“KuNkulunkulu Kungenzeka Konke”
1 Umsebenzi oyinhloko webandla lobuKristu ukushumayela isigijimi soMbuso emhlabeni wonke. (Math. 24:14) Lowo umsebenzi omkhulu. Kwabaningi ababukele, ubonakala udinga okungaphezu kwalokho esinakho. Kwabanye, ukufeza lesi sabelo kucishe kungaqondakali ngoba siyahlekwa, siphikiswe futhi sishushiswe. (Math. 24:9; 2 Thim. 3:12) Abangakholwa bayaqiniseka ukuthi lo msebenzi uyinto engenakufezeka. Nokho, uJesu wathi: “KuNkulunkulu kungenzeka konke.”—Math. 19:26.
2 Izibonelo Ezinhle Zokulingiswa: UJesu waqala inkonzo yakhe eyedwa ebhekene nomhlaba wonke. Ukuze bazame ukumenza angaphumeleli, abaphikisi bamhlambalaza ngazo zonke izindlela ongase uzicabange, ekugcineni bambulala kabuhlungu. Nokho, ekugcineni, uJesu wamemezela ngesibindi: “Mina ngilinqobile izwe.” (Joh. 16:33) Wayefeze umsebenzi omangalisayo!
3 Abafundi bakaJesu babonisa umoya ofanayo wesibindi nentshiseko enkonzweni yobuKristu. Abaningi babhaxabulwa, bashaywa, bafakwa etilongweni baze babulawa nokubulawa. Noma kunjalo, ‘babejabula ngoba bebalwe njengabakufanelekele ukuhlaziswa ngenxa yegama lakhe.’ (IzE. 5:41) Nakuba izinto zazibamele kabi, bafeza umsebenzi owawubonakala ungenakwenzeka wokushumayela izindaba ezinhle “nasezingxenyeni eziqhele kakhulu zomhlaba.”—IzE. 1:8; Kol. 1:23.
4 Indlela Yokuphumelela Osukwini Lwethu: Nathi siye sawamukela ngentshiseko umsebenzi wokushumayela ngoMbuso lapho sibhekene nezimo ezibonakala zingenakunqobeka. Naphezu kokuvinjelwa, ukushushiswa, ukugqunywa ejele neminye imizamo yokusiyekisa, siyaphumelela. Kwenzeka kanjani? “‘Kungabi ngempi, kungabi ngamandla, kepha kube ngomoya wami kuphela,’ usho uJehova Sebawoti.” (Zak. 4:6) Njengoba uJehova esisekela, akukho okuyomisa umsebenzi wethu!—Roma 8:31.
5 Lapho sishumayela, asinasizathu sokuba namahloni noma sokwesaba noma sokuzizwa singafaneleki. (2 Kor. 2:16, 17) Sinezizathu ezinamandla zokuqhubekela phambili sisakaza izindaba ezinhle zoMbuso. Ngosizo lukaJehova, siyofeza “izinto ezingenakwenzeka”!—Luka 18:27.