.—UmSh. 5:1; Fil. 2:4.
Lapho abasanda kuhlanganyela beqala ukuya emihlanganweni yebandla, othile ebandleni obaziyo angase acele ukuhlala nabo phakathi nemihlangano. Lokhu kungaba usizo kakhulu uma benezingane okufanele ziqeqeshwe. Ukuba khona emihlanganweni kungenzeka kuyinto entsha emkhayeni. Uma kunjalo, bayokwazisa kakhulu ukuhlala emuva lapho bengeke baphazamise khona abanye uma kwenzeka abazali kudingeka baphume ukuze bayonakekela abantwana babo. (IzAga 22:6, 15) Imikhaya enezingane ezincane akufanele ihlaliswe kwenye indawo lapho izingane zingase zibe nomuzwa wokuthi zikhululekile ukubanga khona umsindo. Ngokuvamile kungcono ukuba umzali aphume ayokhuza izingane noma ayonakekela izidingo zazo ngaphandle kwehholo abuye uma eseqedile.
Abalindi balwela ukulondoloza isimo esifanele endlini yokukhulekela. Basiza imikhaya nalabo abangase bafike sekwephuzile ukuba bathole indawo efanele yokuhlala. Benza ngokuqonda nangokuhlakanipha lapho besiza abanye ukuba bahlale kahle ngaphandle kweziphazamiso. Basebenzisa ukwahlulela okuhle lapho besingatha noma yiziphi iziphazamiso ezingalindelekile. Uma ingane iziphatha ngendlela ephazamisa abanye, abalindi bangasiza ngomusa.
Bonke abakhona emihlanganweni yokukhulekela bangaba nengxenye ekwakheni isimo esihle sokufunda ngoJehova nangezinjongo zakhe zomhlaba omusha onokuthula nokulunga.—Heb. 10:24, 25.