Okuphawulwa Abafundi Balo Magazini
Izingane Ezishiya Ikhaya Lwangiduduza uchungechunge oluthi “Lapho Izingane Zishiya Ikhaya.” (January 22, 1998) Izingane zethu ezintathu kwezine zashiya ikhaya eminyakeni emithathu edlule. Nakuba ngazikhulisa ngikulindele ukuthi sasizofika isikhathi sokuba zihambe, ngangingazange ngicabange ukuthi ezintathu zaziyohamba ngesikhathi esisodwa! Ngiyakwazisa ngempela ukukhathalela i-Watch Tower Society ekubonisayo ngemizwa yabazali.
M. S., Japan
Okwamanje, mina nomkami sikhonza njengamaphayona akhethekile, noma abashumayeli besikhathi esigcwele, kwesinye isifundazwe. Siyasebenza ngempela iseluleko senu sokuba sibonise abazali bethu ukuthi nakuba sikude, sisabathanda kakhulu.
M. M. S., Brazil
Ngineminyaka engu-11 ubudala. Imisebenzi yasendlini ngangingayibheki njengengiqeqeshela ukuba umuntu omdala. Kodwa lezi zihloko ziye zangisiza ngashintsha umqondo. Siyabonga ngokusikhathalela njengentsha.
D. U., Yugoslavia
Ama-gorilla Ngakujabulela ukufunda isihloko esithi “Ukuvakashela Ama-gorilla Asezintabeni.” (January 22, 1998) Angikaze ngicabange ukuthi umuntu angasondelana kangaka nama-gorilla ngaphandle kokuba kuvuke impi. Ngokuvamile emabhayisikobho avezwa njengezilwane ezinobudlova. Ngiyabonga ngesihloko esihle kangaka.
R. P., Venezuela
Ukungingiza Ngibonga kakhulu ngesihloko esithi “Indlela Engikubekezelela Ngayo Ukungingiza.” (January 22, 1998) Okuhlangenwe nakho kukaSven Sievers kwangikhuthaza kakhulu, njengoba nami ngingingiza. Kuyo yonke le minyaka, iSikole Senkonzo Esingokwasezulwini siye sangisiza ukuba ngibe isikhulumi esiqephuzayo.
E. Z. S., Brazil
ISikole Senkonzo Esingokwasezulwini siqhutshwa masonto onke emaHholo OMbuso OFakazi BakaJehova ezindaweni ezihlukahlukene.—ED.
Isimo sengqondo esihle sikaSven Sievers nakuba ebhekene nobunzima sangihlaba umxhwele. Ebandleni lethu kunomzalwane ongingizayo. Manje sengizokhuluma naye ngenhlonipho enkulu nangokukhathalela.
K. K., Japan
Nami bengingingiza kusukela ngisemncane. Nashaya emhloleni uma nithi umuntu kumelwe azame ukuqonda isimo somuntu ongingizayo kunokuba amdabukele. Ngiyabonga ngalesi sihloko.
E. C., Italy
Ukunqaba Kwabazali Ngisanda kuthola umagazini ka-January 22, 1998, futhi ngafunda isihloko esithi “Intsha Iyabuza . . . Kuthiwani Uma Abazali Bami Benginqabela Ukuba Ngishade?” Ngangicabanga ukuthi ngenza iphutha ngokunqabela indodakazi yami ukuba ishade. Kodwa lesi sihloko sakhuluma ngakho kanye okwakungikhathaza—ukuthi yayisencane, ubuntu balowo eyayizoshada naye, ithuba lokuboshelwa ejokweni linye nongakholwa, ingozi yokungenwa ingculaza nokungafani kwamasiko. Ngithandazela ukuba lesi sihloko sifinyelele inhliziyo yendodakazi yami.
N. B., United States
Yeka ukuthi sibhalwe kahle kanjani lesi sihloko! Nakhuluma ngendaba ebucayi futhi nayisingatha kahle kakhulu. Kwakhulunywa ngamaphuzu amaningi ahlukahlukene, asiza umfundi ukuba abe nombono ovulekile ngalezi zindaba.
S. C., United States
Sengineminyaka engu-8 ngingumshumayeli wesikhathi esigcwele. Abazali bami nabo bangamaKristu, futhi babengavumelani nesinqumo sami sokushada. Ngibonga kakhulu ngokusinika lokhu kwaziswa okuwusizo.
T. C. F., Tanzania