Van ons lesers
Geheue Ek wil graag my opregte dank uitspreek vir die artikel “Jy kan jou geheue verbeter” (8 April 1996). In die verlede het ek die name probeer onthou van al die lede van ons plaaslike gemeente van Jehovah se Getuies—maar sonder sukses. Dit het onlangs nog moeiliker geword toe die Wagtoringgenootskap my as ’n reisende bedienaar aangestel het. Hierdie artikel was ’n antwoord op my gebede! Nadat ek die wenke toegepas het wat daarin gegee is, kon ek die name van meer as die helfte van diegene onthou wat ek in agt verskillende gemeentes ontmoet het.
C. E. U., Nigerië
God gevind Baie dankie vir die artikel “God het hom deur ons laat vind” (22 Maart 1996). Terwyl ek dit gelees het, het my oë vol trane van vreugde geskiet vir Scott en Steve Davis. Hulle ondervinding het my meer vasbeslote gemaak om ’n loopbaan in die voltydse diens te begin wanneer ek met skool klaarmaak.
G. G., Italië
Nog nooit het ek ’n ondervinding gelees wat so wonderlik en so hartverblydend is soos hierdie een nie! Jehovah het sekerlik geglimlag toe hy hierdie twee jong manne sien wat so hard probeer om hom te dien. Hulle onselfsugtige diens aan God is baie prysenswaardig.
J. D., Verenigde State
Die verhaal van Scott en Steve se soeke na God was voorwaar besielend. Ek het ook in baie kerke na God gesoek maar was nooit tevrede nie. Ek wou God so graag behaag, maar het glad nie geweet hoe om dit te doen nie. Hoe dankbaar is ek tog dat Jehovah geweet het my hart smag na die waarheid! My diens aan Jehovah het my lewe gered en het my vrede besorg.
D. C., Verenigde State
Goddelike beskerming? Ek was die laaste ruk terneergedruk omdat ek gedink het dat Jehovah nie na my gebede luister nie. Maar die artikel “Die Bybelse beskouing: Kan ware Christene Goddelike beskerming verwag?” (8 April 1996) het my help verstaan dat God in ooreenstemming met sy voornemens optree en nie altyd volgens ons wense nie. Mag Jehovah julle seën terwyl julle voortgaan om artikels te skryf wat ons help om ons vertroue in hom te stel.
C. A. A., Brasilië
Gebruikte motors Dankie vir die artikel “Hoe om ’n gebruikte motor te koop” (8 April 1996). Ek en my man het onlangs ’n gebruikte motor gekoop. In die begin het dit taamlik goed geklink, maar ná twee weke het ons geluide begin hoor. Ná ses weke het die motor heeltemal onklaar geraak. As ons hierdie goeie inligting voor die tyd gehad het, sou ons moontlik nie ’n stukkende motor in ons oprit gehad het nie.
M. C., Verenigde State
As ’n professionele motortegnikus wil ek graag een punt byvoeg. Voordat jy ’n gebruikte motor koop, moet jy seker maak dat die nommers op die motor se bakwerk en die enjin ooreenstem met dié op die registrasievorm. As hulle verskil of as dit verwyder is, koop jy dalk ’n gesteelde motor!
M. V., Tsjeggiese Republiek
Dankie vir die nuttige wenk.—RED.
Rooklose tabak Dankie vir die artikel “Jongmense vra . . . Rooklose tabak—Is dit onskadelik?” (22 April 1996). Ek het nie eintlik die titel verstaan nie, en dit het my aangespoor om die artikel te lees. Selfs al het ek nog nie hierdie probleem in Togo teëgekom nie, het die artikel my gehelp om die soort probleme te verstaan waarmee ander in verskillende wêrelddele te doen het.
C. H., Togo
Ek geniet dit om al julle artikels te lees, maar hierdie een was die beste. Daar is jongmense hier wat rooklose tabak gebruik, maar hierdie artikel het teen die gevare daarvan gewaarsku. Ek gaan dit nooit gebruik nie.
P. H. W., Brasilië