Inkonzo YobuKristu—Ngumsebenzi Wethu Oyinhloko
1 Sonke sinezinhlobo ezihlukahlukene zemisebenzi okumelwe siyenze. Ukondla umkhaya kuyimfuneko kaNkulunkulu. (1 Thim. 5:8) Nokho, umsebenzi ohilelekile ekufezeni le mfuneko akufanele ubaluleke ukwedlula umsebenzi wokushumayela ngoMbuso nokwenza abafundi.—Math. 24:14; 28:19, 20.
2 UJesu wasibekela isibonelo okumelwe sisilandele ‘ekufuneni kuqala umbuso.’ (Math. 6:33; 1 Pet. 2:21) Nakuba ayenezinto ezibonakalayo ezincane, wayegxile ngokuphelele ekwenzeni intando kaYise. (Luka 4:43; 9:58; Joh. 4:34) Wazikhandla ekunikezeni ubufakazi ngawo wonke amathuba. (Luka 23:43; 1 Thim. 6:13) Wakhuthaza abafundi bakhe ukuba babe nesithakazelo esijule ngokufanayo emsebenzini wokuvuna.—Math. 9:37, 38.
3 Ukulingisa UJesu Namuhla: Singasilingisa isibonelo sikaJesu ngokulwela ukwenza ukuphila kwethu kube lula kugxile enkonzweni yobuKristu. Uma sinezinto eziyizidingo zokuphila, masilalele iseluleko seBhayibheli sokuba singaqhubeki sinqwabelanisa impahla yaleli zwe. (Math. 6:19, 20; 1 Thim. 6:8) Yeka ukuthi kungcono kanjani ukuba esikhundleni salokho silwele ukwandisa ingxenye yethu emsebenzini wokushumayela! Uma sihlangabezana nezimo ezinzima, kwangathi singazikhandla njengoJesu, singazivumeli izinkathazo zokuphila zenze umsebenzi wethu oyinhloko wokumemezela izindaba ezinhle zoMbuso ube ngongabalulekile.—Luka 8:14; 9:59-62.
4 Ngisho nalabo abanemithwalo eminingi benza umsebenzi wokushumayela uze kuqala. Umzalwane onomkhaya omkhulu, onesikhundla esiphakeme emsebenzini, futhi ongumdala ebandleni lobuKristu uthi: “Inkonzo ngiyibheka njengomsebenzi oyinhloko.” Udade oyiphayona uthi: “Ukuphayona kubaluleke ngaphezu komsebenzi wokuziphilisa ochumayo.”
5 Kungakhathaliseki ukuthi izimo zethu zinjani, kwangathi singalandela isibonelo sikaJesu. Kanjani? Ngokwenza inkonzo yobuKristu ibe ngumsebenzi wethu oyinhloko.