Izingxoxo Zobungane Zingafinyelela Inhliziyo
1 Ingxoxo ingachazwa ngokuthi “iwukudlulisela imibono ngomlomo.” Ukuqala izingxoxo zobungane ngesihloko esibathintayo abanye kungavusa isithakazelo sabo futhi kungasisiza nathi ukuba sifinyelele izinhliziyo zabo ngesigijimi soMbuso. Okuhlangenwe nakho kuye kwabonisa ukuthi kuphumelela kakhulu ukuhilela abantu engxoxweni yobungane nekhululekile kunokubashumayeza.
2 Indlela Yokuqala Ingxoxo Yobungane: Ukukwazi kwethu ukuxoxa nabanye akusho ukuthi kufanele sihlele imiqondo nemibhalo ngobuciko obuhlaba umxhwele. Kumane nje kuhilela ukwenza omunye umuntu akhulume nathi. Ngokwesibonelo, lapho sinengxoxo yobungane nomakhelwane wethu, ayishubi kodwa iba ekhululekile. Asicabangi ngalokho esizokusho ngokulandelayo kodwa sivele nje siphendule ngokuzenzakalelayo kulokho akushoyo. Ukubonisa isithakazelo esiqotho kulokho akushoyo kungamkhuthaza ukuba aqhubeke exoxa nathi. Kufanele senze okufanayo nalapho sifakaza kwabanye.
3 Izihloko ezifana nobugebengu, izinkinga zentsha, izindaba ezisematheni zasendaweni, izimo zezwe, noma ngisho nesimo sezulu zingasetshenziselwa ukuqala izingxoxo zobungane. Izindaba ezikuthinta ngokuqondile ukuphila kwabantu ziphumelela kakhulu ekuvuseni isithakazelo sabo. Lapho nje ingxoxo isiqaliwe, kancane kancane singayishintshela esigijimini soMbuso.
4 Ukuba nengxoxo ekhululekile akusho ukuthi ukulungiselela kusengaphambili akudingekile. Kuyadingeka. Nokho, asikho isidingo sokwakha uhlaka oluhlelekile noma ukuyibamba ngekhanda intshumayelo, okungabangela ukuba ingxoxo ingashintshashintshi noma ingavumelani nezimo zangaleso sikhathi. (Qhathanisa neyoku-1 Korinte 9:20-23.) Indlela enhle kakhulu yokulungiselela iwukukhetha iphuzu elilodwa noma amabili angokomBhalo, ngenjongo yokwakha izingxoxo ngawo. Ukubukeza izihloko ezitholakala encwadini ethi Ukubonisana kungaba usizo kulokhu.
5 Izimfanelo Ezibalulekile Zengxoxo Yobungane: Lapho sixoxa nabanye, kufanele sifudumale futhi sibe qotho. Ukumoyizela nokwenama kuyasiza ekuboniseni lezi zimfanelo. Sinesigijimi esihle kunazo zonke emhlabeni; siyakhanga kakhulu kwabanhliziyo ziqotho. Uma bebona ukuthi isithakazelo sethu kubo sishukunyiswa isifiso esiqotho sokuhlanganyela nabo izindaba ezinhle, bangase bashukumiseleke ukuba balalele.—2 Kor. 2:17.
6 Ukuhileleka engxoxweni kufanele kube okuhlangenwe nakho okujabulisayo. Khona-ke, kufanele sibe nomusa nesu lokungacunuli lapho sinikeza isigijimi soMbuso. (Gal. 5:22; Kol. 4:6) Lwela ukushiya umuntu oxoxa naye enombono omuhle ngathi. Ngalendlela, ngisho noma singazange siphumelele ukufinyelela inhliziyo yakhe ekuqaleni, angase amamukele uFakazi oyoxoxa naye esikhathini esizayo.
7 Ukuqala ingxoxo yobungane akubangelwa ikhono lokusho ngobuciko intshumayelo eyinkimbinkimbi. Kumane nje kuyindaba yokuvusa isithakazelo ngendaba emthintayo lowo muntu. Lapho nje silungiselele kusengaphambili, siyokulungela ukuhilela abantu ezingxoxweni zobungane. Masenze umzamo wokufinyelela izinhliziyo zalabo esihlangana nabo ngokuhlanganyela nabo izindaba ezinhle kunazo zonke ezingatholakala, zezibusiso zaphakade zoMbuso.—2 Pet. 3:13.