Van ons lesers

Bedreigde planeet Ek skryf oor die reeks “Ons bedreigde planeet—Kan dit gered word?” (8 Januarie 1996). Dit is goed om iets bemoedigends te kan lees. Die derde artikel in die reeks gee ons hoop op die Paradys, waar ons ons nie oor die ekosisteem of gate in die osoonlaag sal hoef te bekommer nie! Ek hoop om saam met my familie en vriende in daardie Paradys te leef.

A. C., Verenigde State

Ons het gehou van die leersame venster op bladsye 8 en 9 wat gehandel het oor probleme soos ontbossing, waterskaarste en bedreigde spesies. Die artikels het ons laat besef in watter ernstige toestand ons planeet nou verkeer. Ons voel veilig in die wete dat ons Skepper die enigste oplossing vir hierdie ernstige probleem het.

O. P. en F. J. O., Spanje

Jessica se toespraak Ek het so pas die artikel “Jessica se toespraak” in die nommer van 8 Januarie 1996 klaar gelees. Dit het my werklik aangemoedig! Wanneer ek sien hoe ’n intelligente jongmens Jehovah so blymoedig en getrou dien, voel ek trots. Jessica se verhaal laat my dink aan die nodigheid om by elke geleentheid te getuig.

A. H., Verenigde State

’n Doel in die lewe Die artikel “Ek was rigtingloos, maar het ’n doel in die lewe gevind” (8 Januarie 1996) het werklik my hart geraak. Terwyl ek dit gelees het, het ek myself gesien. Ek het ook rigtingloos rondgeswerf en ’n sombere uitkyk op die toekoms gehad. Maar ek is na die Koninkryksaal van Jehovah se Getuies genooi en het die Bybel begin bestudeer. Nou neem ek met genoeë aan die voltydse predikingswerk deel en help ek ander om te leer van die wonderlike hoop wat Jehovah my gegee het.

C. R., Verenigde State

Behandeling vir onvrugbaarheid Die nuusbrokkie “Nuwe hoop vir onvrugbare paartjies?” in “Ons beskou die wêreld” het my aandag getrek (22 September 1995). Ek het dit vir ’n bioloog gewys, en sy het gesê dat sy nog nooit gehoor het van die tegniek wat beskryf is nie, waarvolgens die mikro-inspuiting van ’n enkele manlike sperm op ’n eiersel “binne die vrou” gedoen word.

E. K., Duitsland

Ons nuusbrokkie was gebaseer op ’n berig deur die Franse nuusagentskap France-Presse wat ’n lesing deur die Deense geneeskundige Anders Nyboe Andersen bespreek het. Ongelukkig is daar nie met juistheid oor sommige sake verslag gedoen nie. Dr. Andersen het vir “Ontwaak!” gesê dat die mikro-inseminasie in werklikheid in vitro gedoen word, dit wil sê buite die vrou se liggaam. Die bevrugte eiersel word dan in die vrou geplaas. Ons het tereg gesê dat die tegniek dit moontlik maak om “haar man se sperm [te] gebruik en nie dié van ’n naamlose skenker nie—dus word sensitiewe sedelike en godsdienstige kwessies uitgeskakel”. Aangesien dit die geval is, sal ’n Christenegpaar self moet besluit of hulle van hierdie tegniek gebruik sal maak. (Sien “Die Wagtoring” van 15 Augustus 1981, bladsy 31.)—RED.

Weerspannige vriendin Ek skryf oor die artikel “Jongmense vra . . . Wat moet ek doen as ’n vriend in die moeilikheid beland?” (22 Januarie 1996). Een van my beste vriendinne is ’n jaar gelede uitgesit. Ek was verbyster. Ek het gedink dat ek haar nie genoeg gehelp het nie, nie genoeg daar was vir haar nie en nie ’n baie goeie vriendin was nie. Toe ek gelees het dat dit nie my skuld is dat sy die waarheid verlaat het nie, het dit gevoel asof ’n groot las van my skouers afgeneem is!

L. T., Verenigde State

In my geval was die persoon na aan my wat “’n twyfelagtige lewe begin lei” het nie net my vriendin nie, maar my onvervangbare en saggeaarde moeder. Ek het uiteindelik na die gemeentelike ouer manne gegaan oor haar situasie, en sy is uitgesit. Ek het my verwyt dat ek die ouer manne vertel het. Nou wil ek teen my misplaaste skuldgevoelens stry deur die voorstelle in die artikel toe te pas.

I. Y., Japan