Imibiko Evelele Yonyaka Odlule

IZEHLAKALO zonyaka odlule zinikeza ubufakazi obengeziwe bokuthi sesingene shí “ezinsukwini zokugcina,” iZwi likaNkulunkulu elizichaza ‘njengezibucayi okunzima ukubhekana nazo.’ (2 Thim. 3:1) Nokho, njengoba izinsuku zokugcina ziya ziba nzima, isibusiso sikaJehova ezincekwini zakhe ezithembekile emhlabeni wonke siya siba sobala ngokwengeziwe. Kungakhathaliseki ukuthi oFakazi BakaJehova babhekene nezinhlekelele zemvelo, ubugebengu nobudlova, ukugula, ukucindezeleka, ukukhula, ukuphikiswa, noma ukunganakwa, ngamandla kaJehova bayaqhubeka ‘bewugijima ngokukhuthazela lo mncintiswano obekwe phambi kwabo.’—Heb. 12:1.

“UKUPHELA KWENKOLO YAMANGA KUSEDUZE!”

Ngo-October nango-November 2006, oFakazi BakaJehova bafaka umfutho emsebenzini wabo wokushumayela emhlabeni wonke ukuze basakaze i-Kingdom News No. 37, ethi “Ukuphela Kwenkolo Yamanga Kuseduze!” Abantu basabela kanjani kulesi sigijimi esinamandla?

Indoda yaseSweden eyayikhathazwe ubuzenzisi enkolweni yamanga yathi: “Lidl’ ubhedu!” Njengale ndoda, baningi abaqale ukufunda iBhayibheli ngenxa ye-Kingdom News.

ENepal

EKathmandu, uDil wahambisa i-Kingdom News endodeni esontayo kodwa eyayishiywe umkayo ezinyangeni ezimbili ngaphambili ngoba yayidakwa. Lapho uDil nomyeni wakhe uBuddha bephindela beyoxoxa nge-Kingdom News, le ndoda yathi ayikuthandi ukuziphatha kwamanye amalungu esonto nokuthi lokho ekuzwa koFakazi BakaJehova kuhluke kakhulu kulokho eyayikuzwa esontweni. Umzalwane wayibonisa isAmbulo 18:2-4 wayesegcizelela ukubaluleka kokuphuma ‘eBhabhiloni Elikhulu.’ Ekuhambeleni kwesithathu, baqala isifundo besebenzisa isifundo 13 sencwajana ethi Yini UNkulunkulu Ayifunayo? Lapho bephindela okwesihlanu, bathola inkosikazi yayo isibuyile ekhaya. Le nkosikazi yayazi ngoFakazi BakaJehova futhi yayisithanda isigijimi sethu. Lapho bebuyela okwesikhombisa, bafundela le ndoda nomkayo. Inkosikazi yathi, “Umyeni wami akasaphuzi manje.”

EBrazil

Umshayeli wesithuthuthu esisebenza njengetekisi owayethole i-Kingdom News, wakhangisa ngayo ngokuyinamathisela emhlane izinsukwana. Abagibeli babezoyibona nakanjani njengoba ayebathutha.

Lapho odade ababili eBrazil besondela emzini othile, bamangazwa ukubona uphawu oluthi: “Ungangena, kodwa ngeke uphume usaphila.” Bethukile, babuza abazalwane ababili ukuthi kufanele benzenjani. Abazalwane banquma ukuthi yibona abazongena kule ndlu. Ngemva kokuthandazela isiqondiso sikaJehova, laba bazalwane bangena egcekeni base beshaya izandla okuyisiko lendawo lokukhuleka. Umninikhaya oyiphoyisa, wayamukela ngomoya omuhle i-Kingdom News. Wabachazela ukuthi uvuselela indlu yakhe nokuthi unempahla eningi yokwakha ngemva kwendlu. Lolu phawu wayelubekele ukwethusa izigebengu. Lapho abamemezeli bebuya, wamukela isifundo seBhayibheli.

EMongolia

UTsetsegmaa wayesezame kaningi ukushumayeza udadewabo omdala. Nakuba ayeke aba khona emihlanganweni embalwa naseSikhumbuzweni iminyaka emibili ilandelana, akabonisanga mdlandla otheni futhi wasenqaba isifundo seBhayibheli. Kepha lapho ebona i-Kingdom News No. 37 emzini kaTsetsegmaa, waba nesithakazelo. Engxoxweni eyadonsa amahora amabili, wabuza imibuzo eminingi, uTsetsegmaa ayiphendula ngeBhayibheli. Emangazwe yilokho ayekuzwa, udadewabo omdala wathi ufisa ukufunda okwengeziwe, futhi manje uqhutshelwa isifundo seBhayibheli njalo.

EGeorgia

OFakazi bahambisela owesifazane i-Kingdom News, wabuza ukuthi iphathelene nenkolo yini. Lapho ezwa ukuthi kunjalo, wayithatha wabathembisa ukuthi uzoyifunda. Lapho oFakazi bephindela kuye, lo wesifazane wabuza ukuthi iSonto Lobu-Orthodox lalimkhohlisile yini. Wayekhathazekile ngezimo zezwe kanye nokuwohloka kwesimilo entsheni. Wathi kunzima ukuthola izinto abangaxoxa ngazo nezingane zakhe. OFakazi bambonisa eyesi-2 Thimothewu 3:1-5, futhi wamukela incwadi ethi Okufundiswa IBhayibheli. Lapho oFakazi behamba, wathi: “Ngiyaqiniseka ukuthi inkolo yenu eyeqiniso. Kumelwe ngiyincome indlela intsha yenu egqoka ngayo, ukwethembeka kwayo nezindinganiso zayo eziphakeme zokuziphatha.” Manje lo wesifazane ujabulela ukufunda omagazini bethu njalo.

EBangladesh

URichel oneminyaka engu-19 wasakaza i-Kingdom News No. 37 ensimini eyayingakaze isetshenzwe. Nakuba yayiqhelile impela lapho ayehlala khona, uRichel wayenomuzwa wokuthi kufanele aye ngoba kwakuwumkhankaso okhethekile lona. Emzini wesibili, wathola amantombazane amabili angamaKristu okuzisholo ayesanda kushonelwa uyise ezinyangeni ezimbili ngaphambili. Abuza: “Kungani uNkulunkulu evumele lokhu ukuba kwenzeke?” URichel waphendula ngeBhayibheli, futhi amantombazane ayamukela ngenjabulo i-Kingdom News ayesethi kuRichel, “Sikuthunyelelwe uNkulunkulu lapha ekhaya.” Eliqaphela iphango lezinto ezingokomoya lalawa mantombazane, uRichel wasikisela isifundo seBhayibheli, futhi asamukela ngokushesha. Akukhuthalele ukufunda futhi anemibuzo eminingi. URichel kudingeka acwaninge kakhulu, kodwa ave ekujabulela ukwaneliseka akuthola ngokubafundisa iqiniso laba bantu abalambile ngokomoya.

