Ons beskou die wêreld
HIV in Indië
Wetenskaplikes aan die Nasionale Instituut vir Vigs-navorsing in Poena, Indië, het in samewerking met ’n span navorsers onder leiding van dr. Max Essex, van die Harvard-universiteit se Instituut vir Vigs, Indië se algemeenste soort HIV geïsoleer. Dit is HIV-1C, wat glo vyf tot tien keer makliker oorgedra word as die HIV-1B, wat algemeen in Europa en Amerika voorkom. Volgens die Indian Express het dr. Essex gesê dat die tempo waarteen HIV in Indië versprei waarskynlik baie hoër sal wees as in baie ander wêrelddele. Wetenskaplike dr. V. Ramalingaswami het opgemerk dat nie een van die paar entstowwe wat belowend lyk vir die voorkoming van vigs vir HIV-1C doeltreffend is nie.
Hulp tydens droogte in Zimbabwe
In onlangse jare het Jehovah se Getuies dikwels hulp aan diegene in rampgebiede verleen. Hulle Christelike gees is veral in ontwikkelende lande soos Zimbabwe nodig, waar droogte baie dele van die land erg geteister het. Groot hoeveelhede voedsel en klere is op liefdevolle wyse vir hierdie poging bygedra, en die takkantoor van die Wagtoringgenootskap in Zimbabwe het hierdie voorraad suksesvol versprei onder Getuies en hulle vriende in afgeleë dele van die land. Benewens voedsel en klere het die Zimbabwiese Getuies R29-000 bygedra, en die Wagtoringgenootskap het ’n verdere R79 100 spandeer om die noodlenigingspogings uit te voer. Die Genootskap en die Getuies wat daardeur geraak is, het hulle diepe waardering uitgespreek vir die oorvloedige liefde wat deur hulle Christenbroers betoon is.
’n Gemeenskaplike grondslag?
Volgens die International Herald Tribune van Parys beweer ’n artikel in die invloedryke Jesuïetetydskrif La Civiltà Cattolica dat “God deur boeke kon gespreek het wat so uiteenlopend is soos die Moslems se Koran, die Hindoes se Vedas en Bhagavad-Gita asook die heilige geskrifte van China se Taoïsme en Japan se Sjintoïsme”. Die artikel gee te kenne dat hierdie en ander godsdiensgeskrifte “nie net blote letterkunde of filosofie weergee nie, maar eerder ‘openbaring’—God wat deur die mens spreek”. Omdat die tydskrif se artikels informeel deur Vatikaanse sensors nagegaan word, het dit die vraag laat ontstaan of hierdie beskouings die Pous se eie sienswyse van die saak voorstel. Die Tribune het opgemerk dat Johannes-Paulus II in sy boek Crossing the Threshold of Hope gesê het dat die kerk in ander godsdienste gesoek het na iets wat ’n soort gemeenskaplike grondslag met die leringe van die kerk vorm.
100 jaar oue vuur word geblus
Meer as 100 jaar gelede het ’n onontgonne steenkoolneerslag in China aan die brand geraak, en dit het tot onlangs toe nog gebrand. Die vuur het oor ’n gebied van ses vierkante kilometer gestrek en jaarliks 300-000 ton steenkool verbrand. Pogings om die yslike vuur te blus, was baie jare lank vrugteloos. Maar brandweermanne het na wat berig word uiteindelik daarin geslaag om die vuur uit te doof. Ten einde die vuur te blus, het brandweermanne plofstof gebruik om gate te maak en toe sand, klippe en water op die vlamme gegooi.
Hoë bloeddruk en ’n slegte geheue
“’n Nuwe studie toon dat middeljarige mans met hoë bloeddruk waarskynlik aan ’n slegte geheue asook verswakte oordeel en konsentrasie sal ly wanneer hulle hulle laat sewentigerjare bereik”, berig Psychology Today. Navorsers het bevind dat die kanse op ’n afname in breinwerking met 9 persent vermeerder vir elke tien punte wat die sistoliese bloeddruk verhoog. “Ons weet dat hoë bloeddruk met beroerte en hartkwaal verband hou”, sê Lenore Launer, Ph.D., wat aan die hoof van die studie is, en sy voeg by: “Dit is net nog ’n rede om dit te verlaag.”
Die kommunikasiegaping
Die koerant The Courier-Mail van Brisbane, Australië, berig dat ’n onlangse opname aan die lig gebring het dat tienderjarige hoërskoolleerlinge selde, indien ooit, ernstige gesprekke met hulle vaders voer. Die opname het getoon dat die meeste tienderjariges minder as 15 minute per dag met hulle vaders deurbring; tog gesels hulle omtrent ’n uur per dag met hulle moeders. Ouers het selde met hulle kinders oor sedes gesels of gelet op die televisieprogramme of video’s waarna hulle kyk. Enige gesprekke tussen seuns en vaders sou heel moontlik oor oppervlakkige dinge handel, soos motors en sport. Kommunikasie met moeders was meestal oor vriende, die skool en planne vir vermaak, maar selde oor ernstiger sake. In baie gevalle was kommunikasie tussen vaders en dogters slegs tot skertsery of gekskeerdery met mekaar beperk.
