Anɛ Yehowa Ma Ha Ye Sɔlemi Ɔmɛ A Heto Lo?

1-2. Mɛni he je nɛ wa ma nyɛ maa nu he kaa Yehowa ha we wa sɔlemihi a heto ɔ?

‘MO NÁ Yehowa he bua jɔmi, nɛ e ma ha mo níhi nɛ o tsui suɔ.’ (La 37:4) Si womi nɛ ɔ sa kadimi wawɛɛ! Se anɛ e sa nɛ wa susu kaa Yehowa ma ha wɔ nɔ́ fɛɛ nɔ́ nɛ wa biɔ lɛ ɔ amlɔ nɔuu lo? Mɛni he je nɛ sane bimi nɛ ɔ he hia a? Nyɛ ha nɛ wa susu nɔ hyɛmi níhi nɛ nyɛɛ se nɛ ɔmɛ a he nɛ waa hyɛ. Nyɛmiyo ko nɛ e sɛ we gba si himi mi ɔ sɔle konɛ e ná he blɔ kɛ ya Sukuu Kɛ Ha Matsɛ Yemi Sane Kpakpa Fiɛɛli ɔ eko, se jehahi babauu be nɛ́ a tsɛ we lɛ. Nyɛminyumu wayoo ko nɛ e be he wami wawɛɛ ɔ sɔle kaa Yehowa nɛ ha nɛ e ná he wami konɛ e nyɛ nɛ e pee babauu ngɛ asafo ɔ mi, se loloolo ɔ, e ná we he wami. Fɔli nɛ a ji Kristofohi ɔ sɔleɔ konɛ a bimɛ nɛ a hi asafo ɔ mi, se kɛ̃ ɔ, a bimɛ ɔmɛ ma nyɛ maa mwɔ a yi mi kpɔ kaa a be Yehowa sɔmɔe.

² Eko ɔ, mo hu o bi Yehowa nɔ́ ko hyɛ, se o nine sui nɔ. Enɛ ɔ he ɔ, o ma nyɛ ma susu kaa Yehowa buɔ ni komɛ a sɔlemi tue, se moo lɛɛ e bui mo tue. Aloo eko ɔ, o ma susu kaa o pee nɔ́ yaya ko, nɛ lɔ ɔ he je nɛ e bui mo tue ɔ nɛ. Nyɛmiyo ko nɛ a tsɛɛ lɛ ke Janiceb ɔ nu he jã. E kɛ e huno ɔ suɔ nɛ a ya sɔmɔ ngɛ Betel, enɛ ɔ he ɔ, a sɔle ha Yehowa ngɛ he. Nyɛmiyo ɔ de ke: “Jamɛ a be ɔ mi ɔ, i ngɛ nɔ mi mami kaa e be kɛe kulaa nɛ a maa fɔ wɔ nine kɛ ya Betel.” Se jehahi babauu be nɛ a tsɛ we mɛ. Nyɛmiyo Janice de hu ke: “Enɛ ɔ ha nɛ i hao, nɛ ye kɔni mi jɔ̃. I nu he kaa eko ɔ, i pee nɔ́ ko kɛ si Yehowa. I sɔle wawɛɛ kaa Yehowa nɛ ye bua wɔ nɛ waa ya Betel. Mɛni he je mɔ nɛ e ha we ye sɔlemi ɔ heto ɔ?”

3. Mɛni he wa ma susu ngɛ ní kasemi nɛ ɔ mi?

³ Be komɛ ɔ, wa ma nyɛ maa nu he kaa Yehowa bui wa sɔlemi ɔmɛ tue. Nyumu anɔkualetsɛmɛ komɛ nɛ a hi si blema a po nu he jã. (Hiob 30:20; La 22:2; Hab. 1:2) Mɛni ma ha nɛ o ná nɔ mi mami kaa Yehowa ma ha o sɔlemi ɔmɛ a heto? (La 65:2) Bɔ nɛ pee nɛ wa ná heto ɔ, e he hia nɛ waa na sane bimi nɛ ɔmɛ a heto kekle: (1) Mɛni wa ma nyɛ maa hyɛ blɔ kaa Yehowa maa pee? (2) Mɛni nɛ Yehowa hyɛɔ blɔ kaa waa pee? (3) Mɛni he je nɛ eko ɔ, e ma bi nɛ waa sɔle ngɛ ní kpahi a he ɔ?

