Jongmense vra . . .

Wie kan my help om my probleme op te los?

“DIE mens word vir moeite gebore.” Dít is wat ’n gekwelde man met die naam Job ongeveer vierduisend jaar gelede gesê het (Job 5:7). Jou lewe is waarskynlik geensins so tragies soos Job s’n nie. Maar jy het heel waarskynlik genoeg probleme en bekommernisse.

Toe een groep jong Amerikaners gevra is: “Waaroor bekommer julle julle die meeste?” het baie gesê dat die skool, ouers, geld, vriende en hulle broers en susters ’n bron van kommer is. Wat van jou? Gaan jy gebuk onder portuurdwang, geldsorge of probleme by die skool? Vind jy dit moeilik om die fisiese en emosionele veranderinge tydens puberteit die hoof te bied? Is jy bekommerd oor jou toekoms?

Wanneer jy aan al hierdie probleme dink, is dit maklik om mismoedig en terneergedruk te raak. Om die waarheid te sê, as jy nie met ander oor hierdie bekommernisse praat nie, sal jy dalk vind dat jy emosioneel van ander afgesonderd is. (Vergelyk Spreuke 18:1.) Hoe moet jy dan te werk gaan om persoonlike probleme op te los? Moet jy hulle werklik op jou eie aanpak?

Nee, want jou probleme—al lyk hulle ook hoe groot—is nie uniek nie. Nadat die wyse koning Salomo die mens se gedrag sorgvuldig bestudeer het, het hy tot die slotsom gekom dat ‘daar glad niks nuuts onder die son is nie’ (Prediker 1:9). Ja, ander het al probleme nes joune aangepak en dit suksesvol opgelos. Jy hoef dus nie altyd dinge op jou eie aan te pak nie; soms kan jy iemand wat reeds sy probleme opgelos het om hulp vra. Dink net daaraan, sal jy nie, as jy na ’n onbekende plek reis, aanwysings probeer kry van iemand wat reeds daar was nie? Die vraag is: Na wie moet jy jou wend vir sulke hulp?

Portuurs—Is hulle raad die beste?

Baie jongmense verkies om hulle portuurs van hulle probleme te vertel. “Soms dink ek dat party van die veranderinge wat ek deurmaak uniek is”, verduidelik jong Anita. “Ek wonder: ‘Is daar enigiemand anders wat dit deurmaak?’ Ek vra my af of ek verspot is om so te voel.” Jy dink dalk dat iemand van jou ouderdom jou gevoelens sal verstaan en dat ’n volwassene—veral ’n ouer—te veroordelend of krities sal wees.

Maar hoewel jou portuurs moontlik begrip, empatie en medelye betoon, is hulle raad dalk nie altyd die beste nie. Soos die Bybel verduidelik: ‘Volwassenes besit geestesvermoëns wat geoefen is om goed van kwaad te onderskei.’ Hoe? Die Bybel antwoord: “Deur voortdurende gebruik”, dit wil sê deur ondervinding! (Hebreërs 5:14; The New English Bible). Omdat jongmense nie sulke ondervinding het nie, is hulle “praktiese wysheid en denkvermoë” selde soos dié van ’n volwassene (Spreuke 3:21, NW). Dit hou dus gevaar in om ’n ander jongmens se raad te volg. Spreuke 11:14 waarsku: “As daar nie goeie oorleg [“bekwame leiding”, NW] is nie, val ’n volk.”

Die waarde van godvresende ouers

Volwassenes is gewoonlik in ’n beter posisie om bekwame leiding te gee. Die regverdige Job het dit so gestel: “By die grysaards is wysheid, en in lengte van dae is verstand” (Job 12:12). Jou godvresende ouers is heel moontlik die beste bekwaam om jou in hierdie opsig te help. Om maar een ding te noem: hulle ken jou beter as enigiemand anders. Aangesien hulle voor party van dieselfde situasies as joune te staan gekom het, kan hulle jou baie help om verdere probleme te voorkom. Salomo het as ouer die volgende raad gegee: “Hoor, julle seuns, na die tug van die vader, en luister om insig te leer ken; want ek gee aan julle goeie lering.”—Spreuke 4:1, 2.

Beskou die geval van ’n jong Ghanese man met die naam Samuel. Terwyl hy in die sekondêre skool (hoërskool) was, moes hy besluit of hy sy sekulêre opvoeding wou voortsit en of hy ’n loopbaan as ’n voltydse bedienaar van Jehovah se Getuies wou volg. “Aangesien ons ’n hegte gesin is wat goed kommunikeer”, verduidelik hy, “was dit maklik om my ouers in my vertroue te neem.” Samuel se ouers het hom aangemoedig om die voltydse bediening te betree—’n loopbaan waarin hy steeds vooruitgang maak. Samuel raai jongmense aan om hulle ouers te vra om hulle met persoonlike probleme te help omdat “hulle meer lewensondervinding het en moontlik dieselfde probleme die hoof moes bied . . . en in ’n beter posisie is om die saak objektief van albei kante te beskou”.

Dit is interessant dat ’n onlangse Gallup-opname toon dat ’n groot aantal jongmense ouerlike leiding wil hê—selfs oor sulke onderwerpe soos dwelms, die skool en seks.

