Ingabe Inkolo Ingazanelisa Izidingo Zethu?

SIZODLANI? Sizophuzani? Sizogqokani? Lemibuzo ifuna izimpendulo eziphuthumayo, ikakhulukazi uma kunzima ukuthola izidingo eziyisisekelo zokuphila. Nokho, phawula lokho uJesu Kristu akusho: “Ningakhathazeki ngokuphila kwenu ukuthi niyakudlani noma niyakuphuzani, nangomzimba wenu ukuthi niyakwembathani.” (Mathewu 6:25) Ingabe lokho kuzwakala kungajwayelekile? Kakade, uma othile eswela ukudla, izembatho, nendawo yokukhosela, akudingayo usizo olungokoqobo, kungekhona lokho abanye abangase bakubheke njengenkulumo ewuwangala engokwenkolo.

UJesu wayengeyena ongenazwela, futhi wayengazami ukubalekela inselele. Wayeziqaphela kakhulu izidingo zabantu. Noma kunjalo, wayazi ngengozi engokoqobo ngempela. Lapho kuziwa ekwaneliseni izidingo zethu, kulula kakhulu ukugxilisa ukuphila kwethu ezintweni ezibonakalayo nokuba nomuzwa wokuthi uNkulunkulu akabalulekile. Ngakho-ke, sidinga ukuhlela kahle izinto eziza kuqala.

Siyobe sihlela kahle izinto eziza kuqala uma silandela iseluleko sikaJesu: “Kodwa funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina.” (Mathewu 6:33) Uma sisilandela leseluleko, inkolo—inkolo yeqiniso esekelwe emaqinisweni eBhayibheli—ingakwazi ukwanelisa izidingo zethu.

Nokho, uJesu wayengeyena ongawaboni amaqiniso kangangokuba wayengasikisela ukuthi ukuba nje omunye wabafundi bakhe nokulandela izimfundiso zakhe zenkolo kwakuyozixazulula ngokushesha izinkinga zethu; futhi wayengachazi ukuthi abafundi bakhe kwakumelwe bazihlalele nje futhi balindele uNkulunkulu ukuba abondle ngokuyisimangaliso. Phela, wonke umuntu wayengaba umKristu uma lokho kwakusho inkululeko esheshayo kubo bonke ubunzima bokuphila! Lokho uJesu ayekusho kwakuwukuthi uYise uJehova uNkulunkulu, unikeza konke okudingekayo ukuze sanelise zonke izidingo zethu. Kungalesosizathu uJesu wathi futhi: “UYihlo wasezulwini uyazi ukuthi niyakudinga konke lokhu.”—Mathewu 6:32.

UJehova futhi wanelisa izidingo zethu ezingokomoya ezibalulekile. Ngosizo lwemiBhalo eNgcwele, uye wasinikeza isiqondiso esiphefumlelwe ukuze siqondise ukuphila kwethu ngendlela engcono kakhulu ngangokunokwenzeka. (Isaya 48:17) UNkulunkulu uye wamisa inhlangano yabakhulekeli abasekelayo lapho kudingekile. (IzEnzo 4:34) Uyangenela futhi ukuze asize izinceku zakhe ngomoya ongcwele, noma amandla ayisiphekupheku. (Luka 11:13; Galathiya 5:22-25) Ngaphezu kwalokho, uNkulunkulu uye wenza ilungiselelo lokubuyisela ipharadesi emhlabeni.—Luka 23:43; IsAmbulo 21:1-4.

Ukwanelisa Izidingo Zethu Ezibonakalayo

Manje cabangela ezinye izimiso zeBhayibheli eziye zasiza abantu ukuze banelise izidingo zabo ezibonakalayo. Umphostoli uPawulu ongumKristu wabhala:

“Masizihlambulule ekungcoleni konke kwenyama nokomoya.” (2 Korinte 7:1)

Cabanga ngazo zonke izinkinga esingazibalekela uma sigwema ukungcoliswa ugwayi, imilaliso engekho ngokomthetho, nezinye izinto ezingcolisa umzimba. Futhi yeka ukuthi siba ngabangcono kanjani uma singasaphazi imali, isikhathi, nengqondo ezincwadini zokuziphatha okubi nasekuzijabuliseni okungcolisa umoya wethu!

ImiBhalo futhi ithi:

“Ungabi-phakathi kwezinseli zewayini nabayiziminzi zenyama. Ngokuba inseli noyisiminzi bayakuba-mpofu; ukozela kuyakwembathisa umuntu amanikiniki.” (IzAga 23:20, 21)

Phawula umphumela wokugcina wokudakwa nokuminza—ubumpofu namanikiniki. Abaningi namuhla—ngisho nabantu abathanda inkolo kakhulu—bahlala ebumpofwini ngoba bazitika ngokweqile ophuzweni oludakayo noma bayimilutha yezinto ezingcolisa inyama. Ukugwema izinto ezinjalo ukuze uvumelane nezindinganiso zeBhayibheli kungenza okuningi ekusisizeni sanelise izidingo zethu zokudla, izingubo, nendawo yokukhosela.

