Isifundo 36
Isiphetho Esifanele Nokulinganiswa Kwesikhathi Sakho
1-3. Ungenza kanjani ukuba isiphetho sihlangane nesihloko senkulumo yakho na?
1 Lokho okusho ekugcineni kuvame ukukhunjulwa kuqala. Njalo isiphetho senkulumo yakho sidinga ukulungiselelwa ngokunakekela. Sifanele siqhamise ikakhulu amaphuzu ayinhloko ofuna akhunjulwe futhi singenisise emqondweni isihloko okokugcina. Ngenxa yendaba yakho nokunikela simelwe siqhubezele izilaleli esenzweni. Sikucelisisa ukuba unakekele lokhu lapho ufika ekuthini “Isiphetho sifanele, siyaphumelela” epheshaneni Leseluleko Senkulumo.
2 Isiphetho sihlangene ngokuqondile nesihloko senkulumo. Ngemiqondo yendlela yokuhlanganisa isiphetho nesihloko senkulumo, sisikisela ukuthi ubukeze Isifundo sama-27. Isiphetho sakho asidingi ukusho futhi isihloko senkulumo ngalawomazwi, nakuba abanye abafundi, ikakhulu labo abasebasha, bangahle bakufumane kuwusizo; kepha sifanele sikhombe kuso. Ngakho-ke, ngesisekelo sesihloko, bonisa lokho izilaleli ezingakwenza.
3 Uma isiphetho singahlangene ngokuqondile nesihloko, asinakuyiphetha kahle indaba futhi siyihlanganise. Ngisho noma usebenzisa isiphetho sokuqondile ukubuyekeza, unikela amabala engwe amaphuzu amakhulu, akungabazeki ukuthi usazothanda ukwengeza umusho wokugcina noma emibili, oveza umqondo omkhulu noma isihloko senkulumo.
4-9. Kungani isiphetho sakho simelwe sibonise izilaleli zakho lokho ezimelwe zikwenze na?
4 Isiphetho sibonisa izilaleli lokho ezimelwe zikwenze. Njengoba ngokuvamile injongo yakho yokukhuluma wukuqhubezela ohlotsheni oluthile lwesenzo noma ukukholisela embonweni othile, ngempela-ke, imicabango ephethayo yenkulumo ifanele ingenisise emqondweni lawomaphuzu. Injongo enkulu yesiphetho-ke, wukubonisa izilaleli lokho ezimelwe zikwenze nokuzikhuthaza ukuba zikwenze.
5 Ngalesisizathu, phezu kokukhanyisa injongo yenkulumo yakho, isiphetho sifanele sibe-nokushiseka, ukukholwa, amandla ashukumisayo. Ngokuvamile kuyofunyanwa ukuthi imisho emifushane inosizo ekunikezeni amandla esiphethweni. Kepha, kungakhathaleki ukwakhiwa kwemisho, kufanele kunikezwe izizathu zesenzo ezizwakalayo, kuhlanganise nezinzuzo eziyotholwa ekuthatheni inkambo enjalo.
6 Isiphetho sifanele silandele ngomqondo ohlelekile lokho osekushiwo enkulumweni. Kanjalo, lokho okushoyo esiphethweni sakho kumelwe kushukumise izilaleli zakho ukwenza lokho osekushiwo emzimbeni wenkulumo. Isiphetho sakho siyokhanyisa futhi sigcizelele lokho ezimelwe zikwenze kangangoba ziyokwenza ngesisekelo salezozinto ezihlanganiswe enkulumweni futhi ziyoshukumiswa kakhulu ukukwenza ngamandla esiphetho sakho.
7 Enkonzweni yendlu ngendlu iziphetho zivame ukuba-buthakathaka. Lokhu kwenzeka lapho umninindlu engaboniswa ngempela inkambo esilindele ukuba ayithathe, noma ekuthatheni enye yezincwadi, ekuvumeni ukuphindelelwa noma okuthile okufanayo.
8 Neziphetho ezabelweni zesikole ziyokuba-buthakathaka uma ziwukubuyekezwa nje kwendaba futhi zingashukumiseli izilaleli esenzweni. Kufanele kunikezwe ukusetshenziswa kwendaba, noma ngenye indlela indaba ifanele iboniswe ukuba inosizo oluthile ezilalelini.
