Ons beskou die wêreld
Huis-tot-huismetode
Volgens die koerant El País in Madrid gaan Katolieke priesters en biskoppe ’n krisis deur. Sommige verlaat die priesteramp of tree vroeg af omdat hulle heeltemal ontmoedig is. Onder die redes daarvoor is die eensaamheid wat die gedwonge selibaat meebring. Die biskoppe is ook bekommerd oor die groei in ander godsdiensgroepe. El País het opgemerk dat een kardinaal voorgestel het dat seminariste “die huis-tot-huismetode [geleer moet word] sodat hulle van huis tot huis kan gaan soos Jehovah se Getuies, ten einde mense te oortuig om die Katolieke geloof aan te neem”. Volgens die koerant het die kardinaal bygevoeg dat beide Christus en die apostel Paulus aan ’n predikingswerk van huis tot huis deelgeneem het.
Waarskuwing teen “siek” geboue
Noudat daar meer inligting is oor die siekgebousindroom as gevolg van binnenshuise lugbesoedeling, hoe sal ’n mens te werk gaan om die probleem op te spoor voordat mense siek word? (Sien die Ontwaak!, 11/8/88, bladsy 30 en 12/8/88, bladsy 29.) Deur plante te gebruik, sê twee professore aan die Dartmouth-Universiteit. Hulle beweer dat besoedelstowwe plante sigbaar kan laat kwyn nog voordat die chemikalieë mense aantas, en daarom kan hulle as ’n vroeë waarskuwingstelsel dien. ’n Klompie plante se blare het opgekrul en verdroog of het abnormaal gegroei toe hulle blootgestel is aan chemikalieë wat mense hoofpyn gee, duiseligheid veroorsaak en ander simptome van “siek” geboue aanbring. Afgesien van hulle geweldige sensitiwiteit is plante baie goedkoper as instrumente, voeg hulle by.
Hulle omskep geweerkolwe in krieketkolwe
Volgens Financial Mail het die Suid-Afrikaanse regering in 1990 ’n aansienlike vermindering in verdedigingsbesteding afgekondig. “Militêre analiste voorspel dat minstens nog R1 biljoen op volgende jaar se verdedigingsbegroting besnoei sal word”, het hierdie Suid-Afrikaanse tydskrif bygevoeg. Om die verminderde aanvraag die hoof te bied, het die wapennywerheid vennootskappe aangegaan met firmas wat kommersiële goedere vervaardig. Een wapenfabriek “het sy masjinerie wat gebruik is om geweerkolwe van hout te maak, aangepas sodat krieketkolwe van die hoogste gehalte gemaak kan word”, berig die Johannesburgse koerant The Star. Die krieketkolwe word in Suid-Afrika se gewilde somersport gebruik en is getoets en goedgekeur deur ’n top krieketspeler.
Verminderende skoenlappers
Europa het sowat 380 bekende skoenlappersoorte, waarvan ongeveer ’n derde slegs op daardie vasteland voorkom. ’n Berig in The European wys daarop dat “byna almal . . . drasties verminder het, en etlike soorte staan op die randjie van uitsterwing”. Die lande wat geraak word, sluit Nederland, Duitsland, Switserland en die Verenigde Koninkryk in. Wat is die oorsaak? ’n Vermeerdering in landbouproduksie wat veral deur die groei van die Europese Gemeenskap bevorder is, het tot die vernietiging van die natuurlike omgewing gelei. Die situasie is vererger deur grasvelde wat omgeploeg is, moerasse wat drooggelê is, die grootskaalse gebruik van plaagdoders, die vernietiging van lanings en die wanbenutting van weivelde.
Jong misdadigers
Volgens ’n studie wat deur die Regsministerie in Japan gemaak is, “[maak] jeugdiges 57,4 persent [uit] van alle verdagtes wat ondervra of in hegtenis geneem word”, berig The Daily Yomiuri. Die gemiddelde ouderdom van jong misdadigers het oor ’n tydperk van tien jaar elke jaar laer geword. Die koerant voeg by: “Volgens die studie het meer as 70 persent van die oortreders hulle eerste misdaad tussen die ouderdomme van 13 en 15 gepleeg. Van diegene wat minstens twee keer in hegtenis geneem is, het die meeste hulle eerste oortreding voor die ouderdom van 10 begaan.” Die studie het aan die lig gebring dat die meeste jeugmisdadigers in Japan ouers het wat nie genoegsame dissipline verskaf nie. Hulle kom uit gesinne met ’n “duidelike onvermoë om sinvol te kommunikeer”.
Mongoolse Bybel
Die Mongoolssprekende mense van die wêreld het nou toegang tot ’n deel van die Bybel in hulle eie taal. Dit het Britse geleerde John Gibbens 18 jaar geneem om sy vertaling van die Christelike Griekse Geskrifte te voltooi. Volgens mnr. Gibbens “is Mongools die laaste amptelike nasionale taal in die wêreld om die Nuwe Testament te ontvang”, berig Asia Magazine. Die tydskrif voeg egter by dat die getal van diegene wat in die Bybel glo “volgens skatting nie meer as sowat twaalf uit die 2,2 miljoen mense is wat in die Volksrepubliek Mongolië woon nie”. ’n Bybelgenootskap in Engeland verduidelik dat daar ’n toenemende belangstelling in die Bybel as ’n internasionale klassieke werk is.