Esinye isimiso esiye sasiza amaKristu ukuba anelise izidingo zawo sitholakala emazwini omphostoli uPawulu:

“Siyethemba ukuthi sinonembeza omuhle, sithanda ukuhamba kahle ezintweni zonke.” (Heberu 13:18)

Ukwethembeka kukho konke ukusebenzelana kwawo nabanye kuye kwenza amaKristu amaningi akwazi ukuzondla kahle wona nemikhaya yawo. Kuye kwawazuzela idumela elihle, futhi ngenxa yalokho abanye bakuthanda kakhulu ukusebenzelana nawo. Umuntu othembekile angase angabi ngaso sonke isikhathi nezinto eziningi ezibonakalayo, kodwa ngokuvamile unezidingo eziyisisekelo zokuphila futhi ulondoloza ukuzihlonipha kwakhe.

Nasi iseluleko esihlangene eduze nalesi:

“Owebayo angabe eseba, kepha kunalokho akhuthale asebenze okuhle ngezandla zakhe.” (Efesu 4:28)

Ukusebenzisa lesimiso kuye kwasiza abaningi ukuba bathole umsebenzi futhi babambelele kuwo ngoba bathembekile. Ngenxa yalokho, bayakwazi ukuzondla bona nemikhaya yabo. Esikhundleni sokonakaliswa umoya walelizwe, elithalalisa izenzo eziningi zokungathembeki, amaKristu athembekile, futhi lokhu kuletha imiphumela emihle.

Ngokwesibonelo: Omunye woFakazi BakaJehova eJapane wayefuna ukusebenza amahora ambalwa isonto ngalinye ukuze abe nesikhathi esengeziwe sokuphishekela izinto ezingokomoya. Nokho, lapho enza lesicelo, umqashi wakhe wamxosha emsebenzini. Ngalokho, unina walomqashi wabuza: “Ingabe uxoshe indoda ethembeke kunabo bonke?” Izinto zaba zimbi ngokwedlulele lapho uFakazi elimala iqolo komunye umsebenzi. Ngokushesha ngemva kwalokho, wahlangana nomqashi wakhe wangaphambili, owayedumazekile ngenxa yokuba wayesanda kuzwa ukuthi omunye wabaqashwa bakhe ubelokhu entshontsha igolide, iplatinum, nezindandatho enkampanini yakhe yamatshe ayigugu. Lomqashi ngokushesha wacela uFakazi ukuba aphindele emsebenzini, manje ngokuvumelana nezimo zakhe. Lendoda yayifuna umuntu othembekile.

Ngokukamphostoli uPawulu, umKristu kumelwe “akhuthale” kungekhona ukuba azondle kuphela kodwa futhi ukuze “abe-nokokwabela osweleyo.” (Efesu 4:28) Ngezikhathi zokuswela, amaKristu eqiniso azimisele ngaso sonke isikhathi ukusiza abanye. Umkhaya othile eFiji wakubona lokho lapho izivunguvungu zonakalisa kakhulu ikhaya lawo ngenkathi usemhlanganweni wobuKristu. Lapho uphindela ekhaya, wathola sekungamanxiwa nje. Kodwa futhi wathola abakholwa nawo abasebenzisa ngenjabulo impahla yabo ukuze bawulungiselele indawo yokukhosela nosizo oludingekayo ukuze kwakhiwe ikhaya labo kabusha. “Kuyaduduza,” kusho ubaba, “uma wazi ukuthi kunamaKristu akukhathalela ngempela.”

UJesu Kristu wayebazwela kakhulu abasweleyo. Ezikhathini eziningi, yena ngokwakhe wabasiza ababehlupheka ngezindlela ezihlukahlukene. Yebo, uJesu wayazi ukuthi uma nje lesimiso sezinto esonakele sisavunyelwe ukuba sibe khona, ubumpofu nezinye izinkinga zezenhlalo ziyoba khona. (Johane 12:8) Ngakho-ke, nakuba enza okuningi ukuba asize abantu ngokwezinto ezibonakalayo, umfutho wangempela wenkonzo yakhe wawuwukwanelisa izidingo zabo ezingokomoya.

Lapho isixuku esiye sasuthiswa silandela uJesu eya eKapernawume, wakhuluma lokhu okubalulekile: “Aningifuni ngokuba nabona izibonakaliso, kepha ningifuna ngokuba nadla izinkwa, nasutha. Ningasebenzeli ukudla okuphelayo kepha ukudla okuhlala kuze kube-ngukuphila okuphakade, eyakunipha khona iNdodana yomuntu.” (Johane 6:26, 27) UJesu wayesho ukuthini?

