Ingabe Ukulungele Ukuya Eholidini?
SEKUSONDELE ihlobo eNyakatho Nenkabazwe. Ngokushesha izigidi zizoya eholidini. Kodwa ukuya eholidini akugcini nje ngehlobo. Ukuvakashela amazwe sekuyibhizinisi lonyaka wonke, elingenisa izinkulungwane zezigidi zamaRandi minyaka yonke. Nakuba iningi labaya eholidini livakasha ezweni lakubo, ukuvakashela emazweni angaphandle, okwake kwajatshulelwa abacebile kuphela, sekuyinsakavukela.
Isikhathi seholide esigunyazwa abaqashi siyahlukahluka kuye ngokwamazwe. Ngo-1979, amaphesenti amabili kuphela ezisebenzi zaseJalimane ayethola isikhathi seholide esingamasonto ayisithupha, kodwa manje iningi seliyasithola. Isikhathi seholide esisesilinganisweni esitholwa izisebenzi zasezimbonini eNtshonalanga Yurophu singaphezu kwamasonto amahlanu.
Ukuya Eholidini Kunendawo Yakho
Ekuqaleni isikhathi seholide sasisho okuthile okuhluke ngokuphelele kulokho esikusho namuhla. I-New Encyclopædia Britannica iyachaza: “Umkhuba wanamuhla wokuya eholidini . . . ususelwa enkathini eshintshiwe engokwenkolo yaseRoma lasendulo. Izinsuku zonyaka ezingaphezu kweziyikhulu zaziyizinsuku zemikhosi yonkulunkulu nonkulunkulukazi abahlukahlukene bamaRoma. Ezinsukwini zemikhosi engcwele, ezazibhekwa njengezinsuku ezingcwele, abantu babephumula emisebenzini yabo evamile yansuku zonke. Izinsuku ezazingabhekwa njengezingcwele zazibizwa ngokuthi ama-dies vacante, izinsuku ezingenalutho, abantu ababesebenza ngazo.” Kunokuba zibe izinsuku zokusebenza, “izinsuku ezingenalutho” zezikhathi zanamuhla ziyizinsuku zokuphumula.
AmaJalimane athanda ukubiza izikhathi zeholide ngokuthi “amasonto aphambili onyakeni.” Ngakolunye uhlangothi, imilutha yomsebenzi ingase ibheke “izinsuku ezingenalutho” zanamuhla njengezingenalutho ngempela, ezingenawo umsebenzi onenjongo. Kodwa lona bekungaba umbono oweqisayo. Umbono olinganiselayo ukubheka njengokuhlakanipha ukushiya inkambo evamile ngezinye izikhathi, ukwenza okuthile okuhlukile, nokuphumula.
Izici ezinhle zezikhathi zeholide zaqinisekiswa ekuhlolweni kwango-1991 kwezikhulu zamabhizinisi zaseYurophu, ezingu-78 kweziyikhulu zazo ezathi ukuya eholidini “kudingekile ngempela ukuze kunqandwe ukutubeka kwezikhulu emsebenzini.” Izingxenye ezintathu kwezine zaba nomuzwa wokuthi ukuya eholidini kuthuthukisa izinga lokusebenza, futhi ezingaphezu kwezingxenye ezimbili kwezintathu zathi ukuya eholidini kuthuthukisa ikhono lokusungula izinto. Okuthakazelisa nakakhulu, amaphesenti angu-64 abesifazane namaphesenti angu-41 abesilisa avumelana namazwi athi: “Ngingaphambana uma ngingayi njalo eholidini.”
Ukuhamba Kuyafundisa
Udokotela ongumlobi waseNgilandi wekhulu le-17 uThomas Fuller wabhala: “Ohamba kakhulu uzuza ulwazi.” Ukuhambela amazwe kusinikeza ithuba lokujwayela abantu bakwezinye izindawo, ukufunda ngamasiko abo nendlela yabo yokuphila. Ukuvakashela amazwe anezinga lokuphila eliphansi kunelethu kungasifundisa ukuba sikwazise lokho esinakho futhi kungashukumisa imizwa yozwela kithina ngabantu abaswele kunathi.
