Ikati Elisengozini Kakhulu Emhlabeni
NGUMLOBELI WE-PHAPHAMA! ESPAIN
Sekuyisikhathi eside i-lynx yaziwa ngokuthi ikati elinamehlo abukhali futhi elisheshayo. Lapho umuntu ebukhali ekuqondeni izinto, abantu baseSpain bathi “unamehlo e-lynx.” Ngokudabukisayo, i-lynx yase-Iberia (Lynx pardinus) manje seyaziwa nangokunye okungahlangene neze namehlo noma ubukhali bayo. Isibhekwa “njengekati elisengozini enkulu yokuqothulwa emhlabeni.”a
Eminyakeni edlule i-lynx yase-Iberia yayitholakala kulo lonke elasePortugal naseSpain futhi wawungaze uyithole ngisho nasezintabeni zasePyrenees eFrance. Namuhla, kutholakala amaqembu ambalwa ahlakazekile esifundeni esiseningizimu-ntshonalanga yeNhlonhlo Yase-Iberia. Nokho, mabili kuphela kula maqembu anezimo eziwavumayo ukuba azalane, futhi selilonke inani lama-lynx liye lehla ngendlela ethusayo.
Ngokokunye ukulinganisela, inani lama-lynx ase-Iberia manje selehle laba ngaphansi kuka-200. Yini ebangele lokhu kwehla okushaqisayo? Abanye bathi isizathu esiyinhloko ukuntuleka okukhulu kwenyama ayidlayo, yomvundla, oye waqedwa imiqedazwe eminingana yesifo se-myxomatosis. Ngaphezu kwalokho, amanye ama-lynx aye abanjwa izingibe zabazingela ngokungemthetho noma aye abulawa emigwaqweni emikhulu. Futhi indawo yawo efanelekayo iye yancozulwa ngokwandayo. Umbiko wamuva we-World Wildlife Fund uthi lezi zinkinga ziye zenza ukuba inani lawo elinciphayo lihlakazeke ezicagogwaneni eziqhelelene.
Yize kuye kwabekelwa eceleni imali engamaRandi ayizigidi ezingu-230 ukuze kusindiswe ama-lynx asengozini, iqembu lezazi muva nje lichaze isimo ngokuthi “siyashaqisa.” NgokukaNicolás Guzmán, umxhumanisi we-National Plan for the Conservation of the Iberian Lynx, kulezi zilwane ezingaba ngaphansi kuka-200 ezisele endle, ‘kunezinsikazi eziphakathi kuka-22 no-32 kuphela ezisesigabeni sokuzala.’ Wanezela, ‘Ukuqhubeka kwalezi zilwane zikhona kuzoxhomeka kulezi zinsikazi.’ Kuyadabukisa ukusho ukuthi indaba yama-lynx ase-Iberia ibonisa isimo izidalwa eziningi kakhulu ezinhle zomhlaba ezikuso.
[Umbhalo waphansi]
a I-lynx yase-Iberia noma yaseSpain yachazwa ngokuthi “isengozini ngendlela ebucayi” kuyi-Red List, uhlu lwezilwane ezingaphansi kosongo lokuqothulwa olubhalwe i-International Union for Conservation of Nature and Natural Resources.
[Imithombo Yesithombe ekhasini 18]
Foto © Fernando Ortega
sos lynx