Bahlulelwa Ngokwamazwi Abo

ZIMELELA wonke amasonto aseYurophu azisholo ukuthi angawobuKristu, izithunywa ezingu-638 zazihlangene ngoMay odlule eBasel, eSwitzerland, eMhlanganweni Wazo Zonke Izinkolo ZaseYurophu owawuthi “Ukuthula Okunokwahlulela Ngokulunga.” Ngamavoti angamaphesenti angu-94,5, zamukela umbhalo wokugcina osemthethweni lowo-ke ongathathwa njengombhalo wesivumelwano weLobukholwa laseYurophu. Lombhalo osemthethweni ake uphendule imibuzo embalwa esingase siyibuze ngokufanelekile. (Izinombolo ezikubakaki zibhekisela ezigabeni zalombhalo.)

Ingabe lamasonto akhulekela uNkulunkulu oyedwa weqiniso, uJehova, futhi alondoloza ubunye bobuKristu obufanele?

“Ukuphila kwethu sikukweleta uMdali, uNkulunkulu onguziqu-zintathu—uBaba, iNdodana noMoya oNgcwele; lowo ngomusa wakhe owazembula esintwini ngoJesu Kristu. Kungakhathaliseki ukuthi kunokwahlukana okungokwenkolo okuphikelelayo thina sonke sihlanganyela kulolukholo.” (21)

“Ngenxa yomphumela wobhapathizo nokusabela kokholo ekuzweni izwi likaNkulunkulu, thina maKristu sesimunye kakade kuKristu, nakuba okwamanje singakabi sebudlelwaneni obugcwele. Sifuna ukuqeda ukungafani kwezimfundiso nokwezenzo ukuze sibe sebudlelwaneni obugcwele.” (39)

“Siye sahluleka ukuphelisa ukwahlukana phakathi kwamasonto futhi kaningi siye sasebenzisa kabi igunya namandla esiwanikeziwe ukuze siqinise ubunye obulinganiselwe nobenkohliso njengobuhlanga, ukubandlululana kwabobulili obuhlukene nobuzwe.” (43)

Ingabe aye enza ngokuvumelana nokuzisholo kwawo ukuba ngabalandeli beNkosi Yokuthula?

“NjengamaKristu sikholelwa ukuthi ukuthula kweqiniso kuzonikezwa ngokuba sihambisane noKristu, nakuba ngokuvamile sikugwema ukumlandela kuze kube sekugcineni. Ukulahla kwakhe ubudlova kusukela kulolothando olufuna ngisho nesitha ukuze lusiguqule futhi lunqobe ubutha kanye nobudlova. Loluthando lukulungele ukuhlupheka ngendlela ephapheme. Lwembula inkambo engalungile yesenzo sobudlova, lubabeke icala labo abasebenzisa ubudlova futhi luholela isitha ebudlelwaneni bokuthula.” (32)

“Siye sabangela izimpi futhi siye sahluleka ukusebenzisa wonke amathuba okusebenzela ekubuyisaneni nasekulamuleni; siye sathethelela futhi ngokuvamile savumela izimpi kalula kakhulu.” (43)

“Ukuqembuka kwamasonto nemibango engokwenkolo kube negalelo elikhulu emlandweni waseYurophu. Izimpi eziningi bekuyizimpi zenkolo. Izigidi zamadoda nabesifazane ziye zahlushwa futhi zabulawa ngenxa yezinkolelo zazo.” (48)

Ingabe aye asilandela isibonelo sikaJesu sokukhuluma iqiniso, ukufuna ukulunga, nokubonisa inhlonipho ngokuphila nangendalo kaNkulunkulu?

