Funda Ukuze Unwebe Imingcele Yakho

INGABE wake wafuna ukuya ezindaweni ezikude; ukuhlangana nabantu bezimpucuko ezihlukahlukene; ukubona nokuhlola izimangaliso ezingokwemvelo njengezimpophoma ezesabisayo, izintaba ezinde, namahlathi aminyene ayimfihlakalo; nokufunda ngezinyoni ezingajwayelekile, izilwane, nezitshalo? Noma ubungathanda yini ukutshuza ushone phansi olwandle; ukwenyukela emkhathini ongaphandle; ukuhlola izwe lezinto ezincane kakhulu; ukuhlola izimangaliso zobuchopho, iso, nenhliziyo; noma ukubona isimangaliso sokubeletha? Mhlawumbe ngisho nokuhlehlisa iwashi futhi uhlole isikhathi esidlule ngomlando noma ulwazi lwemivubukulo?

Zonke lezinto ezijabulisayo zikuvulekele ngephepha elibhaliwe. Ngaphandle kokuba kudingeke ushiye ukunethezeka kwekhaya lakho, ungabona zonke lezizinto ngokufunda izincwadi nokunye okunyathelisiwe okuyinqolobane yolwazi oluvela kuyo yonke imikhakha. Njengoba iBhayibheli lisho: “Ukwenza izincwadi eziningi akunakuphela.” (UmShumayeli 12:​12) Ukufunda okuhle kuyokwenza ukwazi ukutapa kulenqolobane lapho uthanda.

Ukuphazamiseka Okufanele Kunqotshwe

Ngokudabukisayo, emhlabeni jikelele abantu abangaphezu kwezigidi ezingu-800 abangaphezu kweminyaka engu-15 abakwazi ukufunda nokubhala. Lokhu kulilinganisela kabi ikhono labo lokufunda nokuxoxa. Kucindezela ikhono labo lokucabanga futhi kubenze bathembele kulabo abakwaziyo ukufunda, ngaleyondlela kubabeke engozini yokusetshenziswa kabi noma ukuxhashazwa.

Ngisho nemisebenzi eyisisekelo yansuku zonke ingaba izihibe kulabo abangakwazi ukufunda. Ngokwesibonelo, ukuhamba ngezinto zokuhamba, ngokuvamile, kuyadida uma umuntu engakwazi ukufunda izimpawu zomgwaqo neziqondiso eziteshini zamabhasi, eziteshini zikaloliwe, nasezikhumulweni zezindiza. Kukhona futhi ukuphazamisa nokuphoxeka kokucela othile ukuba afunde futhi abhale izincwadi namaphepha omuntu siqu noma ngisho nokugcwalisa amafomu alula. Omama abangakwazi ukufunda iziyalezo ngokuqondene nokudla noma imithi basengozini yokunika abantwana babo izinto ezingabalimaza.

Ngokucacile, ukungakwazi ukufunda kuwukuphazamiseka okukhulu. Nokho, ngosizo oluncane, kunganqotshwa. Lesimo sifana kakhulu nesikaMarthe. Lapho eneminyaka engu-70 wayeseneminyaka engaphezu kuka-20 eyimpumputhe futhi wayenezinkumbulo kuphela ngendlela izwe lokukhanya nelemibala elalibukeka ngayo. Khona-ke udokotela ohlinzayo wamhlinza. Lokhu kwaphinde kwamvulela izwe elimangalisayo lokubona​—⁠nezinjabulo zokufunda. Bese kuba khona uKalu, manje oneminyaka engu-70. Lapho eseyinsizwa, “wayeyimpumputhe” ekhasini elibhaliwe​—⁠wayengakwazi ukufunda. Kodwa wabhalisa ekilasini lokufundisa ukufunda. Manje uyafunda futhi abhale ngezilimi ezintathu.

Kungenzeka bambalwa abantu abanjengoMarthe, kodwa kunezinkulungwane ezinjengoKalu eziye zanqoba ukuphazamiseka kwazo ngokufunda ukufunda. Yebo, akwenzeki ngokushesha. Kudingeka isikhathi nomzamo futhi, ngaphezu kwakho konke, isikhuthazo esikhulu nosizo. Ingabe ungasiza othile? OFakazi BakaJehova emazweni amaningi baqhuba amakilasi okufundisa ukufunda njengalelo elasiza uKalu, futhi lokhu kuye kwaba nengxenye ezingeni eliphakeme labakwaziyo ukufunda phakathi koFakazi. Ngokwesibonelo, eNigeria izinga labafundile phakathi koFakazi BakaJehova lingaphezulu ngokuphindwe kabili kunaphakathi kwabantu bakhona bebonke.

Yiba Umuntu Ofunda Kangcono

Mhlawumbe awunayo inkinga yokungakwazi ukufunda. Kodwa ingabe ungumuntu ofunda kahle kangakanani? Mhlawumbe ufunda ngokukhandleka futhi uyaphindaphinda, okuwukuthi, unomkhuba wokuma phakathi nomugqa noma umusho futhi uphindele emuva ukuze uwufunde futhi. Noma mhlawumbe uwaphimisela kabi amagama noma unobunzima ekutholeni incazelo yawo. Ingabe lezinkinga zinganqotshwa?

UBeatrice oneminyaka eyishumi nantathu ubudala wayekwazi ukuhlanganisa amagama nemiqondo kodwa enobunzima ekuwaphimiseleni. Wayefunda elithi “umuntu” njengelithi “othile” noma elithi “isakhiwo” njengelithi “indlu.” Othile wamfundisa ifonetiki yamagama​—⁠indlela imisindo yonkamisa nongwaqa okuhlangana ngayo kwenze eminye imisindo⁠—​nendlela yokuphimisela amagama ngezinhlamvu. Futhi wamkhuthaza ukuba afunde INcwadi Yami Yezindaba ZeBhayibheli lapho elalele ikhasethi layo.a Ukuqonda kwakhe amagama nokuphinyiselwa kwawo kwathuthuka, futhi manje uthola injabulo enkulu ngokwengeziwe ekufundeni.

