Ungaphuthelwa!
UPHUTHELWE yini? UMhlangano Wesigodi “Wabenzi Bezwi LikaNkulunkulu” WoFakazi BakaJehova! Lolu chungechunge lwemihlangano, eyoqala ngo-November eningizimu ye-Afrika, iyoqhutshwa emadolobheni angamakhulu kuwo wonke umhlaba ezinyangeni ezimbalwa ezizayo. Ezindaweni eziningi isimiso siyoqala ngomculo ngoLwesihlanu ekuseni ngo-9:30.
Ngemva kokuvula ngesikhuthazo sokuba silalele lokho okushiwo yiZwi likaNkulunkulu, isimiso sasekuseni siyoqhubeka ngenkulumo ethi “Thokoza Ngobuhle BukaJehova” nethi “Qhubeka Ugxilile Sengathi Uyambona Lowo Ongabonwa.” Isimiso sasekuseni siyobe sesiphetha ngenkulumo yomhlangano eyisihluthulelo ethi “Dumisani UJehova—UMenzi Wezinto Ezimangalisayo.”
Inkulumo yokuqala esimisweni santambama, ethi “Ungayeki Ukwenza Okuhle,” iyolandelwa uchungechunge olunezingxenye ezintathu olukhuluma ngendlela yokukhetha umngane womshado, ukwakha umkhaya oqinile ngokomoya nokufundisa izingane ukuthanda uJehova. Inkulumo ephetha usuku ethi “Ukuhambisana Nenhlangano KaJehova,” iyobukeza intuthuko eqhubekayo ezikhathini zanamuhla ekuqondeni izinjongo zikaNkulunkulu.
Isimiso sangoMgqibelo ekuseni siyoba nochungechunge lwesibili olunezingxenye ezintathu olunesihloko esithi “Izikhonzi ZeZwi LikaNkulunkulu.” Lolu chungechunge luyonikeza ukusikisela kokuthi singawenza kanjani umsebenzi wethu wokwenza abafundi. Khona-ke kuyoba nenkulumo enhle ethi “Ukwenza UNkulunkulu Angabi Nasizathu Sokuba Namahloni.” Ngemva kwayo kuyolandela inkulumo yobhapathizo, futhi labo abakufanelekelayo ukubhapathizwa bayonikezwa ithuba lokwenza kanjalo.
Ntambama uchungechunge olunezingxenye ezintathu luyoqokomisa isihloko esithi “Zikhandle Ekuhlakuleleni Ingokomoya,” esiyonikeza ukusikisela okungokoqobo kokuthi ingokomoya lingahlakulelwa kanjani. Isimiso siyophetha ngenkulumo evula amehlo ethi “Ukuhamba Ekukhanyeni Okuthuthukayo KweZwi LikaNkulunkulu.” Le nkulumo iyodingida u-Isaya izahluko 25 no-26 futhi ichaze ukuthi singayiqonda kanjani kangcono le ncwadi yeBhayibheli ethakazelisayo.
Isimiso sangeSonto ekuseni siyohlanganisa nochungechunge lokugcina olunezingxenye ezintathu olunesihloko esithi “Isiprofetho SikaZefaniya Esinenjongo Kulabo Abenza Intando KaNkulunkulu.” Luyochaza indlela leso siprofetho esasebenza ngayo ezikhathini zasendulo esizweni sakwaJuda nokuthi sisebenza kanjani osukwini lwethu, ikakhulukazi ezinkolweni zezwe. Ngemva kwalokho uyojabulela idrama yasendulo enesihloko esithi “Izibonelo Eziyisixwayiso Zosuku Lwethu,” echaza ukuziphatha okubi kwamadoda akwa-Israyeli ngaphambi nje kokuba u-Israyeli angene eZweni Lesithembiso. Isici esivelele sesimiso esiphetha umhlangano ngeSonto ntambama kuyoba inkulumo yeningi ethi “Isizathu Sokuba Uqaphele Imisebenzi KaNkulunkulu Emangalisayo.”
Yenza amalungiselelo manje okuba khona ngazo zontathu izinsuku. Ukuze uthole indawo eseduze nalapho uhlala khona, thintana neHholo LoMbuso lendawo loFakazi BakaJehova noma ubhalele abashicileli balo magazini.