Indlela Yokuhambisa Incwadi Ethi Okufundiswa IBhayibheli
Lesi senezelo sinezintshumayelo ezisikiselwe ezihlukahlukene zokuhambisa incwadi ethi Okufundiswa IBhayibheli. Ukuze lezi zintshumayelo ziphumelele, sebenzisa amazwi akho, uvumelanise indlela ozisebenzisa ngayo nabantu abasensimini yenu, futhi uzijwayelanise namaphuzu asencwadini. Kungasetshenziswa nezinye izintshumayelo ezisebenzayo ensimini yenu.—Bheka INkonzo Yethu YoMbuso ka-January 2005, k. 8.
I-Armagedoni
◼ “Lapho bezwa igama elithi ‘Armagedoni,’ abanye abantu bacabanga ngembubhiso ebulala uyaca. Kungakumangaza yini ukwazi ukuthi empeleni i-Armagedoni yinto okufanele siyilangazelele? [Lindela impendulo, bese ufunda isAmbulo 16:14, 16.] Ake uzwe ukuthi kuthiwa ukuphila kuyoba njani ngemva kwe-Armagedoni.” Vula emakhasini 82-4, bese ufunda isigaba 21.
IBhayibheli
◼ “Abantu bavame ukubiza iBhayibheli ngokuthi iZwi likaNkulunkulu. Wake wazibuza yini ukuthi kungani incwadi eyabhalwa abantu kungashiwo kufanele ukuthi iyiZwi likaNkulunkulu? [Lindela impendulo, bese ufunda eyesi-2 Petru 1:21 nesigaba 5 emakhasini 19-20.] Le ncwadi inezimpendulo eziseBhayibhelini zale mibuzo.” Mbonise imibuzo esekhasini 6.
Impi/Ukuthula
◼ “Bonke abantu balangazelela ukuthula. Ucabanga ukuthi kumane kuwukuzikhohlisa ukuba nethemba lokuthi kuyoke kube nokuthula emhlabeni? [Lindela impendulo, bese ufunda iHubo 46:8, 9.] Le ncwadi idingida indlela uNkulunkulu ayoyifeza ngayo injongo yakhe futhi alethe ukuthula emhlabeni wonke.” Mbonise isithombe ekhasini 35, bese nixoxa ngezigaba 17-21 emakhasini 34 no-36.
◼ “Namuhla abantu bangathola ukwaziswa okwengeziwe kunanini ngaphambili. Kodwa ucabanga ukuthi singasitholaphi iseluleko esihlakaniphile esingasisiza ukuba siphile ukuphila okujabulisayo nokuyimpumelelo? [Lindela impendulo, bese ufunda eyesi-2 Thimothewu 3:16, 17 nesigaba 12 ekhasini 22-3.] Le ncwadi ichaza indlela esingaphila ngayo ukuphila okujabulisa uNkulunkulu nokuzuzisa thina.” Mbonise ishadi nesithombe okusemakhasini 122-3.
Inkolo
◼ “Abantu abaningi sebeqala ukukholelwa ukuthi izinkolo ezikhona emhlabeni yizona ezibangela izinkinga zesintu kunokuzixazulula. Ucabanga ukuthi inkolo ibaqondisa kahle abantu? [Lindela impendulo, bese ufunda uMathewu 7:13, 14 nesigaba 5 emakhasini 145-6.] Lesi sihloko sikhuluma ngezinto eziyisithupha ezibonisa ukukhulekela okwamukelwa uNkulunkulu.” Mbonise uhlu olusekhasini 147.
Izindawo Zokuhlala
◼ “Ezindaweni eziningi, sekunzima nakakhulu ukuthola indawo ekahle yokuhlala nengabizi kakhulu. Ucabanga ukuthi kuyoke kwenzeke ngelinye ilanga wonke umuntu abe nendawo ekahle yokuhlala? [Lindela impendulo, bese ufunda u-Isaya 65:21, 22 nesigaba 20 ekhasini 34.] Le ncwadi ichaza indlela esiyogcwaliseka ngayo lesi sithembiso sikaNkulunkulu.”
UJehova UNkulunkulu
◼ “Abantu abaningi abakholelwa kuNkulunkulu bangathanda ukuzizwa besondelene naye. Bewazi yini ukuthi iBhayibheli lithi masisondele kuye? [Lindela impendulo, bese ufunda uJakobe 4:8a nesigaba 20 ekhasini 16.] Le ncwadi yenzelwe ukusiza abantu ukuba bafunde okwengeziwe ngoNkulunkulu besebenzisa awabo amaBhayibheli.” Mbonise imibuzo esekuqaleni kwesahluko ekhasini 8.
