Isiphetho Esiphumelelayo

KUNGENZEKA ukuthi uye wacwaninga ngokucophelela futhi walungiselela umzimba wenkulumo yakho. Kungenzeka nokuthi uye walungiselela isethulo esivusa isithakazelo. Noma kunjalo, kusadingeka okunye okwengeziwe—isiphetho esiphumelelayo. Ungasithathi kancane. Lokho okusho ekugcineni yikona okuvame ukukhumbuleka isikhathi eside. Uma isiphetho singenamandla, ngisho namaphuzu ashiwo ngaphambi kwaso angase angafezi lutho.

Cabangela okulandelayo: Ngasekupheleni kokuphila kwakhe, uJoshuwa wabekela amadoda amadala esizwe sakwa-Israyeli inkulumo engenakulibaleka. Ngemva kokulandisa ngokusebenzelana kukaJehova no-Israyeli kusukela ezinsukwini zika-Abrahama, ingabe uJoshuwa wamane nje wabukeza amaphuzu avelele? Cha. Kunalokho, ngomuzwa ojulile, wanxusa abantu: “Yesabani uJehova, nimkhonze ngobuqotho nangeqiniso.” Zifundele isiphetho sikaJoshuwa esilotshwe kuJoshuwa 24:14, 15.

Enye inkulumo ephawulekayo, etholakala kuzEnzo 2:14-36, yanikezwa ngumphostoli uPetru esixukwini esasiseJerusalema ngoMkhosi wePhentekoste lika-33 C.E. Okokuqala, wachaza ukuthi babebona ukugcwaliseka kwesiprofetho sikaJoweli ngokuphathelene nokuthululwa komoya kaNkulunkulu. Wabe esebonisa ukuthi lokhu kwakuhlobene kanjani neziprofetho eziphathelene noMesiya kumaHubo ezabikezela ukuvuswa kukaJesu Kristu nokuphakanyiselwa kwakhe kwesokunene sikaNkulunkulu. Esiphethweni sakhe, uPetru wabe eselubeka ngokucacile udaba zonke izilaleli zakhe okwakudingeka zibhekane nalo. Wathi: “Yonke indlu ka-Israyeli mayazi ngokuqinisekile ukuthi uNkulunkulu wamenza iNkosi noKristu, lo Jesu enambethela.” Labo ababekhona babuza: “Madoda, bazalwane, yini okufanele siyenze?” UPetru wabe esephendula: “Phendukani, yilowo nalowo kini abhapathizwe egameni likaJesu Kristu.” (IzE. 2:37, 38) Ngalolo suku abantu abangaba ngu-3 000 ezilalelini zakhe bamukela iqiniso ngoJesu Kristu, beshukunyiswa yilokho ababekuzwile.

Amaphuzu Okukhunjulwa. Lokho okusho esiphethweni sakho kufanele kuhlobane ngokuqondile nesihloko senkulumo yakho. Kufanele kube isiphetho esizwakalayo samaphuzu ayinhloko oxoxe ngawo. Nakuba ungase usebenzise amazwi ayisihluthulelo abesesihlokweni sakho, uma uthanda ungasiphinda njengoba sinjalo isihloko.

Ngokuvamile, lapho ukhuluma, injongo yakho kusuke kuwukukhuthaza abanye ukuba bathathe isinyathelo esivumelana nendaba obukhuluma ngayo. Enye yezinjongo eziyinhloko zesiphetho ukubabonisa ukuthi kumelwe benzeni. Lapho ukhetha isihloko namaphuzu asemqoka, ucabangisisile yini ukuthi kungani le ndaba ibalulekile ezilalelini zakho nokuthi uzoba yini umgomo wokuyinikeza? Uma kunjalo, uyasazi isinyathelo ozothanda basithathe. Manje kudingeka uchaze ukuthi siyini leso sinyathelo nokuthi mhlawumbe bangasifinyelela kanjani.

Ngaphezu kokubonisa izilaleli zakho ukuthi kumelwe zenzeni, isiphetho sakho kufanele sikhuthaze. Kufanele sibe nezizathu ezizwakalayo zokuthatha leso sinyathelo futhi mhlawumbe nezinzuzo zokwenza kanjalo. Uma umusho wokugcina ucatshangisiswe kahle futhi wabekwa kahle, uyokwenza inkulumo yakho iphumelele nakakhulu.

