Izinhlobonhlobo Zokudla Zenza Ukuphila KwaseMexico Kuthakazelise

Ngumlobeli wePhaphama! EMexico

UNGATHANDA yini ukunambitha ukudla kwangempela kwaseMexico? Khonake, siza uhlale etafuleni. Bheka nje izinhlobonhlobo zokudla ezibekwe phezu kwezarape emibalabala yaseMexico esetshenziswa njengendwangu yetafula, bese uhogela iphunga lokudla eliconsisa amathe!

Njengokulindelekile, cishe wonke amazwe anezinhlo-bo eziningi zokudla, kodwa eMexico uhlu lokudla kwendawo alupheli. Sinezinhlobo eziningana zamamole; zonke izinhlobo zamasauce ababayo athelwa phezu kokudla; ukudla okuvula inhliziyo kwaseMexico, okunjengamatostada, amaenchilada, amasope, amaquesadilla, amatlacoyo. Futhi, kukhona namataco amnandi. Cishe kunezinhlobo eziningi zamatamale njengoba kunamazwe amaningi eMexico. Kukhona ngisho nezinhlobo eziningi zokudla eziphekwa nezinhlanzi zasolwandle ezidliwayo.

Ingabe usuqala ukuconsa amathe? Khona-ke sizozama ukukwazisa ngokunye kokudla kwethu kwaseMexico okwaziwa kangcono.

IMole—EyaseMexico Ngempela

Igama elithi mole (elibizwa ngokuthi mo’lay) livela kwelithi mulli, igama elisetshenziswa olimini lwesigodi lwama-Aztec Nahuatl elisho i‘sauce.’ Imole iyinhlama noma isauce ethelwa phezu kwamaqatha enkukhu nawekalikuni noma phezu kwerayisi, futhi iyilokho okwenza ukudla kunambitheke njengokomkhosi othile, kwazise imole ngokuvamile isetshenziswa ngezikhathi zezenzakalo ezikhethekile. UPatricia Quintana encwadini yakhe ethi Mexico’s Feasts of Life usitshela ukuthi “amamole ayehlukahluka ngokwezifunda, ngokwamadolobhana, ngokwabapheki edolobhaneni elifanayo.”

Lenhlama yenziwa ngopelepele obabayo owomisiwe, otamatisi ababomvu, o-anyanisi, ama-almond, amaprune, ukhova, isinkwa esithosiwe, amaclove, icinnamon, namafutha emifino, bese ithelwa usawoti nopelepele ukuze inambitheke. Kwenezelwa ushokolethi ukuze inhlama izwakale inezinongo noshukela. Singakuthelela yini phezu kwenkukhu yakho nerayisi? Qaphela! Ulwanga nezisu zabanye abantu kuthatha isikhathi ukujwayela lenhlanganisela enezithako eziningi.

Opelepele Abababayo Abafakwe Okuthile

Opelepele abababayo abafakwe okuthile bawukudla okuvame kakhulu. Lokhu kwenziwa ngamapoblano, opelepele abababayo abakhulu, abathé ukuthoswa kancane emafutheni ashisayo ukuze kususwe amakhasi athambile nokubenza bathambe. Khona-ke kususwa okusamithambo nezinhlamvu zembewu. Kuphekwa inhlanganisela yenyama eqotshiwe nezinhlamvu bese ithoswa nezinongo namaprune; bese ifakwa phakathi kopelepele. Labopelepele bavalwa ngezinti zokuvungula. Ushizi nawo ungase usetshenziswe njengokokufakwa phakathi. Ngemva kwalokho opelepele bafakwa enhlanganiseleni kafulawa, amaqanda, nobisi bese bayathoswa. Badliwa sebethelwe isauce katamatisi obomvu phezulu. Bamnandi kakhulu kangangokuba kumelwe uqaphele ukuba ungadli izinti zokuvungula!

Kukhona nopelepele ofakwe okuthile oyinkimbinkimbi nakakhulu obizwa ngokuthi ichiles en nogada. Okufakwa ngaphakathi kuphekwa nezinhlamvu kanye nezinhlobo eziningana zenyama eqotshiwe, ezinjengenyama yenkomo, inkonyane, neyengulube. Ngezinye izikhathi izithako zihlanganisa izithelo ezihlukahlukene eziqotshwe zaba zincane kanye nesitshalo sebisnaga esimnandi. Lopelepele ofakwe okuthile uyaphekwa, bese uyapholiswa futhi uthelwe ukhilimu onoshukela phezulu bese ufafazwa ngezinhlamvu zepomegranati ezembozwe ingxenye ethambile enamanzi.

Ukudla Okuconsisa Amathe KwaseMexico

Izithako eziyinhloko zokwenza ukudla okuvula inhliziyo kwaseMexico amatortilla nezinhlobo eziningi zamasauce kapelepele obabayo. Amatortilla aye aziwa emhlabeni wonke. Ngokuvamile angamaqebelengwane ayisicaba, asongekayo enziwe ngenhlama yempuphu yokusanhlamvu abhakelwa kuyicomal (insimbi eyisicaba eshisayo). Ngokuvamile amasauce enziwa ngopelepele abaluhlaza abanjengamajalapeño (acishe abe ngamasentimitha amahlanu ubude futhi anesiqu esikhulu) noma amaserrano (amancane futhi anesiqu esincane). Labopelepele abababayo basetshenziswa emhlabeni wonke, njengoba belondolozwa kuviniga ukuze bangaboli bese bethunyelwa kwamanye amazwe.

