“Ungenzi Lutho Oluwubuwula, Kungenjalo Ngizokubulala”

Umlomo wesibhamu walunguza ngesikhala sefasitela lemoto futhi wakhomba ekhanda lami. Izwi lathi:

“Ungangibheki, Ntokazi. Vula umnyango. Gudlukela esihlalweni esiseceleni.” Ngenza njengoba ngangitshelwa. Lendoda yahlala esihlalweni somshayeli, isibhamu sisakhombe kimi.

“Unawo ukhiye wasebhange?”

“Anginawo ukhiye. Ukhona ozofika noma kunini manje ezovula.”

“Ungenzi lutho oluwubuwula,” exwayisa, “kungenjalo ngizokubulala.” Wadumisa imoto yami futhi wayishayela.

Lokhu kwase kuyinto evamile. Ngangisebenza emshinini wemali egatsheni leBhange leTrust Company. NgoApril odlule omunye wesifazane wangikhomba ngesikhwama sakhe wathi: “Kunesibhamu lapha. Letha imali.” Ngenza kanjalo.

Emasontweni ambalwa kamuva, enye indoda yafika efasiteleni lami. Isibhamu sayo sasibonakala ngokucacile. “Nginike imali.” Ngasunduzela inqwaba yemali ngakuyo.

Ngase ngikhathele. Ngacela ukushintshelwa kwelinye igatsha. Isicelo sami savunywa. Ngakho manje, ngalesikhathi sasekuseni ngoLwesine, ngoMay 23, ngihlezi emotweni yami endaweni yokupaka yegatsha elisha, igatsha lasePeachtree Mall eColumbus, eGeorgia. Ngilindele ukuba livulwe. Ngu-8:​25. Ngivame ukufika emsebenzini kusasele imizuzu embalwa futhi ngifunde itekisi leBhayibheli losuku. Ngalolusuku olukhethekile ekuseni, lalikuMathewu 6:​13, elithi: ‘Usikhulule komubi.’ Angiqaphelanga ngalesosikhathi, kodwa lowombhalo wawuzoba obaluleke kakhulu kimi ezinsukwini ezimbili ezilandelayo.

Ngangisenamasonto amabili kuphela ngisebenza kuleligatsha elisha futhi ngingakawunikezwa ukhiye. Ifasitela lemoto yami ngangilivule kancane, futhi ngizindla ngetekisi, engangisanda kulifunda, lapho kuvela umlomo wesibhamu efasiteleni. Kabili ngaphambidlana, abaphangi babebaleke nemali yasebhange. Kulokhu kwakubalekwa nami.

Njengoba yayishayela, ngaqala ukuthandaza ngokuzwakalayo: “O Jehova, ngicela ungisize!”

“Ngubani uJehova?” kubuza umthumbi wami.

“UnguNkulunkulu engimkhulekelayo.”

“Ungangibheki! Qhubeka ubheke efasiteleni lakho! UJehova . . . leyo yiWatchtower, oFakazi BakaJehova, akunjalo?”

“Yebo.”

“Ngangibazi ngesikhathi ngihlala eDolobheni laseNew York. Mina ngokwami ngingumKatolika. Nokho, thandaza ngenhliziyo. Angifuni ukukuzwa.” Kodwa wanezela: “Bheka, ngeke ngikulimaze. Yimali engiyifunayo, hhayi wena. Ungenzi lutho oluwubuwula, futhi ngeke ulimale.”

Sonke lesikhathi sisahamba, wayengibuza ngebhange. Ubani owayezoba lapho ezovula? Iningi lalivulelwa ngasikhathi sini? Lalinamalini? Imibuzo eminingi ngebhange. Ngangiyiphendula ngendlela engcono ngokusemandleni ami futhi ngesikhathi esifanayo ngithandaza ngenhliziyo. Nganginxusa uJehova ukuba angisize ngiphume ngiphephile kulokhu.