MƐNI WA MA NYƐ MAA HYƐ BLƆ KAA YEHOWA MAA PEE?

4. Ngɛ Yeremia 29:12 ɔ nya a, mɛni nɛ Yehowa wo si kaa e maa pee?

⁴ Yehowa wo si kaa e maa bu wa sɔlemihi tue. (Kane Yeremia 29:12.) Wa Mawu ɔ suɔ e sɔmɔli anɔkualetsɛmɛ wawɛɛ, lɔ ɔ he ɔ, e maa ya nɔ maa bu mɛ tue. (La 10:17; 37:28) Se kɛ̃ ɔ, enɛ ɔ tsɔɔ we kaa Yehowa ma ha wɔ níhi tsuo nɛ wa biɔ lɛ ɔ. Eko ɔ, ní komɛ ngɛ nɛ wa biɔ lɛ nɛ wa nine be nɔ sue amlɔ nɛ ɔ, ja je ehe ɔ mi.

5. Ke Yehowa ngɛ wa sɔlemihi tue bue ɔ, mɛni he nɛ e susuɔ? Moo tsɔɔ nya.

⁵ Yehowa hyɛɔ bɔ nɛ níhi nɛ wa biɔ lɛ ɔ kɛ e yi mi tomi ngɛ tsakpa ha. (Yes. 55:​8, 9) Yehowa yi mi tomi ɔmɛ eko ji kaa adesahi nɛ a buɔ lɛ tue kaa a Nɔ Yelɔ ɔ nɛ a hyi zugba a nɔ tɔ. Se Satan tsɔɔ kaa ke adesahi ye mɛ nitsɛmɛ a nɔ ɔ, a bua maa jɔ wawɛɛ. (1 Mose 3:​1-5) Bɔ nɛ pee nɛ e pee heii kaa Abosiami ji lakpatsɛ ɔ, Yehowa ngmɛ adesahi blɔ konɛ a ye mɛ nitsɛmɛ a nɔ. Se adesa nɔ yemi ha nɛ waa kɛ nyagbahi babauu ngɛ kpee mwɔnɛ ɔ. (Fiɛɛ. 8:9) Se wa le kaa Yehowa be nyagba nɛ ɔmɛ tsuo jee kɛ je amlɔ nɛ ɔ. Ke e pee jã a, e ma ha nɛ ni komɛ ma susu kaa adesa nɔ yemi ngɛ mɔde bɔe saminya, nɛ e ngɛ wa nyagba amɛ a he ní tsue.

6. Mɛni he je nɛ wa ma nyɛ ma ná nɔ mi mami kaa Yehowa jeɔ suɔmi mi kɛ peeɔ níhi, nɛ blɔ nɔ nɛ e guɔ kɛ peeɔ níhi ɔ da be fɛɛ be ɔ?