Katolieke meningsverskille
Volgens ’n onlangse landwye meningsopname onder Franse Katolieke, verskil die meeste Franse Katolieke (57 persent) van die amptelike leringe van die kerk aangaande morele sake, aldus die Franse koerant Le Figaro. Toe hulle uitgevra is oor huwelikstrou, geboortebeperking, aborsie en kunsmatige inseminasie was 60 persent se reaksie dat die kerk nie reëls op hierdie gebiede moet neerlê nie. Die opname bring aan die lig dat ’n volle 69 persent van Franse Katolieke sê dat hulle, in beginsel, geslagsgemeenskap voor die huwelik goedkeur. Verder het 49 persent gesê dat hulle ten gunste is van die afskaffing van vereiste selibaat vir Katolieke priesters, en 51 persent het gemeen dat vroue tot die priesteramp toegelaat moet word. Dit is interessant dat slegs 8 persent gedink het dat die Katolieke Kerk nog steeds getrou aan die leringe van Christus Jesus is.
Sataniese rituele
“Berigte van sataniese rituele, wat lank as onmoontlik afgemaak is, kom al hoe meer voor en is ontstellend konsekwent”, berig The Globe and Mail van Kanada. Sulke berigte sluit seksuele misbruik, kannibalisme en menseofferandes in. Sommige beweer dat die slagoffers van menseofferandes uit die 50 000 swerwers en haweloses kom wat elke jaar in Noord-Amerika as vermis aangegee word. Daar word ook beweer dat babatjies verwek en weggesteek word met die doel om hulle as menseofferandes te gebruik. The Globe and Mail voeg by dat daar in “Kanada na raming 2000 individue na vore gekom het wat beweer dat hulle in sataniese kultusse misbruik is”. Om werk te maak van die probleem bespreek polisiedepartemente in sommige dele van Kanada Satanisme in hulle opleidingskursusse. Amptenare is bekommerd oor “die aantrekkingskrag wat Satanisme vir jongmense het”.
Gesonde vet
’n Onlangse studie het aan die lig gebring dat hartsiekte minder voorkom onder mense wat langs die kusgebiede van Japan woon as onder diegene wat in die binneland woon. Die rede? Asiaweek berig dat ’n dieet wat baie seekos insluit “in verband gebring is met ’n vermindering in etlike algemene koronêre gevare”. Veral salm en forel het ’n hoë inhoud van ’n poli-onversadigde vet wat as omega-3 bekend staan. Daar word geglo dat hierdie soort vet die trigliseriedevlak kan verlaag en dat dit die “bloed se ‘klewerigheid’—sy neiging om te stulp en kroonvate moontlik te verstop”—kan verminder, het Asiaweek gesê. Sommige beweer dat omega-3 selfs kan help om ander siektes, soos artritis, borskanker, nieraandoenings en skeelhoofpyne, te voorkom.
Die nommer een boomdoder
Volgens die Süddeutsche Zeitung, ’n koerant in München, het woude in Duitsland agteruitgegaan. Ongeveer 56 persent van die woudoppervlakte in Duitsland is na bewering beskadig. Dennebome word veral daardeur geraak, met ernstige gevolge vir die heuwels waar diep wortels ’n belangrike rol speel in die voorkoming van rotsstortings en die erosie van bogrond. Süddeutsche Zeitung sê dat “bewaringsgesindes weer ’n beroep op die federale regering gedoen het om iets omtrent die ‘Nr. 1 boomdoder’, die motor, te doen” as gevolg van die hoë vlak van motoruitlaatgasse in Duitsland.
Onderwys by die huis
Honderdduisende ouers in die Verenigde State leer hulle kinders tuis pleks van hulle skool toe te stuur. The New York Times berig dat tot 500 000 kinders, volgens party skattings, by die huis geleer word. Hierdie keuse verwerf gewildheid onder ouers wat bekommerd is “oor dwelms en misdaad in openbare skole en oor ’n afname in die gehalte van onderwysers”. Volgens die Times sê opvoedkundiges dat hierdie kinders “oorgelaat word aan welmenende maar ongekwalifiseerde ouers”. ’n Woordvoerster vir die National Homeschool Association het erken dat “tuisonderwys nie vir almal is nie”. Toe het sy bygevoeg: “Maar openbare skole is ook nie.”
Katedraalonderhoud—’n krisis
Hoewel die Anglikaanse Kerk die naasgrootste grondeienaar in Brittanje is, ondervind hy probleme om al sy katedrale te onderhou. Volgens die Guardian Weekly van Manchester “is daar tekens dat die publiek moeg word daarvoor om hierdie verbrokkelende, dog statige monumente jaar na jaar in stand te hou”. Party kerkamptenare het voorgestel dat restaurante op kerkgronde geopen moet word of dat die bestaande geskenkwinkels vergroot moet word; in York het kerkamptenare die huur van plaaslike winkels verdubbel. Kerkleiers het sulke pogings met ’n meerdere of mindere mate van afkeur bejeën. Maar dr. Robert Runcie, die voormalige aartsbiskop van Kantelberg, het onlangs ’n brief aan die Britse regering geskryf waarin hy om finansiele hulp vir die kerk smeek. Die katedraal van Ely het ’n eenvoudiger oplossing: Hulle vra hulle besoekers toegangsgeld.