Intsha Iyabuza . . .

Imidlalo Eyingozi—Ingabe Kufanele Ngiyizame?

“LONA kuzoba umzuzu osabisa kunayo yonke ekuphileni kwakho,” uyatshelwa njengoba umi endaweni yokugxuma, amadolo eshayisana. Ukubala kuyaqala: “5, 4, 3, 2, 1—GXUMA!” Kusiphuzela izinwele njengoba uwa. Kubonakala sengathi uzophahlazeka kuphele ngawe, kodwa ngokungazelele uzwa intambo enwebekayo ikudonsa ngokushesha. Amaphaphu ayehla. Usindile!

I-bungee jumping.a Lomdlalo usuhehe abadlali abalinganiselwa esigidini kuya kwezimbili e-United States kuphela. Umane nje ungomunye wemidlalo eminingi esanda kuduma kakhulu—ukucaca emaweni, ukushwibeka emoyeni ngezimpiko zokuzenzela, ukuhamba ngezikebhe emfuleni ogijima kakhulu, nokushwibeka emoyeni umi epulangweni elincane, uma sibala embalwa. “Iminyaka yawo-1990 iyishumi leminyaka yemidlalo eyingozi,” kusho omunye umgqugquzeli we-bungee jumping.

Imidlalo eyingozi ayithandwa yilabo abacebile nje kuphela. Abathandi benjabulo basemadolobheni bahlanganyela ezintweni eziyingozi (futhi ezingekho emthethweni) ezinjengokushwibeka ngamakheshi (ukugibela ophahleni lwekheshi elihambayo), ukuhamba emihubheni engaphansi kwezakhiwo ezinkulu, ukugibela ophahleni lwezitimela ezihamba ngaphansi komhlaba, nokushibilika ezitebhisini ezigcotshwe nge-grisi.

Kungani Ithandwa?

“Ngingazama noma yini engenza ngesabe,” kusho uNorbert osemusha. “Yonke imidlalo ngiyayithanda—i-baseball, i-basketball—kodwa ukugxuma ebhulohweni kwangethusa ngempela! Kuhluke kakhulu.” UDouglas osemusha uyavuma. “Imidlalo ejwayelekile ikahle, kodwa ilinganiselwe,” esho. “Uhlala uvimbelekile. Ngiyawuthanda umuzwa wokuwa. Nesivinini sakhona . . . Awubi nawo kwanhlobo lowomuzwa kweminye imidlalo.”

Imidlalo esabisayo ayibekeli amakhono akho inselele kuphela; ikwenza ubhekane ubuso nobuso nokufa! Abayidlalayo babonakala bewujabulela umuzwa wokwenyuka kwe-adrenaline ekhiqizekayo. Abanye ochwepheshe bathi izakhi zofuzo zenze abanye abantu baba uHlobo-T, noma abantu abathanda izingozi. Nokho, intsha eningi izifaka engozini; kuyindlela yokuhlola ukulinganiselwa kwayo nokwakha ukuzethemba.

Ngeshwa, intsha ayivamile ukusebenzisa ukwahlulela okuhle lapho yenza kanjalo. “Udumo lwabasha lungamandla abo,” kusho izAga 20:29. Kodwa kubonakala sengathi abanye bacabanga ukuthi amandla abo awalinganiselwe. UDkt. David Elkind uthi ngokuvamile intsha ikholelwa ukuthi “ikhethekile futhi ihlukile—imithetho yemvelo esebenza kwabanye ayisebenzi kuyo. Ilenkolelo yokuba ngokhethekile, yokugubuzelwa ingubo yokuthi akukho okuzokwehlela, ebangela intsha eningi ukuba izifake engozini.” UDkt. Robert Butterworth naye uyaphawula: “Uma wenza okuthile okunjengokwehla endizeni ihamba, kukunikeza umuzwa wokuphikisana nemvelo, wokuzinqumela isiphetho sakho.”

