Okuphawulwa Abafundi Balo Magazini
Ubumpohlo Angivumelani nengosi ethi “Ubumpohlo—Kungani?” kwesithi “Ukubuka Okwezwe.” (September 22, 1999) Nithi isizathu seSonto ‘asisekelwe emiBhalweni.’ Ngenxa kaMathewu 19:10-12 neyoku-1 Korinte 7:8, 26, 27, isiphetho sami siwukuthi kunesisekelo sobumpohlo.
M. T., United States
Kuyiqiniso ukuthi iBhayibheli litusa ukungashadi njengenkambo efiselekayo kwabanye. Nokho, iBhayibheli alishayi mthetho othi izikhonzi ezingamaKristu mazibe yizimpohlo. Umphostoli uPetru namanye amadoda ayenomthwalo wemfanelo ebandleni lokuqala lobuKristu babeshadile. (1 Korinte 9:5; 1 Thimothewu 3:2) Ngakho-ke, ubumpohlo obuyimpoqo abusekelwe emiBhalweni.—ED.
zinkolelo-ze Njengesazi sezilimi, ngifisa ukuniqaphelisa iphutha elikuyi-Phaphama! ka-October 22, 1999. Ochungechungeni oluthi “Izinkolelo-ze—Kungani Ziyingozi Kangaka?” naveza ukuthi igama lesiJalimane elithi gesundheit liyindlela yokuthi “uNkulunkulu akubusise” lapho othile ethimula. Indlela yesiNgisi yokuhumusha leli gama kufanele ithi “mpilo-nhle.”C. C., United States
Sasingaqondile ukuthi elithi “gesundheit” liwukuhunyushwa okunembile kwenkulumo yesiNgisi. Labalwa kanye nezinkulumo ezimbili zezinye izilimi, kwachazwa ukuthi lisetshenziswa ngendlela “efanayo” nenkulumo yesiNgisi ethi “uNkulunkulu akubusise.”—ED.
I-cystic Fibrosis Ngisanda kufunda isihloko esithi “Ukuphila Ne-cystic Fibrosis.” (October 22, 1999) Indlela uJimmy Gratziotis abhekana ngayo nalesi sifo esibuhlungu yangithinta inhliziyo. Indlela amazisa ngayo umkakhe othandekayo nayo yangikhuthaza kakhulu. Ngiyaqaphela ukuthi ziningi kangakanani izinto esizithatha kalula—ngisho nekhono lethu lokuphefumula ngenkululeko!
D. A., England
Anginayo le nkinga kodwa nginesifo sokuwohloka kwemigudu yokuphefumula nokuvaleka kwemithambo yegazi. Kwangiduduza ukufunda le ndaba. Ngizizwa ngendlela efanayo noJimmy uma ethi angathanda ukugijima emathafeni, isifiso esinethemba lokusigcwalisa ezweni elisha elizayo elithenjiswe nguNkulunkulu.
F. A., Italy
UMfula IDanube Ngifisa ukunibonga ngesihloko esihle esithi “UMfula IDanube—Ukube Nje Ubungakhuluma!” (October 22, 1999) Lapho ngisakhula njengentombazane, ngangihlala eduze nesiphethu soMfula iDanube futhi ngangisithanda ngempela. Njengesazi se-hydrology, ngihlola imifula, futhi nginomuzwa wokuthi iyindalo kaNkulunkulu emangalisa ngempela.
D. O., Croatia
Nathi i-University of Vienna, eyasungulwa ngo-1365, iyona endala kunawo wonke emazweni akhuluma isiJalimane. Uma nikhuluma ngezindawo lapho kukhulunywa khona isiJalimane njengamanje—eJalimane, e-Austria nasezingxenyeni zeSwitzerland—enikushoyo kuyiqiniso. Kodwa-ke, iyunivesithi yesiJalimane endala kunawo wonke yasungulwa ngo-1348 ePrague, inhloko-dolobha yeCzech Republic yanamuhla. Ngaleso sikhathi yayingaphansi kwe-Austria.
M. E., Germany
Eqinisweni, iPrague yayiyinhloko-dolobha yaseBohemia. Nakuba kwakukhulunywa kokubili isiJalimane nesiCzech lapho, ulimi olungokomthetho lwale yunivesithi kwakuyisiLatini.—ED.
Amahloni Ngiyabonga kakhulu ngesihloko esithi “Intsha Iyabuza . . . Kungani Nginamahloni Kangaka?” (October 22,1999) Lokhu ukudla okufike ngesikhathi. Kukho konke ukuphila kwami bengihlushwa ukuba namahloni. Ngineminyaka engu-17 ubudala futhi ngikuthola kunzima ukujwayelana nabanye abantu nokwakha ubudlelwane nabasanda kuhlanganyela emibuthanweni yobuKristu. Ngenxa yalokhu, ngiye ngaphuthelwa amathuba amaningi okwanuleka nokujabulela ubudlelwane nabafowethu nodadewethu. Isihloko senu siye sangisiza ngaqaphela ukuthi amahloni ayinto evamile futhi ngingawanqoba.
B. H., United States