E-Armenia

U-Eliza, iphayona elivamile, wathola ucingo oluvela kuLilit, owake wafundelwa iBhayibheli. Wathi, “Kumelwe nakanjani ushiye konke obuzokwenza kusasa uze kimi sizovuselela isifundo sethu.” Kwase kwenzekeni? Lapho uLilit eqala ukutadisha iBhayibheli noFakazi BakaJehova, umyeni wakhe wayethé kuye: “Khetha phakathi kwami noJehova.” Ngakho wayeka ukufunda. Manje, ngemva kweminyaka emibili, wanikezwa i-Kingdom News No. 37 ngenkathi ehamba nezingane zakhe epaki. Lokhu kwavuselela isithakazelo sakhe kangangokuba watshela umyeni wakhe ngesibindi, “Mhlawumbe wena ungathanda ukuphila kahle iminyaka engu-50 bese uyafa, kodwa mina ngifuna okwengeziwe kunalokho.” Wabe esethembisa umyeni wakhe ukuthi ukuqhutshelwa isifundo seBhayibheli kuzomsiza anqobe izici zobuntu bakhe ezingathandeki, ngakho wayeka ukumphikisa. Manje uqhutshelwa isifundo ngemvume yomyeni wakhe, onakekela izingane zabo ngesikhathi yena efunda.

ECambodia

Phakathi nomkhankaso okhethekile, isithunywa sevangeli esigama laso nguHugues saxoxa nendoda eyiSulumane. Lapho ifunda i-Kingdom News, le ndoda yavuma ukuthi izinkolo akufanele zihlanganyele empini. Kwayona yayidunyazwe inkolo yayo, eyathi yayisizakhele igama elibi ngenxa yontamolukhuni. UHugues wafundela le ndoda amaHubo 46:9, akhuluma ngesithembiso sikaNkulunkulu somhlaba ongenayo impi. Ngesonto elilandelayo uHugues wayibonisa incwadi ethi Okufundiswa IBhayibheli. Manje le ndoda ilazisa ngokujulile iBhayibheli futhi ifundelwa njalo.

ERussia

Ngemva kokwamukela i-Kingdom News kodade ababili, umpristi wobu-Orthodox wathi: “Ngiyazi ukuthi nineqiniso, nokuthi uNkulunkulu wenu uJehova uzobhubhisa yonke inkolo yamanga ashiye eyenu.” Wayesebatshela ukuthi uyazi ngethemba lasezulwini nangepharadesi lasemhlabeni. Odade bambuza ukuthi pho kungani ehlezi enkolweni yakhe ebe azi ukuthi izobhujiswa. Waphendula, “Phela ngiqashiwe. Nginezindlu ezintathu nezimoto ezine. Angeke ngivele ngikushiye konke lokhu.”

UMKHANKASO OKHETHEKILE WOKUMEMEZELA ISIKHUMBUZO

NgoMsombuluko, ngo-April 2, 2007, oFakazi BakaJehova emhlabeni wonke baphakamisa umusa ongafanelwe kaNkulunkulu nothando lwakhe ngokukhumbula iSidlo SeNkosi Sakusihlwa. Kulungiselelwa lesi senzakalo esibalulekile, kwasakazwa isimemo esikhethekile emhlabeni kabanzi kusukela ngo-March 17 kuya ku-April 2. Abantu abaningi abafundelwa iBhayibheli nabantwana basebenzisa lesi sikhathi somsebenzi owengeziwe ukuze baqale ukumemezela izindaba ezinhle.

E-United States

Kwaphela amahora acishe abe mabili ngobusuku beSikhumbuzo umzalwane osebenza endlunkulu yomhlaba wonke yoFakazi BakaJehova eBrooklyn, eNew York, elokhu ephendula izingcingo ubuthaphuthaphu, zivela kubantu ababefuna ukwazi ukuthi bangayaphi ukuze babe seSikhumbuzweni. Abaningana ababeshaya ucingo balushaya ngenxa yesimemo ababesitholile esasibamemela eSikhumbuzweni. Omunye wesifazane wathi: “Ngiyangena nje endlini futhi ngithola isimemo sokuya eSikhumbuzweni senu esinamuhla kusihlwa. Ngifuna ukuya, kodwa angazi ukuthi siqala nini.”

UJacquelin oneminyaka engu-16 wanikeza uthisha wakhe isimemo seSikhumbuzo futhi wamchazela ukubaluleka kwalesi senzakalo. Engalindele, uthisha wakhe wafika. Njengoba iSikhumbuzo sasikwelinye lamaHholo Omhlangano OFakazi BakaJehova, ngemva kwesimiso uJacquelin wabonisa uthisha wakhe lesi sakhiwo. Yamhlaba umxhwele uthisha indlela yonke into eyayihlanzeke futhi ihleleke ngayo, ikakhulukazi ukuzwa ukuthi lesi sakhiwo sasakhiwe izisebenzi zokuzithandela nanokuthi sinakekelwa yizo. Ngemva kokusho ukuthi wayeyijabulele kangakanani inkulumo, uthisha wabuza: “Ngingasithola kanjani isifundo seBhayibheli isikhulumi esikhulume ngaso?” UJacquelin waphendula ngokuthokoza: “Ush’ entshweni, ngingakufundela!” UJacquelin waqala ukufundela uthisha wakhe njalo ngoMsombuluko ngemva kwesikole.