◼ “Abantu abaningi bathandazela ukuba igama likaNkulunkulu lingcweliswe. Wake wazibuza yini ukuthi ubani igama lakhe? [Lindela impendulo, bese ufunda iHubo 83:18 nezigaba 2-3 ekhasini 195.] Le ncwadi ichaza lokho okufundiswa yiBhayibheli ngempela ngoJehova uNkulunkulu nangenjongo yakhe ngesintu.”
UJesu Kristu
◼ “Abantu emhlabeni jikelele bake bezwa ngoJesu Kristu. Abanye bathi wayemane nje eyindoda evelele. Abanye bayamkhonza bathi unguNkulunkulu uMninimandla onke. Ucabanga ukuthi kunendaba ukuthi yini esiyikholelwayo ngoJesu Kristu?” Lindela impendulo, bese ufunda uJohane 17:3 nesigaba 3 emakhasini 37-8. Mbonise imibuzo esekuqaleni kwesahluko.
Ukufa/Uvuko
◼ “Abantu abaningi bazibuza ukuthi kwenzekani ngempela lapho umuntu efa. Ucabanga ukuthi singayithola impendulo yalokho? [Lindela impendulo, bese ufunda umShumayeli 9:5 nezigaba 5-6 emakhasini 58-9.] Le ncwadi ichaza nokuthi isithembiso seBhayibheli sovuko siyosho ukuthini kwabafileyo.” Mbonise isithombe esisekhasini 75.
◼ “Lapho umuntu esimthandayo eshona kungokwemvelo ukufuna ukuphinde simbone. Uyakuvuma lokho? [Lindela impendulo.] Abaningi baye bathola induduzo esithembisweni seBhayibheli sovuko. [Funda uJohane 5:28, 29 nezigaba 16-17 emakhasini 71-2.] Lesi sahluko siphendula nale mibuzo.” Mbonise imibuzo esekuqaleni kwesahluko ekhasini 66.
Ukuphila Okuphakade
◼ “Abantu abaningi bafisa ukuba imiqemane futhi baphile isikhathi eside. Ukube bekungenzeka, ubungathanda yini ukuphila phakade? [Lindela impendulo, bese ufunda isAmbulo 21:3, 4 nesigaba 17 ekhasini 54.] Le ncwadi ikhuluma ngendlela esingakuthola ngayo ukuphila okuphakade nokuthi ukuphila kuyoba njani lapho lesi sithembiso sesigcwalisekile.”
Umkhaya
◼ “Sonke siyathanda ukuba imikhaya yethu ijabule. Awuvumi yini? [Lindela impendulo.] IBhayibheli likhuluma ngokuthile okungenziwa yiwo wonke amalungu omkhaya ukuze kube nenjabulo ekhaya—ukulingisa uNkulunkulu ngokubonisana uthando.” Funda eyabase-Efesu 5:1, 2 nesigaba 4 ekhasini 135.
Umthandazo
◼ “Wake wazibuza yini ukuthi uNkulunkulu uyiphendula kanjani imithandazo? [Lindela impendulo, bese ufunda eyoku-1 Johane 5:14, 15 nezigaba 16-18 emakhasini 170-2.] Lesi sahluko sichaza ukuthi kungani kufanele sithandaze kuNkulunkulu nokuthi yini okumelwe siyenze ukuze asizwe.”
Usizi/Ukuhlupheka
◼ “Lapho usizi lugadla, abaningi bazibuza ukuthi uNkulunkulu uyabakhathalela ngempela yini abantu nokuthi uyakubona yini ukuhlupheka kwabo. Wena wake wazibuza yini lokho? [Lindela impendulo, bese ufunda eyoku-1 Petru 5:7 nesigaba 11 emakhasini 11-2.] Le ncwadi ichaza indlela uNkulunkulu ayokuqeda ngayo ukuhlupheka kwesintu.” Mbonise imibuzo esekuqaleni kwesahluko ekhasini 106.
[Ibhokisi ekhasini 5]
Izindlela Zokukhulumela Ilungiselelo Lokunikela
“Uma ungathanda ukwenza umnikelo omncane namuhla usekele umsebenzi wethu womhlaba wonke, ngingawujabulela.”
“Nakuba izincwadi zethu singazithengisi, siyayamukela iminikelo emincane esekela umsebenzi wethu womhlaba wonke.”
“Mhlawumbe uyazibuza ukuthi iphumaphi imali yokwenza lo msebenzi. Umsebenzi wethu womhlaba wonke usekelwa ngeminikelo yokuzithandela. Uma ungathanda ukwenza umnikelo omncane namuhla, ngingawujabulela.”