⁶ Ke wa sɔle ngɛ nɔ́ ko he nɛ nɔ kpa ko hu sɔle ngɛ jamɛ a nɔ́ ɔ nɔuu he ɔ, Yehowa ma nyɛ maa gu blɔ ekpaekpahi a nɔ kɛ ha nɔ fɛɛ nɔ heto. Kaa nɔ hyɛmi nɔ́ ɔ, benɛ Matsɛ Hezekia nu hiɔ wawɛɛ ɔ, e kpa Yehowa pɛɛ konɛ e tsa lɛ. Enɛ ɔ he ɔ, Yehowa tsa lɛ. (2 Ma. 20:​1-6) Bɔfo Paulo hu kpa Yehowa pɛɛ kaa e je ‘mio ko ngɛ e he lo ɔ mi’ ɔ kɛ je. E ma nyɛ maa ba kaa hiɔ ko lɛ ngɛ Paulo nya gbae, se Yehowa tsa we lɛ. (2 Kor. 12:​7-9) Jehanɛ hu ɔ, mo susu bɔfo Yakobo kɛ Petro a nɔ hyɛmi ní ɔmɛ a he nɛ o hyɛ. Matsɛ Herode to kaa e maa gbe mɛ ni enyɔ ɔmɛ tsuo. Asafo ɔ tsuo sɔle kɛ ha Petro, nɛ eko ɔ, a sɔle ha Yakobo hulɔ. Se kɛ̃ ɔ, a gbe Yakobo, nɛ Petro lɛɛ bɔfo ko ba kpɔ̃ lɛ. (Níts. 12:​1-11) Enɛ ɔ ma nyɛ ma ha nɛ wa bi ke, ‘Mɛni he je nɛ Yehowa kpɔ̃ Petro, se e si Yakobo ɔ?’ Baiblo ɔ tsɔɔ we nɔ́ he je.c Wa le kaa Yehowa ‘pee we nɔ́ nɛ dɛ kɔkɔɔkɔ.’ (5 Mose 32:4) Wa le hu kaa Yehowa suɔ Petro kɛ Yakobo tsuo. (Kpoj. 21:14) Be komɛ ɔ, e ma nyɛ maa ba kaa Yehowa be wa sɔlemihi a heto hae kaa bɔ nɛ wa ngɛ blɔ hyɛe ɔ. Se akɛnɛ wa le kaa Yehowa ngɛ suɔmi nɛ e peeɔ nɔ́ nɛ da be fɛɛ be he je ɔ, ke e gu blɔ kpa nɔ kɛ ha wa sɔlemihi a heto ɔ, wa mi mi fu we lɛ.—Hiob 33:13.

7. Mɛni nɛ wa sume nɛ waa pee, nɛ mɛni he je?

⁷ Wa bɔɔ mɔde kaa waa kɛ wa si fɔfɔɛ be ni kpahi a nɔ́ ɔ he toe. Kaa nɔ hyɛmi nɔ́ ɔ, eko ɔ, wa maa sɔle kaa Yehowa nɛ ye bua wɔ ngɛ blɔ pɔtɛɛ ko nɔ, se e be wa sɔlemi ɔ heto hae. Pee se ɔ, wa maa na kaa nɔ kpa ko kɛ jamɛ a si fɔfɔɛ ɔ nɔuu kpe nɛ e sɔle ngɛ he, nɛ Yehowa ha e sɔlemi ɔ heto. Nyɛmiyo ko nɛ a tsɛɛ lɛ ke Anna a ná enɛ ɔ mi níhi a si kpami. E huno nɛ a tsɛɛ lɛ ke Matthew ɔ ná kansa nɛ e sɔle konɛ Yehowa nɛ ye bua lɛ nɛ e ná he wami. Ngɛ jamɛ a be ɔ mi nɔuu ɔ, nyɛmimɛ yihi enyɔ nɛ a wa ngɛ jeha mi ɔ hu ná kansa. Anna sɔle wawɛɛ kɛ ha e huno Matthew kɛ nyɛmimɛ yi nɛ ɔmɛ. Nyɛmiyi ɔmɛ ná he wami, se Matthew lɛɛ e gbo. Sisije ɔ, Anna bi e he ke ji Yehowa lɛ ye bua nyɛmimɛ yi nɛ ɔmɛ nɛ a ná he wami loo pi lɛ. Ke Yehowa lɛ ye bua mɛ ɔ, mɛni he je mɔ nɛ Yehowa ha we lɛɛ e sɔlemi ɔ heto konɛ e tsa e huno ɔ? Ngɛ anɔkuale mi ɔ, wa be nyɛe maa tsɔɔ nɔ́ nɛ ha nɛ nyɛmimɛ yi enyɔ ɔmɛ ná he wami. Se wa le kaa Yehowa maa po wa haomi ɔmɛ tsuo se, nɛ e pee klaalo kaa e ma tle e huɛmɛ nɛ a gbo ɔ tsuo si kɛ ba wami mi ekohu.—Hiob 14:15.

