INgxenye 7
Uye Waba Yini Umphumela Wokuhlubuka?
1-3. Isikhathi siye sabonisa kanjani ukuthi uJehova akanaphutha?
NGOKUPHATHELENE nempikiswano yegunya likaNkulunkulu lokubusa, ube yini umphumela wawo wonke lamakhulu eminyaka okubusa komuntu ngaphandle kukaNkulunkulu? Ingabe abantu baye baba ababusi abangcono kunoNkulunkulu? Uma sahlulela ngomlando wonya lomuntu kumuntu, akunjalo neze.
2 Lapho abazali bethu bokuqala benqaba ukubusa kukaNkulunkulu, kwalandela inhlekelele. Bazilethela ukuhlupheka bona kanye nawo wonke umkhaya wesintu owavela kubo. Futhi akekho omunye okwakufanele bamsole ngaphandle kwabo ngokwabo. IZwi likaNkulunkulu lithi: “Bonile kuye; abasibo abantwana bakhe, kuyisici sabo.”—Duteronomi 32:5.
3 Umlando uye wabonisa ukunemba kwesixwayiso sikaNkulunkulu kuAdamu noEva sokuthi uma bephuma ngaphansi kwamalungiselelo kaNkulunkulu, babeyowohloka futhi ekugcineni bafe. (Genesise 2:17; 3:19) Baphuma ngaphansi kokubusa kukaNkulunkulu, futhi ngokuhamba kwesikhathi bawohloka futhi bafa.
4. Kungani sonke sizalwa singaphelele, sigula futhi sifa?
4 Lokho okwenzeka kamuva kuyo yonke inzalo yabo kwaba njengoba eyabaseRoma 5:12 ichaza: “Isono sangena ezweni ngamuntu munye [uAdamu, inhloko yomkhaya wesintu], nangesono kwangena ukufa, ngokunjalo ukufa kwafikela abantu bonke.” Ngakho lapho abazali bethu bokuqala behlubuka ekuqondiseni kukaNkulunkulu, baba izoni ezingaphelele. Ngokuvumelana nomklamo wezakhi zofuzo, ukungapheleli okwaba umphumela yikhona kuphela ababengakudlulisela enzalweni yabo. Yingakho sonke siye sazalwa singaphelele, sigula futhi sifa.
5, 6. Umlando uye wabonisani ngemizamo yomuntu yokuletha ukuthula kweqiniso nokuchuma?
5 Sekudlule amakhulu amaningi eminyaka. Imibuso iye yafika yadlula. Kuye kwazanywa lonke uhlobo olukhona lukahulumeni. Nokho, ngokuphindaphindiwe, kuye kwenzeka izinto ezesabekayo emkhayeni wesintu. Ngemva kweminyaka eyizinkulungwane eziyisithupha, umuntu wayengacabanga ukuthi abantu bayobe sebethuthukele ephuzwini lokuletha ukuthula, ubulungisa, kanye nokuchuma emhlabeni wonke nanokuthi manje babeyobe sebengochwepheshe bezimiso ezinhle zokuziphatha eziwumusa, uzwela, kanye nokubambisana.
6 Nokho, okwenzekayo kungokuphambene nalokho. Alukho uhlobo lukahulumeni wesintu olwake lwasungulwa oluye lwalethela bonke abantu ukuthula kweqiniso nokuchuma. Kulelikhulu lama-20 leminyaka kuphela, siye sabona ukubulawa okuhleliwe kwezigidi phakathi nokuQothulwa Kwesizwe kanye nokubulawa ngonya ezimpini kwezigidi ezingaphezu kwekhulu. Esikhathini sethu inani elingenakubalwa labantu liye lahlushwa, labulawa, futhi laboshwa ngenxa yokungabekezeli nokwehluka okungokwezombangazwe.
Isimo Namuhla
7. Singachazwa kanjani isimo somkhaya wesintu namuhla?
7 Ngaphezu kwalokho, cabangela sonke isimo somkhaya wesintu namuhla. Ubugebengu nobudlova kudlangile. Ukusetshenziswa kabi kwezidakamizwa kuwumqedazwe. Kunobhadane lwezifo ezidluliselwa ngobulili. Isifo esesatshwayo sengculaza sithinta izigidi zabantu. Unyaka ngamunye kufa amashumi ezigidi zabantu ngenxa yendlala noma izifo, kuyilapho inani elincane labantu linengcebo enkulu. Abantu bayawungcolisa futhi bayawonakalisa umhlaba. Ukuphila komkhaya kanye nezimiso zokuziphatha kuye kwawohloka yonke indawo. Ngempela, ukuphila namuhla kubonisa ukubusa okubi ‘kukankulunkulu walelizwe,’ uSathane. Izwe ayinkosi yalo alinazwela, linonya, futhi lonakele ngokuphelele.—2 Korinte 4:4.
8. Kungani singenakukubiza ngokuthi intuthuko yangempela lokho isintu esiye sakufinyelela?
8 UNkulunkulu uye wanikeza abantu isikhathi esanele sokuba bafinyelele umvuthwandaba wentuthuko yabo engokwesayensi neyezinto ezibonakalayo. Kodwa ingabe kuyintuthuko yangempela ukuthi umnsalo nomcibisholo kuye kwathathelwa indawo izibhamu ezingontuluntulu, izinqola zempi, izindiza eziwisa amabhomu, kanye nezikhali zenuzi ezicitshwayo? Ingabe kuyintuthuko ukuthi abantu bayakwazi ukuya emkhathini kodwa behluleka ukuhlalisana ngokuthula emhlabeni? Ingabe kuyintuthuko ukuba abantu basabe ukuhamba emigwaqweni ebusuku, noma ngisho nasemini ezindaweni ezithile?
