Okuphawulwa Abafundi Balo Magazini
Inhlekelele Yembulunga Yonke? Ngineminyaka eyishumi, futhi ngasijabulela isihloko esithi “Umbono WeBhayibheli: Ingabe Umhlaba Wethu Uyobhujiswa Yinhlekelele Yembulunga Yonke?” (December 8, 1998) Sangisiza ukuba ngiqonde ukuthi ayikho inhlekelele yembulunga yonke eyobhubhisa iplanethi yethu ngoba uJehova ufuna ukuba siphile lapha emhlabeni oyipharadesi.
J. P., United States
Ukuhlinzwa Ngaphandle Kwegazi Ngifisa ukunibonga ngesihloko senu esithi “Odokotela Sebeshintshe Umbono Ngokuhlinza Ngaphandle Kwegazi.” (December 8, 1998) Ngajabula ngempela lapho ngisifunda, ngoba kwaphumelela kahle lapho ngihlinzwa inqulu. Ngangihlala egumbini elilodwa nomunye owayelashwe ngendlela efanayo, kodwa kuye kusetshenziswa igazi. Ngaphuma esibhedlela lingakapheli isonto. Kodwa yena kwadingeka ahlale ngoba wayesengenwe amagciwane.
N. H., United States
Yeka Ugwayi! Isihloko esithi “Ungawuyeka—Nathi Sawuyeka” sasikhethekile kimi. (December 8, 1998) Ngisanda kuqeda ukufunda iBhayibheli nomuntu obhemayo. Uba khona kuyo yonke imihlangano, kodwa akathuthuki ngenxa yalo mkhuba wakhe. Ngiye ngamnikeza ezinye izihloko ezikhuluma ngokuyeka ugwayi, kodwa ngithandazela ukuthi lesi sihloko ekugcineni simsize ukuba anqobe lesi thiyo.
E. C., United States
Amakhemikhali Nempilo Muva nje ngiye ngaqala izifundo eziphathelene nokuthakwa kwemithi, futhi lapho ngibona umagazini ka-December 22, 1998, wangiheha. Njengokuvamile, niyakwazi ukubeka indaba eyinkimbinkimbi ngendlela yokuba iqondakale kuwo wonke umuntu. Njengoba izinto ezingcolisayo nemikhiqizo yamakhemikhali kuthinta bonke abantu, kungadingeka izivumelwano zomhlaba wonke ukuze kuxazululwe inkinga yokungcola ngokuphelele. Kodwa ubugovu nokuhaha komuntu kwenza kungenzeki lokhu. Siyabonga ngokuthi uJehova uyazi ukuthi angayixazulula kanjani le nkinga ngokuphelele.
C. V., Canada
Ukulahlekelwa Ngabazali Ngiyanibonga ngokubhala isihloko esihle kangaka, esithi “Intsha Iyabuza . . . Ngingaphila Kanjani Ngingenabazali?” (December 22, 1998) Sasiza ekungiqinisekiseni ngekhono likaJehova lokusivikela thina zingane uma silahlekelwa ngabazali. Angikashonelwa ngabazali bami, kodwa ngivame ukuzibuza ukuthi ngingenzenjani uma beshona. Isibonelo esihle sikaHoracio sangikhuthaza kakhulu.
M. J., Trinidad
Izinhlungu Ezibangelwa Ukukhandleka Kunzima ukubonisa indlela ozizwa ngayo lapho uthola isihloko esikhuluma ngenkinga onayo. Kwaba njalo ngesihloko esithi “Lokho Okufanele Ukwazi Ngezinhlungu Ezibangelwa Ukukhandleka.” (December 22, 1998) Nganginalolu hlobo lobuhlungu esihlakaleni, futhi yimanje lapho sengiqaphela khona ukuthi babubangelwe yini. Sangisiza kakhulu iseluleko sokuthi kungabhekanwa kanjani nale nkinga.
S. T., Yugoslavia
Ngisebenzela inkampane ekhiqiza amathuluzi okuvikela izisebenzi ezinhlungwini ezibangelwa ukukhandleka (RSI [repetitive strain injury]). I-RSI isivuse ilukuluku lokwazi kanye nempikiswano, kodwa isihloko senu sasibhalwe kahle kakhulu. Sakhuluma ngale ndaba ngendlela engakhethi nengancikile emibonweni yabanye. Ibhodi yethu yabaqondisi yahlabeka umxhwele kangangokuba ya-oda amakhophi alo magazini ukuze iwathumelele abameleli bayo kulo lonke elaseBrazil.
J. P. M., Brazil
Ngingumama wekhaya onomsebenzi wokuziphilisa ohilela ukulayisha amabhokisi amapulangwe asindayo. Zisuka nje ngazilimaza iqolo, izingalo nezihlakala. Cishe eminyakeni emibili edlule, ngaqala ukwelula imisipha yami imizuzu eyishumi ngaphambi kokuba ngivuke. Ngangicabanga ukuthi loko kuvivinya umzimba kuzongisiza, kodwa lesi sihloko sanikeza izindlela eziwusizo kakhulu zokubhekana nale nkinga. Ngesikhathi esizayo, ngizonikeza labo engisebenza nabo ikhophi yalo magazini.
K. Y., Japan