Imibuzo Evela Kubafundi

◼ Ezinye izazi ziphikisa ngokuthi “Indophi” kumelwe ithathe indawo ‘yekamela’ kuMathewu 19:24, ofundeka kanje: “Kulula ukuba ikamela lingene ngentunja yosungulo.” Yiliphi igama eliqondile?

Izazi zeBhayibheli ezithile ngokuyiphutha ziphetha ngokuthi amazwi kaJesu lapha ekuqaleni ayebhalwe ngesiAramu. Igama lesiAramu elisetshenziswe ezinguqulweni ezinjalo (gam·la’ʹ) lingasho “ikamela.” Nokho, lingasho futhi “indophi enkulu nogongolo” kuye ngomongo wendaba. Kodwa ngokwePapias kaHierapolis, mhlawumbe untanga kamphostoli uJohane, uMathewu wabhala ukulandisa kwamaVangeli akhe okokuqala ngesiHeberu, hhayi isiAramu, emva kwalokho wakuhumushela esiGrekini. Igama lesiHeberu elisho ikamela (ga·malʹ) lihluke kakhulu emagameni ahunyushwe ngokuthi indophi (cheʹvel) noma intambo (‛avothʹ), futhi kuyiqiniso ukuthi uMathewu wayeyokhetha igama eliqondile lesiGreki.

Imibhalo yesandla yesiGreki emidala kakhulu nethenjwa kakhulu (Sinaiticus and Vatican No. 1209) inegama elithi kaʹme·los, elisho ikamela. Lona leligama lisetshenziswe kuMathewu 23:24, lapho kungekho kungabaza kokuthi kubhekiselwe kwelithi “ikamela.”

Emakhulwini amaningi eminyaka abanye baye bazama ukululaza ihaba likaJesu elihlabayo. Abanye baze ngisho bayedelela imibhalo engcwele. Kusukela cishe ekhulwini lesihlanu leminyaka, igama elifanayo elithi kaʹmi·los liyatholakala kulelitekisi kweminye imibhalo yesandla yamaGreki. Leligama elingajwayelekile lisho “indophi, ikhebuli yomkhumbi.” Ngokwe A Greek-English Lexicon of the New Testament kaArndt noGingrich, ‘alinandawo kuyi-NT [KuTestamente Elisha].’ Izazi zamaGreki uWestcott noHort basola umKristu uCyril waseAlexandria wekhulu lesihlanu leminyaka ngalolushintsho, owagomela ngokuthi igama elisetshenziswe kuMathewu (kaʹme·los) lalingasho ikhebuli, ethi: “Kuyisiko lalabo abakwazi kahle ukuhamba kwemikhumbi ukubiza amakhebuli awugqinsi ngokuthi ‘amakamela.’” Nokho, ngalombono uWestcott noHort bathi: “Kuyiphutha ngokuphelele.”

Umqondo wekamela elikhulu lizama ukungena ngembobo yenaliti encane yokuthunga “imfanelo yokweqisa kwasempumalanga” ngokusho komunye umthombo wezikhombo. Eqinisweni, ekukhulumeni ngabanye abantu abadume ngokuhlakanipha okunjalo kangangokuba babonakala benza okungenakwenzeka, iThe Babylonian Talmud ithi: “Badweba indlovu iphuma embotsheni yenaliti.” Ngakho uJesu wayesebenzisa umfuziselo womfanekiso wasempumalanga wokugcizelela into ethile engenakwenzeka ngendlela yokuqhathanisa esobala. Ngempela, kwakungenakwenzeka ukufaka noma yini enkulu embotsheni yenaliti—kungaba yindophi, ikamela, noma indlovu.

UJesu wayengasho ukuthi kwakungenakwenzeka ngomuntu ocebile ukuba azuze ukuphila, ngoba abanye abantu abacebile baba abalandeli bakhe. (Mathewu 27:57; Luka 19:2, 9; Johane 19:38, 39) Kodwa ngaphambi kokuba nje uJesu asho ‘lesisisho esinzima,’ insizwa ecebile yayiye yayeka amathuba amahle kakhulu angokomoya ngenxa yothando lwayo ‘lwezinto eziningi.’ (Mathewu 19:16-22) Bekuyoba okungenakwenzeka ngomuntu ocebile onalesimo ukuzuza ukuphila okuphakade. Umuntu onjalo angaguquka futhi athole ukusindiswa kuphela ngosizo lukaNkulunkulu olujulile okumelwe luze ngamandla kaNkulunkulu.—Mathewu 19:24, 26.