Uma sikuvumela, ukuhambela amazwe kungalungisa imibono eyiphutha futhi kunciphise ubandlululo. Kunikeza ithuba lokufundafunda ulimi olusha, ukunambitha ukudla esingase sikujabulele, noma ukwandisa izithombe zomkhaya, ukuqongelela ama-slide, noma umtapo wama-video onezibonelo zobuhle bendalo kaNkulunkulu.
Yiqiniso, ukuze sizuze kakhulu, kumelwe senze okungaphezu nje kokuhamba. Isivakashi esizungeza umhlaba kodwa sigcine ehhotela nezinye izivakashi—iningi lazo elingabantu basezweni lakubo—sibhukude echibini noma ebhishi lasehhotela, futhi sidle ukudla okufana nokwasekhaya ngeke sifunde lutho. Yeka indlela okudabukisa ngayo! Ngokwemibiko, iningi lezihambi kubonakala lingenasithakazelo esiqotho emazweni eliwavakashelayo noma kubantu bakulawo mazwe.
Ukulungiselela Kahle
USamuel Johnson, umlobi wezindaba nezinkondlo waseNgilandi wekhulu le-18, wathi umuntu ohambela amazwe “kumelwe athwale ulwazi, ukuze alethe ulwazi ekhaya.” Ngakho uma unethuba lokuhamba, lungiselela uhambo lwakho. Funda ngendawo oya kuyo ngaphambi kokuba uhambe. Hlela ukuthi yini ofuna ukuyibona, futhi unqume ukuthi yini ofuna ukuyenza. Khona-ke hlela ngokuvumelana nalokho. Ngokwesibonelo, uma ufuna ukushaywa umoya ebhishi noma ukucaca izintaba, thatha izicathulo nezingubo ezifanele.
Ungazami ukwenza izinto eziningi kakhulu ngesikhathi sakho kanjalo ubangele ukucindezeleka kokuphila kwansuku zonke kuphazamise iholide lakho. Shiya isikhathi esiningi esingahlelelwe lutho ukuze wenze izinto ezingalindelekile. Enye yezinzuzo zangempela zokuba seholidini iwukuba nesikhathi sokucabanga nokuzindla ngaphandle kokucindezelwa isikhathi, ukuzizwa ukhululekile ekucindezelekeni nasemibandeleni yokuphila okumatasa.
Iholide elivuza ngempela lingase lihlanganise ngisho nomsebenzi onzima. Ukwenza okuthile okuhlukile ngokuvamile kuyisihluthulelo seholide elimnandi. Ngokwesibonelo, inhlangano engasebenzeli nzuzo yase-United States ebizwa ngokuthi i-Volunteer Vacations ihlela ukuba izisebenzi zokuzithandela zichithe isikhathi seholide zinakekela izindawo zombuso zokulondoloza imvelo noma amahlathi. Esinye isisebenzi sathi sazikhandla kakhulu, kodwa sakujabulela kakhulu kangangokuba sanquma ukuphinda okufanayo ngemva konyaka.
OFakazi BakaJehova ngokuvamile basebenzisa izikhathi zeholide ukuze baye emihlanganweni yobuKristu noma baqhubekisele phambili inkonzo yabo yasobala. Abanye basebenzisa isikhathi sabo seholide ukuze basebenze endlunkulu noma ezakhiweni zamagatsha zoFakazi BakaJehova emazweni akubo, futhi bayakujabulela lokhu. Kamuva, iningi lalaba libhala izincwadi zokwazisa ngaleli lungelo.
Yebo, izikhathi zeholide zingajabulisa kakhulu, zibe ngisho amasonto aphambili onyakeni. Akumangalisi ukuthi kungani izingane zisilinda ngokulangazela leso sikhathi! Nokho, kunezinto okudingeka uziqaphele. Isihloko esilandelayo sizochaza.