Van ons lesers
’n Aardwye tuin Ek moet dankie sê vir die pragtige reeks “’n Aardwye tuin—’n Droom of ’n toekomstige werklikheid?” (8 April 1997). Ja, tuine en kleure kan ons gesondheid beïnvloed en ons vreugdevol maak. Ek het baie gehou van die deel met die titel “Die weg terug na die Paradys”. Daardie paar woorde was so bemoedigend—soos ’n uitnodiging wat lui: “Dit is die weg.” Wat ’n genot sal dit tog eendag wees om van sonop tot sononder te werk om die aarde in ’n paradys te help omskep! Aangesien ek daarvan hou om te skilder, te teken en kunshandwerk te doen, geniet ek ook al die kunswerk in die tydskrifte.
V. R., Australië
Ek wil julle graag prys vir die artikels. Ek het dit terdeë geniet. Ek is amper 80 jaar oud en hou nog daarvan om in my tuin te werk. My blomme en groente sal nou nie die eerste prys wen nie, maar ek geniet dit om buite te wees en daarmee te werk. Nadat ek die artikels gelees het, verstaan ek beter waarom mense daarvan hou om in die tuin te werk.
R. R., Verenigde State
Red ’n huwelik? Toe ek die artikel “Kan ’n huwelik ná ontrouheid gered word?” (8 April 1997) lees, was dit asof Jehovah vir my ’n brief gestuur het. Dit het presies beskryf wat ek ondervind het en hoe ek gevoel het. My man was ontrou, maar hy het opregte berou gehad. Soos die artikel gemeld het, het dit vir my gevoel of ek deur ’n orkaan getref is. Ek het besluit om hom te vergewe, maar ek was soms skaam oor my gedagtes. Die artikel het my help verstaan dat my reaksies heeltemal normaal en geregverdig was. Jehovah het ons pogings grootliks geseën, en ons huwelik is gered.
L. P., Frankryk
Hoewel my huwelik nie gered kon word nie, was hierdie artikel ’n ware seën omdat dit presies beskryf het hoe ek gevoel het. Ek kon my werklik met alles in die artikel vereenselwig. Ek weet ook van ander wat eweneens daarby baat gevind het. Baie vind dit moeilik om te verstaan hoe dit voel, en dus sal hierdie artikel ’n groot hulp wees om hulle insig hierin te gee.
M. C., Ierland
Ek is al nege jaar lank met ’n ongelowige getroud wat ook ’n ontroue huweliksmaat is. Maar toe ek die paragrawe onder die onderhofie “Kan die huwelik gered word?” gelees het, het ek baie beter gevoel. My man wil hê ons moet getroud bly, maar wil ook die ander verhouding voortsit. Ek is dus bly dat ek besluit het om dit te beëindig. Nou moet ek oor begin en ’n enkelmoeder wees.
M. S. B., Trinidad
Dankie vir die pragtige en gevoelvolle artikel. Dit het uitstekende raad bevat oor hoe om te bepaal of ’n versoening suksesvol sal wees. Ek het altyd aangeneem dat ek nooit my man sou kon vergewe as hy ontrou is nie. Ek besef nou dat dit nie altyd die regte oplossing is nie. Dit is jammer dat dit blykbaar ’n immer toenemende probleem is, maar dankie vir die skriftuurlike insig in hoe ons onsself kan help. My vertroue op Jehovah het my deur diep depressie gehelp en het my gehelp om die krag te vind om te vergewe, aangesien my man opreg berouvol was (en nog steeds is).
S. N., Verenigde State
Die dowes loof Jehovah Terwyl ek die artikel “Die dowes loof Jehovah” (8 April 1997) gelees het, het ek eers opgehou en na die prent gekyk van almal wat teenwoordig was. Hoe geloofversterkend was dit tog om soveel broers en susters te sien wat gebaretaal gebruik om Jehovah te loof! Ek is verskeie kere tot trane beweeg, aangesien ek vol waardering is vir hulle ywer, vasberadenheid en toegewydheid. Dankie vir sulke artikels.
R. H., Verenigde State