Ingabe Sasikhona Isikhukhula Sembulunga Yonke?

UZAMCOLO owakhukhula umhlaba wonke, babengasoze bawukhohlwe abasinda kuwo. Babengakhuluma ngawo kubantwana babo nakubazukulu babo. UShemi waphila iminyaka engu-500 ngemva kukaZamcolo ukuze alandise lesisenzakalo ezizukulwaneni eziningi. Wafa eminyakeni eyishumi nje ngaphambi kokuzalwa kukaJakobe. UMose walondoloza lomlando oyiqiniso encwadini kaGenesise. Esikhathini esithile ngemva kweSikhukhula, lapho abantu abadelela uNkulunkulu bakha uMbhoshongo WaseBabele, uJehova wasanganisa ulimi lwabo futhi wabahlakazela “emhlabeni wonke.” (Genesise 11:9) Kufanele ukuba lababantu bathatha izindaba zeSikhukhula futhi bazidlulisela ezizukulwaneni ezilandelayo. Iqiniso lokuthi akuzona nje izindaba ezimbalwa ezikhuluma ngalowoZamcolo omkhulu kodwa mhlawumbe izindaba eziningi ezihlukahlukene, nokuthi izindaba ezinjalo zitholakala ezinkolelweni zezinhlanga zasendulo eziningi emhlabeni wonke, liwubufakazi obuqand’ ikhanda bokuthi bonke lababantu babenendabuko efanayo nokuthi okhokho babo basendulo babeyazi indaba yalesoSikhukhula.

Ukulandisa kwalezizinganekwane ngoZamcolo kuvumelana nezinye izici eziyinhloko zokulandisa kweBhayibheli: (1) indawo eyisiphephelo sabambalwa abasinda, (2) ukubhujiswa ngamanzi okuhlukile kokuphila embulungeni yonke, kanye (3) nokulondolozwa kwembewu yohlanga lwesintu. AbaseGibithe, amaGreki, amaShayina, amaDruid aseBrithani, abasePolynesia, ama-Eskimo nabaseGreenland, abantu base-Afrika, amaHindu, namaNdiya aseMelika—bonke laba banezindaba zabo ezikhuluma ngeSikhukhula.

I-International Standard Bible Encyclopedia (Umqulu 2, ikhasi 319) ithi: “Izindaba ezikhuluma ngeSikhukhula ziye zatholakala cishe kuzo zonke izizwe nezizwana. Nakuba zandile ezwekazini lase-Asia naseziqhingini ezingaseningizimu yalo nasezwekazini laseNyakatho Melika, ziye zatholakala kuwo wonke amazwekazi. Ingqikithi yenani lezindaba ezaziwayo ingafinyelela kwezingaba ngu-270 . . . Ukwaziwa endaweni yonke kokulandisa ngesikhukhula ngokuvamile kubhekwa njengobufakazi bokubhujiswa kwaso sonke isintu ngesikhukhula nokwanda kohlanga lwesintu kusuka endaweni eyodwa ngisho nasemkhayeni owodwa. Nakuba kungezona zonke izinkolelo ezibhekisela esikhukhuleni esifanayo, ngokusobala eziningi ziyabhekisela. Ukugomela kokuthi eziningi zalezizindaba zesikhukhula zavela ngezithunywa zevangeli akunakuba iqiniso ngoba eziningi zazo zaqoqwa izazi zemvelaphi nenhlalo yabantu ezazingenasithakazelo sokuvikela iBhayibheli.”

Ezikhathini ezidlule, abantu abathile basendulo (e-Australia, eGibithe, eFiji, eSociety Islands, ePeru, eMexico, nakwezinye izindawo) balondoloza okwakungaba izinsalela zezinkolelo eziphathelene neSikhukhula ngokugubha ‘Idili Lokhokho’ noma ‘Umkhosi Wabafile’ ngo-November. Amasiko anjalo ayebonisa ukukhumbula imbubhiso eyabangelwa uZamcolo. Ngokwencwadi ethi Life and Work at the Great Pyramid, lomkhosi wawenziwa ngomhla ka-17 ku-November eMexico ngoba “ngalesosikhathi babenenkolelo yokuthi izwe lalibhujisiwe ngaphambili; futhi babesaba ukuthi inhlekelele efanayo, ekupheleni kwenkathi, yayingaqothula uhlanga lwesintu.” (Nguprofesa C. Piazzi Smyth, Edinburgh, 1867, Umqulu II, amakhasi 390, 391)

Incwadi ethi The Worship of the Dead iyaphawula: “Lomkhosi [wabafile] . . . wenziwa uwonk’ uwonke ngosuku noma cishe ngalo kanye usuku uZamcolo owenzeka ngalo, ngokokulandisa kukaMose, okuwukuthi, usuku lweshumi nesikhombisa lwenyanga yesibili—inyanga ecishe iqondane no-November.” (NguJ. Garnier, eLondon, ngo-1904, ikhasi 4) Ngokuthakazelisayo, iBhayibheli libika ukuthi iSikhukhula saqala “ngenyanga yesibili ngosuku lweshumi nesikhombisa lwenyanga.” (Genesise 7:11) ‘Leyonyanga yesibili’ iqondana nengxenye yokugcina ka-October nengxenye yokuqala ka-November kumakhalenda ethu.

