Indlela Yokulawula Ukucindezeleka
IBhayibheli likhuluma ‘ngezikhathi zosizi zokucindezeleka okukhulu nobunzima.’ Cishe uzovuma ukuthi siphila enkathini yokucindezeleka okukhulu manje.—2 Thimothewu 3:1, The Amplified Bible.
NJENGOBA wazi, kulula ukucima umlilo omncane kunokucima umlilo omkhulu. Ngokufanayo, ukucindezeleka okuncane kulula ukukulawula kunokucindezeleka okukhulu osekunesikhathi eside kukhona. Udokotela othile uthi “kubalulekile ukukwenza umkhuba wansuku zonke ukulawula ukucindezeleka kulokhu kuphila kwethu okumatasa.”a
Umgomo wokukwenza umkhuba wansuku zonke ukulawula ukucindezeleka unenjongo ekabili. Eyokuqala, ukusisiza ukuba sinciphise izinto ezibangela ukucindezeleka ekuphileni esingase sikwazi ukuzinciphisa. Eyesibili, ukusisiza ukuba silawule indlela esisabela ngayo ekucindezelekeni esingenakukulawula.
Ingabe iBhayibheli liyasinika isiqondiso esingasisiza ukuba silawule ukucindezeleka?
Amaqiniso EBhayibheli Abalulekile
Ngokwamukela amaqiniso aseBhayibhelini, singathola imicabango yoMdali wethu eqabulayo nenikeza amandla. IZwi likaNkulunkulu liwumthombo wesiqondiso oyigugu. Empeleni, liwumthombo omkhulu wamaqiniso angokomoya anciphisa ukucindezeleka! Lokhu kungasisiza ukuba sigweme ‘ukwethuka noma ukwesaba’ futhi sibhekane ngokuphumelelayo nokucindezeleka kwansuku zonke.—Joshuwa 1:7-9.
IBhayibheli lisisiza ukuba sinciphise ukucindezeleka ngendlela enhle ngokusiqinisekisa ngokuthi uBaba wethu wasezulwini, uJehova, “unothando futhi unesihe.” (Jakobe 5:11) UPatricia, owayenguprofesa eyunivesithi ethile eCalifornia, uyachaza: “Into eye yangisiza kakhulu ukucabanga ngentando kaNkulunkulu nezinto ezinhle azenzayo.”
Cabanga ngendlela amagama anomusa nezenzo zikaJesu Kristu endulo ezazenza zaqabuleka ngayo izilaleli zakhe ezazicindezelwe futhi zicindezelekile. Wanxusa: “Wozani kimi, nina nonke enikhandlekayo nenisindwayo, ngizonenza niqabuleke [ngokomoya].”—Mathewu 11:28-30.
Njengoba nje asho, uJesu wayengenalo ukhahlo. Kunalokho, wayezicabangela izidingo ezingokomzwelo nezingokomzimba zabafundi bakhe, enza ngisho namalungiselelo okuba baphumule esimisweni sabo esimatasa sokushumayela. (Marku 6:30-32) Singaqiniseka ukuthi uJesu, manje oyiNkosi yasezulwini, usizwela ngokujulile lapho sibhekana nokucindezeleka okukhulu. Ngomusa, usinika ‘usizo ngesikhathi esifanele.’—Hebheru 2:17, 18; 4:16.
Indima Yokukhulumisana Okuhle
Ukukhulumisana okuhle kungelinye lamathuluzi abalulekile okulawula ukucindezeleka ngokuphumelelayo. IBhayibheli liyafundisa: “Amacebo ayashafa lapho kungekho khona inkulumo eyisifuba, kodwa ngobuningi babeluleki kuba khona okufezwayo.” (IzAga 15:22) Ngenxa yalokho, abaningi bathole ukuthi ukuxoxa nomuntu abashade naye, umngane, noma umuntu abamjwayele kufeza lukhulu ekunciphiseni ukucindezeleka.
Indlela ebaluleke kakhulu, ewusizo netholakala kalula ‘yenkulumo eyisifuba’ ukuthandaza kuNkulunkulu. Ukulisebenzisa njalo leli lungiselelo kungakusiza ukuba ugweme ‘ukukhathazeka nganoma yini.’ Abaningi bathole ukuthi ngokuncika emthandazweni, baye basizwa ukuba bathole “ukuthula kukaNkulunkulu okudlula konke ukucabanga.” Ngokuvumelana nesithembiso seBhayibheli, ‘izinhliziyo namandla engqondo’ abantu abanjalo kuyavikelwa.—Filipi 4:6, 7; IzAga 14:30.