Ngemva kwemizuzu ecishe ibe yishumi, wathatha umgwaqo owubhuqu ongena ehlathini. Ngokusobala wayelindele ukuhlangana nothile, ngoba waqala ukukhuluma yedwa: “Uphi? Uphi?” Wamisa imoto waphuma futhi wangenza ngidlulele esihlalweni somshayeli bese ngiphuma ohlangothini lwakhe, ngimfulathele sonke lesikhathi. Engikhombe ngesibhamu ohlangothini lwami, wangiholela phakathi ehlathini, ngaso sonke isikhathi amehlo ami ebheke phansi ukuze ngingamboni. Kwakunzima ukuhamba ezihlahleni eziminyene ngengubo yami nezicathulo eziphakeme. Wangiholela esihlahleni, wangibhekisa isiqu, wanginamathisela amehlo nomlomo ngetheyiphu eyisixwembe. Wabophela izindla zami ndawonye emhlane wabe esengihlanganisa ngetheyiphu nesiqu sesihlahla.

Ngalesikhathi ngangivevezela ngamandla. Wangiyala ukuba ngikuyeke lokho. Ngazama ukukhuluma ngimtshela ukuthi angikwazi. “Nokho, unganyakazi. Ukhona okubhekile, uma uzabalaza ufuna ukuzikhulula, uzokubulala.” Khona-ke wangishiya. Ngakhumbula itekisi losuku elithi, ‘Usikhulule komubi,’ futhi ngacabanga ngendlela elalifaneleka ngayo kimi ngalesikhathi.

Wabuya ngokushesha kodwa ngemoto ehlukile​—⁠ngangingase ngiyazi eyami ngomsindo wenjini. Kungenzeka wayishintsha wathatha eyakhe. Wathukulula itheyiphu eyayingihlanganise nesiqu sesihlahla kodwa wayeka esemehlweni nasemlonyeni wami, futhi izihlakala zami zazisaboshelwe ngemuva ngetheyiphu. Wangiholela emuva emotweni sidlula ezihlahleni. Wavula ibhuthi, wangihlohlolozela kuyo, wavala isivalo, wasusa imoto.

Ngaqala ukuthandaza futhi. Ngangithandaza ingxenye enkulu yosuku futhi ngicela kuJehova amandla engangiwadinga ukuba angisize ngikhuthazelele noma yini eyayingaphambili. Sahamba ngokunokwenza imizuzu engu-15 kuya kwengu-20 ngaphambi kokuba ame futhi avule ibhuthi, wasusa itheyiphu emlonyeni wami, futhi wangibuza inombolo yocingo lwasebhange. Ngamnika yona. Wangibuza ukuthi ubani ubasi wami. Ngamtshela, futhi wabuyisela itheyiphu emlonyeni wami. Kungalesosikhathi lapho ashayela khona ibhange ucingo efuna imali​—⁠u-R410-000, njengoba ngezwa kamuva.

Watshela uGeorge​—⁠lelo kwakuyigama lesikhulu esasisebhange ngalolosuku⁠—​ukuba abe sendlwaneni yocingo ethile eningizimu yeAtlanta ngehora lesibili ntambama nemali, lapho ayeyothola khona iziyalezo ezengeziwe. Wangitshela ngalokho okwakwenzeka futhi wangiqinisekisa ukuthi ngangizokhululeka ngokushesha. Nokho, ihora lesibili lalisekude kakhulu, futhi ngangisasongene futhi ngiboshiwe kulebhuthi futhi ngiya ngifuthelana. Isikhathi sasihamba kancane. Wangilunguza kanye noma kabili ebheka ukuthi ngihlezi kanjani. “UNkulunkulu wakho uJehova ukubhekile,” ephawula. Ngakho wayewukhumbula umthandazo wami owawuya kuJehova ekuseni.

Ngazibuza ngomkhaya wami. Ingabe wawazi ukuthi ngangidukile? Uma wawazi, wawusabela kanjani? Ngangikhathazeke kakhulu ngawo ngisho nangaphezu kokukhathazeka ngami ngokwami. Ngacabanga ngemibhalo ehlukahlukene. Omunye okhuluma ngegama likaJehova ‘njengeliwumbhoshongo onamandla futhi abalungileyo bebalekela kuwo futhi balondeke.’ Nothi ‘uma ubiza egameni likaJehova, uyosindiswa.’ Futhi ngokuqinisekile ngangisebenzisa iseluleko somphostoli uPawulu ‘sokukhuleka singaphezi.’ (IzAga 18:​10; Roma 10:​13; 1 Thesalonika 5:​17) Ngaphezu kwemibhalo yeBhayibheli, amazwi neminkenenezo yezingoma zoMbuso kwakudlula engqondweni yami, njengezithi ‘Jehova, dwala lami, namandla ami’ nethi ‘uJehova uyisiphephelo sami.’