Izinsalela Zemivubukulo

Izinsalela zemivubukulo yezilwane eziningi zingase zinikeze ubufakazi obengeziwe besikhukhula sembulunga yonke. Kuye kwatholakala izinsalela zezindlovu nobhejane ezingxenyeni ezihlukahlukene zomhlaba. Ezinye kulezi zatholakala emaweni aseSiberia; ezinye zalondolozwa eqhweni laseSiberia nelase-Alaska. Eqinisweni, ezinye zatholakala zinokudla okungagayekile eziswini noma okungahlafuniwe emilonyeni, okubonisa ukuthi zafa ngokungazelele. Ekuhwebeni ngamazinyo endlovu, kulinganiselwa ukuthi kuye kwatholakala amashumi ezinkulungwane zamathambo ezindlovu ezinjalo.

Izinsalela zemivubukulo yezinye izilwane eziningi, njengamabhubesi, amahlosi, amabhele, namaphiva, ziye zatholakala endaweni eyodwa, okungase kubonise ukuthi zonke lezizilwane zabhujiswa kanye kanye. Abanye baye babhekisela ezintweni ezinjalo ezavubukulwa njengobufakazi obubonakalayo bokushintsha kwesimo sezulu ngokushesha nokubhujiswa ngokungazelele ngesikhukhula sendawo yonke. Nokho, abanye basekela izincazelo zokufa kwalezizilwane ezingahileli inhlekelele yomhlaba wonke. Ubufakazi bokuthi lesoSikhukhula saba khona abuxhomekile emivubukulweni enjalo nasezinsaleleni zezilwane ezomile.

Ubufakazi ObungokomBhalo

Ubufakazi obuqand’ ikhanda bokuba ngokomlando kukaZamcolo isiqinisekiso esanikezwa abanye abalobi beBhayibheli ngaphansi kokuphefumulelwa. Esinye isibonelo u-Isaya. (Isaya 54:9) UHezekeli naye uqinisekisa ukuthi uNowa ungumuntu ongokomlando. (Hezekeli 14:14, 18, 20) UPetru udonsela ukunakekela ekulandiseni ngoZamcolo ezincwadini zakhe. (1 Petru 3:20; 2 Petru 2:5) UPawulu unikeza ubufakazi bokholo olukhulu olwaboniswa uNowa ngokwakha umkhumbi wokusindisa umkhaya wakhe. (Heberu 11:7) ULuka ufaka uNowa ohlwini lozalo lokhokho bakaMesiya.—Luka 3:36.

Okubaluleke ngisho nakakhulu yilokho uJesu akusho ngezinsuku zikaZamcolo, njengoba kulotshwe uLuka noMathewu. Ngaphezu nje kokuba isiqinisekiso sokunemba kokulandisa ngoZamcolo, amazwi kaJesu abonisa ukubaluleka okungokomfanekiso nokungokwesiprofetho kwalezozenzakalo zasendulo. Lapho ephendula umbuzo wabafundi othi “Siyoba yini isibonakaliso sokuba khona kwakho nesesiphelo sesimiso sezinto?” phakathi kokunye uJesu wathi: “Ngoba njengoba nje zazinjalo izinsuku zikaNowa, kuyoba njalo nokuba khona kweNdodana yomuntu. Ngoba njengoba babenjalo ngalezozinsuku zangaphambi kwesikhukhula, bedla futhi bephuza, amadoda eshada futhi abesifazane bendiswa, kwaze kwaba usuku uNowa angena ngalo emkhunjini; futhi abanakanga kwaze kwafika isikhukhula, sabakhukhula bonke, kuyoba njalo nokuba khona kweNdodana yomuntu.”—Mathewu 24:3, 37-39; Luka 17:26, 27.

Ngakho-ke, kunobufakazi obuningi bemiBhalo Engcwele ephefumulelwe obusekela ubuqiniso bokulandisa ngoZamcolo. Abuxhomekile ezinkolelweni zabantu ezingelutho, ezinganekwaneni zabantu basendulo, noma kokutholwe isayensi yokwakheka komhlaba nesayensi yemivubukulo.

Uma ngemva kokufunda lomagazini, uba nemibuzo ethile yeBhayibheli, zizwe ukhululekile ukubonana noFakazi BakaJehova eHholo LoMbuso elisendaweni yangakini, noma ubhalele abanyathelisi balomagazini. (Bheka ikhasi 5.)