Nokho, ukuzifaka engozini futhi kungabangelwa izinhloso ezimbi. Encwadini yakhe ethi Childstress!, umlobi uMary Susan Miller uthi amadelakufa amaningi asemasha azifaka ngobuwula engozini ngenxa nje yokuthi awakwazi ukubhekana nokucindezela kokuphila kwawo. Ngaleyondlela imidlalo esabisayo yembula isimo sokuzilimaza noma sokuzibulala. “Bazifaka ngamabomu ezimweni eziyingozi,” kusho uMiller, “njengokungathi bafuna ukuzinqumela isiphetho sabo.”

Ingabe Iyingozi Ngempela?

Kungakhathaliseki ukuthi ithandwa kangakanani, imidlalo esabisayo ingaba yingozi. Abanye baveza iphuzu lokuthi ‘Kuyafana nokuwela umgwaqo nje.’ Kodwa umuntu owela umgwaqo usuke engalandile ingozi izihlalele. Futhi, nakuba imidlalo eminingi njenge-bungee jumping, inomlando ongconywana wokulondeka, izinto zingonakala. UMark Bracker, M.D., wakubeka ngalendlela: “Kulemidlalo eminingi eyingozi, uma konakala okuthile kuba yinhlekelele. Uma isilinganiso sokwesaba sisikhulu ngokuvamile nesengozi siba sikhulu kakhulu, kungaba sekugxumeni ezindizeni noma ukushwibeka emoyeni ngezimpiko zokuzenzela noma ukugibela izithuthuthu.” Omunye osemusha oneminyaka engu-20 wagxuma nge-bungee ehla kwi-balloon eyayimi emamitheni angu-58 phezulu. Yaba yini inkinga? Intambo yakhe yayingamamitha angu-79 ubude! Wawa wafa kabuhlungu.

Kuyavunywa ukuthi eminye imidlalo, njengokugibela izithuthuthu, ingajatshulelwa ngendlela ephephile nelinganiselwe. Kodwa omunye uchwepheshe wezokwelapha kwezemidlalo uthi ngabafuni benjabulo: “Njengoba amakhono abo eba ngconywana, bakhetha okuthile okuthé ukuba nzinyana, bagcine belimele.” Omunye osemusha wavuma: “Sengiwumlutha. Sekunzima manje ukuba nalowomuzwa wovalo nobumnandi.”

Iwalungele AmaKristu?

Ingabe iBhayibheli liyichitha ngokuphelele yonke imidlalo? Cha. Ukweqisa kobuwula okulahlwayo. Njengoba kulotshwe kumShumayeli 7:17, uSolomoni wabuza: “Uyakufelani kungakabi yisikhathi na?”

‘Isikhathi sokuphila sifushane. Dlala uzidelise,’ kukhuthaza esinye isaziso sezicathulo zokugijima. Kodwa sinomthwalo wemfanelo kithi ngokwethu, kulabo abasithandayo, nakuMdali wethu ukuba sikwazise ukuphila kwethu. Ukuphila kuyisipho esivela kuNkulunkulu. (IHubo 36:9) Ezikhathini zeBhayibheli kwakuba nenhlawulo enzima uma ukuphila kothile kwakungase kulahleke ngengozi. (Eksodusi 21:29; Numeri 35:22-25) Ngakho abantu bakaNkulunkulu bakhuthazwa ukuba bagweme izingozi ezingadingekile.—Qhathanisa noDuteronomi 22:8.

AmaKristu ngokufanayo namuhla anesibopho sokubonisa inhlonipho ngokuphila. Kungaba okufanelekile yini ukuphishekela umdlalo ongase ukuchaye ezingozini ezingadingekile? Lapho uSathane uDeveli ezama ukulinga uJesu, waveza iphuzu lokuthi izingelosi zazizombamba uJesu uma eziphonsa phansi esuka esiqongweni sethempeli. UJesu waphendula: “Ungayilingi iNkosi uNkulunkulu wakho.”—Mathewu 4:5-7.