Incwadi ethile ekhuluma ngokucindezeleka ithi “abantu abanabangane ababasekelayo bavame ukubhekana kangcono nokucindezeleka futhi baphile kangcono engqondweni kunalabo abazama ukwenza yonke into bebodwa.” Alikho iqembu labasekeli elingcono kunalelo elijatshulelwa abantu abakhulekela uNkulunkulu weqiniso, uJehova. Ngokuvumelana nesiqondiso seBhayibheli, bahlangana njalo futhi bakhuthazane. (Hebheru 10:24, 25) Omunye oba khona kule mihlangano wathi: “Ngezinye izikhathi ngisebenza amahora amaningi futhi ngicindezeleke kakhulu. Kodwa uma ngiya emhlanganweni, kuye kuthi ngemva komthandazo wokuphetha ngizithole ngingasacindezelekile futhi ngizizwa ngiqabulekile.”
Okunye okubalulekile ukuba namahlaya uma ubhekene nokucindezeleka. UmShumayeli 3:4 uthi kukhona “isikhathi sokukhala nesikhathi sokuhleka.” Ukuhleka kuyaqabula futhi kunempilo ngoba, njengoba omunye udokotela echaza, “umzimba ukhipha ama-endorphin unqande nokukhishwa kwe-adrenaline uma sihleka.” Owesifazane othile wathi: “Umyeni wami uvele asho okuthile okuhlekisayo uma izimo zicindezela kakhulu, futhi lokho kuyasiza ngempela.”
Izimfanelo Ezinciphisa Ukucindezeleka
IBhayibheli likhuthaza izimfanelo ezinciphisa ukucindezeleka. Zihlanganisa ‘uthando, injabulo, ukuthula, ukubekezela, umusa, ubuhle, ukholo, ubumnene nokuzithiba,’ ezibizwa ngokuthi “izithelo zomoya [kaNkulunkulu].” Ngaphezu kwalokho, iBhayibheli lisiyala ukuba sigweme “ukufutheka okubi nentukuthelo nolaka nokuklabalasa nokuhlambalaza.” Libe selinezela: “Yibani nomusa komunye nomunye, ninobubele besisa, nithethelelane ngokukhululekile.”—Galathiya 5:22, 23; Efesu 4:31, 32.
Omunye udokotela uchaza ukubaluleka kokusebenzisa lezi zimfundiso zeBhayibheli, ikakhulukazi ezweni lanamuhla. Uthi: “Ukuphatha abantu ngenhlonipho kuyindlela ebalulekile yokunciphisa ukucindezeleka.” IBhayibheli lisisiza nokuba sihlakulele isizotha, okusho ukuba nombono olinganiselayo ngamakhono ethu.—Mika 6:8.
UNkulunkulu ulindele ukuba ngokuthobeka sivume ukuthi sinokulinganiselwa ngokomzimba, ngokwengqondo nangokomzwelo futhi asinakukwazi ukwenza yonke into esifuna ukuyenza. Nakuba lokhu kunzima, kungase kudingeke sifunde ukuthi kunini lapho singenakuvuma khona ukwenza okuthile okungaphezu kwamandla ethu nokuthi singakwenza kanjani.
Lokhu akusho ukuthi uma zonke izeluleko ezingenhla ezisekelwe eBhayibhelini zisetshenziswa, uyokhululeka kukho konke ukucindezeleka. Iqiniso liwukuthi, uSathane uDeveli usegxile kulabo abakhulekela uNkulunkulu ngoba ezama ukubonisa ukuthi bayoshiya ukukhulekela kweqiniso uma becindezelwa. (IsAmbulo 12:17) Kodwa njengoba sesibonile, kunezindlela eziningi uNkulunkulu asinika ngazo imithombo efika ngesikhathi ukuze asisize sinciphise futhi sibhekane nokucindezeleka.b
[Imibhalo yaphansi]
a Lapho uba nokucindezeleka okuqhubeka isikhathi eside noma okubi kakhulu kuze kubangele ukugula, kungase kube ukuhlakanipha ukuya kochwepheshe bezokwelapha.
b Ukuze uthole izindlela ezengeziwe zokubhekana nokucindezeleka, ucelwa ukuba ubheke uchungechunge oluthi “Ukukhululeka Ekucindezelekeni!” kuyi-Phaphama! ka-February 8, 2005 kanye noluthi “Ukubhekana Nokuphila Kwanamuhla Okumatasa,” kumagazini ka-February 8, 2001.
[Ibhokisi ekhasini 9]
EZINYE IZINDLELA ZOKUNCIPHISA UKUCINDEZELEKA
● Ungalindeli ukuphelela kuwe noma kwabanye.—UmShumayeli 7:16.
● Beka izinto ezifanele kuqala.—Filipi 1:10, 11.
● Vocavoca umzimba njalo.—1 Thimothewu 4:8.
● Jabulela indalo kaJehova.—IHubo 92:4, 5.
● Yiba nesikhathi sokuba wedwa.—Mathewu 14:23.
● Phumula futhi ulale ngokwanele.—UmShumayeli 4:6.
[Isithombe ekhasini 7]
Ukuzinika isikhathi sokuxoxa kubalulekile ekunciphiseni ukucindezeleka
[Isithombe ekhasini 7]
Ukuhlakulela izimfanelo ezijabulisa uNkulunkulu kuyasiza ekunciphiseni ukucindezeleka