ENingizimu Afrika

Ibandla elinabamemezeli abangu-9 endaweni engayodwa, laxakeka lapho lithola isimemo esisodwa kuphela esivela egatsheni esikhundleni sezingu-500 elalizi-odile. Kamuva lezwa ukuthi ihhovisi leposi lalapha lalihlulekile ukuthola ukuthi iposi elithunyelwe yigatsha kufanele liye kubani ngoba isigqebhezana sekheli sase sisukile. Izisebenzi zaseposini zalivula iposi ngoba zizama ukuthola ukuthi ingabe liya kubani noma lisuka kubani. Lapho zibona izimemo zeSikhumbuzo, zaphetha ngokuthi lezi zimemo kudingeka zisakazwe, ngakho zafaka isimemo esisodwa ebhokisini ngalinye laseposini, ngaleyo ndlela zazisakaza zonke izimemo ezazithunyelwe. Konke lokhu abafowethu bakwazi lapho bethola isimemo esisodwa ebhokisini leposi lebandla esikhundleni se-oda lalo. Kodwa yeka indlela laba bamemezeli abangu-9 abajabula ngayo ukuba nabangu-42 eSikhumbuzweni, iningi labo elalifike liphethe izimemo elalizithole emabhokisini eposi!

E-Italy

UPatrizia wanikeza uGabriella, afunda naye iBhayibheli, isimemo seSikhumbuzo futhi wamchazela ukubaluleka kokuba khona. Indodana kaGabriella eneminyaka emihlanu uMattia, eyayilalele ngokucophelela njengoba kuxoxwa, yabuza ukuthi ingasithola yini isimemo ukuze isinike uthisha wayo. Ngakusasa, uMattia wanikeza uthisha wakhe isimemo, wachaza ukuthi sibaluleke kangakanani iSikhumbuzo nokuthi ufisa kakhulu ukuba abe khona. Ngemva kwezinsuku ezimbalwa emhlanganweni wabazali nothisha, uthisha kaMattia wachazela uGabriella ukuthi ukuqiniseka kukaMattia kumhlabe umxhwele kangangokuthi wayesenqume ukuya eSikhumbuzweni. Lo thisha wahamba noGabriella noMattia baya eSikhumbuzweni. Wayilalela ngokucophelela inkulumo futhi wakuthanda kakhulu ukuziphatha okuhle kwazo zonke izingane. Ekuphetheni, wathi useyaqonda ukuthi kungani iSikhumbuzo sibalulekile, njengoba uMattia ayeshilo. Ngemva kwalokho, uMattia wanikeza uthisha incwadi ethi INcwadi Yami Yezindaba ZeBhayibheli ukuze aphathele indodana yakhe, futhi Gabriella noPatrizia sebehlele ukubuye baxoxe kabanzi naye.

EMexico

Omunye umdala washumayeza umfundisi waseHabe wabe esemmemela eSikhumbuzweni. Lo mfundisi wasamukela ngenjabulo isimemo, futhi umdala wamangala lapho emuzwa ebuza ukuthi angalinika yini ibandla lakhe izimemo. Abazalwane bajabula kakhulu ngobusuku beSikhumbuzo lapho bebona lo mfundisi efika namalungu angu-40 esonto lakhe, ngalinye liphethe isimemo elalisosiveza emnyango. Umfundisi wathi baningi ababefuna ukuza, kodwa bacabange ukuthi ngeke bavunyelwe ukungena bengasiphethe isimemo. Abamemezeli abangu-11 kuleli bandla babechichima injabulo ngokuba nabangu-191 eSikhumbuzweni!

E-Australia

Insizwa efunda iBhayibheli noFakazi yaqala ukutshela abanye endaweni yokuvivinya umzimba lapho isebenza khona ngesifundo sayo seBhayibheli. Omunye wabo kwakungowesifazane owamukela isimemo sayo sokuba eze eSikhumbuzweni. Esemncane, lo wesifazane wayeye ezwe kuculwa eHholo LoMbuso eliseduze futhi wacela kubazali bakhe ukuya khona, kodwa bamenqabela bathi angalokothi azihlanganise noFakazi BakaJehova. Noma kunjalo waya kweminye yemihlangano kodwa walahlekelana nabo ngemva kokuba umkhaya wakubo uthuthele kwenye indawo. Njengoba eseSikhumbuzweni, wethulwa kudade owabe esefunda naye iBhayibheli. Waqala ukuza emihlanganweni yebandla, nomyeni wakhe naye waqala ukubonisa isithakazelo. Phakathi nalesi sikhathi, le nsizwa esebenza endaweni yokuvivinya umzimba iye yafaneleka ukuba ummemezeli ongabhapathiziwe futhi manje ithuthukela ekubhapathizweni.

EKazakhstan

Owesifazane othakazelayo wathi ngenxa yezingane zakhe ezincane, ngeke akwazi ukuya eSikhumbuzweni. Nokho, ngosuku lweSikhumbuzo, indodakazi yakhe eneminyaka emihlanu yavele yazigqokisa yaqonda ngqo eHholo LoMbuso. Lapho lo mama ebona ukuthi indodakazi yakhe ilahlekile, waphuma inqina eyoyifuna. Wacabanga ukuthi kungenzeka ukuthi iye eSikhumbuzweni, futhi nangempela wayithola eHholo LoMbuso. Manje njengoba naye azithola eseseSikhumbuzweni, wasale esenquma ukuhlala eceleni kwendodakazi yakhe alalelisise isikhulumi.

UKUMISA IZINDABA EZINHLE NGOKOMTHETHO

EFrance

Kusukela ngo-1996 ezinye iziphathimandla zaseFrance bezilokhu zifuna igatsha likhokhe izintela emadlaneni encane etholwa amalungu omkhaya waseBethel eLouviers. Kepha ngo-March 28, 2007, i-Administrative Court yaseParis yanquma ukuthi akukho zintela okudingeka zikhokhwe njengoba amalungu omkhaya waseBethel engezona izisebenzi ezikhokhelwayo. Inkantolo yathi “isimo abazithola bekuso oFakazi BakaJehova abangamalungu eBethel eseLouviers, ngokuyinhloko sisekelwe ekubeni kwabo nezinkolelo ezifanayo.” Lesi sinqumo siqinisekisa ukuthi umkhaya waseBethel wenza umsebenzi ongokwenkolo futhi sivumelana nesinqumo esifanayo esakhishwa inkantolo ephakeme yaseBrazil.

Ecaleni elihlukile, idolobha laseLyon lenqaba ukuqashisela oFakazi BakaJehova ihholo likamasipala ukuze babe neSikhumbuzo. Kodwa ngo-March 15, 2007, ijaji lenkantolo ephakeme layala idolobha ukuba libaqashisele ihholo oFakazi BakaJehova. Idolobha ladlulisela icala eMkhandlwini WoMbuso, kodwa uMkhandlu WoMbuso wasisekela isinqumo senkantolo ephakeme, futhi wathi izenzo zedolobha “ziwukuxhaphaza okungathí sina nokungemthetho kwenkululeko yokuhlangana, okuyinkululeko ewumgogodla.” UMkhandlu WoMbuso waphinde wayala ukuba idolobha likhokhe izindleko zecala zenhlangano yoFakazi BakaJehova yendawo.

