Okuphawulwa Abafundi Balomagazini
Ukuyeka ukubhema Ngiyabonga ngesihloko esithi “Izindlela Eziyishumi Zokuyeka Ukubhema.” (July 8, 1989) Ngisisebenzisa ekusizeni umuntu osenesikhathi eside ebhema futhi ongakwazanga ukuyeka. Ngiye futhi ngathatha amakhophi akhulisiwe alesihloko futhi ngawagcina endaweni yami yomsebenzi, lapho kudlula khona abantu abaningi ababhemayo. Lokhu kwaziswa kwabahlaba umxhwele, futhi abanye basebenzisa lokho abakufundayo.
R. L. B. S., Brazil
Umsebenzi Wokukhangisa Ngengqephu Ngahlatshwa umxhwele isihloko esithi “Intsha Iyabuza . . . Kuthiwani Ngemisebenzi Yokukhangisa Ngengqephu Nemincintiswano Yonobuhle?” (January 8, 1990) Kwakungamandla kaJehova kuphela ukuthi ngakwazi ukuyeka lomsebenzi. Ngayeka ukuba umkhangisi ovela ezithombeni sekusele izinyanga ezimbalwa ngaphambi kokuba ngibhapathizwe. Kodwa nakuba ngangisinciphisile isilinganiso sabangane ababi, ukucindezela kwakusenamandla. Umkhangisi wenziwa inhlekisa, anganakwa, futhi aze ngisho aphoqeleke ukuba ahambe enqunu ngokwengxenye ngenxa yokuntuleka kwezindawo zokushintshela. Ukwenezela kulokho isizungu lapho uhlala amasonto amaningi ngokuqhubekayo ehhotela. Ezokukhangisa zibonakala zidl’ubhedu, kodwa zigcwele ukuhaha, imibango, ukuziphatha okubi, ukuthanda izinto ezibonakalayo, nezidakamizwa.
J. Y. A. M., Federal Republic of Germany
Ukugwema Ubulumbi Isihloko senu esithi, “Intsha Iyabuza . . . Kungani Kumelwe Ngigweme Ukulumba”? (March 8, 1990) sangenza ngawaqaphela kakhulu amandla uSathane awasebenzisa kubantu kanye namasu obuqili awasebenzisayo ukuze avuse usikisiki lokwazi. Ngangivame ukuba nomuzwa wokuthi kungenzeka kusekhona ubuhle obuthile amademoni anabo, njengoba ake aba izingelosi. Lesihloko sangibonisa ngokucacile ukuthi afanelwe nje kuphela ukubhujiswa kwawo okusondela ngamandla. Nginibonga ngokuphindiwe.
R.S., United States
Izinkinga Zendlala Yowesilisa Isihloko senu esasikhuluma ngezinkinga zendlala yowesilisa (April 8, 1990) sangithakazelisa, njengoba ubaba ayedinga ukuhlinzwa lendlala. Nakuba lesihloko sasifundisa kakhulu, ukukhulumela kokuphetha kwangikhathaza. Nithi amadoda amaningi afuna ukuvusa inkanuko yobulili ngezincwadi ezinezithombe ezingcolile. Lokhu kusikisela ukuthi wonke amadoda anezinkinga zalendlala abukela amabhayisikobho noma izincwadi okunezithombe ezingcolile.
N. R., Federal Republic of Germany
Sasingaqondile ukusikisela ukuthi izinkinga zendlala nakanjani ziwumphumela wokuziphatha okungekhona kobuKristu. Izinkinga zendlala yowesilisa zivamile phakathi kwamadoda amadala—kuhlanganise namaKristu athembekile—ngenxa yezizathu eziningi. Kodwa njengoba ukuvuswa kwenkanuko yobulili okungeneliswa kubonakala kuhilelekile ekubangeleni noma okungenani ekwandiseni lenkinga kwamanye amadoda, kwabhekwa njengokufanelekile ukuxwayisa abafundi balomagazini ngokumelene nogibe lwezithombe ezingcolile.—ED.
Ngamehlo Omntwana Isihloko senu (January 22, 1990) sabhalwa ngokuqonda okukhulu kakhulu kangangokuthi ngazizwa ngishukunyiselwa ukuba ngihambise amakhophi amaningi ngangokunokwenzeka ezikoleni nasezibhedlela nakubo bonke omama engibaziyo. Umphathi wesikole lapho amadodana ami efunda khona wasazisa kakhulu lesihloko, futhi omunye wothisha bamadodana ami watusa indlela lesihloko esasingathwa ngayo. Nami futhi nginezingane ezine futhi ngiyazi ukuthi kunzima kanjani ukuba umzali. Izihloko ezinjengalezi ziyasisiza ukuze sikwazi ukusiza izingane zethu.
M. P. R., Italy
Indlebe Njengoba ngizithanda izihloko ezikhuluma ngomzimba womuntu, sangijabulisa kakhulu isihloko senu esasikhuluma ngendlebe. (January 22, 1990) Senginesikhathi eside ngifunda omagazini benu ngenxa yokuthi bahlanganisa yonke into umuntu afuna ukuyazi—kokubili umuntu ovamile kanye nalabo abagogothile.
H. V., Brazil