“Amasonto namaKristu aye ahluleka ezicini eziningi futhi awazange ngaso sonke isikhathi enze ngokuvumelana nezindinganiso ezifunwa uNkulunkulu futhi ngezinye izikhathi aze ehluleka ngisho nokumemezela iqiniso likaJesu Kristu . . . Isikhathi eside besingaziboni iziqondiso nezimfuneko zeVangeli ngokuphathelene nokwahlulela ngokulunga, ukuthula nobuqotho bendalo.” (42)

“Siye sahluleka ukufakazela ukunakekela kukaNkulunkulu ngabo bonke nangazo zonke izidalwa nokuthuthukisa indlela yokuphila ebonisa ukuziqonda kwethu njengengxenye yendalo kaNkulunkulu.” (43)

Ingabe awayazi imbangela yezinkinga zomhlaba?

“Ziyini izimbangela eziyinhloko zezinsongo esibhekene nazo namuhla? . . . Izimbangela zangempela . . . kumelwe zifunwe khona kanye ezinhliziyweni zabantu, ezimweni zabo zengqondo nasendleleni abacabanga ngayo.” (18, 19)

“Izinkinga esizithola sikuzo ekugcineni zisukela eqinisweni lokuthi izindlela zikaNkulunkulu ziye zashiywa.” (41)

Naphezu kwalokhu kuvuma, ingabe ayakufulathela ukubusa komuntu futhi abeke ithemba lawo eMbusweni kaNkulunkulu omisiwe?

“Kunezehlakalo ezintathu ezisemqoka nezibaluleke kakhulu ezidinga ukunakekela okukhethekile: ukuthuthukiswa kobudlelwane phakathi kweMpumalanga neNtshonalanga ohlelweni lwe-CSCE [Conference on Security and Cooperation in Europe]; Izinguquko zentando yeningi eSoviet Union nakwamanye amazwe aseMpumalanga Yurophu, uhlelo lokuhlanganiswa kweNtshonalanga Yurophu (uMthetho Owodwa WaseYurophu, oqala ukusebenza ngokugcwele ekuqaleni kuka-1993).” (51)

“Uhlelo olusetshenziswa emhlabeni wonke lweZizwe Ezihlangene kumelwe lwenziwe luphumelele ngokwengeziwe. Baye babonakalisa ukuthi bangaba usizo ekuxazululeni izingxabano zezifunda, ekulekeleleni imizamo yentuthuko yamazwe amaningi, ekusebenzelaneni nezinkinga zezenhlalo. Ngakho-ke, kunesidingo ngohulumeni bomhlaba ukuba bathuthukise ukusekela kwabo iZizwe Ezihlangene futhi baguqule lokhu kusekela kube yinto ebonakalayo.” (83)

Ingabe kukhona okubonisa ukuthi angase ashintshe isimiso sawo sokuhileleka kwezombangazwe esikhathini esizayo esiseduze?

“Ngaphezu kwalokho u-1992 uzophawula unyaka wama-500 wokukhunjulwa kwesiqalo senkathi yokwandiswa kweYurophu kube ukulimala kwabanye abantu. Lokhu kubizela ukuba sisebenzele ubudlelwano obufanele nobunokuthula kokubili phakathi kwamazwe angaphakathi kweYurophu naphakathi kweYurophu nezinye izingxenye zomhlaba ikakhulukazi eMpumalanga ePhakathi leyo iYurophu enomthwalo wayo wemfanelo omkhulu ongokomlando. Sinxusa amasonto ethu ukuba asekele umzabalazo wabantu baseLatin America, eAfrika naseAsia wokwahlulela ngokulunga kwezokuhlalisana, isithunzi sobuntu nokulondolozwa kwendawo yabo ezungezile.” (84n)

Yisiphi isimiso seBhayibheli okumelwe sisetshenziswe ekwahluleleni izinkolo ezabhala lombhalo osemthethweni wokugcina?

UMathewu 12:37 uthi: “Ngamazwi akho uyakuthethwa, nangamazwi akho uyakwahlulelwa.” (Bheka futhi noLuka 19:22.) Ingabe eLobukholwa laseYurophu lifaneleka kanjani? Ingabe amazwi alo alibonakalisa lilungile, noma ingabe ayalilahla? Lapho kubhekwa izingcaphuno ezingenhla, ingabe kukhona ukungabaza okungaba khona?

[Umthombo Wesithombe ekhasini 19]

Swiss National Tourist Office