Naphezu kwalesi sinqumo esihle eLyon, oFakazi BakaJehova eFrance bayaqhubeka beyizisulu zabaphikisi, abezindaba, ngisho nezikhulu zikahulumeni. Ngokwesibonelo, engxoxweni yasobala ngo-2005, owayeke waba ngummeleli weSishaya-mthetho Sikazwelonke SaseFrance wasola oFakazi BakaJehova ngokuthi “bahlelwe kuhle kweqembu lezigelekeqe eliphethwe isigebengu esiwubhongoza.” OFakazi BakaJehova bafaka icala enkantolo ngenxa yalokhu kunyundelwa, futhi ngo-July 2007 iNkantolo Yamacala Adlulisiwe eRouen yabavuna oFakazi, ithi “amazwi eqisayo” omnyundeli “ayenezinhloso ezimbi [futhi] ayeseqele ngalé kwemingcele yenkululeko yokukhuluma.” Uhulumeni waseFrance uyaphikelela nodaba lokutheliswa okungenabulungisa nokungemthetho kweNhlangano YoFakazi BakaJehova. Okwamanje lolu daba lusezithebeni zeNkantolo YaseYurophu Yamalungelo Abantu [European Court of Human Rights (ECHR)], futhi abafowethu bayaqiniseka ukuthi uJehova uyabasekela.

E-Uzbekistan

Kuye kwabikwa izehlakalo ezingaphezu kwenkulungwane zokuboshwa, ukuvalelwa nokuhlaselwa kwabafowethu nodadewethu. Abaningi baboshwa ngenkathi yeSikhumbuzo ngo-2005 nango-2006. Siyajabula ukubika ukuthi ngo-2007 azikho izinkinga ezabikwa ngokuphathelene neSikhumbuzo. Noma kunjalo, ukuthula kwaba okwesikhashana. Ngokushesha ngemva kwaso, kwaboshwa umzalwane nodade futhi balahlwa icala lokufundisa ngezenkolo. Lo mzalwane, oshadile futhi onezingane ezimbili, wagwetshwa iminyaka emibili ejele futhi wavalelwa ngaso leso sikhathi. Udade yena wagwetshwa iminyaka emibili yokuqondiswa izigwegwe, okuhilela ukuba uhulumeni athathe amaphesenti angu-20 omholo wakhe njengesijeziso.

EGeorgia

Ngo-May 3, 2007, i-ECHR yakhipha isahlulelo ngazwilinye ngokumelene nohulumeni waseGeorgia, ngenxa yokubekezelela kwawo ubudlova benkolo obenziwa koFakazi BakaJehova futhi yayala ukuba izisulu zinxeshezelwe. Kusukela ngo-October 1999 kuya ku-November 2002, kwaba nezigigaba ezingu-138 zokuhlaselwa koFakazi BakaJehova ngobudlova. Kwezinye izimo, nakuba amaphoyisa ayekhona, enqaba ukuthatha isinyathelo sokubavikela. Inkantolo yathola ukuthi ngokungabavikeli abafowethu kulezi zidlamlilo zenkolo, uhulumeni wangaphambili waseGeorgia awugcinanga nje ngokungahloniphi izibopho owazenza kuyi-European Convention on Human Rights, kodwa waphinde wangayihlonipha nenkululeko engokwenkolo yabafowethu. Lesi sinqumo esicacile sithumela umyalezo onamandla wokuthi inkululeko engokwenkolo akumelwe ishaywe indiva nokuthi oFakazi BakaJehova kumelwe bavikelwe ngisho nalapho bephikiswa iningi.

E-Eritrea

Ngemva kweminyaka emihlanu uhulumeni uqale ukucindezela wonke amaqembu ezinkolo ezizimele ezingabaliwe ezinkolweni ezine eziqashelwa uhulumeni, oFakazi BakaJehova bayaqhubeka bebhekana nokuphikiswa okunzima. Ngisho nalapho bekhulekela ezindlini zabo, abafowethu bangaboshwa, bahlukunyezwe futhi bacindezelwe kanzima ukuba baphike ukholo lwabo. Kuze kube u-April 2007, bekunoFakazi BakaJehova abangu-24 abebelokhu besejele ngenxa yokuya emihlanganweni, ukushumayela, noma ukwenqaba ukuya empini ngenxa kanembeza. OFakazi abathathu ababoshiwe baneminyaka engu-60 noma ngaphezulu, abayishumi bavalelwe ngaphansi kwezimo ezimbi kakhulu, futhi abathathu bebelokhu bebhadle ejele kusukela ngo-1994. Nakuba imizamo eyengeziwe yokusiza abafowethu ingakaphumeleli, silokhu sinethemba lokuthi maduzane bazoyithola impumuzo, futhi siyaqhubeka sibheke kuJehova ohlenga izinceku zakhe “ekucindezelweni nasebudloveni.”—IHu. 72:14.

E-Andorra

Ukuqashelwa ngokomthetho obekulokhu kuzanywa kusukela ngo-1973, bagcine bekutholile abafowethu ngo-December 14, 2006. Kunabamemezeli boMbuso abangaphezu kuka-150 e-Andorra.

EKorea

Sekuyiminyaka engaphezu kuka-50 abafowethu eNingizimu Korea begqunywa ejele ngoba benqaba ukuya empini. Sekufe abahlanu ngenxa yalokhu. Ngemva kokuzama zonke izintuba zomthetho eNingizimu Korea, uMfoweth’ uYoon noChoi badlulisela icala labo eKomitini Yamalungelo Abantu yeNhlangano Yezizwe. Ngo-November 3, 2006, le komiti yanquma ukuthi iNingizimu Korea yayinecala lokungawahloniphi amalungelo alaba bafowethu, yayala nokuba abafowethu banxeshezelwe. Le komiti yaphinde yayala iNingizimu Korea ukuba iqiniseke ukuthi labo abenqaba ngenxa kanembeza abaphoqelelwa ukuba bakhethe phakathi kokwephula izindinganiso zabo nokudonsa izigwebo zasejele. Ngokwesilinganiso, bangu-70 abazalwane abagqunywa ejele nyanga zonke.