Kokuhlangenwe nakho engangikufunde kuNqabayokulinda, ngakhumbula ukuthi uJehova wayesize abanye ukuba bakhuthazelele izilingo ezikhethekile. Okunye okukuPhaphama! okwakuvelele engqondweni yami kwakumayelana noFakazi owathunjwa ekuphangweni kwebhange.a Wayekade ebanjwe wathiwa ngqí entanyeni kuyilapho umphangi ephethe ibhomu lesandla futhi emsongela. Usizi lwakhe lwaqhubeka amahora amaningi; yena nomphangi becashe ngaphakathi, amaphoyisa engaphandle. Naye wayekhuthazelele usizi lwakhe ngokukhuleka kuJehova nangokukhumbula imibhalo, futhi isibindi sakhe savuzwa ngokuba abuyiselwe emkhayeni wakhe ephephile.

Ekugcineni imoto yama, futhi umshayeli waphuma. Ngangingakwazi ukubona iwashi lami, njengoba lalisesihlakaleni sami futhi siboshwe ngemuva ngetheyiphu, kodwa ngokunembile, ngaqagela ukuthi kwakuyihora lesibili futhi wayeyothintana noGeorge owayevela ebhange. Nganginamathemba okuthi ukukhululwa kwami kwakuzokwenzeka ngokushesha. Kodwa akuhambanga ngaleyondlela. Ngokusobala, amacebo akhe ayengahambanga njengoba ayehlelile, sase sisendleleni futhi.

Ngokushesha injini yaduma ngamandla, futhi imoto yasukisa okwenhlamvu iqonde phambili! Wayengahambi ngejubane elikhulu kakhulu nje kuphela kodwa futhi wayeya ngapha nangapha njengokungathi wayevika izimoto. Ngangiphonseka ngapha nangapha ebhuthini. Umzimba wami wawudiklizeka phansi, ikhanda lami lingqubuzeka ezinhlangothini zebhuthi. Njengoba izandla zami nezingalo zaziboshelwe ngemuva, ngangingenamandla okuziqinisa noma okuzivikela ekushayekeni, njengoba ngangiphonseka kuyo yonke indawo. Kwaqhubeka mhlawumbe imizuzu eyishumi, kodwa kwakubonakala kuyisikhathi eside kunalokho.

Ngokushesha ngemva kwalokhu imoto yama, futhi wavula ibhuthi ukuze abone ukuthi nginjani. Ngokusobala, ngangishaqekile futhi ngicindezelekile ngenxa yokushayiseka kwami. Inhliziyo yami yayishaya ngamandla futhi ukuphefumula kwakunzima kakhulu. Ngangijuluke ngimanzi futhi ngingingakwazi ukuzesula njengoba izandla zami zaziboshelwe ngemuva. Ukuphefumula kwakunzima ngokukhethekile njengoba kwakuvele ikhala kuphela phakathi kwetheyiphu eyayivale amehlo naleyo eyayivale umlomo. Wayisusa itheyiphu emlonyeni okwesikhashana ukuze ngikwazi ukuphefumula kalula futhi ngikhulume uma ngifuna.

Wangitshela ukuthi amaphoyisa ayeyibonile imoto yakhe, ngokunokwenzeka ngokuyisola, futhi ayeqale ukuyixosha. Yingakho ayehamba ngejubane kangaka futhi ebaleka ukuze agweme ukushayisa ezinye izimoto. Wayephumelele ekubalekeleni amaphoyisa. Wachaza ukuthi wayengakayitholi imali, kodwa wayezozama okuthile futhi, ukuthi kwakusazothatha isikhathi esijana, kodwa ngingakhathazeki. Wangiqinisekisa futhi ukuthi wayengeke angilimaze ngokomzimba, ukuthi kwakungeyona inhloso yakhe. Wayedinga imali, futhi ngangiyisihluthulelo sokuba ayithole. Lapho esho lokhu, umqondo wami wakhululeka, njengoba ngangithandazele ukuthi uma eqala ukungilimaza, uJehova angisize ngisabele ngendlela efanelekile.