Mhlawumbe nawe futhi kudingeka uthuthukise indlela osebenzisa ngayo ifonetiki. Njengoba ufunda lesihloko, usuyazi kakade ukuthi izinhlamvu ziyini. Lusebenzise lolulwazi lapho uziqeqeshela ukuphimisela. Thatha igama, ulihlahlele libe izinhlamvu, bese uphimisela uhlamvu ngalunye. (Ngokwesibonelo: u-ku-phi-mi-se-la) Khona-ke lihlanganise futhi leligama bese uliphimisela lilonke. Prakthiza ukwenza lokhu nangamanye amagama, bese uzama ukuwafunda ngaphandle kokuhlukanisa uhlamvu ngalunye. Funda ukubona amagama aphelele ngaphandle kokuwaphimisela ngokoqobo.

Abantu abafunda kahle abafundi igama ngalinye. Babona imishwana ephelele futhi babambe amagama akha umqondo noma imiqondo ephelele. Ngakho esikhundleni sokuma futhi ubheke igama ngalinye, zama ukubona amagama amaningana ngokubheka ngakunye, futhi ukubheka ngakunye kumelwe kube ukuma okuzenzakalelayo kweso, ukuthi shazí kafushane. Ngokuprakthiza uyokwazi ukukwenza lokhu. Kodwa qaphela noma ikuphi ukuthambekela ekuphindaphindeni. Ukuqala phansi ufunde futhi izingxenye zomusho kuyonqamula ukushelela komqondo futhi kuphazamise ukuqonda kwakho. Ngakho prakthiza ukufunda ungami.

Ngisho nalapho usukwazi ukufunda ngokushelelayo, kunezinye izici ezihilelekile ekubeni ofunda kahle. Ukuqonda, ukukwazi ukukhumbula, nenqolobane yamagama ecebile​—⁠konke lokhu kuyimigomo okufanelekile ukuba iphishekelwe. Amabhokisi alandelayo anikeza ukusikisela kokuthi ingafinyelelwa kanjani. Kungani ungazihloli wena ngokwakho ngokusebenzisa lokhu kusikisela?

Khetha Into Yokufundwa Efanele

Lapho unekhono lokufunda elithuthukile, izwe lolwazi​—⁠umcebo wokwaziswa okusekhasini elibhaliwe⁠—​liba elifinyelelekayo kuwe. Yebo, ungafunda okunye kwalokhu ngeTV namavideotape, kodwa ukufunda kushukumisa futhi kuthuthukise inqubo yakho yokucabanga, ukubona kwakho ngeso lengqondo, nekhono lakho lokukhuluma. Kukunikeza kokubili amagama nemifanekiso yengqondo ongayikhumbula, ukhulume ngayo, futhi uyibhale ngokuhlakanipha ngezihloko eziningi, kukwenze ube umuntu othakazelisa ngokwengeziwe ukuba nobudlelwane naye.

Nokho, njengoba kunezihloko eziningi kangaka ongazihlola, uqalaphi? Ivesi leBhayibheli elithi, “Ukwenza izincwadi eziningi akunakuphela,” lithi futhi, “Nokufunda okuningi kukhathaza umzimba.” (UmShumayeli 12:​12) Awunakukwazi ukufunda konke​—⁠futhi akuzona zonke izinto ezakhayo neziyiqiniso. Ngakho yiba okhethayo. Ngokusemandleni akho funda ukwaziswa okuyololonga ubuntu bakho bubenze bube ngcono, nokuyokusiza emsebenzini, esikoleni, noma ekunakekeleni imithwalo yemfanelo yomkhaya wakho. Ungayandisa kakhulu imingcele yakho ngokufunda okunyathelisiwe kwezizwe zonke njengePhaphama! Emakhasini ambalwa, ungajabulela ukwaziswa okuvela emhlabeni wonke.

Ukuba okhethayo kuyokwenza ukufunda kwakho kube okunenjongo futhi kukulethele izinzuzo ezingokoqobo, ezingokwengqondo, nezingokomoya. Ngakho khetha kahle, futhi uthengisise isikhathi sokufunda ekhaya, phakathi namakhefu lapho usebenza khona, lapho ulindile, lapho uhamba, nangezinye izikhathi. Funda​—⁠kuyonweba imingcele yakho.

[Umbhalo waphansi]

[Ibhokisi ekhasini 27]

Indlela Yokuthuthukisa Ukuqonda

● Cabanga ngokushesha lapho ufunda, uzibuze imibuzo futhi ufinyelele eziphethweni.

● Khumbula isihloko sendaba nanoma iziphi izihlokwana.

● Zama ukubona indlela isigaba ngasinye esihlangana ngayo nomongo oyinhloko.

● Hlobanisa ukwaziswa nalokho osukwazi kakade.

● Sebenzisa ukwaziswa ekuphileni nakokuhlangenwe nakho kwakho.

Yakha Inqolobane Yamagama Enkudlwana

● Phawula amagama ongawajwayele lapho usafunda.

● Phawula indlela amagama anjalo asetshenziswe ngayo emongweni.

● Bheka isichazamazwi ukuze uthole izincazelo zamagama njengoba ufunda.

● Funda ukuphimisela amagama ngokuyikho.

● Prakthiza ukusebenzisa amagama amasha lapho uxoxa nabanye.