Esikhathini esedlule, abafowethu abaningi ababebhekene nalesi simo bamane bakhetha ukuba bahambisane nesinqumo senkantolo sokuba badonse ejele unyaka nesigamu. Nokho, muva nje, iningi labafowethu abasha liye lanquma ukuwadlulisa amacala alo, okuphumele ekutheni kube namacala amaningi asathethwa. Ngenxa yalokho, uhulumeni waseKorea umemezele ukuthi uhlose ukuba kube nohlobo oluthile lwenkonzo yokusebenzela umphakathi engaphathelene nezempi. Kusazobonakala ukuthi kuzokwenzeka yini lokho nokuthi uma kwenzeka, leli lungiselelo bayolamukela yini labo abanembeza wabo uyabavumela ukuba benze enye inkonzo.

E-Argentina

Ngo-July 2007, ungqongqoshe wezobulungisa namalungelo abantu wasayina isinqumo somnyango wakhe esivuma ukuthi uDaniel Victor Guagliardo waboshwa ngokungemthetho ngoba enqabe ukujoyina umbutho wezempi ngenxa kanembeza wakhe oqeqeshwe ngeBhayibheli. Lesi sinqumo singase sizuzise nabanye ababoshwa ngokungeyikho ngoba benqabe ukubuthelwa kwezempi ngenxa kanembeza.

E-Armenia

Abazalwane abangu-19 baye bamangalelwa lapho benqaba ukwenza inkonzo yomphakathi, eqinisweni, ebizobenza bayekethise ukungathathi hlangothi kwabo kobuKristu. Kwathi ngo-September 2006, incwadi evela ehhovisi lomshushisi omkhulu yatshela abazalwane ukuthi amacala abo asesuliwe. Yize kunjalo, kuze kube manje uhulumeni awukakabi nohlobo lwenkonzo yomphakathi olungamukeleka kumaKristu. Ngenxa yalokho, maphakathi no-2007, kwase kunabafowethu abasebasha abangu-71 ababedonsa izigwebo zeminyaka eya kwemithathu.

UVahan Bayatyan ungomunye wentsha eningi engoFakazi eye yabekwa icala futhi yaboshwa e-Armenia ngenxa yalokhu. Ngemva kokuba egwetshwe isigwebo sonyaka nengxenye, umshushisi wacela ukuba athole isigwebo esithé ukuba qatha, ethi ukwenqaba ngenxa kanembeza kukaMfoweth’ uBayatyan “akunasisekelo futhi kuyingozi.” Inkantolo yokudlulisela amacala yavuma, yandisa isigwebo ngonyaka, futhi nenkantolo ephakeme yasisekela lesi sinqumo. UMfoweth’ uBayatyan wabe esefaka isicelo kuyi-ECHR. I-ECHR yathi iyasamukela lesi sicelo, kanjalo ibonisa ukuzimisela kwayo ukulihlola ngokwengeziwe lolu daba. Sithemba ukuthi kuyoba nomphumela omuhle kuleli cala, oyosiza uMfoweth’ uBayatyan kanye nabanye ababhekene nesimo esifanayo.

E-Azerbaijan

Nakuba oFakazi BakaJehova bebhaliswe ngokomthetho e-Azerbaijan, abafowethu nodadewethu bayaqhubeka bebhekana nezinselele eziningi. Ngokwesibonelo, ngo-December 24, 2006, abafowethu nodadewethu nabathakazelayo abangaphezu kuka-200 babebuthene ngokuthula eBaku ngenjongo yokuxoxa ngeBhayibheli, ngenkathi kufika amaphoyisa ahlomile ezomisa lo mhlangano, ehamba nabacosheli bezindaba zethelevishini nezikhulu zendawo. Nakuba amaphoyisa ayengenayo incwadi egunyaza ukusesha, angena ngodlí kulezi zakhiwo eziqashiwe, abopha ababekhona. Okungenani ababili ababekhona bathelwa induku. Amaphoyisa ashaqa inqwaba yezincwadi zeBhayibheli, ibhokisi lomnikelo elinemali, amaphepha ezomthetho, kanye nama-computer amaningana asetshenziselwa ukuhumusha iBhayibheli nezincwadi zeBhayibheli. Iningi lababoshwa ladedelwa ekupheleni kosuku. Phakathi kwabo kwakunezisebenzi zokuzithandela eziyisithupha zakwamanye amazwe ezaxoshwa ngoba kuthiwa “zisakaza inkulumo-ze engokwenkolo.” Abafowethu lapha basongelwa ngokuboshwa uma benqaba ukungenela inkonzo yezempi. Baphinde babhekane nobunzima lapho kudingeka bangenise izincwadi kuleli zwe.

Kwa-Israel

Ngo-February 5, 2007, iHaifa District Court yanquma ukuthi iHaifa Congress Center (ICC) yayicwase oFakazi BakaJehova ngokubenqabela ukuba basebenzise ihholo layo ukuze babe nomhlangano. Inkantolo yayala i-ICC ukuba ikhokhe ingxenye yezindleko zecala njengesinxephezelo. Ummeli-jikelele wathi abaphathi be-ICC “banesibopho esiyisisekelo . . . sokuphatha amakhasimende abo ngokulinganayo, okuyisibopho esingazange sihlonishwe kulokhu.” Lesi sinqumo esihle sizokwenza kube lula ngabafowethu kwa-Israel ukuba bahlangane njengamaqembu amakhulu ukuze bakhulekele.

ETajikistan

Izisebenzi ezilawula ukungena kwempahla ezweni zathatha inqwaba yezincwadi zethu, umnyango wezamasiko wanxuswa ukuba uvale izincwadi nenhlangano yethu. Njengoba kwase kunobutha, izithunywa zevangeli ezimbili ezaqeqeshwa eGileyadi zaxoshwa kuleli. Kwathi ngo-October 11, 2007 iziphathimandla zawuvala umsebenzi woFakazi BakaJehova. Kwafakwa izikhalo ngokuphathelene nakho konke lokhu kuphathwa kabi, futhi sithandazela ukuba uJehova avule indlela yokuqhubeka sishumayela kule nsimu ekhiqizayo, ebe nokwanda ngamaphesenti angu-14 phakathi nonyaka wenkonzo ka-2007.