UJesu wayesho ukuthi kwakunengozi yokuba abantu bazihlanganise naye nabafundi bakhe ngenxa yezinzuzo ezibonakalayo kuphela. Kodwa wayazi ukuthi lokhu kwakungeke kuzilethe izinzuzo ezihlala njalo. Ngakho-ke wathi: “Babusisiwe abampofu emoyeni, ngokuba umbuso wezulu ungowabo. Babusisiwe abalambele, bomele ukulunga ngokuba bayakusuthiswa.”—Mathewu 5:3, 6.

Ngaphandle kwendlala yokudla okungokwenyama, kunendlala yeqiniso nokwaneliseka okungokomoya. Lapho lendlala engokomoya yaneliswa kuholela enjabulweni yeqiniso. ELobukholwa liye laveza umphakathi othambekele ezintweni ezibonakalayo. Izinkolo zaseMpumalanga ziye zashiya abantu besebumnyameni obungokomoya. Kodwa ukukhulekela kweqiniso—inkolo kaJesu Kristu—iye yanelisa izidingo zabantu ezingokomoya. Ingakwenzela okufanayo nawe. Lamalungiselelo angaba ngawakho uma uyozenza utholakale.

Ngokwesibonelo, enye insizwa eMauritius yathatha omagazini beNqabayokulinda nomngane wayo iPhaphama! komunye umKristu owayefakaza emgwaqweni. Ngesonto elilandelayo, yabuya izofuna omagazini abengeziwe. Yachaza ukuthi yayicabangela ukuzibulala ngenxa yezinkinga zayo ezingokwezimali, kodwa omagazini babeyisizile ukuba iqaphele ukuthi ukhona uNkulunkulu onendaba. Indlala engokomoya yalensizwa yayisiqala ukwaneliswa.

Ingabe siyoke sisibone isikhathi lapho zonke izidingo zethu ziyokwaneliswa ngokuphelele? IBhayibheli lithembisa ukuthi siyosibona. Yiqiniso, abantu sebekhathele ukuzwa izithembiso ngezithembiso zezinto ezingcono ezizayo. Baye badumazeka izikhathi eziningi. Kodwa singathembela ezithembisweni zeBhayibheli. UMlobi walo, uJehova uNkulunkulu, ugcwalisa zonke izithembiso azenzayo. UJoshuwa wakubonisa kahle lokhu lapho ekhumbuza amaIsrayeli ayekanye nawo: “Niyazi ezinhliziyweni zenu zonke nasemiphefumulweni yenu yonke ukuthi akuphuthanga nento eyodwa kuzo zonke izinto ezinhle azikhuluma uJehova uNkulunkulu wenu ngani; kwenziwa konke kini, akuphuthanga nento eyodwa kukho.”—Joshuwa 23:14.

Ikhambi langempela lazo zonke izinkinga zethu lincike ekugcwalisekeni kwezithembiso zikaNkulunkulu ezimangalisayo zokuhlanza wonke umhlaba. (IsAmbulo 11:18) Zonke izidingo zethu ziyokwaneliswa lapho uMbuso wakhe ubuyisela iPharadesi lasemhlabeni, ugcwalisa injongo yakhe yokuqala ngesintu. (Mathewu 6:9, 10) Khona-ke ngeke siphinde sizwe “izwi lokulila nelokukhala” labantu abazidingo zabo ngeke zaneliswe. Ngomsebenzi wokwethembeka nangokusebenzisa izimiso zokwesaba uNkulunkulu, bayojabulela ukuphila okugcwele, nokwanelisayo.—Isaya 65:17-25.

UMaria owayeyindelakazi engumKatolika okukhulunywe ngaye ekuqaleni, walithola lelithemba. Waqaphela ukuthi wayephila ebumnyameni obungokomoya iminyaka eminingi, ehlushwa ukwesaba ngekusasa futhi engakwazi ukubona injongo yangempela yokuphila. Kodwa ukwazi iqiniso leBhayibheli kwakushintsha konke lokho. “Ngiphume ebumnyameni ngaya ekukhanyeni okukhazimula njalo,” esho. (IHubo 43:3; IzAga 4:18) Lokhu akumsizanga nje kuphela ukuba ahlangabezane nezidingo zakhe eziphuthumayo zezinto ezibonakalayo kodwa futhi kuye kwanelisa nendlala nokoma kwakhe okungokomoya. Yebo, inkolo—inkolo yeqiniso—ingazanelisa izidingo zethu.

[Isithombe ekhasini 7]

Inkolo yeqiniso iyozanelisa zonke izidingo zethu