Lokho Isikhathi Esiye Sakubonisa
9, 10. (a) Yini eye yaboniswa ngokucacile amakhulu eminyaka edlule? (b) Kungani uNkulunkulu engeke asephuce inkululeko yokuzinqumela?
9 Lokho ukuhamba kwesikhathi esingamakhulu eminyaka okukubonisile ukuthi akunakwenzeka ukuba abantu baqondise izinyathelo zabo ngokuphumelelayo ngaphandle kokubusa kukaNkulunkulu. Ngeke besakwenza lokho njengoba nje bengenakuphila ngaphandle kokudla, ukuphuza, nokuphefumula. Ubufakazi busobala: Saklanyelwa ukuba sincike ekuqondiseni koMdali wethu njengoba nje sadalelwa ukuba siphile ngokudla, amanzi, kanye nomoya.
10 Ngokuvumela ububi, uNkulunkulu uye wabonisa ngaphandle kokungabaza imiphumela edabukisayo yokusebenzisa kabi inkululeko yokuzinqumela. Futhi inkululeko yokuzinqumela iyisipho esiyigugu kangangokuba kunokuba abephuce yona abantu, uNkulunkulu uye wabavumela ukuba babone ukuthi kusho ukuthini ukuyisebenzisa kabi. IZwi likaNkulunkulu likhuluma iqiniso lapho lithi: “Akukuyo indoda ukuba ihambe, iqondise izinyathelo zayo.” Liqinisile futhi lapho lithi: “Lapho umuntu ebusa omunye kube-ngukulimala kwakhe.”—Jeremiya 10:23; UmShumayeli 8:9.
11. Ingabe lukhona uhlobo lokubusa komuntu oluye lwaqeda ukuhlupheka?
11 Ukuvumela kukaNkulunkulu ukubusa komuntu iminyaka eyizinkulungwane eziyisithupha kubonisa ngamandla ukuthi umuntu akakwazi ukuqeda ukuhlupheka. Asikho isikhathi ake wakwenza ngaso. Ngokwesibonelo, osukwini lwayo iNkosi yakwaIsrayeli uSolomoni, inakho konke ukuhlakanipha kwayo, ingcebo, kanye namandla, ayikwazanga ukuqeda usizi olwalubangelwa ukubusa komuntu. (UmShumayeli 4:1-3) Ngokufanayo, osukwini lwethu abaholi bezwe, naphezu kwentuthuko yamuva yezobuchwepheshe, abakwazi ukuqeda ukuhlupheka. Okubi nakakhulu, umlando uye wabonisa ukuthi abantu abazibusa ngaphandle kokubusa kukaNkulunkulu baye bandisa ukuhlupheka esikhundleni sokukuqeda.
Umbono KaNkulunkulu Wesikhathi Eside
12-14. Yiziphi izinzuzo ezihlala njalo ezibangelwa ukuvumela kukaNkulunkulu ukuhlupheka?
12 Ukuvumela kukaNkulunkulu ukuhlupheka kuye kwaba buhlungu kithi. Kodwa uye waba nombono wesikhathi eside, azi imiphumela emihle ezoba khona ekugcineni. Umbono kaNkulunkulu uzozizuzisa izidalwa, hhayi nje iminyaka embalwa noma izinkulungwane ezimbalwa, kodwa izigidi zeminyaka, yebo, kuze kube phakade.
13 Uma noma nini esikhathini esizayo kungaphakama isimo lapho othile esebenzisa kabi inkululeko yokuzinqumela okuyobangela ukuba angabaze indlela kaNkulunkulu yokwenza izinto, ngeke kudingeke anikezwe isikhathi sokuba azame ukubonisa ukuthi imibono yakhe ingaphumelela. Njengoba kakade evumele izihlubuki iminyaka eyizinkulungwane, uNkulunkulu uye wamisa isandulela esingokomthetho esingasetshenziswa phakade noma kuphi endaweni yonke.
14 Ngenxa yokuthi uJehova uye wavumela ububi nokuhlupheka kulesikhathi, kuyobe kakade sekuboniswe ngokwanele ukuthi akukho lutho olungavumelani naye olungaphumelela. Kuyobe kuboniswe ngaphandle kokungabaza ukuthi alikho icebo lokuzibusa labantu noma lezidalwa zomoya elingaletha izinzuzo ezihlala njalo. Ngakho, kuyoba okufanele ngokugcwele ukuba uNkulunkulu ngokushesha abhubhise noma isiphi isihlubuki. “Ababi bonke uyakubabhubhisa.”—IHubo 145:20; Roma 3:4.
[Izithombe ekhasini 15]
Ngemva kokuba abazali bethu bokuqala bekhethe ukuzibusa ngaphandle kukaNkulunkulu, ekugcineni baguga futhi bafa
[Izithombe ekhasini 16]
Ukubusa komuntu ngaphandle kukaNkulunkulu kuye kwaba inhlekelele
[Umthombo]
U.S. Coast Guard photo