E-Ukraine

Ngosuku olwandulela inkulumo ekhethekile eyayizoba seL’viv Stadium ngo-May 12, 2007, abaphathi benkundla banqotshwa ukucindezela kwabaphikisi futhi bahoxisa isicelo sabafowethu sokusebenzisa inkundla. Ngokushesha kwathintwa izikhulu zikahulumeni zase-Ukraine nezase-United States ukuze ziqinisekise abaphathi benkundla ukuthi oFakazi BakaJehova abalona usongo enhlalakahleni yedolobha. Izingxoxo zazisaqhubeka ngisho nangosuku lwenkulumo njengoba izinkulungwane zoFakazi BakaJehova ezivela ezingxenyeni ezihlukahlukene ze-Ukraine ziqala ukutheleka eL’viv ngezimoto, amabhasi kanye nezitimela. Abafowethu babuthana ngokuthula ngaphandle kwamasango enkundla ahluthulelwe, belinde ngesineke bejabulela nobudlelwane obufudumele futhi behlabelela nezingoma zoMbuso. Kungazelelwe, sekusele imizuzu engu-20 ngaphambi kokuba isimiso siqale, izisebenzi zenkundla zatshelwa ukuba ziyovulela abafowethu amasango ukuze bangene. Bangaphezu kuka-27 000 abafowethu nodadewethu abathutheleka enkundleni ukuze bajabulele inkulumo ekhuthazayo eyanikezwa umbonisi wamagatsha.

ETurkmenistan

OFakazi BakaJehova ababhalisiwe eTurkmenistan. Ngemva kwenkathi yokuthula, iziphathimandla zakuleli zwe ziphinde zaqala ukushushisa abafowethu. Nokho, abafowethu nodadewethu ngesibindi nangobuhlakani bayahlangana futhi bahlanganyele izindaba ezinhle nomakhelwane babo. (Math. 10:16) Abafowethu abasebasha abathathu baye baboshelwa ukwenqaba ukungenela inkonzo yezempi ngenxa kanembeza. Bonke balahlwa icala; ababili balengiselwa isigwebo, kodwa oyedwa wagwetshwa unyaka nesigamu esejele. Ngenxa yokuthi izimo zasejele zinzima kakhulu, amanye amazwe aye ezwa ngosizi lwakhe. Abazalwane bakwamanye amazwe abangabameli baye banqatshelwa ukuthola ama-visa okungena kuleli zwe ukuze bazosiza ngokumela abafowethu enkantolo. Nokho, akukho ziphathimandla ezingathiya imithandazo yethu yokucela usizo ekubeni ifike koPhezukonke.—1 Thim. 2:1, 2.

EKazakhstan

Izikhulu eziyisithupha eziphuma ehhovisi lomshushisi zaphazamisa umhlangano owawusemzini kadade, endaweni oFakazi BakaJehova abangabhalisiwe kuyo. Omunye umzalwane owayengekho ngisho nakulo mhlangano kanye nodade abayisihlanu bahlawuliswa imali enkulu. Bonke bafaka izikhalo.

ETurkey

Ngo-July 31, 2007, igatsha laseTurkey lajabula ukuthola isiqinisekiso sokuthi inhlangano ebizwa ngokuthi i-Association for the Support of Jehovah’s Witnesses iye yabhaliswa ngokomthetho. Lokhu kubhaliswa kwenzeka ngemva komshuduliswano owathatha iminyaka emibili owahlanganisa ukuyiswa enkantolo uhulumeni, ngoba ungabaza ukuthi inqubo yegatsha iyavumelana nomthetho-sisekelo. Ngemva kokuba inkantolo ephansi e-Istanbul iqinisekise ukuba ngokomthetho kwenqubo yegatsha, uhulumeni wadlulisela icala enkantolo ephakeme. Kodwa inkantolo ephakeme yavumelana nesinqumo senkantolo ephansi, yaphendleka kanjalo indlela yokuba sibhaliswe. Le nhlangano entsha engokwenkolo esemthethweni inikeza igatsha amandla okuthenga nokuba abanikazi bendawo, ukuqasha izindawo zemihlangano emikhulu, ukwamukela iminikelo, nokuba ivikele ngokomthetho izithakazelo zoFakazi BakaJehova enkantolo.

OFakazi BakaJehova ababili abamangalelwa “ngokuphazamisa abantu” ngenkathi besakaza i-Kingdom News No. 37 bahlawuliswa. Nokho, i-Istanbul Sisli Peace Court yayihoxisa leyo nhlawulo, ithi “ukuhambisa izincwadi zoFakazi BakaJehova . . . kuhambisana nemigoqo yenkululeko yokucabanga nokukhulekela” nokuthi izakhamuzi zaseTurkey “zinenkululeko yokusakaza izinkolelo zazo.” Noma kunjalo, kunezinye izinselele abafowethu eTurkey ababhekana nazo, njengendaba yokungathathi hlangothi, eyenza ukuba abafowethu abaseminyakeni yokubuthelwa empini babhekane nosongo lokuboshwa nokuhlawuliswa.

Njengoba singabona kule mibiko eyandulele, ngokuvamile oFakazi BakaJehova bafaka izikhalo eNkantolo YaseYurophu Yamalungelo Abantu lapho amazwe aseYurophu ebekela inselele ilungelo lethu lokukhulekela uNkulunkulu wethu. Maphakathi no-2007, kwakunezicelo ezingu-22 ezazilinde ukusingathwa yile nkantolo, izicelo eziphathelene nezindaba ezifana nokungathathi hlangothi, ukubhaliswa ngokomthetho nokushushiswa. Abafowethu nodadewethu ababhekana nalezi zinselele, kungaba seYurophu noma kwezinye izindawo, bayakudinga ngempela ukusekelwa imithandazo yethu.—2 Kor. 1:10, 11.

UKWETHEMBEKA NOBUQOTHO

Kule Ncwadi Yonyaka, uzofunda ngendlela abafowethu eRussia abalondoloza ngayo ubuqotho phakathi nesikhathi samaSoviet lapho oFakazi BakaJehova bevinjelwe. Ukuphikiswa kwakunonya futhi kungachazeki. Ngisho nasemazweni lapho senza khona umsebenzi wethu ngenkululeko, uSathane nenzalo yakhe bayaphikelela bezama ukwephula ubuqotho bethu ngezindlela ezicashe kakhudlwana. Noma kunjalo, yeka indlela okuyijabulisa ngayo inhliziyo kaJehova lapho izinceku zakhe zihlala zithembekile! (IzAga 27:11) Nazi ezinye izibonelo ezibonisa indlela abantu bakaNkulunkulu abaye babonisa ngayo ukholo nokwethembeka ezimweni zansuku zonke emhlabeni kabanzi.