8. (a) Kaa bɔ nɛ Yesaya 43:2 ɔ tsɔɔ ɔ, mɛni blɔ nɔ nɛ Yehowa yeɔ bua wɔ? (b) Ke waa kɛ si fɔfɔɛhi nɛ a mi wa ngɛ kpee ɔ, mɛni blɔ nɔ nɛ sɔlemi yeɔ bua wɔ? (Hyɛ video nɛ ji, Sɔlemi Yeɔ Bua Wɔ Nɛ Wa Nyɛɔ Fiɔ Si.)

⁸ Yehowa maa ye bua wɔ be fɛɛ be. Yehowa ji wa Tsɛ nɛ ngɛ suɔmi, enɛ ɔ he ɔ, e sume nɛ e maa na kaa wa ngɛ nɔ́ nae. (Yes. 63:9) Se kɛ̃ ɔ, e tsi we kahi tsuo nɛ waa kɛ kpeɔ, nɛ a ngɛ kaa pa loo la a nya. (Kane Yesaya 43:2.) Se e wo si kaa e ‘maa piɛɛ wa he,’ nɛ e be hae nɛ kahi nɛ waa kɛ kpeɔ ɔ nɛ a ná wa nɔ he wami nɛ wa kpa lɛ sɔmɔmi. Jehanɛ hu ɔ, Yehowa haa wɔ e mumi klɔuklɔu ɔ nɛ ngɛ he wami ɔ konɛ wa nyɛ nɛ wa fĩ si. (Luka 11:13; Filip. 4:13) Enɛ ɔ he ɔ, wa ma nyɛ ma ná nɔ mi mami kaa wa nine maa su nɔ́ tutuutu nɛ wa hia a nɔ, konɛ wa nyɛ nɛ wa fĩ si nɛ waa ya nɔ nɛ waa ye lɛ anɔkuale.d

MƐNI NƐ YEHOWA HYƐƆ BLƆ KAA WAA PEE?

9. Ngɛ Yakobo 1:​6, 7 ɔ nya a, mɛni he je nɛ wa ngɛ nɔ mi mami kaa Yehowa maa ye bua wɔ ɔ?

⁹ Yehowa suɔ kaa waa ngɔ wa hɛ kɛ fɔ e nɔ. (Heb. 11:6) Be komɛ ɔ, wa ma nyɛ maa nu he kaa wa haomi ɔmɛ a nya wa tsɔ nɛ wa be nyɛe maa da nya. Wa ma nyɛ maa nu he po kaa Yehowa be wɔ ye buae. Se Baiblo ɔ ha wɔ nɔ mi mami kaa ngɛ Mawu he wami nya a, wa ‘ma nyɛ maa tu gbogbo’ po. (La 18:29) Enɛ ɔ he ɔ, e sɛ nɛ wa susu kaa Yehowa be wɔ ye buae, mohu ɔ, e sa nɛ waa sɔle wawɛɛ nɛ wa ná hemi kɛ yemi nɛ mi wa kaa Yehowa ma ha wa sɔlemi ɔmɛ a heto.—Kane Yakobo 1:​6, 7.

10. Mo ha nɔ hyɛmi nɔ́ ko nɛ tsɔɔ blɔ nɔ nɛ wa ma nyɛ maa gu kɛ tsu wa sɔlemihi a he ní.

¹⁰ Yehowa hyɛɛ blɔ kaa wa tsu wa sɔlemi ɔmɛ a nya ní. Kaa nɔ hyɛmi nɔ́ ɔ, eko ɔ, nyɛminyumu ko maa sɔle kaa Yehowa nɛ ha nɛ a ngmɛ lɛ blɔ ngɛ e ní tsumi he ɔ konɛ e nyɛ nɛ e ya kpokpa nɔ kpe ko nɛ a maa pee ɔ. Mɛni blɔ nɔ Yehowa maa gu kɛ ha sɔlemi nɛ ɔ heto? Eko ɔ, e maa wo nyɛminyumu ɔ he wami konɛ e ná kã nɛ e ya e nitsumitsɛ ɔ ngɔ. Se e sa nɛ nyɛminyumu ɔ nɛ ya e nitsumitsɛ ɔ ngɔ konɛ e ya de lɛ e ní bimi ɔ. Eko ɔ, e ma bi nɛ e pee jã si abɔ. Eko ɔ, e he maa hia nɛ e to blɔ nya konɛ e ya tsu ní ligbi kpa. Ke e maa hi po ɔ, e ma nyɛ maa to blɔ nya konɛ a je ligbi nɛ e be ní tsumi yae ɔ hiɔwo ngɛ sika nɛ a ma ha lɛ ɔ mi.