‘Hulle verstaan my nie!’

Maar ongelukkig onttrek baie jongmense hulle van hulle ouers wanneer hulle tieners word. Party voel soos die tienderjarige seun wat gesê het: “Ek het al met my ouers oor my eksamenvrees probeer praat en dat ek dink dat hierdie skool te moeilik is, maar hulle sê net vir my dat ek lui is en harder moet leer.” ’n Jong Christenmeisie in Afrika was ook bekommerd en het gesê: “Diep binne my weet ek dat ek hulp nodig het met my persoonlike probleme, maar ek is bang dat my ouers my nie sal verstaan nie.”

Selfs godvresende ouers skiet natuurlik soms te kort. Hulle oorreageer dalk op dinge, luister nie na jou nie, verstaan jou verkeerd of veroordeel jou. Dit beteken egter nie dat jy hulle moet verstoot nie. Jesus Christus is deur onvolmaakte ouers grootgemaak. Tog toon die Bybel dat Jesus “aan hulle onderdanig gebly” het. Hulle invloed het hom ongetwyfeld gehelp om ‘in wysheid en in guns by God en die mense toe te neem’.—Lukas 2:51, 52, NW.

Vind jy baat by jou ouers se wysheid en ondervinding? Indien nie, moet jy ag slaan op wat die boek Adolescence deur Eastwood Atwater sê: “Wanneer tieners oormatig deur hulle portuurs beïnvloed word, is dit moontlik eerder weens iets wat in die ouer-adolessent-verhouding ontbreek en nie soseer omdat hulle portuurs groter byval by hulle vind nie.” Wat is jou verhouding met jou ouers? (Galasiërs 6:5). Vermy jy dit moontlik die afgelope ruk om met hulle te kommunikeer? Doen dan gerus alles in jou vermoë om dinge te verbeter.a Dit maak deel daarvan uit om, volgens Salomo, “’n ware seun” of dogter vir jou ouers te wees.—Spreuke 4:3, NW.

Malcolm, ’n jong Ghanese man wat nou in die Verenigde State woon, het vroeër gedink sy ouers verstaan nie hoe hy voel nie. Maar hulle het voortgegaan om hulle ondervinding van die lewe sowel as die raad van God se Woord aan hom oor te dra. In ’n onlangse brief aan sy ouers het Malcolm geskryf: “Ek weet ons het in die verlede ons geskille gehad. Maar as ek daaraan terugdink, staan ek verstom oor hoe julle my hardkoppigheid verdra het en party van die besluite wat ek deur die jare heen geneem het kalm aanvaar het. Glo my, ek weet wat in ander huise gebeur, en die Bybel het beslis ’n verskil [in ons s’n] gemaak. Weer eens dankie.”

Doen self praktiese wysheid op!

As jy jou ouers se leiding aanvaar, sal dit jou eerder help om ’n ryp volwassene te word as wat dit jou vooruitgang sal belemmer. Mettertyd kan jy ook ‘skranderheid, kennis en denkvermoë’ ontwikkel (Spreuke 1:4, NW). Jy sal toegerus wees om probleme te ontleed en verstandige besluite te neem oor hoe jy hulle moet oplos.

Alle jongmense is weliswaar nie so gelukkig om godvresende ouers te hê nie. Maar dit sal verkeerd wees om tot die slotsom te kom dat jy jou nie veel moet steur aan wat jou ouers sê nie net omdat hulle nie Christene is nie. Hulle is steeds jou ouers, en hulle moet as sodanig geëer word (Efesiërs 6:1-3). As jy hulle ’n kans gee, sal jy dalk boonop uitvind dat hulle heelwat praktiese raad het om aan te bied. Wanneer jy geestelike leiding nodig het, kan jy iemand wat jy in die Christengemeente vertrou in jou vertroue probeer neem. Dit behoort nie moeilik te wees om daar ’n godvresende volwassene te vind wat objektief, met begrip en simpatie, sal luister nie.

Hou ook in gedagte dat Jehovah se gees altyd gereed is om hulp te verleen en krag te gee aan dié wat daarvoor vra (Lukas 11:13). Jehovah het ook vir jou ’n oorvloed van kennis voorsien in die Bybel en in die Wagtoringgenootskap se Bybelse publikasies. Trouens, hierdie einste reeks het al duisende jongmense gehelp om praktiese antwoorde op hulle probleme te vind! As jy leer om na antwoorde te soek en navorsing te doen, sal jy moontlik baie probleme self kan oplos.—Spreuke 2:4.

Om probleme te ondervind, is natuurlik ’n deel van die lewe. Maar dit help om die psalmis se positiewe beskouing te hê. Hy het geskryf: “Dit is goed vir my dat ek verdruk was, sodat ek u insettinge sou leer” (Psalm 119:71). Ja, as jy probleme oplos, kan dit jou vorm en leer. Maar jy hoef dit nie op jou eie aan te pak nie. Vra om hulp. Gewoonlik is dit daar as jy net vra.

[Voetnoot]

[Prent op bladsy 16]

As jy jou ouers se leiding aanvaar, sal dit jou help om ’n ryp volwassene te word