Hindernisse word oorkom om brûe te bou
ONS het nie die gesin of volk gekies waarin ons gebore is nie, en ons het ook nie besluit watter kultuur ons denke sou vorm nie. Ons het geen beheer oor sulke dinge gehad nie. Ons is almal aan tyd en omstandighede onderworpe. Maar ons het beheer oor hoe ons ander beskou en hoe ons teenoor hulle optree.
Die Bybel beskryf hoe ons dit kan doen. Beskou ’n paar beginsels wat ons sal help om met diegene te kommunikeer wie se agtergrond dalk van ons s’n verskil.
“Die God wat die wêreld en alles daarin gemaak het, . . . het uit een mens elke nasie van die mense gemaak om op die hele oppervlak van die aarde te woon” (Handelinge 17:24, 26). Ons is almal lede van dieselfde mensegesin en het dus baie in gemeen. As ons na die dinge soek wat ons in gemeen het, maak dit kommunikasie makliker. Ons almal wil goeie vriende hê en wil voel dat ander ons liefhet en respekteer. Almal probeer fisiese en emosionele pyn vermy. Mense van alle kulture is lief vir musiek en kuns, vertel grappe, glo daaraan om beleef teenoor mekaar te wees en soek na maniere om gelukkig te wees.
‘Moet niks uit twisgierigheid of uit egotisme doen nie, maar ag met ootmoed die ander hoër as julleself’ (Filippense 2:3). Dit beteken nie dat ons ander in alles hoër as onsself moet ag nie. Ons moet eerder besef dat ander op sekere terreine van die lewe hoër is. Ons moet nooit dink dat ons of ons kultuur die alleenreg het op alles wat goed is nie.
“Ja, laat ons dan, solank ons tyd het wat daarvoor gunstig is, aan almal goed doen” (Galasiërs 6:10). As ons eenvoudig die inisiatief neem om vriendelik en hulpvaardig teenoor ander te wees, ongeag wat hulle kulturele agtergrond is, kan dit baie help om ’n kommunikasiegaping te oorbrug.
“Weet dit, my geliefde broers. Elke mens moet gou wees om te hoor, stadig om te praat, stadig ten opsigte van gramskap” (Jakobus 1:19). Goeie kommunikeerders moet nie net praat nie; hulle moet met empatie luister.
“Die raad in die hart van ’n man mag diep waters wees, ’n man van verstand sal dit tog uitskep” (Spreuke 20:5). Probeer raaksien watter gevoelens en geskille agter ’n persoon se gedrag skuil. Leer mense beter ken.
“[Moet] nie in persoonlike belangstelling ’n oog op net julle eie sake hou nie, maar ook in persoonlike belangstelling op dié van die ander” (Filippense 2:4). Betoon empatie deur sake uit die ander persoon se oogpunt te beskou. Wees onselfsugtig.
Kulturele verskeidenheid onder Jehovah se Getuies
Die merkwaardige eenheid van Jehovah se Getuies, wat in 232 lande van die wêreld bedrywig is, toon dat hierdie beginsels werklik doeltreffend is. Hulle is ’n volk wat uit “alle nasies en stamme en volke en tale” kom en wat vasbeslote is om in alles volgens Jehovah se liefdevolle leiding te lewe.—Openbaring 7:9; 1 Korintiërs 10:31-33.
Individuele Getuies verag nie ander se kultuur nie. Diegene wat Getuies word, verwerp ook nie die kultuur waarin hulle grootgemaak is nie, tensy dit van die beginsels in die Bybel verskil. In sulke gevalle bring hulle veranderinge in hulle lewens aan. Hulle erken dat daar prysenswaardige kenmerke in elke kultuur is en dat hierdie kenmerke selfs aantrekliker word in mense wat ware aanbidding aanneem.
Hulle probeer ons planeet sien soos God dit moet sien—helder en blou en pragtig—terwyl dit deur die ruimte spoed. Dit is ’n planeet met ’n wonderlike verskeidenheid volke en kulture. Jehovah se Getuies sien uit na die tyd wanneer almal op aarde die lewe as ’n waarlik verenigde gesin sal geniet.
[Prent op bladsy 8]
Jehovah se Getuies het geleer hoe om kulturele hindernisse te oorkom