11. Mɛni he je nɛ e sa kaa waa sɔle si abɔ ngɛ wa nyagba amɛ a he ɔ?

¹¹ Yehowa hyɛɛ blɔ kaa wa maa sɔle si abɔ ngɛ wa nyagba amɛ a he. (1 Tɛs. 5:17) Yesu tsɔɔ kaa pi wa sɔlemi ɔmɛ eko fɛɛ eko nɛ a ma ha heto amlɔ nɔuu. (Luka 11:9) Enɛ ɔ he ɔ, e sɛ nɛ wa kɔni mi nɛ jɔ̃! Mohu ɔ, moo je o tsui mi kɛ sɔle nɛ o sɔle si abɔ. (Luka 18:​1-7) Ke wa ya nɔ nɛ wa sɔle kɛ ha Yehowa si abɔ ngɛ sane ko he ɔ, lɔ ɔ haa nɛ Yehowa naa kaa wa hɛ dɔ ngɛ nɔ́ nɛ wa ngɛ lɛ bie ɔ he. Jehanɛ hu ɔ, lɔ ɔ tsɔɔ kaa wa ngɛ hemi kɛ yemi kaa e maa ye bua wɔ.

MƐNI HE JE NƐ EKO Ɔ, E MA BI NƐ WA TSAKE NÍHI NƐ WA SƆLEƆ NGƐ HE Ɔ?

12. (a) Mɛni sane nɛ e sa kaa wa bi wa he ngɛ níhi nɛ wa sɔleɔ ngɛ he ɔ he, nɛ mɛni he je? (b) Ke wa ngɛ sɔlee ɔ, mɛni wa ma nyɛ maa pee kɛ tsɔɔ kaa wa ngɛ bumi kɛ ha Yehowa? (Hyɛ daka nɛ ji, “Anɛ Níhi Nɛ I Sɔleɔ Ngɛ He ɔ Tsɔɔ Kaa I Ngɛ Bumi Kɛ Ha Yehowa Lo?”)

¹² Ke wa sɔle ngɛ nɔ́ ko he nɛ wa nine sui nɔ ɔ, wa ma nyɛ ma bi wa he sane etɛ nɛ ɔmɛ. Kekleekle ɔ, ‘Anɛ nɔ́ nɛ i ngɛ sɔlee ngɛ he ɔ sa lo?’ Behi fuu ɔ, wa susuɔ kaa wa le níhi nɛ maa hi kɛ ha wɔ. Se eko ɔ, níhi nɛ wa sɔleɔ ngɛ he ɔ be wɔ ye buae kɛ pi si. Ke wa ngɛ sɔlee ngɛ nyagba ko he ɔ, eko ɔ, blɔ nɛ hi pe kulaa ngɛ nɛ a ma nyɛ maa gu nɔ kɛ tsu nyagba a he ní pe nɔ́ nɛ wa ngɛ bie ɔ. Jehanɛ hu ɔ, e ma nyɛ maa ba kaa níhi nɛ wa ngɛ sɔlee ngɛ he ɔ kɛ Yehowa suɔmi nya ní kpa we gbi. (1 Yoh. 5:14) Kaa nɔ hyɛmi nɔ́ ɔ, mo susu fɔli nɛ wa tu a he munyu kɛ sɛ hlami ɔ he nɛ o hyɛ. A sɔle kɛ bi Yehowa kaa e ha nɛ a bimɛ ɔmɛ nɛ a hi anɔkuale ɔ mi daa. Eko ɔ, enɛ ɔ maa pee nɔ́ nɛ hi wawɛɛ. Se kɛ̃ ɔ, Yehowa be nɔ ko nɔ nyɛe kaa e sɔmɔ lɛ. E suɔ nɛ nɔ fɛɛ nɔ nɛ e hla kaa e ma sɔmɔ lɛ. Wa bimɛ ɔmɛ hu piɛɛ he. (5 Mose 10:​12, 13; 30:​19, 20) Enɛ he ɔ, jinɛ e sa nɛ fɔli ɔmɛ nɛ a bi Yehowa nɛ e ye bua mɛ nɛ a su a bimɛ ɔmɛ a tsui he, konɛ a suɔ Yehowa nɛ a pee e huɛ.—Abɛ 22:6; Efe. 6:4.