Verkeersongelukke—Waarom?
’n Studie wat deur Brasilië se Departement van Vervoer gepubliseer is, toon dat ongeveer 90 persent van verkeersongelukke plaasvind omdat bestuurders foute maak of nalatig is. Volgens die verslag word bestuurders dikwels te selfversekerd wanneer hulle in goeie weer of op reguit hoofweë bestuur. Die verslag het ook aan die lig gebring dat motorongelukke wat deur slegte toestande op paaie en deur motordefekte veroorsaak word elke jaar tot 25 000 sterftes en 350 000 beserings in Brasilië lei.
Die oseane word beroof
“In ’n dolle wedloop om nuwe en potensieel winsgewende geneesmiddels te vind, neem ‘bioprospekteerders’ wat vir farmaseutiese firmas werk te veel organismes uit die see sonder enige benul van die gevolge”, sê die New Scientist. Volgens Mary Garson, ’n seebiochemikus aan die Universiteit van Queensland, Australië, word 98 persent van die monsters wat versamel word, weggegooi sonder ’n volledige ontleding. Vierhonderd-en-vyftig kilogram eikewurms en 2400 kilogram sponse het elk byvoorbeeld net een milligram van ’n kankerwerende middel opgelewer, 1600 kilogram seehase het tien milligram peptied voorsien wat vir die behandeling van melanome gebruik word en 847 kilogram bontpalinglewer was nodig om net 0,35 milligram cigua-gif vir navorsing af te skei. “Ons kan nie sommer net groot getalle van ’n organisme uit die see haal nie—hoe nuttig dit ook al is—tensy ons daarvan seker is dat ons dit nie uitwis nie”, het Mary Garson gesê.
Planeet toevallig ontdek
’n Kleinerige planeet is onlangs ontdek deur amateursterrekundige George Sallit van Bradfield, ’n dorpie in Engeland, met ’n teleskoop in sy tuinskuurtjie. “Dit was heel toevallig”, het hy erken. “Ek het ’n foto geneem, en toe ek dit van naderby beskou, het ek besef dat dit ’n planeet is wat stadig oor die raampie beweeg.” Sallit-Een, soos die nuwe planeet nou genoem word, is net omtrent 30 kilometer in deursnee en is sowat 600 miljoen kilometer van die aarde af. Sy wentelbaan is tussen Mars en Jupiter. Die teleskoop wat gebruik is, is ’n 30 sentimeter rekenaarbeheerde model wat R27 000 kos, maar wat toegerus is met sagteware wat ontwerp is vir gebruik op die Hubble-teleskoop, berig The Times van Londen. Daar kan duisende van hierdie kleiner planete, of asteroïede, in ons sonnestelsel wees.
’n Verrassing vir rysboere
Rysboere in Asië bespuit hulle oeste al jare lank baie deeglik in die vroeë deel van die seisoen om die larwes van bladrollermotte, wat die rysplante se blare in groot mate afvreet, dood te maak. Onlangse proefnemings toon egter dat die rysplante tot die helfte van hulle blare kan verloor sonder enige uitwerking op die hoeveelheid rys wat hulle voortbring. Sommige Viëtnamese boere is oorreed om die vroeë bespuiting uit te skakel—wat 30 tot 50 persent uitmaak van al die plaagdoders wat Asiatiese boere gebruik—en het gevind dat dit glad nie ’n nadelige uitwerking op die oeste gehad het nie.
Godsdiens en politiek onbelangrik
Volgens die koerant The Australian stel “die tipiese Australiese adolessent” nie werklik in die politiek of in godsdiens belang nie. Hierdie gevolgtrekking is gebaseer op ’n opname onder leerlinge van 13 en 16 jaar, wat gemaak is deur ’n lektrise aan die Universiteit van Sydney, dr. Jennifer Bowes. Die jongmense se voorkeure was in hierdie volgorde van belangrikheid: “om intieme vriende te hê, ’n goeie opvoeding te kry, ’n vaste werk te hê, my talente te ontwikkel, na aan my gesin te wees, die aarde vir toekomstige geslagte te bewaar, diere te beskerm, ’n mooi huis te hê, na ander lande te reis, baie geld te verdien, iets te doen om besoedeling stop te sit, te trou, diegene te help wat minder bevoorreg is, my land te help, iets nuttigs vir die gemeenskap te doen, ’n mate van invloed op ander mense uit te oefen”. Van die 18 waardes op die lys was die twee onbelangrikstes “om die beginsels van my godsdiens na te volg” en “om aan politiek deel te neem”.