Uitlanders—Hoe kan jy hulle help?

JOERNALIS Günter Wallraff het hom as ’n Turkse werker voorgedoen en in ’n Duitse staalfabriek gaan werk. Toe hy sy bevindings aangaande die behandeling van werkers uit die buiteland, of gasarbeiders, bekend gemaak het, was die publiek geskok en ontstem. Hy het die een geval na die ander van openlike diskriminasie en vernederende vooroordeel teenoor immigrantewerkers gedokumenteer. In een geval het hy gesien hoe Turkse werkers, ten spyte van noodsirenes en flikkerende rooi ligte, beveel is om in ’n gevaarlike gebied te werk. Toe een man bang geword het en die gebied wou verlaat, is hy met afdanking gedreig.

Wallraff se ondervindinge onthul baie duidelik die posisie waarin immigrante hulle bevind. Namate simpatieke burgers al hoe meer bewus word van die probleme waarmee uitlanders te kampe het, wonder baie wat hulle kan doen om die immigrant en sy gesin te help.

Aanvaar ons soos ons is

Vermy vooroordeel. Daar is niks wat ’n skans van agterdog en onverdraagsaamheid tussen die plaaslike burger en die vreemdeling vinniger skep as wanneer ’n mens vreemdelinge voor die voet met vooroordeel bejeën nie. “[Kultuur] skend ons beskouing van hoe ander mense dinge doen, veral wanneer hulle maniere verskillend is . . . van ons aanvaarde maatstawwe”, sê die skrywer Ben Levitas in sy boek Tribal Life Today. Hy sê dat hierdie verskille “dikwels veroorsaak dat ons krities is oor die manier waarop ander optree”. Helen, ’n Koreaanse immigrant in Kanada, onthou die dag duidelik toe haar onderwyseres woedend op haar geskreeu het omdat sy nie die werk gedoen het wat die klas gevra is om te doen nie. “Sy het nie besef dat ek haar nie kon verstaan nie”, sê Helen, wat op daardie tydstip baie gekrenk gevoel het.

Misverstande en vooropgestelde idees oor ander nasionaliteite is dikwels eerder op verdigsels as op feite gegrond. Skrywers Mildred Sikkema en Agnes Niyekawa-Howard vertel in hulle boek Cross-Cultural Learning & Self-Growth van een Amerikaanse professor wat sy nuwe immigrantestudente getoets het deur vir hulle ’n grap te vertel. Hy het dan hulle reaksie dopgehou. As die studente nie lag nie, het hy hulle dadelik vir Engelse lesse gestuur. “[Die professor] het blykbaar nie besef”, sê die skrywers, “dat ’n mens met die Amerikaanse kultuur asook die taal bekend moet wees om ’n Amerikaanse grap te verstaan nie . . . Wat mense van een kultuur dalk as snaaks sal beskou, sal dalk deur [ander] as onsmaaklik beskou word.” Sulke goed bedoelde optrede deur plaaslike mense toon ’n gebrek aan insig met betrekking tot die behandeling van vreemdelinge.

As jy die vreemdeling sonder vooroordeel aanvaar net soos hy is, sal hy jou daarvoor waardeer. So ’n gesindheid is in ooreenstemming met ’n rigsnoer wat Jesus gegee het: ‘Jy moet jou naaste liefhê soos jouself’ (Lukas 10:27). Jasoesji Higasjisawa, ’n prokureur in Tokio, Japan, wat baie met vreemdelinge te doen het, beveel aan dat “noue omgang met mense van ander kulture die beste hulpmiddel is om vooroordeel uit die weg te ruim”. Hierdie soort omgang maak dit vir die immigrant moontlik om ook op baie ander maniere gehelp te word.

Praktiese bystand

Daar is baie dinge wat die uitlander oor sy nuwe land wil weet—hoe om huisvesting te kry, die taal te leer, die kinders by ’n skool in te skryf en van gesondheids- en maatskaplike dienste gebruik te maak. Jy kan hom baie onnodige probleme en moeite spaar deur dit wat jy weet met hom te deel.

Kan jy die uitlander byvoorbeeld help om agentskappe of organisasies op te spoor wat hom sal help om hom by die taal en die kultuur aan te pas? Of kan jy miskien die eerste paar keer saam met ’n immigrantevrou gaan inkopies doen en haar help om kossoorte en huishoudelike items uit te ken? Kan jy dalk raad aan ’n immigrantegesin gee wat die dikwels ingewikkelde formaliteite met betrekking tot hulle regstatus, die verkryging van werk, die invul van belastingvorms, ensovoorts moet afhandel?—Sien voetnoot in venster.

Iemand om op te steun

Dit is altyd nuttig om jou af te vra: ‘Hoe sou ek behandel wou word as ek in ’n ander land was?’ “Alles wat julle . . . wil hê dat die mense aan julle moet doen, net so moet julle aan hulle ook doen”, het Jesus in die bekende Gulde Reël gesê (Mattheüs 7:12). Om ’n vriend te hê waarop hulle tydens die moeilike ervaring van verandering en aanpassing kan steun, is iets wat baie vreemdelinge sal waardeer. Wanneer die plaaslike inwoners sulke gasvryheid aan die dag lê, bring dit wedersydse voordele mee. Nog ’n Bybelbeginsel lui: “Dit is saliger om te gee as om te ontvang.”—Handelinge 20:35.

As jy een van Jehovah se Getuies is, is die vooruitsig op ’n verenigde broederskap die beste geskenk wat jy ’n vreemdeling kan gee. Jy sal heel waarskynlik opbouende leesstof in sy moedertaal vind om vir hom te gee.

Die verantwoordelikheid vir suksesvolle migrasie rus natuurlik hoofsaaklik op die vreemdeling. Maar met ’n bietjie beplanning is daar baie wat jy kan doen om hom tuis te laat voel sodat die migrasieproses minder traumaties, selfs aangenaam, sal wees.

[Lokteks op bladsy 11]

“Ons neem aan dat mense van ’n ander kultuur . . . dieselfde beskouing, gevoelens en denkwyse as ons het. . . . Baie misverstande word veroorsaak deur die veronderstelling dat ons eie reaksies universeel is.”—Cross-Cultural Learning & Self-Growth

[Lokteks op bladsy 12]

’n Student wat tyd op die eiland Guam deurgebring het, het gesê: ‘Ek het meer verdraagsaam geword teenoor nuwe of ander maniere om dinge te doen.’—Cross-Cultural Learning & Self-Growth

[Venster op bladsy 12]

Jy kan die uitlander help om . . .

▶ gevestig te raak deur ’n gasvrye buurman te wees

▶ reg op te tree teenoor beamptes wanneer hy sy verhuising laat wettiga

▶ belastingvorms in te vulb

▶ met organisasies in aanraking te kom wat hom die plaaslike kultuur en taal kan leer

▶ huisvesting te kry

▶ van mediese en maatskaplike dienste gebruik te maak

▶ die kinders by ’n skool in te skryf

▶ inkopies te doen vir gebruiksartikels teen die beste prys

▶ werk te kry

[Voetnoot]