Maagdelikheid—Waarom?

“DIE maagdelikheidskultus”—dit is wat Randall Balmer, adjunk-professor van godsdiens aan die Barnard-kollege/Universiteit van Columbia, die skynbaar toenemende neiging onder tienderjariges noem om geslagsgemeenskap uit te stel tot hulle ouer is.

Dit is nie verbasend dat die aansporing tot seksuele onthouding in groot mate van godsdiensorganisasies kom nie. “Maar die dryfkrag agter die maagdelikheidskultus is sekulêr van aard en nie godsdienstig nie”, sê dr. Balmer. “Die eintlike motivering om ’n maagd te bly, is vrees—nie vrees vir Goddelike vergelding nie, maar vrees vir dodelike siektes.” Daarom stel hy “die Maagd Maria-kultus”, wat onthouding as ’n godsdiensideaal uitbeeld, teenoor die hedendaagse “maagdelikheidskultus”, wat onthouding merendeels om gesondheidsredes voorstaan.

“Die feit dat vrees vir siektes die dryfkrag agter sedelikheid is, is ’n droewige beskrywing van die toestand van godsdiens in die negentigerjare”, sê dr. Balmer voorts. “Godsdiensleiers, wat tog net nie aanstoot wil gee nie, het mense ’n kragtelose sedeleer, of glad geen sedeleer nie, voorgehou. En dit word dus aan die wetenskaplikes en openbare gesondheidsamptenare oorgelaat om adolessente raad te gee oor hoe hulle hulle seksuele lewe moet lei.”

Dit is egter nie die geval met ware Christene nie. Neem byvoorbeeld Chad, ’n tiener wat as een van Jehovah se Getuies grootgemaak word. Chad is deur ’n meisie genader wat ’n geselsie met hom aangeknoop het. Maar dit was gou duidelik dat sy nie net ’n geselsie in gedagte gehad het nie. “Toe het dit my getref”, sê Chad. “Ek kon Jehovah nie teleurstel nie. Toe ek daaraan dink dat ek Jehovah altyd wil behaag, het ek vir haar gesê dat ek moet gaan.”

Soos Chad handhaaf baie jongmense onder Jehovah se Getuies goeie sedes, nie net ter wille van goeie gesondheid nie, maar hoofsaaklik om hulle Skepper, Jehovah God, te behaag. Dit is nie vrees vir siektes wat die dryfkrag agter hulle sedelikheid is nie. Sulke jongmense volg eerder die raad van Prediker 12:1: “Dink aan jou Skepper in die dae van jou jonkheid.”