Isauce evame kakhulu yileyo okulula kakhulu ukuyenza. Idinga opelepele abaluhlaza okotshani, otamatisi ababomvu, no-anyanisi—konke okuluhlaza. Kuyaqotshwa kube izicucu ezincane bese kunongwa ngosawoti ngokwesilinganiso esifiswa umuntu. Uma uhlanganisa lesauce nokwatapheya ababhuciwe, usuneguacamole emnandi, engasetshenziswa njengesauce noma idliwe njengetaco (itortilla esongiwe noma egoqiwe efakwe okuthile). Futhi kunesauce eluhlaza okotshani eyenziwa ngopelepele abaluhlaza okotshani namatomatillo aluhlaza okotshani okugazingiwe kwase kufakwa emshinini ohlanganisayo. Amasauce abomvu enziwa ngopelepele ababomvu notamatisi ababomvu okuye kwagazingwa. Amanye amasauce enziwa ngopelepele abababayo abangaxutshiwe, kodwa lokhu kuxhomeke ekutheni ufuna ibabe kangakanani.

Itostada yitortilla eklamuzelayo nethosiwe ofaka kuyo ubhontshisi othosiwe, ulandelise ngenkukhu esikwe izicucu noma enye inyama, nezindilinga zika-anyanisi, bese uthela isauce phezulu. Amasope acishe afane namatostada, kodwa itortilla yawo ithe ukuba qatha futhi incane futhi ayiklamuzeli. Amatlacoyo amatortilla amakhulu afakwe ubhontshisi othosiwe. Izindilinga zika-anyanisi nesauce kubekwa phezu kwalobhontshisi othosiwe. Amaenchilada afana namataco afanayo asongiwe, ngokuvamile afakwe inyama yenkukhu encane phakathi. Lokhu kuthelwa imole phezulu, bese kufafazwa ngoshizi osand’ ukukhuhlwa kubekwe nezindilinga zika-anyanisi. Uma uthanda, ungafaka ukhilimu osemusha kunoma yikuphi kwalokudla okuvula inhliziyo.

Wonke umuntu uyawathanda amaquesadilla! Leligama livela esithakweni sawo esiyinhloko, iqueso, ushizi, kodwa amaquesadilla enziwa ngezithako ezinhlobonhlobo: izikhumba eziklamuzelayo zengulube, ihuitlacoche (isikhutha sokusanhlamvu), izimbali zesithombo seselwa, itinga (inyama yenkomo eyizicucu eshisayo), namasosishi engulube, uma kubalwa ezimbalwa. Kunezindlela eziningi kakhulu zokuwenza, kodwa anambitheka kangcono yilawo enziwa ngesikhathi esifanayo nesokwenziwa kwamatortilla. Kwenziwa itortilla bese kufakwa ushizi ohlangothini olulodwa, ngemva kwalokho iyasongwa bese ibekwa phezu kwecomal enamafutha amancane bese iyabhakwa. Iphendulwa okungenani kanye ukuze kuqinisekiswe ukuthi iphekeke nhlangothi zombili. Ngaphambi kokuba idliwe, kufakwa isauce phakathi, bese iyadliwa—isashisa! Hmmm, yeka ubumnandi!

Okwabantu Abanesibindi Kuphela

Kodwa kukhona okunye ukudla kwaseMexico okungokwabantu abanesibindi kuphela! Ungathanda ukuzama uxamu omnandi—yebo, uxamu—ofakwe kuyimole? Ubukeka kahle esitsheni, futhi kungakhathaliseki ukuthi uyakukholelwa noma cha, iphunga lawo lingaba elihehayo. Uthini ngamatsheketshe athosiwe enziwe aba amataco? Izazi zithi amnandi uma enesauce ebomvu noma eluhlaza. Ukudla okuseyivela kancane amaqanda etsheketshe afakwe kumataco—isithako saseMexico esenziwe ngamaqanda enhlanzi! Noma kungani ungazami izintethe eziye zajika zaba bomvu lapho zithoswa epanini lokuthosa? Kukhona ezabo bonke ubukhulu, kodwa kwabaqalayo zingcono ezincane. Nokho, lokudla, kunganambitheka kamnandi kuphela kwabaseMexico noma isazi sezokudla esaziwayo.

Simane nje sakha phezulu. Kuyofuneka uthole isikhathi sokwazi izinhlobo eziningi zamatamale (inhlama yokusanhlamvu enenyama phakathi, emiswe okwesikhwebu sommbila, futhi embozwe ngamakhoba ommbila), amamixiote (inyama nezinongo eziyizitshalo okuphekwa ngesineke kusesikhumbeni esizacile sezitshalo semaguey), amaceviche (inhlanzi eluhlaza neminenke ethanjiswe ngamanzi kalamula), amasobho, nobhontshisi ohlala ukhona, otholakala ngayo yonke imibala.

Woza! Hlala etafuleni! Ungakhathazeki ngopelepele abababayo. Okuningi kokudla kuphekwa ngaphandle kukapelepele, futhi unganezela amasauce ababayo kuye ngokuthi ufuna kubabe kangakanani. Ngisho nabantu baseMexico bayehlukahluka endleleni ababathanda ngayo opelepele abababayo, futhi kunabangenakuwuthinta nhlobo. Kodwa yamukela indlela yethu yaseMexico yokwamukela izihambi, futhi uzame izinhlobo eziningi zokudla ozinikwayo, kwazise izinhlobonhlobo zokudla zenza ukuphila kwaseMexico kuthakazelise!

[Umthombo Wesithombe ekhasini 25]

The Codex Nuttall/Zelia Nuttall/Dover Publications

[Izithombe ekhasini 25]

Ngenhla ngakwesobunxele: amataco

Ngenhla ngakwesokudla: amachile relleno

Ngezansi: amatostada

[Izithombe ekhasini 26]

Iguacamole

Amatlacoyo

Ienchilada de mole