Mensheerskappy in die weegskaal

Deel 1c—Menseheerskappy in die weegskaal—Waarom?

“Ontwaak!” kondig met genoeë ’n reeks artikels aan oor “Menseheerskappy in die weegskaal”

NIEMAND kan ontken dat regerings—om ons bespreking tot die politiek te beperk—’n invloed op die wêreldgeskiedenis en op elkeen van ons gehad het nie. Die taal wat jy praat, die lewenstandaard wat jy nastreef, die werk wat jy doen, die sosiale sisteem waarin jy woon, miskien selfs die godsdiens wat jy aanhang, is ten minste gedeeltelik deur die wisselvalligheid van politieke verandering aan jou voorgeskryf.

Aangesien regering noodsaaklik is, wil ons tog almal onder ’n regeringsvorm lewe wat op die bes moontlike manier in ons behoeftes sal voorsien, nie waar nie? Maar watter soort regering is die beste? En het ons hoegenaamd ’n keuse wat heerskappy betref?

Ontwaak! kondig met genoeë ’n reeks artikels aan oor “Menseheerskappy in die weegskaal”. Die artikels sal in toekomstige nommers van hierdie tydskrif verskyn. Dit sal gedurende die res van 1990 aandag skenk aan die geskiedkundige agtergrond van monargieë, aristokrasieë, oligargieë en plutokrasieë. Dit sal talle vorme van demokrasie, sowel as die talle soorte republieke ondersoek. Dit sal die soeklig werp op outokrasieë, diktatorskappe en totalitêre regeringsvorme soos Fascisme en Nazisme van die Tweede Wêreldoorlog. Sosialisme en Kommunisme sal ook behandel word.

Menseheerskappy is baie ingewikkeld, en nie alles wat oor regering bekend is, sal dus bespreek word nie. Die artikels is nie ontwerp om ’n volledige handboek van die politiek te wees nie. Dit sal nie die belange van menseregerings oor die algemeen of enige vorm in die besonder onderskryf of bevorder nie. Enige vergelyking tussen verskillende vorme word nie gedoen met die doel om die een bo die ander aan te beveel nie. Ontwaak! sal getrou bly aan sy beleid wat op bladsy 5 uiteengesit word, waar ons lees: “Dit delf dieper as die oppervlak en wys op die ware betekenis van aktuele gebeure; tog bly dit altyd neutraal wat die politiek betref.”

Die artikels “Menseheerskappy in die weegskaal” is ontwerp om deel uit te maak van daardie proses om “dieper as die oppervlak” te delf. Dit sal op die “ware betekenis van aktuele gebeure” wys, gebeure wat toon dat menseheerskappy met ’n krisis te kampe het.

Die boek The Columbia History of the World beskryf die krisis so: “Die toestand van regering, godsdiens, sedelikheid, sosiale omgang, taal, die kunste en daardie fundamentele grondslag van die beskawing, openbare hoop, help ons om ten minste ’n tentatiewe gevolgtrekking te maak oor die omvang van die hedendaagse epog. Regering is boaan die lys en is die belangrikste. . . . [Daar] is minagting vir die wet, vir die Staat wat dit toepas en vir die regeerders wat steeds op albei vertrou. . . . Die hedendaagse siening verskil baie van dié van ’n eeu gelede . . . In baie wêrelddele wag magte net op die bevel om die stadhuis te bestorm, ’n openbare verhoor op te breek, ’n universiteit te plunder of ’n ambassade op te blaas. . . . Die begeerte na absolute vryheid is kwaadaardig. . . . Kortom, die politieke en sosiale ideaal, die motiverende krag van die tyd is Separatisme, ongeag onder watter mantel van ouer filosofie dit ook al is. As dit nog nie Ineenstorting is nie, is dit onteenseglik Verbrokkeling.”

Sal “Verbrokkeling” binnekort tot “Ineenstorting” lei, en indien wel, met watter gevolge vir die wêreld waarin ons lewe? Menseregering word in der waarheid geoordeel, maar nie net deur mense wat hulle regerings al duisende jare lank weeg en herhaaldelik te lig bevind nie. Hierdie keer eis die Skepper van die heelal self rekenskap. Regverdig die geskiedenis van menseheerskappy deur die eeue heen dat dit toegelaat moet word om voort te bestaan? Of sal die skaal van goddelike oordeel toon dat dit verwyder moet word? En as dit die geval is, waarmee kan dit vervang word?

Die reeks artikels “Menseregering in die weegskaal” sal jou kennis oor regering verbreed. En dit sal jou hoop gee omdat jy alle rede het om optimisties te wees. Beter regering is aan die kom. En die allerbeste is dat jy dit kan belewe!

[Prente op bladsy 9]

Sal God ’n gunstige oordeel uitspreek wanneer die geskiedenis van menseheerskappy geweeg word?

[Erkenning]

WHO photo/PAHO by J. Vizcarra