Amahora adlula kancane. Wama izikhathi eziningana, mhlawumbe ngenjongo yokushaya izingcingo ezengeziwe noma ezindaweni ayezama ukuthola kuzo imali. Ngesinye isikhathi lapho ema, ngamuzwa egcwalisa ithangi ngophethiloli. Nganginenkwantshu kakhulu kangangokuthi ngazama ukunyakaza ngazo zonke izindlela futhi ngabanga umsindo. Ngokushesha wavula ibhuthi futhi wangixwayisa ngokwenza noma yimuphi umsindo. Ngabuza ukuthi isikhathi sasithini. Akazange angitshele ngokuqondile, ngaphandle kwesikhathi sokuqala, lapho kuyihora lesibili. Ngangazi ukuthi sasisesendaweni yaseAtlanta ngoba ngangizizwa izindiza zisuka futhi zehlela esikhumulweni.

Ngemva kwalokho, wayevula ibhuthi athi, ‘Kusazothatha elinye ihora. Ngelinye ihora uzobe usukhululekile.’ Wakusho lokho izikhathi eziningana. Ngangingasamkholelwa. Ngangimane nje nginethemba. Kwakungelona usuku olushisa kakhulu ngaphandle, kodwa ebhuthini kwakuvalekile futhi kufuthelene futhi kwakuya kushisa ngokwengeziwe. Ngangijuluka kakhulu, futhi kwakuba nzima ngokwengeziwe ngami ukuphefumula. Ngaqala ukuthandaza ngovuko ngoba ngangingaqiniseki ukuthi ngangizoqhubeka isikhathi esingakanani ngisaphefumula.

Uma ngifa, nganginethemba lokuthi uJehova wayezosiza umkhaya wami ukwazi ukubhekana nakho. Ngangikhathazekile ngomkhaya wami nangami ngokwami. Ngangazi ukuthi uma ngifa, uJehova wayeyongibuyisa ngovuko, nokuthi ngangiyohlangana nomkhaya wami ezweni lakhe elisha lokulunga alithembisile. (Johane 5:​28, 29; 2 Petru 3:​13) Ukucabanga kwami ngoJehova nangezithembiso zakhe yikho okwangisekela.

Umshayeli wavula ibhuthi futhi. Kwakumnyama​—⁠kwase kungamahora amaningi kumnyama. Wayeshaye izingcingo eziningana. Ayikho imizamo yakhe yokuqoqa imali yesihlengo eyayiphumelele. Wathi wayekhathele ukuzama futhi wayezongibuyisela eColumbus futhi angiyeke ngihambe. Ngesikhathi sibuya, ngase ngifile ukukhathala. Ngamane ngadindiliza nje ebhuthini ngifisa ukuba konke kudlule. Kodwa ngazimisa isibindi futhi ngacabanga, ‘Cha, kumelwe ngihlale ngiqaphile. Kumelwe ngizenze ngihlale ngiphapheme. Konke kuzophela ngokushesha. Usedelile, futhi usengiyisa ekhaya.’

Wayezongehlisa emotweni yami, kodwa yayingekho lapho ayecabanga ukuthi yayikhona. Wangiyisa eHholo LoMbuso loFakazi BakaJehova, kodwa izibani zazikhanya esakhiweni lapho omunye wabameleli bethu abajikelezayo ayehlala khona. “Angikwehlisi lapho kunabantu abaningi khona!” Nokho, wangehlisa, engikhipha ebhuthini ngokokuqala ngqá. Ngangisavalwe amehlo, izandla zami zisaboshwe ngetheyiphu ngemuva, kodwa wayisusa itheyiphu emlonyeni wami. Ngazizwa nginesiyezi futhi ngingakwazi ukuhamba​—⁠imilenze yami yayindikindiki kakhulu. Wangibuyisela ebhuthini, wahamba nami kancane endleleni, wangishiya ngemuva kwesonto lamaBaptist, wayeseshaya echitha. Kwakungu-1:​30 ngoLwesihlanu ekuseni.