9 Ezinye izikhulumi zikufumana kunosizo kakhulu ukuphetha inkulumo yesihloko seBhayibheli ngokubuyekezwa okufushane kwayo yonke inkulumo, zisebenzisa amatekisi ayisihluthulelo nesihloko senkulumo njengesisekelo sakho. Ngokufishanisa inkulumo ibe-yizihloko ngalendlela kuxoxwa ngamatekisi ambalwa njengoba ubuyokwenza emnyango, awunakukhanyisa iphuzu lenkulumo kuphela kepha uyonikeza izilaleli okuthile ezingahamba nakho futhi zikusebenzise ekuphindaphindeni amaphuzu amqoka enkulumo. Leyo yinjongo enkulu yesiphetho, nalendlela ayifanele kuphela, kepha iyifeza ngokuphumelelayo leyonjongo.
**********
10-14. Nikeza ukusikisela ngobude besiphetho.
10 Isiphetho side ngokufanele. Ubude besiphetho abufanele bunqunywe yiwashi, nakuba lokhu kuvame ukwenzeka. Isiphetho side ngokufanele uma siphumelela futhi sifeza injongo yaso. Ngakho-ke, ukufaneleka kobude baso kufanele kunqunywe yimiphumela. Lokhu yilokho umeluleki wakho ayokwenza lapho usebenzela ukuthi “Isiphetho side ngokufanele,” epheshaneni Leseluleko Senkulumo.
11 Ngokuqhathaniswa kweziphetho ngokulinganisana nobude bomzimba wendaba, qaphela isiphetho esifushane sayo yonke incwadi kamShumayeli njengoba sifunyanwa kumShumayeli 12:13, 14, futhi siqhathanise neNtshumayelo kaJesu yaseNtabeni nesiphetho sakhe ngokukaMathewu 7:24-27. Nazo-ke izinhlobo ezimbili ezahlukene nobude beziphetho, kanti zozimbili ziyayifeza injongo yazo.
12 Isiphetho asifanele sizume izilaleli. Akufanele nje amazwi akhulunywayo akhombe ngokusobala esiphethweni senkulumo, kepha afanele abe-nanephimbo lokugcina. Lokho okushoyo nendlela okusho ngayo kufanele kuphethe ingxoxo yakho. Akufanele kunense ngokungadingekile. Uma ungakwazi ukuhlanganisa inkulumo yakho futhi usalokhu usibambile isithakazelo kuso sonke isiphetho, sifanele-ke sibuye senziwe kabusha. Siseside ngokweqile.
13 Uma uyisikhulumi esiqalayo, kuvame ukuba-kuhle kakhulu ukufushanisa isiphetho sakho kunalokho obungahle ucabange ukuba kudingekile. Senze sibe-lula, siqonde futhi sikhanye. Musa ukusivumela siqhubeke ngokungenasiphelo.
14 Uma unikela enye ingxenye yenkulumo ehlanganyelwa yizikhulumi ezahlukene, noma uma ukhuluma emhlanganweni womsebenzi, isiphetho-ke senkulumo yakho siyohlangana nesethulo senkulumo elandelayo nangalokho singaba-sifushane kakhulu. Kanti-nokho, enye nenye ingxenye ngayinye ifanele ibe-nesiphetho esifeza injongo yenkulumo. Uma yenze njalo, inobude-ke obufanele.
**********
15-18. Uma ukulinganiswa kwesikhathi kungatholi ukunakelelisiswa, kwenzekani na?
15 Ukulinganiswa kwesikhathi. Abubalulekile kuphela ubude besiphetho; ukulinganiswa kwesikhathi kwazo zonke izingxenye zenkulumo kufanele kunakekelwe. Ngalesosizathu kukhona isikhala esahlukile epheshaneni Leseluleko Senkulumo so“Kulinganiswa kwesikhathi.”
16 Ukubaluleka kokulinganiswa okufanele kwesikhathi senkulumo akufanele kuncishiswe. Uma inkulumo ilungiselelwe ngokufanele, nokulinganiswa kwesikhathi kuyokube-kucatshangelwe, kepha uma isikhulumi, ngomzamo wokushiqela yonke indaba, seqa isikhathi, ngempela asiyifezi injongo yaso. Lokhu kungokuba labo abasezilalelini bayoqala ukushobashoba nokubheka amawashi abo nangempela bangakulaleli lokho esikushoyo. Isiphetho, esifanele sihlanganise ukusetshenziswa nokusunduzelwa okubalulekile ekufezeni injongo yenkulumo, siyolahleka. Ngisho noma sinikelwa, kaningi izilaleli ziyokwahluleka ukuzuza kuyo ngokuba isikhulumi seqa isikhathi.
17 Akukhathazeki kuphela izilaleli lapho isikhulumi seqa isikhathi, kepha nesikhulumi. Lapho sibona ukuthi isikhathi saso siyaphela futhi sinendaba eningi kakhulu, singahle sizame ukuhlohla eningi kakhulu, siqeda ukuphumelela kwayo. Lokhu kuvame ukuphumela ekuntulekeni kwesizotha. Ngenye indlela, uma isikhulumi sifumana ukuthi asinayo indaba eyanele yokugcwalisa isikhathi esabiwe, ngomzamo wokuyinweba singahle singezwakali futhi sindandaze ekunikeleni kwaso.
