Ingabe Baklanywa?
Ubulembu
◼ Bulula kunokotini, kodwa uma kulinganiswa igremu negremu, buqine ngaphezu kwensimbi. Sekungamashumi eminyaka ososayensi behlola ubulembu obuphothwa yizicabucabu. Baye bagxila kakhulu ohlotsheni lobulembu isicabucabu esihamba ngabo—obuqine kunazo zonke izinhlobo ezingu-7 ezenziwa yizicabucabu. Buqinile futhi buvimba amanzi ngaphezu kwemicu ekhiqizwa amacimbi, ngokuvamile esetshenziselwa ukwenza izingubo zokugqoka.
Cabanga Ngalokhu: Ukuze kwenziwe imicu ekhiqizwa yizimboni njenge-Kevlar, kudingeka amazinga aphakeme okushisa noketshezi oluyingxube oluthathwe ezithakweni zemvelo. Ngokuphambene, izicabucabu zikhiqiza ubulembu ezingeni lokushisa elilingana nelasendlini, zisebenzisa amanzi kuphela. Ngaphezu kwalokho, ubulembu izicabucabu ezihamba ngabo buqinile kune-Kevlar. Uma bebunganwetshwa bulingane nenkundla yebhola likanobhutshuzwayo, lobu bulembu bebungavimba indiza enkulu emoyeni!
Akumangalisi-ke ukuthi kungani abacwaningi behlatshwa umxhwele ukuqina kobulembu besicabucabu. U-Aimee Cunningham uyabhala kumagazini i-Science News: “Ososayensi bangathanda ukubuhlola ezintweni ezinjengezivikelo zezinhlamvu kanye nezintambo zokubamba amabhuloho alengayo.”
Kodwa ukulingisa ubulembu akuyona into elula, ngoba benziwa ngaphakathi emzimbeni wesicabucabu futhi le nqubo ayikaqondakali ngokuphelele. Lapho sicashunwa kumagazini i-Chemical & Engineering News, isazi sezinto eziphilayo uCheryl Y. Hayashi sathi: “Kuyasithobisa ngempela ukuqaphela ukuthi abantu abaningi abayizihlakaniphi bazama ukulingisa lokho izicabucabu ezisemizini yethu ezikwenza ngokwemvelo.”
Wena ucabangani? Ingabe isicabucabu nobulembu baso obuqine njengensimbi kwazivelela ngengozi, noma ingabe kuwumsebenzi woMdali ohlakaniphile?
[Isithombe ekhasini 24]
Isithombe esikhulisiwe esibonisa isicabucabu sikhiqiza ubulembu
[Umthombo]
Copyright Dennis Kunkel Microscopy, Inc.