Khumbula ukuthi inkulumo inesiphetho. Okushoyo kumelwe kukubonise lokho. Ijubane lakho nalo kumelwe lifaneleke. Ungakhulumi usheshe kakhulu kusukela ekuqaleni kuze kube sekugcineni, bese uyaphetha kungazelelwe. Ngakolunye uhlangothi, ungavumeli izwi lakho limane liphele. Izwi lakho kumelwe lizwakale ngokwanele kodwa lingabangi umsindo. Imisho yakho embalwa yokugcina kumelwe ibonise ukuthi usufika esiphethweni. Indlela oyisho ngayo kufanele iveze ubuqotho nokuqiniseka. Lapho ulungiselela inkulumo yakho, ungalibali ukuprakthiza isiphetho.

Kumelwe isiphetho sibe side kangakanani? Ubude baso akufanele bunqunywe iwashi. Akufanele isiphetho sibe side kakhulu. Ubude baso bunganqunywa ukuthi sizithinta kanjani izilaleli. Isiphetho esilula, esishaya emhloleni nesihle yisona esingcono. Esithé ukuba side nesihlanganisa umfanekiso omfushane naso singase siphumelele uma sihlelwe kahle. Qhathanisa isiphetho esifushane sayo yonke incwadi yomShumayeli esitholakala kumShumayeli 12:13, 14 nesifushane nakakhulu seNtshumayelo YaseNtabeni esilotshwe kuMathewu 7:24-27.

Enkonzweni Yasensimini. Ayikho enye indawo lapho kuyodingeka wenze iziphetho kaningi njengasenkonzweni yasensimini. Uma ulungiselele futhi unesithakazelo sothando kubantu, kuningi okuhle ongakufeza. Iseluleko esisemakhasini andulele singasetshenziswa ngokunenzuzo, ngisho nalapho sesishintshiwe savumelana nengxoxo yomuntu oyedwa.

Ingxoxo ingase ibe mfushane. Umuntu angase abe matasa. Ukuhambela kwakho kungathatha umzuzu nje kuphela. Uma kufaneleka, ungase usho okuthile okufana nalokhu: “Ngiyaqonda ukuthi umatasa. Kodwa mangikushiye nephuzu nje elilodwa elikhuthazayo. IBhayibheli libonisa ukuthi uMdali wethu unenjongo emangalisayo—yokwenza lo mhlaba ube indawo lapho abantu bengajabulela khona ukuphila phakade. Singaba khona kulelo Pharadesi, kodwa kudingeka sifunde ngezimfuneko zikaNkulunkulu.” Noma ungase ucele ukuphinde ubuye ngesikhathi esikahle.

Uma ukuhambela kwakho kuphazamiseka ngoba umninikhaya enokhahlo—noma edelela nokwedelela—kuningi okuhle okusengafezwa noma kunjalo. Khumbula iseluleko esitholakala kuMathewu 10:12, 13 nakweyabaseRoma 12:17, 18. Ukusabela kwakho ngesizotha kungawushintsha umbono wakhe ngoFakazi BakaJehova. Uyobe ufeze okuhle kakhulu.

Ngakolunye uhlangothi, kungenzeka ube nengxoxo emnandi nomninikhaya. Kungani ungaliphindi iphuzu eliyinhloko ofuna alikhumbule? Hlanganisa nesikhuthazo sokuba enze okuthile ngalo.

Uma ubona ukuthi likhona ithuba lokuxoxa okwengeziwe ngesinye isikhathi, mnikeze isizathu sokulangazelela leso sikhathi. Buza umbuzo—mhlawumbe lowo okuxoxwa ngawo encwadini ethi Ukubonisana NgemiBhalo noma incwadi ehlelelwe ukuqhuba izifundo zeBhayibheli zasekhaya. Wukhumbule njalo umgomo wakho njengoba ubekwe kuMathewu 28:19, 20.

Ingabe uphetha isifundo seBhayibheli sasekhaya? Ukuphinde usho isihloko kuyosiza umfundi ukuba akhumbule lokho obekuxoxwa ngakho. Ukusebenzisa imibuzo yokubukeza kuyosiza ekugxiliseni amaphuzu ayinhloko engqondweni yomfundi, ikakhulukazi uma lokho kubukeza kwenziwa ngokungajahi. Umbuzo ophathelene nokuthi indaba obekufundwa ngayo ingamzuzisa kanjani umfundi noma ukuthi angayihlanganyela kanjani nabanye ungase umsize ukuba acabange ngokuthi angakusebenzisa kanjani ngokoqobo lokho akufundile.—IzAga 4:7.

Khumbula—isiphetho sakho sinengxenye ekuphumeleleni kwengxoxo yakho iyonke.