Woza Emhlanganweni Wesigodi “Wokwesaba UNkulunkulu”
IZINCEKU zikaJehova ezikhathini zasendulo kwakulindeleke ukuba zihlangane izikhathi ezintathu unyaka ngamunye ngaphansi koMthetho kaMose zizogubha imikhosi ethile. Lezi kwakuyizikhathi ezijabulisayo nezakhayo ngokomoya.—Duteronomi 16:16.
Ezikhathini zanamuhla izinceku zikaJehova ngokufanayo zihlangana izikhathi ezintathu unyaka ngamunye: ngosuku lomhlangano okhethekile, ngomhlangano wesifunda wezinsuku ezimbili, nangomhlangano wesigodi wezinsuku ezintathu noma ezine. Phakathi no-1994, oFakazi BakaJehova bazohlangana bezothamela uMhlangano Wesigodi “Wokwesaba UNkulunkulu.”
IZwi likaNkulunkulu alisishiyi singaqiniseki ukuthi kubalulekile yini ukwesaba uNkulunkulu noma cha. Lolohlobo lokwesaba kukhulunywe ngalo kulo izikhathi ezingaba ngu-200. Ukwesaba uNkulunkulu kuyisivikelo, njengoba kungabonwa kuzAga 16:6: “Ngokumesaba uJehova kudedwa ebubini.” Phela kumaHubo 111:10 sitshelwa ukuthi ukwesaba uNkulunkulu kungukuqala kokuhlakanipha!
Kungase kushiwo ukuthi kunezici ezimbili zokwesaba uNkulunkulu. Ngokwesibonelo, ukwesaba okunjalo kushukunyiswa uthando. Sesaba ukudumaza uNkulunkulu ngenxa yothando lwethu olukhulu ngaye. (IzAga 27:11) Futhi, ukuhlakanipha kwethu kuyosiza ekugxiliseni ukwesaba uNkulunkulu kithi, njengoba sazi ukuthi uNkulunkulu “ungumlilo oqothulayo” kubo bonke abenza okubi.—Heberu 12:29.
EMhlanganweni wethu wesiGodi “Wokwesaba UNkulunkulu,” siyothola isiyalo nesikhuthazo esikhulu ukuze sikhule ekwesabeni uNkulunkulu. Ukufundisa okunjalo kuyonikezwa ngezinkulumo, imiboniso, nangedrama, kanye nokulandiswa kokuhlangenwe nakho.
Njengoba nje ama-Israyeli asendulo ayalwa ukuba angezi emihlanganweni engaphethe lutho, ngakho nathi kufanele sifune ukufeza ingxenye yethu ukuze imihlangano yethu yesigodi ijabulise futhi iphumelele. (Duteronomi 16:17) Lokhu singakwenza ngokubonisa inhlonipho ngetafula likaJehova. Kanjani? Ngokufika ngesikhathi, ngokulalelisisa lokho okushiwo endaweni yesikhulumi, ngokuhlanganyela ngenhliziyo yonke ekuhlabeleleni izingoma. Ngeke sixoxe noma sihambahambe phakathi nesimiso. Siyofuna futhi ukunikela ngendlela esingakwazi ngayo ngezinkonzo zethu ezenziwa ngokuzithandela. Ukuhleleka komhlangano wesigodi kuhlanganisa ukuba khona kweminyango eminingi, yonke edinga abantu abazosebenza kuyo. Siyofuna futhi ukwenza iminikelo engokwezimali ngezinga uJehova asibusise ngalo.
Kwangathi inceku kaJehova ngayinye ingahlela manje ukuba khona ngazo zontathu izinsuku zoMhlangano Wesigodi “Wokwesaba UNkulunkulu,” kusukela engomeni yokuqala ngoLwesihlanu ekuseni kuze kube semthandazweni wokuphetha ngeSonto ntambama.