13. Ngɛ Hebri Bi 4:16 nya a, mɛni be nɛ Yehowa maa ye bua wɔ? Moo tsɔɔ nya.

¹³ Sane bimi enyɔne ɔ ji, ‘Anɛ be nɛ Yehowa to kaa e ma tsu ye ní bimi ɔmɛ a he ní ɔ ji nɛ ɔ lo?’ Ke wa sɔle ɔ, wa ma nyɛ maa nu he kaa e sa nɛ a ha wa sɔlemi ɔmɛ a heto oya nɔuu. Se ngɛ anɔkuale mi ɔ, Yehowa le be nɛ e sa kaa e ye bua wɔ. (Kane Hebri Bi 4:16.) Ke wa nine sui nɔ́ nɛ wa sɔle ngɛ he ɔ nɔ amlɔ nɔuu ɔ, eko ɔ, wa ma susu kaa Yehowa sume nɛ e ha wɔ heto. Se e ma nyɛ maa ba kaa Yehowa be wɔ heto hae amlɔ nɔuu. Kaa hyɛmi nɔ́ ɔ, mo susu nyɛminyumu wayoo ɔ nɛ e sɔle kaa Yehowa nɛ ha nɛ e ná he wami ɔ he nɛ o hyɛ. Kaa Yehowa gu nyakpɛ blɔ nɔ kɛ tsa lɛ ɔ, jinɛ Satan ma nyɛ ma de ke akɛnɛ Yehowa tsa nyɛminyumu ɔ he je nɛ e ngɛ lɛ sɔmɔe ngɛ anɔkuale mi ɔ nɛ. (Hiob 1:​9-11; 2:4) Jehanɛ hu ɔ, Yehowa to be nɛ e kɛ ma je hiɔ kɛ je kulaa. (Yes. 33:24; Kpoj. 21:​3, 4) Kɛ ya si benɛ jamɛ a be ɔ maa su ɔ, wa be nyɛe maa hyɛ blɔ kaa Yehowa maa gu nyakpɛ blɔ nɔ kɛ tsa wɔ. Enɛ ɔ he ɔ, nyɛminyumu ɔ ko nyɛ ko bi Yehowa kaa e ha lɛ he wami kɛ tue mi jɔmi konɛ e nyɛ nɛ e ya nɔ nɛ e fĩ si nɛ e sɔmɔ Yehowa ngɛ anɔkuale mi.—La 29:11.