ESweden

Ukunqoba ukuyengelwa ebulilini yizisebenzi zasesibhedlela bekulokhu kuyinselele eqhubekayo kudadewethu oyiphayona osebenza esibhedlela esizimele. Usezisungulele indlela ephumelelayo yokuvimbela izimo ezinjalo. Zisuka nje, utshela izisebenzi ezintsha ukuthi ungomunye woFakazi BakaJehova, futhi ngokuvamile uzitshela nokuthi ushadile. Usebenzisa noma yiliphi ithuba elivelayo ukuze axoxele asebenza nabo ngezinto abafana ngazo nomyeni wakhe, egcizelela isibopho somshado esiqinile abanaso. Lapho kunesidingo sokuxoxa ngesiguli nodokotela, uhlela ukuba bahlangane egunjini lokudlela lapho kukhona nabanye abantu. Ezimweni ezingalindelekile, uma kwenzeka kungena othile egunjini asebenzela kulo bese evala umnyango, ngokushesha uthandaza kuJehova bese egcina isimo sinobungane kodwa sigxile emsebenzini.

EJalimane

Sekuyiminyaka engu-13 uMarian eqashwe inkampani efanayo esenyakatho yeJalimane. Njengoba esebenza amashifu, bekulokhu kunzima ukuba abe semihlanganweni yaphakathi nesonto. Uyachaza: “Lokhu bekungenza ngingajabuli, ikakhulu njengoba ngiyazisa kangaka imihlangano yethu. Ngamnxusa ngiphindelela uJehova ukuba angisize ngithole indlela yokuba ngibe khona kuyo yonke imihlangano.” Wathandazela ukuba athole isibindi sokucela enduneni yakhe, eyavuma ukuba asheshe ashayise ngobusuku bemihlangano, inqobo nje uma ewuqedile umsebenzi wakhe. Leli lungiselelo lahamba kahle kwaze kwaba yilapho isikhundla senduna yakhe sesithathwa enye engazange imvumele ukuba asheshe ashayise. Wayezomisa kanjani uMarian? Uyakhumbula: “Ngenhlonipho ngachazela induna yami entsha ukuthi ngizocela ukukhuluma nomnikazi wenkampani.” Lapho exoxa nomnikazi wenkampani, uMarian wanikeza ubufakazi obuhle, wachaza nezizathu zokufuna ukuba khona emihlanganweni. Umnikazi wenkampani wamvumela uMarian ukuba asheshe ashayise ngobusuku bemihlangano, uma nje bonke abanye asebenza nabo bevuma. Ngakho uMarian wabiza ozakwabo ukuze abachazele isimo, nabo wabanikeza ubufakazi obuhle. Manje uMarian uyakwazi ukuba khona kuyo yonke imihlangano yaphakathi nesonto. Uthi: “Ngilwe kanzima ukuze ngikwazi ukuba khona emihlanganweni, kodwa ukuthandaza ngokujulile kuJehova kunginike amandla angaphezu kwavamile.”

EBrithani

USophie oneminyaka engu-16 ukuthola kuvivinya ukholo ukumenyelwa njalo emaphathini esikole. Uthi: “Nakuba eminye imibuthano izwakala izoba mnandi, ngiyazi ukuthi ngiyozisola uma ngingaya ngoba kungase kube nezimo eziyongilimaza ngokuhamba kwesikhathi. Enye intombazane muva nje ingimemele ephathini, yagcizelela ukuthi kumane ‘kuwumbuthano’ nje. Kamuva ngathola ukuthi le phathi yayingempelasonto efanayo nosuku lwayo lokuzalwa. Ngiyabonga ngokuthi angiyanga ngoba ngezwa kamuva ukuthi iningi labangane bayo basesikoleni ladakwa njengoba abazali bayo babengekho ngalobo busuku. Yingakho ngikhetha ukuzilibazisa nalabo abaseqinisweni abaneminyaka ehlukahlukene yobudala abayongizuzisa ngokomoya. Mina nomfowethu simema abancane nabadala ukuba beze bazodlala nathi umculo, sose inyama, noma siphume sishaywe umoya. Ngakho uma abantu bengicela ukuba ngiye nabo emaphathini, ngiyazibuza ukuthi buzothinteka kanjani ubuhlobo bami noJehova. Sengiyabona ukuthi awuphuthelwa yilutho ngokwenza okulungile.”

E-Italy

Kwase kukaningana amantombazane esikoleni sikaGiovanni oneminyaka engu-17 emeshela, kodwa kwakuneyodwa ngokukhethekile eyayiphikelela kunamanye. Lapho ibona ukuthi uGiovanni akayinaki, yambhalela incwadi ithi: “Ngicabanga ukuthi singafanelana. Uyangichaza. Ngithanda ubuntu bakho futhi akugcini lapho. Ngithemba ukuthi uzokwenza isinqumo esihle. Okuthandayo, u-.” Incwadi yaphetha ngegama layo futhi yabe isiyimanqaza kwasala umfanekiso wezindebe zayo. UGiovanni uthi, “Kufanele ngivume ukuthi lezo zinsuku zazinzima. Ngazibuza ukuthi ngiyophinde ngiyithole yini intombazane enhle njengale. Lapho engifunda nabo bezwa ngalokhu, bangihlohla ukuba ngiyivume. Bathi, ‘Ungadlali ngaleli thuba, uzobe uyisilima uma ungavumi.’ Ngazizwa sengathi ngilahlekelwa uphawu lwami lobuKristu. Ngathandaza kuJehova futhi ngakhuluma nabazali bami—okwaqala kwabamangaza lokhu ngoba babengaqaphele ukuthi kudingeka ngibhekane nesimo esinje. Saba nesifundo esijulile seBhayibheli ndawonye, ikakhulukazi sisebenzisa incwadi ethi Intsha Iyabuza—Izimpendulo Ezisebenzayo. Ngakhuluma nabazalwane abavuthiwe ebandleni. Ekugcineni, ngenza isinqumo esilungile futhi ngasenqaba isicelo sayo. Kumelwe ngisho ukuthi manje engifunda nabo bayangihlonipha ngenxa yokwenqaba kwami.”