Ngangizizwa nginesiyezi ngempela, ngahlala phansi, futhi ngaquleka. Into yokugcina engiyikhumbulayo kwakuwukuzwa imoto yakhe isuka. Lapho ngiphaphama, emahoreni amathathu kamuva, ngangilele otshanini nasodakeni. Ngathukulula itheyiphu esezihlakaleni zami futhi ngayisusa emehlweni ami. Ngabheka iwashi lami. Kwakuyimizuzu engu-15 ngaphambi kwehora lesihlanu. Ngangihlale ebhuthini amahora angu-17 futhi ngiquleke enhlabathini amahora amathathu. Imilenze iqhaqhazela futhi indikindiki, ngehla ngomgwaqo. Kwakunendoda eyayihlehlela emgwaqweni ngeloli layo. Ngayitshela ukuthi ngangikade ngithunjiwe futhi ngangidinga ukushayela umkhaya wami namaphoyisa ucingo. Amaphoyisa atheleka emizuzwini eyishumi. Kwase kudlulile.

Ngayiswa esikhungweni sezokwelapha ukuba ngiyohlolwa. Emahoreni angu-20 ngangingazange ngiphuze noma ngidle lutho futhi angizange ngizikhulule, futhi ngangilale amahora amathathu kuphela adlule. Umzimba wami wawulimele, ingubo yami inodaka, izinwele zami zimahlikihliki, ubuso bami bungcolile futhi buvuvukele ngenxa yetheyiphu. Kodwa akukho kulokhu okwaphazamisa ukuhlangana kwami nomyeni wami, uBrad, nomama, uGlenda, kanye nezinye izihlobo ezithandekayo eziningi nabangane ababehlangene lapho bezongamukela. Usizi lwabo lokulinda nokukhathazeka lwalwehlukile kolwami ngandlela-thile kodwa mhlawumbe lubuhlungu ngisho nangokwengeziwe ngendlela ehlukile.

Lapho ngisuka esikhungweni sezokwelapha, ngaya esiteshini samaphoyisa ngiyophendula imibuzo futhi ngibhalisa isitatimende. Njengoba kwabikwa kuyiColumbus Ledger-Enquirer, kaMay 25, 1991, amaphoyisa athi umthumbi, owayeseboshiwe manje, ‘wayezobekwa futhi icala lokudlwengula nobungqingili obubi kakhulu obenzeka ngempela-sonto edlule,’ okwakungaphambi nje kokuba angithumbe. Okwabikwa futhi kuleliphephabhuku kwakuyincazelo yeSikhulu Samaphoyisa uWetherington ngesicelo sakhe sokwehluleka kwezokuxhumana: “Sasikhathazeke ngempela ngokuphila kukaLisa.” Konke lokhu kwangenza ngaqiniseka ngisho nangokwengeziwe ukuthi kwakuwukuthembela kwami kuJehova okwangilondoloza.

Ngaya ekhaya ngayogeza umzimba njengokungathi amanzi ashisayo ngangingasawazi, ngiyolala ubuthongo obuqabulayo, futhi nginalomcabango ofudumeza inhliziyo njengoba ngangizunywa ubuthongo obukhulu: Itekisi losuku likaMathewu 6:​13 laliselokhu liyinduduzo kimina, futhi ngokuvumelana namaHubo 146:⁠7, ngangiye ngabhekana ‘nokukhululwa ngemva kokuboshwa.’​—⁠Njengoba ilandiswa nguLisa Davenport.

[Umbhalo waphansi]

[Amazwi acashunwe esihlokweni ekhasini 17]

“Thandaza ngenhliziyo. Angifuni ukukuzwa”

[Amazwi acashunwe esihlokweni ekhasini 17]

Wavula ibhuthi, wangihlohlolozela phakathi, wagaklaza isivalo evala, wasusa imoto

[Amazwi acashunwe esihlokweni ekhasini 18]

Ngangidinsileka phansi, ikhanda lami lingqubuzeke ezinhlangothini zebhuthi

[Amazwi acashunwe esihlokweni ekhasini 19]

Ngamane ngadindiliza ebhuthini ngifisa sengathi konke kungaphela

[Amazwi acashunwe esihlokweni ekhasini 20]

Lapho ngiphaphama, emahoreni amathathu kamuva, ngangilele otshanini nasodakeni