Okuphawulwa Abafundi Balo Magazini
I-cystic Fibrosis Ngiyabonga ngesihloko esithi “Ukuphila Ne-cystic Fibrosis.” (October 22, 1999) Nakuba ngineminyaka nje engu-17 ubudala futhi ngingenazo izinkinga zempilo ezingathi sína, indaba kaJimmy Garatziotis yangihlaba umxhwele. Yangisiza ukuba ngicabange ngezinto eziningi, kuhlanganise nokuthi kubaluleke kangakanani ukwazisa lokho onakho. Naphezu kwesifo sakhe esibuhlungu, uJimmy uyaqhubeka ethokoza futhi enokholo oluqinile ezithembisweni zikaJehova. Ngithandazela ukuthi uJimmy noDeanne baqhubeke benamandla okubhekana nokuvivinywa kwabo.
E. Z., Russia
Inkolelo-ze Angiyena omunye woFakazi BakaJehova, kodwa sengineminyaka emibili ngifunda izincwadi zenu. Ngithanda ukunibonga ngezihloko eziwuchungechunge ezithi “Ingabe Ukudalelwa Kulawula Ukuphila Kwakho?” (August 8, 1999) nezithi “Izinkolelo-ze—Kungani Ziyingozi Kangaka?” (October 22, 1999) Ngenxa yendlela engakhuliswa ngayo ngangikholelwa ekudalelweni kanye nasezeni. Kodwa manje ngicabanga ukuthi kuyiqiniso enikushoyo mayelana nobuKristu beqiniso.
N. D., France
Izihloko ezikhuluma ngokukholelwa ezeni zangiphatha kabi. NgingumRoma Katolika ozinikele, futhi esinye sezihloko zenu sikhuluma ngabagibeli abashaya “uphawu lwesiphambano” njengenkolelo-ze. AmaKatolika akwenza lokhu njengengxenye yokuthandazela uhambo oluphephile. Lesi isimiso esiyinhloko sokholo lwethu futhi akufanele sibhekwe njengokukholelwa ezeni.
S. W., United States
Ngeke sikuphike ukuthi abaningi bashaya uphawu lwesiphambano bengacabangi nhlobo ngokuzinikela okungokwenkolo. Lapho ebuzwa ukuthi kungani ashaya isiphambano enkundleni yemidlalo, umdlali webhola likanobhutshuzwayo wase-Australia wathi: “Ngicabanga ukuthi kuyinkolelo-ze ngandlela-thile.” Akumangalisi ukuthi lo mkhuba kwasekuqaleni wawubhekwa njengokukholelwa ezeni. I-“Catholic Encyclopedia” ithi: “Kusukela emandulo bekulokhu kusetshenziswa kuzo zonke izinhlobo zokukhipha amademoni nasekulumbeni njengesikhali sokulwa nemimoya yobumnyama.”—ED.
Izidakamizwa Ngifisa ukunibonga ngochungechunge oluthi “Ingabe Izwe Selibuswa Yizidakamizwa?” (November 8, 1999) Ngenxa yethonya labangane, ubaba usengene shí ekudleni izidakamizwa nasophuzweni oludakayo. Ikhaya aliyona indawo yesiphephelo kodwa seliyindawo lapho ngihlala ngisongelwa khona. Naphezu kwakho konke lokhu, ngeke ngiyeke ukumema abazali bami ukuba bazojabulela injabulo yokukhulekela uNkulunkulu.
M. L., Italy
Kanye ngesonto kufika iphoyisa esikoleni sethu lizokhuluma ngezinto ezinjengezidakamizwa nophuzo oludakayo. Nganquma ukuthi mhla liphinde lifika ekilasini lethu, ngizolinika izihloko ezikhuluma ngezidakamizwa. Lahlabeka umxhwele futhi lafundela ikilasi izingxenye ezithile kulezi zihloko. Lonke ikilasi lazuza kulezi zihloko!
C. D., United States
Ingane Ekhubazekile Indaba kaRosie Major enesihloko esithi “Ubunzima Basifundisa Ukuthembela KuNkulunkulu” (November 22, 1999), yangithinta ngokujulile. Sasihlala edolobheni, kodwa ngangingayithandi indlela okwakuyithinta ngayo indodakazi yami endala. Ngakho sathola indawo yokuhlala emaphandleni. Yonke into yayihamba kahle kwaze kwaba yilapho ngiphelelwa umsebenzi owawungiholela ama-dollar angu-56 000 ngonyaka (R363 000). Sazithola sisemaphandleni nezingane ezintathu okufanele sizondle futhi kudingeka sikhokhele nendlu. Kwakuyisimo esicindezela ngempela! Kodwa ngemva kokufunda indaba kaRosie Major, izinkinga zami zomnotho zabonakala ziwubala kangangokuba ngaba namahloni. Kunabantu abaningi abadinga usizo lukaNkulunkulu! Ngicela isikhokhelo se-Nqabayokulinda ne-Phaphama!
M. F., United States
Sakujabulela ukufeza isicelo salo mfundi.—ED.