18 Lapho kuliqiniso ukuthi umbonisi wesikole uyokhombisa umfundi lapho isikhathi sakhe sesiphelile, kuyadumaza, kokubili kumfundi nasezilalelini, lapho inkulumo kumelwe inqanyulwe ingakapheli. Isikhulumi sifanele sibe-nesithakazelo esanele endabeni yaso ukuze sifune ukuyinikeza. Izilaleli ziyozizwa sengathi zisele zizula emoyeni uma zingakwazi ukuzwa isiphetho. Lowo oweqa njalo isikhathi ezinkulumweni zakhe ubonisa ukuthi akabacabangeli abanye noma ubonisa ukuntuleka kokulungiselela.
19, 20. Kungani ukulinganiswa kwesikhathi kubaluleke kakhulu emihlanganweni yomsebenzi nasezimisweni zemihlangano emikhulu na?
19 Lapho izikhulumi eziningi zinengxenye esimisweni, ukulinganiswa okufanele kwesikhathi kubaluleke kakhulu. Ngokwesibonelo, kungahle kube-nezingxenye ezinhlanu emhlanganweni womsebenzi. Uma esinye nesinye isikhulumi sikhuluma umzuzu owodwa kuphela ngaphezu kwesikhathi esabelwe sona, bekuyokwenza umhlangano weqe ngemizuzu emihlanu. Kanti yilowo nalowo abeseqe kancane kakhulu isikhathi. Umphumela kungahle kube-wukuthi abanye bamelwe bahambe umhlangano ungakaphumi ukuze bathole ibhasi eya ekhaya, noma abaganene abangakholwayo abazolanda omunye emhlanganweni abalindiswayo bangahle bacunuke. Umphumela ovamile awumuhle.
20 Izinkinga zingaphakama nalapho isikhulumi enkulumweni ehlanganyelwa yizikhulumi ezahlukene singasigcwalisi isikhathi esabelwe sona. Uma, ngokwesibonelo, umfowethu owabelwe inkulumo yengxenye yehora esimisweni somhlangano omkhulu abemelwe ayeke ngemuva kwemizuzu engamashumi amabili, bekungahle kubangele inxakanxaka esimisweni uma isikhulumi esilandelayo kwenzeke ukuba besingakalungeli ukuqalisa masinyane.
21-24. Landisa kafushane ezinye zezinkinga maqondana nokulinganiswa kwesikhathi nonobangela bakho.
21 Phela, omunye unobangela oyisisekelo wokweqa isikhathi enkulumweni wukuba-nendaba eningi ngokweqile. Lokhu ngokuthile okufanele kulungiswe lapho inkulumo ilungiselelwa. Uma amanye amaphuzu, amaphuzu asekuqaleni epheshaneni Leseluleko Senkulumo, efundwe kahle kufika kuleliphuzu, nokho, ukulinganiswa kwesikhathi akunakuba-yinkinga. Uma usufunde indlela yokwahlukanisa amaphuzu akho amakhulu neyokulungiselela uhlaka lwenkulumo olufanele, uyofumana ukuthi ukulinganiswa okuhle kwesikhathi kuyalandela ngokwemvelo. Ukulinganiswa kwesikhathi kucatshangelwa ngasekugcineni kwepheshana leseluleko ngokuba kwencike ikakhulu ezimfanelweni zokuqala zenkulumo okuxoxwe ngazo.
22 Ngokuvamile inkinga yokulinganiswa kwesikhathi wukweqa isikhathi. Isikhulumi esilungiselele kahle ngokuvamile sinendaba eningi efundisayo, kepha simelwe siqaphele ukuze singasebenzisi engaphezu kwezovunyelwa yisikhathi esabiwe.
23 Nokho, izikhulumi ezintsha noma ezingenalwazi ngezinye izikhathi zithambekele ukuphelelwa. Ziyothanda ukufunda ukusisebenzisa ngokugcwele isikhathi esitholakalayo. Okokuqala zingahle zikufumane kunzinyana ukulinganisa izinkulumo zazo ukuze zibe-nobude obuyibo du obufunwayo, kepha zifanele zizame ukusondela esikhathini esabelwe ngangokunokwenzeka. Kanti-nokho, ngaphandle kokuba inkulumo iphele ngaphambi kakhudlwana kwesikhathi esabiwe, ukulinganiswa kwesikhathi bekungenakucatshangelwa njengokubuthakathaka uma umfundi abelungiselele futhi wanikeza inkulumo ephethwe kahle, eyanelisayo.