Ngaphezu kwalokho, kungakhathaliseki ukuthi ungase uzizwe uphilile futhi unamandla kangakanani, awuyena nje ovikelekile ekulimaleni. Akunangqondo ukucabanga ukuthi: ‘Ngeke kwenzeke kimi.’ IBhayibheli lisixwayisa ngokuthi “bonke bahlangabezana nesikhathi nethuba.”—UmShumayeli 9:11.

Ubogawula Ubheka

Kunengqondo ukucabanga ngokungathi sína ngemiphumela engaba khona ngokugxuma kuyi-crane, ukwehla endizeni ihamba, noma ukwenza noma yini engase ibonakale iyingozi ngokweqile. Ungamane uthembele kunzwabethi noma imibiko enentshiseko yenye intsha. (IzAga 14:15) Thola amaqiniso.

Ngokwesibonelo, singakanani isilinganiso sokuthi kube nengozi? Yiziphi izinyathelo zokuphepha ezithathwayo? Omunye uchwepheshe uthi ngokuphathelene nokutshuza emanzini: “[Abantu bacabanga ukuthi] ukusuka emoyeni ungene emanzini kuyingozi. . . . Kodwa kuyingozi kuphela uma ukwenza ngaphandle kokufundiswa okufanele.” Ngakho kufanele uzibuze, Yikuphi ukuqeqeshwa namathuluzi okudingeka kulomdlalo? Zikhona yini izinzuzo ezifanelekayo, njengokuvivinya umzimba? Ingabe izingozi zenzeka ngokwethukela, noma ingabe injongo eyinhloko yalomdlalo ukudlala ngokufa?

Uma lokhu okushiwo kamuva kuyiqiniso, ungase uzibuze ukuthi kungani ukuthanda kangaka ukuzifaka engozini. Ingabe kuwukusabela ekubeni nesizungu noma ukucindezeleka? Khona-ke kungani ungatholi indlela ephephile, engcono yokubhekana nemizwa enjalo?b Incwadi ethi Teenage Stress isikhumbuza ukuthi ukuzifaka engozini “kuyindlela eyingozi negcina ingasebenzanga yokubhekana nokucindezeleka.”—Qhathanisa nezAga 21:17.

Ngemva kokucwaningisisa ngakho konke—nokukhuluma nabazali bakho ngezinto ezithile—kungase kunqunywe ukuthi kungcono udede emidlalweni eyingozi ngokweqile. Abazali bakho bangase bakhethe ukuba uphishekele imidlalo ebonakala ingelona usongo kangako ekuphileni, njengokugibela ibhayisikili, ukudlala ngezicathulo ezinamasondo, ukushibilika eqhweni, nokutshuza emanzini, uma sibala okumbalwa. Yebo, ngisho nemidlalo ephephile ngokuqhathaniswa ingaba yingozi uma izinyathelo ezifanelekile zokuphepha zingathathwa.

Lokhu kwenzeka eqenjini elincane lentsha engamaKristu eyanquma ukuhamba ezintabeni. Laphambuka endleleni laqala ukucaca eweni eliphakeme. Ngokushesha lazithola livalelekile, lingasakwazi ukuya phambili noma emuva ngokuphephile. Osemusha owayehola leloqembu wabe esezwa umsindo ongalindelekile. Abangane bakhe ababili babewile bafa. Yeka inhlekelele!

Ngakho siza uqaphele! ‘Thokoza ebusheni bakho,’ ujabulele amandla nobungqabavu obusiswe ngabo. (UmShumayeli 11:9) Kodwa ngaphambi kokwamukela isimemo sokwenza okuthile okuyingozi, yenza lokho okwenziwa uBrian osemusha. Uthi: “Ngiye ngizibuze, ‘UJehova uzozizwa kanjani ngakho? Kuzobonisa ukuthi nginesimo sengqondo esinjani ngesipho sokuphila anginike sona?’” Yebo, hlola izingozi, uhlole izinhloso zakho. Ukuphila kuyigugu kakhulu ukuba kunganganakwa.

[Imibhalo yaphansi]

[Isithombe ekhasini 10]

Kufanele yini intsha engamaKristu izame imidlalo eyingozi njenge-“bungee jumping”?