EMexico

“Lapho ngineminyaka engu-19 nje kuphela,” kukhumbula u-Antonio oneminyaka engu-59 futhi oseneminyaka engu-37 ebhapathiziwe, “ngathola ukuthi nginohlobo olubi lwesifo samathambo. Kuye kwangicindezela kakhulu ukuphathwa isifo esiye sangigoga ngokuphelele futhi sangigcina ngisesihlalweni sabakhubazekile iminyaka engu-35. Ngezinye izikhathi ngiyadikibala. Kodwa ukuhlala ngimatasa emisebenzini yobuKristu ngokwezinga elivunyelwa impilo yami kuyangaqinisa.” Eminyakeni engu-7 edlule, isimo sika-Antonio saba sibi nakakhulu ngemva kokufa kukanina owayemnakekela. Wayezobhekana kanjani nalesi simo u-Antonio? Uyalandisa: “Kusukela ngaleso sikhathi, ngiye ngabona ukuthi uJehova akazilahli izinceku zakhe kunalokho uzinika usizo eziludingayo. Ibandla lahlela ukuba kube nomzalwane ozonginakekela, futhi abanye abazalwane bayangisiza ngezidingo zami eziyisisekelo.” U-Antonio ulangazelela isikhathi eziyogcwaliseka ngaso zonke izithembiso zoMbuso.

“YENZA INDAWO YETENDE LAKHO IBE BANZI”

“Yenza indawo yetende lakho ibe banzi. Mabelule izindwangu zetende zetabernakele lakho elikhulu.” (Isaya 54:2) Ukugcwaliseka okumangalisayo kwala mazwi esiprofetho kungabonakala esidingweni esilokhu sanda sezindawo zokukhulekela kanye nezakhiwo zamagatsha ezinkulu. Ngaphezu kwayo yonke eminye imisebenzi yokwakha eyenziwe emhlabeni kabanzi ngonyaka odlule, la magatsha ayisithupha alandelayo anikezelwe, aye aba umthombo wenjabulo enkulu koFakazi BakaJehova.

EPuerto Rico

Ngemva kweminyaka engu-13 nje kuphela izakhiwo zegatsha ziqediwe, kudingeke ukuba linwetshwe ngenxa yokuthi eminye iminyango yase yandisiwe. Inkulumo yokunikezela yabekwa ilungu leNdikimba Ebusayo uDavid Splane ngoMgqibelo, ngo-September 16, 2006.

EColombia

Abafowethu nodadewethu abavela emazweni angu-30 babuthana egatsheni laseColombia ngo-November 11, 2006, ukuze bajabulele ukunikezelwa kwezakhiwo ezinwetshiwe eFacatativá, engamakhilomitha angu-42 enyakatho-ntshonalanga yeBogotá. Kwakukhona abangu-3 605. Abaningi abase beneminyaka engu-30 noma engu-40 bagcinana bangana ngothando, futhi bonke bajabulela inkulumo yokunikezela eyabekwa uGerrit Lösch, oyilungu leNdikimba Ebusayo.

EFiji

Uma uhamba ngezinyawo imizuzu eyisihlanu usuka maphakathi nenhloko-dolobha yaseFiji, iSuva, ufika ehhovisi legatsha elihle, elibheke ichweba. NgoMgqibelo, ngo-November 11, 2006, uGeoffrey Jackson, oyilungu leNdikimba Ebusayo, wethula inkulumo yokunikezela ezilalelini ezingu-410.

EBurundi

U-November 25, 2006, waba usuku olungalibaleki koFakazi BakaJehova kuleli zwe elihle elisenkabeni ye-Afrika. Abangu-1 141 ababekhona abavela emazweni angu-11, bajabulela ukuhlanganyela noGuy Pierce, oyilungu leNdikimba Ebusayo, ekunikezelweni kwezakhiwo zegatsha ezintsha nezinhle. Isibusiso sikaJehova sisobala, futhi kunamathuba amahle okuthi abaningi basazohlanganyela nathi ekukhulekeleni uJehova.

ERwanda

Ngemva kweminyaka engu-30 yothuthuva, ehlanganisa ukuvinjelwa nempi yombango, abafowethu nodadewethu baseRwanda bajabulela ukuba noGuy Pierce ekunikezelweni kwehhovisi labo legatsha elisha nelikhangayo elizungezwe izingadi ezinhle.

Naphezu kwezenzakalo eziyinhlekelele zokuqothulwa kohlanga, okwabulawa abafowethu abaningi kuzo, umsebenzi kaJehova uye waqhubeka uchuma kuleli zwe elaziwa ngokuthi iZwe Lamagquma Ayinkulungwane. Abangu-553 abajabulela isimiso sokunikezela ngoMgqibelo, ngo-December 2, 2006, babehlanganisa nezihambeli ezingu-112 ezivela emazweni angu-15.

E-Uganda

Igatsha elisha elisemaphethelweni aseningizimu enhloko-dolobha, iKampala, lanikezelwa ngoMgqibelo, ngo-January 20, 2007. Abangu-665 ababekhona babehlanganisa izihambeli ezingu-170 ezivela emagatsheni angu-20 kanye no-Anthony Morris, oyilungu leNdikimba Ebusayo, owanikeza inkulumo yokunikezela.

“UJEHOVA WENZE INTO ENKULU”

Ngokungangabazeki, sinesizathu sokujabula uma sicabangela imisebenzi emangalisayo kaJehova yonyaka odlule. Nganhliziyonye, sinanela amazwi okubonga omhubi: “UJehova wenze into enkulu ngakwenzile kithi. Sijabulile.”—IHu. 126:3.

[Ibhokisi/Isithombe ekhasini 9]

Umkhankaso Womhlaba Wonke Ngempela

Abanye abantu ezindaweni ezihlukahlukene bazibuza ukuthi ingabe ngempela i-Kingdom News yayisakazwa emhlabeni wonke. Ngokwesibonelo, umninikhaya owayekungabaza lokhu eBrazil, watshela ummemezeli ukuba ame kancane njengoba eshayela umngane wakhe ose-United States ucingo ukuze athole ukuthi useyitholile yini. “Yebo,” kuphendula umngane wakhe, “ngiyithole emizuzwini eyishumi edlule.” Ehlabeke umxhwele, lo mninikhaya wayamukela i-Kingdom News futhi wathembisa ukuthi uzoyifundisisa.

[Isithombe ekhasini 12]

Kwakunesimemo esisodwa vo ebhokisini leposi lebandla

[Isithombe ekhasini 25]

U-Antonio ulungela ukuya enkonzweni

[Izithombe ekhasini 28, 29]

Amagatsha Anikezelwe

EPuerto Rico

ERwanda

EColombia

EBurundi

EFiji

E-Uganda