14. Mɛni o kase ngɛ Nyɛmiyo Janice níhi a si kpami ɔ mi?

¹⁴ Mo susu Nyɛmiyo Janice nɛ wa tu e he munyu kɛ sɛ hlami ɔ he nɛ o hyɛ. E sɔle kaa Yehowa nɛ ha nɛ a ya sɔmɔ ngɛ Betel. Se jeha enuɔ sɔuu be loko e na bɔ nɛ Yehowa ha e sɔlemi ɔ heto ha. E de ke: “Yehowa ngɔ jamɛ a be ɔ kɛ tsɔɔ mi ní nɛ e ye bua mi nɛ i ya ye hɛ mi ngɛ Mawu jami mi. E he ba hia nɛ ma ná hemi kɛ yemi nɛ mi wa ngɛ e mi. Jehanɛ hu ɔ, e sa nɛ ma ya ye hɛ mi ngɛ dɛ he ní kasemi mi, nɛ ma ná nɔ mi mami kaa he fɛɛ he nɛ ma sɔmɔ Yehowa ngɛ ɔ, ma nyɛ ma ná bua jɔmi nitsɛnitsɛ.” Pee se ɔ, a ha nɛ nyɛmiyo Janice kɛ e huno ɔ ya tsu kpɔ mi nɔ hyɛmi ní tsumi ɔ. Nyɛmiyo ɔ de ke: “Ke i kai nɔ́ nɛ ya nɔ ɔ, i naa kaa Yehowa ha ye sɔlemi ɔmɛ a heto niinɛ, se e pee jã ngɛ blɔ kpa nɔ. E he be loko i na kaa bɔ nɛ Yehowa ha ye sɔlemi ɔmɛ a heto ha a sa kadimi wawɛɛ. Ye bua jɔ wawɛɛ kaa Yehowa je suɔmi kɛ mi mi jɔmi kpo kɛ tsɔɔ mi.”

15. Mɛni he je nɛ e sa nɛ waa sɔle ngɛ ní kpahi hu a he ɔ? (Hyɛ foni ɔmɛ hulɔ.)

¹⁵ Sane bimi etɛne ɔ ji, ‘Anɛ e ma bi nɛ ma sɔle ngɛ ní kpahi a he lo?’ E ngɛ mi kaa e sa nɛ waa sɔle ngɛ ní pɔtɛɛ komɛ a he mohu lɛɛ, se be komɛ ɔ, wa ma nyɛ maa sɔle ngɛ ní kpahi a he bɔ nɛ pee nɛ waa le nɔ́ nɛ Yehowa suɔ kaa waa pee. Mo susu nyɛmiyo ɔ nɛ e sɛ we gba si himi mi nɛ e sɔle kaa e suɔ nɛ e ya Sukuu Kɛ Ha Matsɛ Yemi Sane Kpakpa Fiɛɛli ɔ eko ɔ he nɛ o hyɛ. E suɔ nɛ e ya sukuu ɔ konɛ e ya sɔmɔ ngɛ he nɛ fiɛɛli fuu a he hia ngɛ. Enɛ ɔ he ɔ, be mi nɛ e ngɛ sɔlee kaa Yehowa nɛ ha nɛ a fɔ lɛ nine kɛ ha sukuu nɛ ɔ eko ɔ, e ma nyɛ maa sɔle hu kaa Yehowa nɛ ye bua lɛ konɛ e le blɔ slɔɔtohi a nɔ nɛ e ma nyɛ maa gu kɛ bli e sɔmɔmi ní tsumi ɔ mi. (Níts. 16:​9, 10) Lɔ ɔ se ɔ, e ma nyɛ ma bi a kpɔ mi nɔ hyɛlɔ ɔ ke ji e le asafo ko nɛ ngɛ a zugba kpɔ ɔ mi nɛ a hia blɔ gbali fuu. Aloo e ma nyɛ maa ngma kɛ ya asafo ɔ ní tsumi kɔni ɔ konɛ e bi mɛ hehi nɛ a hia fiɛɛli fuu ngɛ.e

16. Mɛni nɔ mi mami wa ma nyɛ ma ná?

¹⁶ Kaa bɔ nɛ wa na a, wa ma nyɛ ma ná nɔ mi mami kaa Yehowa maa je suɔmi mi kɛ ha wa sɔlemihi a heto, nɛ e maa pee jã ngɛ blɔ nɛ da nɔ. (La 4:3; Yes. 30:18) Be komɛ ɔ, wa nine be hetohi nɛ wa ngɛ hlae ɔ nɔ sue mohu lɛɛ, se kɛ̃ ɔ, Yehowa ma ha wɔ heto kokooko. E suɔ wɔ wawɛɛ, nɛ e be wɔ kuae gblegbleegble. (La 9:10) Enɛ ɔ he ɔ, ‘ngɔɔ o hɛ kɛ fɔ e nɔ be fɛɛ be,’ nɛ o je o tsui mi kɛ sɔle ha lɛ.—La 62:8.