24 Noma ukulinganiswa kwesikhathi sesikhulumi kufanele kucatshangelwe ukuba-buthakathaka noma qha kunganqunywa kahle kakhulu ngokubheka umphumela wokunikela ezilalelini. Lapho umbonisi wesikole ekhomba ukuthi isikhathi siphelile, umfundi ufanele azizwe ekhululekile ukuqedela umusho wakhe. Uma ngalowomusho engaphetha inkulumo yakhe ngokuphumelelayo ukuze izilaleli zizwe ukuthi zizwe ingxoxo ephethwe kahle, ukulinganiswa kwesikhathi-ke akufanele kucatshangelwe njengokubuthakathaka.
25-29. Umuntu angaqinisekisa kanjani ukuthi inkulumo yakhe ilinganiswe ngokufanele ngesikhathi na?
25 Ukulinganiswa okufanele kwesikhathi kungafezwa kanjani na? Ngokwesisekelo yindaba yokulungiselela. Kubalulekile ukulungiselela, hayi indaba eyongena enkulumweni kuphela, kepha nokunikezwa kwenkulumo. Uma kunokulungiselela okwanele kokunikela, ngokuvamile ukulinganiswa kwesikhathi kuyolunga.
26 Ekwenzeni uhlaka lwakho lwenkulumo khombisa ngokukhanyayo ukuthi yimaphi amaphuzu akho amakhulu. Ngaphansi kwelinye nelinye iphuzu elikhulu ungahle ube namaphuzwana amaningana amancane okuhlanganiswa. Amanye, phela, ayoba-ngabalulekile kunamanye. Yazi ukuthi yimaphi abalulekile ekunikelweni nokuthi yimaphi angakhishwa uma kudingekile. Ngakho-ke uma, phakathi nokunikela kwakho, ufumana ukuba ushiywa yisikhathi, kuyokuba-yinto elula ukunikeza kuphela izizathu eziyinhloko nokukhipha lezo ezingaphansi.
27 Lokhu yinto efunekayo njalo enkonzweni yasensimini. Lapho siya ezindlini zabantu, uma beyohlala futhi balalele siyoxoxa nabo imizuzu embalwa. Kepha silungele nokunikela khona lokhokunikela ngesimo esifingqiwe, sichitha mhlawumbe umzuzu owodwa kuphela noma emibili uma kudingekile. Sikwenza kanjani na? Sicabanga ngephuzu lethu eliyisihluthulelo noma amaphuzu nendaba ebaluleke kakhulu edingekayo yokusekela. Sicabanga nangenye indaba ebaluleke ngaphansi engasetshenziselwa ukwandisa ingxoxo, kepha siyazi ukuthi lapho isimo sikubizela lena ingayekwa. Yona lenqubo ingalandelwa ekunikezeni inkulumo endaweni yesikhulumi.
28 Kuvame ukusisiza isikhulumi ukuphawula osebeni lwekhasi lwenkulumo yaso ukukhomba ukuthi ngokungakanani esifanele ukuba sesikuhlanganisile lapho ingxenye yesikhathi saso isiphelile, noma, uma kuyinkulumo ende kakhulu, singahle sithande ukuyahlukanisa ibe-yizingxenye zesine. Lapho-ke sidlula kulezozimpawu zesikhathi ohlakeni lwaso lwenkulumo, sifanele sibheke isikhathi futhi sibheke indlela esiqhubeka ngayo. Uma sishiywa yisikhathi, yilapho simelwe siqale ukukhipha indaba ebaluleke kancane kunokulinda kuze kube-sekugcineni bese sihlohla isiphetho nakanjalo siqeda ukuphumelela kwaso. Nokho, kuphazamisa kakhulu uma isikhulumi sibheka njalo iwashi laso noma sikwenza ngendlela esobala kakhulu, noma uma sitshela izilaleli ukuthi isikhathi saso siyaphela nokuthi simelwe siyisheshise indaba yaso. Lokhu ngokuthile okumelwe kuphathwe ngendlela evamile ngaphandle kokuphazamisa izilaleli ngakho.
29 Ukufeza ukulinganiswa kwesikhathi okufanele okuhlanganisa konke kudinga ukuthi isethulo sibe-side ngokufanele, ukuthi elinye nelinye lamaphuzu ayisihluthulelo lithuthukiswe ngesilinganiso esifanele, nokuthi isiphetho sishiyelwe isikhathi esanele. Akukhona okuthile omelwe ukucabangele nje lapho ubona ukuthi isikhathi siyaphela. Uma uqaphela ukulinganiswa kwesikhathi sakho zisuka amadaka, umphumela kuyokuba-wukunikela okulinganiswe kahle.