Inkolo EPoland Yanamuhla
NGUMLOBELI WE-PHAPHAMA! EPOLAND
ABANTU basePoland baziwa emhlabeni wonke ngokuthanda inkolo. Empeleni, cishe abantu abangamaphesenti angu-95 bathi bangamaRoma Katolika.
Imikhosi yenkolo ithathwa ngokungathi sína kuleli lizwe futhi iyingxenye ebalulekile yesiko lezwe. Ikakhulukazi ezindaweni zasemaphandleni, amaholide enkolo ajatshulelwa ngezindlela ezinhlobonhlobo, njengoba abahlanganyela kuyo begqoka imvunulo yomdabu nabantu behlanganyela emidlalweni.
Abezindaba baziveza njalo lezi zenzakalo, kanye nohambo oluya ezindaweni ezidumile ezingcwele nasemikhosini yenkolo. Ubhapathizo, imishado yasesontweni, izinsuku ezethiwe ngamagama abantu neSidlo SeNkosi nakho kuyizenzakalo ezihlonishwa kakhulu.
Ngo-1978, uKarol Wojtyła, wasePoland, waba uPapa John Paul II. Lokhu kwafaka ugqozi enkolweni yamaKatolika ePoland. Izixuku zabantu eziziqhenyayo ziyayibungaza le ndoda yakubo lapho ivakashela ezweni lakubo lendabuko.
Zonke lezi zenzakalo zenkolo zenza abantu abangaphandle kwePoland bacabange ukuthi abantu basePoland banokholo oluqinile nolwaziwayo emphakathini. Nokho, ePoland abaholi bamaKatolika nezinye izingqapheli bakhathazekile ngezimo zengqondo nemikhuba eshintshayo yamalungu amaningi esonto.
Ukuhlaziya Isimo SasePoland
Abameleli abavelele besigungu sabefundisi bamaKatolika basePoland kanye nezintatheli nabacwaningi bezokuhlalisana kwabantu banombono ohlukile ngesimo senkolo yobuKatolika ePoland yanamuhla. Abaholi abavelele njalo basho amazwi ahlabayo begxeka ubugebengu obandayo, ukuwohloka kwezimiso zokuziphatha nokuncipha kwesithakazelo emfundisweni nasenqubweni yesonto. Ngokuvamile indaba enkulu yilo mbuzo, Indlela eyandile yokukhulekela yamaRoma Katolika inaliphi ithonya ekuphileni kwabantu kwansuku zonke?
Ngokwesibonelo, uMbhishobhi Omkhulu wasePoland uJózef Glemp waphawula ukungabi nasithakazelo kwabantu enkolweni futhi wathi kunesidingo sokulwisana negagasi elisha lobuqaba ezweni. Kumagazini wamaKatolika i-Ład, umlobi uWojciech Chudy wasichaza ngokuningiliziwe isimo. Wathi: ‘Kumelwe sicabangele indaba ebilokhu ikhathaza abapristi, izazi zezenhlalo nabahloli benkolo iminyaka eminingi—igebe elisobala phakathi kokuphila okungokwenkolo nokwansuku zonke. Ulalela intshumayelo, kodwa lapho uphuma esontweni, umane ukhohlwe ngezimiso zikaNkulunkulu zokuphila. Ungena kokunye ukuphila, komshikashika wethu wansuku zonke, lapho uphila khona njengokungathi akekho ngokuphelele uNkulunkulu.’
Umbhishobhi omkhulu uHenryk Muszyński, oyisekela likamongameli we-Episcopal Conference, uyanezela, ethi: “IVangeli alikwazanga ukusishintsha ngaphakathi. Yizibalo kuphela ezithi abantu basePoland bangamaKristu. Kunzima ukuphika ukuthi abantu abaningi babheka ubuKristu njengomkhuba kunanjengenkolo.”
Ukushintsha Kwezindinganiso —Ukushintsha Kokuziphatha
Amazwi anjalo abonisa ukuthi abameleli abaphambili besonto bayakhathazeka ngezinguquko ezinkulu eziye zenzeka ezindinganisweni nasekuziphatheni kwabantu. Phakathi kokunye, ukuzinikela enkolweni kwangaphambili kubonakala kuthathelwa indawo ezinye izinto abantu abazikhathalelayo.
Ngokwesibonelo, ekuhloleni okuthile kwezenhlalo, abantu basePoland babeka umkhaya kuqala ekuphileni, ulandelwe ukwethembeka, ubulungisa, umusa nokwethenjelwa. Izinto eziphathelene noNkulunkulu nenkolo zanikwa indawo ye-16. Ngenxa yalokho bayancipha abantu abaya emasontweni, ngisho naphakathi kwabaningi abathi bangamakholwa.
Ababhishobhi basePoland nabo bakhathazekile ngezibalo ezibonisa ukwanda kokungazinaki izimfundiso zenkolo. Ngokwesibonelo, ukuhlola okuphathelene nezindaba zenkolo okwenziwa u-Irena Borowik waseJagielloński University, kwabonisa ukuthi abantu abangamaphesenti angu-50 kuphela bathi bayakholelwa ekuphileni kwangemva kokufa, abangamaphesenti angu-47 bathi bacabanga ukuthi abapristi kumelwe bavunyelwe bashade, kanti abangamaphesenti angu-64 bathi bayavumelana nesehlukaniso.
