Okuphawulwa Abafundi Balomagazini
Inguquko YamaKatolika Ngicabanga ukuthi isihloko senu esikhuluma ngomlando wenkolo (September 8, 1989) eqinisweni sasibhalwe kahle. Nokho, ngikholelwa ukuthi nenza iphutha elikhulu ekumkhipheni kwenu ngokuphelele uMartin Luther ‘enzondweni yamaKatolika ngesizwe samaJuda.’ UMartin Luther wakhuluma amazwana anenzondo ngokumelene nalabo bohlanga lwamaJuda, ebabiza ngokuthi “abantu abonakele nabaqalekisiwe” ngisho nangokuthi “odeveli.”
E.W., United States
Lesihloko sabhekisela emikhubeni eyonakele yeSonto lamaKatolika, hhayi ekushiyekeni kwabaholi bezinguquko bamaProthestani. Ekuqaleni uLuther wayemelene nenzondo yamaKatolika ngesizwe samaJuda. Nokho, incwadi yesiJalimane ethi “Die Juden und Martin Luther—Martin Luther und die Juden,” (“The Jews and Martin Luther—Martin Luther and the Jews”), eyabhalwa uHeinz Kremers, iyachaza: “Ekuqaleni uMartin Luther wayenobungane ngakumaJuda, njengoba wayelindele ukuthi ayezophendukela ebuKristwini uma eseshunyayeziwe ivangeli elihlanzekile. Lapho lelithemba lingagcwaliseki, waba isitha esikhulu samaJuda.”—ED. UbuSathane Sangethusa isembozo sikamagazini wesiNgisi kaOctober 22, 1989! Bengilokhu ngibathola bengabakhayo labomagazini. Kodwa lomagazini uyangethusa futhi uyangikhungathekisa. Akukubi yini ukuba nemifanekiso yobuSathane ekhaya lakho kungakhathaliseki ukuthi eyaluphi uhlobo?
P.W., United States
Indaba yezenzo zobuSathane iyethusa ngempela. Nokho, sizizwa siphoqelekile ukuxwayisa abafundi ‘ngamacebo kaSathane,’ futhi ngezinye izikhathi lokhu kuhilela ukuxoxa ngezihloko abanye abangase bazithole zicasula. (2 Korinte 2:11) Nokho, awekho amazwi noma imifanekiso eyasetshenziswa—kuhlanganise nokuboniswa kwemifanekiso yobuSathane—okwabekwa ngendlela eyayithuthukisa izenzo zobuSathane noma eyayivusa isifiso sokwazi ngazo. Kunalokho, yasiza abafundi, kuhlanganise nentsha, ukuba benyanye futhi bagweme imikhuba yobuSathane.—ED.
Ngakufunda ngokwesaba nangokumangala ukulandisa kwenu ngezenzo zobuSathane, futhi ngiyakwazisa ukuletha kwenu lesisono esibi ekunakekeleni kwabafundi balomagazini wenu. Angikaboni bufakazi bezenzo zobuSathane endaweni engihlala kuyo, kodwa nokho ngizohlala ngikugadile ukuvela kwazo uma kungenzeka.
M. V. H., M.D., United States
Izintwala Zasekhanda Njengomhlengikazi wesikole, osebenzelana njalo nendaba yezintwala zasekhanda, ngingavumelana nokuningi okusesihlokweni senu. (September 8, 1989) Ngeshwa, nisikisela ukugunda ikhanda njengendlela ephumelela ngokwengeziwe ekwelapheni umntwana. Mina ngokwami ngingabheka ukugunda ikhanda lengane ukuze ikhululeke ezintwaleni njengokudlala futhi okungadingekile. Futhi angikukhuthazi ukusetshenziswa kwekerosene ogebhezini. Iyingozi futhi ivutha kalula, futhi ngokuqinisekile amakhulukhulu abantu abanezintwala zasekhanda bangcono kunengane eyodwa eshile.
C. M., England
Siyakwazisa lokhu kukhulumela. I“Phaphama!” ayitusi uhlobo oluthile lokwelapha. Kodwa njengoba umagazini wethu usakazwa emhlabeni wonke futhi ufundwa abantu abangase bangakwazi ukuthola izindlela zokwelashwa zesimanje, samane nje sachaza ngamakhambi asekhaya lawo abanye abathi aphumelela ekwelapheni ukuhlushwa izintwala. Nokho, izazi zezokwelapha zesimanje azikukhuthazi ukugundwa kwezinwele ezinezintwala, njengoba lokhu zikubheka njengokulimazayo ngokwengqondo futhi okungadingeki. Ukugunda izinwele kukhuthazwa kuphela lapho izinwele zizinde ngokweqile noma ziyisihluthu esiminyene ngendlela yokuthi zingakameki. Futhi izazi zezokwelapha namuhla azikukhuthazi ukusebenzisa ikerosene ogebhezini. Ngokwesibonelo, uProfesa uDavid Taplin waseUniversity of Miami School of Medicine watshela i“Phaphama!” ukuthi wayebheka lesisenzo njengesakudala.—ED.