Okunye ukuhlola, okwanyatheliswa kumagazini i-Wprost, kwabonisa ukuthi “abantu basePoland abangamaphesenti angu-69 bayakulahla ukunqabela kwesonto ukusetshenziswa kwezinto zokuvimbela inzalo, abangamaphesenti angu-56 abavumelani nokunqatshelwa kokukhipha isisu, kanti abangamaphesenti angu-54 ababoni nkinga ngobulili ngaphambi komshado.” Lezi zibalo zibonisa ukungqubuzana kwemibono okukhona esontweni.
Isonto lathola inhlonipho enkulu emashumini amabili eminyaka adlule ngenxa yendima yalo ekulweni nobuKhomanisi. Nokho, manje ukuqhubeka kwesonto lizigaxa ezindabeni zezombangazwe nezenhlalo kubonakala kubangela isimo esishubile, esiletha ukuhlukana okukhulu phakathi kwamalungu esonto nesigungu sabefundisi besonto.
Liyini Ikhambi Langempela?
Ngaphambi kwezinguquko zezombangazwe eziyingqopha-mlando ngo-1989, uhulumeni wawushaye imithetho eqondile yokuziphatha. Manje eminingi yaleyo mithetho ayisekho. Isimiso esisha sezombangazwe siye saletha umbuso wentando yeningi nenkululeko kubantu kodwa sabangela nomshikashika wokuziphilisa esimisweni sezomnotho esikhululekile. Abaningi lapha banomuzwa wokuthi umphakathi wasePoland wawungazilungele neze izinguquko ezinkulu kangaka. Yini eyayintuleka?
Ukuze umuntu aqhubeke eziphethe kahle futhi ephila ngokomoya kuleli lizwe lanamuhla kudingeka ukholo olusekelwe kokuthile okujule kakhulu kunenqubo noma isiko lenkolo. Umuntu ngamunye kumelwe athole ukholo olusekelwe ngokuqinile olwazini nasekuqondeni iZwi likaNkulunkulu, iBhayibheli.
Muva nje uPapa John Paul II ngokwakhe uye waqaphela isidingo sokuba amaKristu afunde imiBhalo Engcwele njalo. Wanxusa abantu “ukuba bahlakulele ukufunda iZwi likaNkulunkulu kakhulu futhi njalo.” Wanezela: “Kubalulekile ukuba okholwayo afunde ukutadisha umBhalo Ongcwele: kuyisinyathelo sokuqala senqubo, eqhubeka ngokuzindla nangomthandazo oqotho.” UPapa wakhuthaza “noma ubani ofuna iqiniso . . . ukuba azondle nsuku zonke ngesinkwa seZwi Lokuphila.”
Emakhulwini eminyaka angu-19 adlule, esikhathini eside ngaphambi kokuba ukuphila kube matasa futhi kuguquguquke njengoba kunjalo manje, uJesu Kristu wacela uNkulunkulu ukuba avikele abafundi bakhe emathonyeni ayebazungezile anciphisa ingokomoya. Wathandaza: “Bangcwelise ngeqiniso; izwi lakho liyiqiniso.” (Johane 17:17) Futhi isizathu esenza iBhayibheli libe ‘iqiniso’ siwukuthi liyiZwi likaNkulunkulu, hhayi elomuntu. Umphostoli uPawulu wabhalela elinye ibandla: “Ngesikhathi namukela izwi likaNkulunkulu, enalizwa ngathi, anilamukelanga njengezwi labantu, kodwa njengezwi likaNkulunkulu, njengoba nje liyilo ngempela.”—1 Thesalonika 2:13.
Ngenxa yokuthi iBhayibheli ‘liyizwi likaNkulunkulu’ futhi “liyiqiniso,” lingasinika esikudingayo ukuze siziqinise kuleli lizwe eliphishekela okwalo. IBhayibheli lithi: “Yonke imiBhalo iphefumulelwe uNkulunkulu futhi inenzuzo yokufundisa, yokusola, yokuqondisa izinto, yokuyala ekulungeni, ukuze umuntu kaNkulunkulu afaneleke ngokugcwele, ayihlomele ngokuphelele yonke imisebenzi emihle.”—2 Thimothewu 3:16, 17.
Abantu abaningi abaqotho nabahlakaniphile ePoland nasemhlabeni wonke bathola ukuthi ukuzifundela iBhayibheli kunikeza isisekelo esiqinile sokholo kuNkulunkulu nasenjongweni yakhe. Yilolu kholo olubanika amandla okuphila ukuphila kobuKristu bangempela kuleli lizwe lanamuhla eliphishekela izifiso zalo.
[Amazwi acashunwe esihlokweni ekhasini 16]
“Yizibalo kuphela ezithi abantu basePoland bangamaKristu.”—Umbhishobhi omkhulu wasePoland
[Amazwi acashunwe esihlokweni ekhasini 17]
Izimfundiso zesonto azishaywa mkhuba kuyo yonke indawo
[Ibalazwe ekhasini 15]
(Ukuze ubone ukuthi indaba ihlelwe kanjani, bheka encwadini)
POLAND